3 Caꞌ guca,

bzrin Judas naꞌ nen tu cueꞌ benneꞌ caꞌ dxjaque̱ꞌ wedil-la,

ne nen bal-la benneꞌ xraꞌaga we̱n zrin chee̱ xudauꞌ,

benneꞌ caꞌ gulesel-la benneꞌ xíchaje̱ caꞌ chee̱ bxruze caꞌ,

ne benneꞌ fariseo caꞌ.

Zaj nuꞌe̱ xaga,

ne xia caꞌ,

ne xiꞌ caꞌ,

ne xiꞌ xedxe.

4 Jesús ba nézene̱ꞌ ca da gaca chee̱ꞌ,

naꞌ chee̱ le̱ naꞌ bdxúaje̱ꞌ lau benneꞌ caꞌ,

naꞌ bche̱be̱ꞌ le̱ꞌ:

―¿Nuzra dxexílajle?

5 Belexeche̱be benneꞌ caꞌ:

―Jesús,

benneꞌ Nazaret.

Jesús beche̱be̱ꞌ:

―Nedaꞌ naꞌ.

Judas,

bénneaꞌ dxudée̱ꞌ Jesús lu naꞌ benneꞌ caꞌ zúaqueze̱ꞌ ládujla benneꞌ caꞌ.

6 Gate gunná Jesús:

Nedaꞌ naꞌ,

naꞌ benneꞌ caꞌ belexebigue̱ꞌ lau Jesús,

ne xeajlechazte̱ꞌ lu xu.

7 Nadxa Jesús bche̱be̱ꞌ benneꞌ caꞌ da xula:

―¿Nuzra dxexílajle?

Gulenná benneꞌ caꞌ:

―Jesús,

benneꞌ Nazaret.

8 Nadxa guzre Jesús benneꞌ caꞌ:

―Ba guchaꞌ leꞌe nedaꞌ naꞌ.

Che dxexílajle nedaꞌ,

le güe benneꞌ caní lataj cheajxaque̱ꞌ.

9 Ca guca da nigá guca li ca gunná Jesús,

gunné̱ꞌ:

“Benneꞌ caꞌ be̱nna Xraꞌ nedaꞌ,

netue̱ꞌ quebe bnitiaꞌ.”

10 Nadxa Simón Pedro,

ne nuꞌe̱ xia,

guléaje̱ꞌ na,

naꞌ guchugue̱ꞌ naga da zua xabe̱la chee̱ Malco,

we̱n zrin chee̱ bxruze blau.

11 Jesús guzre̱ꞌ Pedro:

―Begúꞌu xia chiuꞌ lu zre na.

Ca da ba nun Xraꞌ siꞌ sacaꞌ nedaꞌ,

¿quebe dxal-laꞌ sacaꞌ na?

12 Nadxa benneꞌ dxjaca wedil-la,

ne benneꞌ dxenná beꞌene̱ꞌ le̱ꞌ,

ne benneꞌ xraꞌaga we̱n zrin chee̱ judío caꞌ gule̱l-le̱ꞌ Jesús,

ne buluchéaje̱ꞌ Le̱ꞌ.

13 Nadxa guleché̱ꞌe̱ Jesús lizre Anás.

Anás nigá naque̱ꞌ xrtau zriꞌine Caifás,

bénneaꞌ naque̱ꞌ bxruze blau iza naꞌ.

14 Caifás nigá naque̱ꞌ bénneaꞌ guzre̱ꞌ judío blau caꞌ gácadxa chaweꞌ gate tuze benneꞌ waláz chee̱ xe̱zr la xu chee̱ꞌ.

15 Simón Pedro,

ne xetú benneꞌ caꞌ dxuse̱de Jesús zjaque̱ꞌ zeajnawe̱ꞌ Jesús.

Benneꞌ ljwezre Pedro nigá núnbea bxruze blau le̱ꞌ.

Caꞌan guca,

benneꞌ nigá guxúꞌule̱ne̱ꞌ Jesús chaleꞌaj lizre bxruze blau naꞌ.

16 Pedro begáꞌane̱ꞌ dxuꞌa dxa xuꞌu da zua chaleꞌaj naꞌ.

Chee̱ le̱ naꞌ bdxuaj bénneaꞌ núnbea bxruze blau le̱ꞌ,

naꞌ bchálajle̱ne̱ꞌ nuꞌula zua dxuꞌa dxa xuꞌu naꞌ,

naꞌ guluꞌe̱ Pedro chaleꞌaj naꞌ.

17 Nadxa nuꞌula naꞌ zua dxuꞌa dxa xuꞌu bche̱be̱ꞌ Pedro:

―¿Quebe nacuꞌ lueꞌ tuze nen benneꞌ Nazaret naꞌ?

Pedro beche̱be̱ꞌ:

―Quebe nacaꞌ.

18 Laweꞌ da dxun na zaga,

benneꞌ we̱n zrin caꞌ,

ne benneꞌ xraꞌaga we̱n zrin chee̱ bxruze caꞌ ba zaj nabeque̱ꞌ xiꞌ,

ne zaj ze̱ꞌ dxuꞌa xiꞌ naꞌ dxelexezréꞌene̱ꞌ.

Pedro ze̱ꞌ nen benneꞌ caꞌ,

dxexezréꞌene̱ꞌ dxuꞌa xiꞌ naꞌ.

19 Bxruze blau guzú lawe̱ꞌ dxuche̱be̱ꞌ Jesús nuca benneꞌ caꞌ zaj naque̱ꞌ benneꞌ dxusé̱dene̱ꞌ,

ne bi da dxusé̱dene̱ꞌ le̱ꞌ.

20 Jesús guzre̱ꞌ le̱ꞌ:

―Nedaꞌ ba bchálajquezaꞌ láwela xúgute̱ bénneache.

Bsé̱dequezaꞌ lu xuꞌu caꞌ,

ne lu xuꞌu naga dxelezraga xúgute̱ benneꞌ judío caꞌ.

Quebe bi bchálajaꞌ bagácheze.

21 ¿Bizr chee̱ naꞌ dxuche̱buꞌ nedaꞌ?

Bche̱be benneꞌ caꞌ ba belenne̱ꞌ chiaꞌ,

naꞌ le̱ꞌ xelenné̱ꞌ bi da bchálajle̱naꞌ le̱ꞌ.

Benneꞌ caꞌ zaj nézene̱ꞌ da ba gunnéaꞌ.

22 Gate gunná Jesús da nigá,

naꞌ tu benneꞌ xraꞌaga we̱n zrin chee̱ xudauꞌ,

benneꞌ ze̱ꞌ naꞌ,

gudape̱ꞌ xraga Jesús,

naꞌ gunné̱ꞌ:

―¿Caní dxexeche̱buꞌ lau bxruze blau nigá?

23 Jesús beche̱be̱ꞌ:

―Che gunnéaꞌ tu da cale̱la,

gunná ájala naca na.

Che da gunnéaꞌ naca na xrlátaje,

¿bizr chee̱ naꞌ dxuꞌu nedaꞌ?

24 Nadxa Anás gusél-le̱ꞌ Jesús,

zaj nadxéaj ne̱ꞌe̱,

lau Caifás,

bxruze blau.

25 Dxácate̱ naꞌ ze̱ Pedro dxuꞌa xiꞌ naꞌ dxexezréꞌene̱ꞌ,

naꞌ gulé̱ꞌe̱ le̱ꞌ:

―¿Quebe nacuꞌ lueꞌ tu benneꞌ caꞌ zaj naque̱ꞌ tuze nen bénneaꞌ?

Naꞌ Pedro gunné̱ꞌ:

―Quebe nacaꞌ.

26 Nadxa tu benneꞌ we̱n zrin chee̱ bxruze blau,

benneꞌ naque̱ꞌ xrtia bénneaꞌ guchugu Pedro nague̱ꞌ,

bche̱be̱ꞌ le̱ꞌ:

―¿Quegá bleꞌedaꞌ lueꞌ nen bénneaꞌ naga zaj ze̱ xaga olivo caꞌ?

27 Pedro gunné̱ꞌ xecha lasa:

―Quebe núnbeꞌa bénneaꞌ.

Laꞌ náꞌqueze gudxezre xjeaj.

28 Nadxa belexebéaje̱ꞌ Jesús lizre Caifás,

naꞌ guleché̱ꞌe̱ Le̱ꞌ xuꞌu lizre benneꞌ xuꞌu lu ne̱ꞌe̱ xe̱zr la xu naꞌ waláz chee̱ Roma.

Ba dxezú lau dxaníꞌsise̱ꞌ,

naꞌ benneꞌ judío caꞌ quebe guluꞌe̱ xuꞌu naꞌ chee̱ quebe xelexegáꞌane̱ꞌ sban,

laweꞌ da che xeluꞌe̱ naꞌ,

quebe gaca xelawe̱ꞌ xrcheꞌ chee̱ Laní Pascua.

29 Chee̱ le̱ naꞌ bdxuaj Pilato bchálajle̱ne̱ꞌ benneꞌ caꞌ,

naꞌ guzre̱ꞌ le̱ꞌ:

―¿Bizra da zria dxágule benneꞌ nigá?

30 Belexeche̱be benneꞌ caꞌ:

―Chela ca naque̱ꞌ tu benneꞌ we̱n da zrinnaj,

quebe gudentuꞌ le̱ꞌ lauꞌ.

31 Nadxa Pilato guzre̱ꞌ benneꞌ caꞌ:

―Le xeché̱ꞌe̱,

ne le guchiꞌa chee̱ꞌ cáte̱ze naca da nadxixruj bea chee̱le.

Belexeche̱be benneꞌ judío caꞌ:

―Netuꞌ,

benneꞌ judío,

quebe naca chee̱ntuꞌ nu gútentuꞌ.

32 Caꞌan guca,

guca li ca naca da ba gunná Jesús ca gatie̱ꞌ.

33 Pilato bexuꞌe̱ xuꞌu naꞌ,

naꞌ gunné̱ꞌ Jesús,

ne bche̱be̱ꞌ Le̱ꞌ:

―¿Nacuꞌ Lueꞌ Wenná Bea chee̱ judío caꞌ?

34 Jesús gunné̱ꞌ:

―¿Dxenabuꞌ da nigá lueꞌzqueze,

u laweꞌ da nu guzre lueꞌ ca naca chiaꞌ?

35 Pilato beche̱be̱ꞌ:

―¿Nacaꞌ nedaꞌ judío?

Benneꞌ xe̱zr la xu chiuꞌ,

ne benneꞌ xíchaje̱ caꞌ chee̱ bxruze caꞌ buludée̱ꞌ lueꞌ lawaꞌ nedaꞌ.

¿Bizra be̱nuꞌ?

36 Nadxa beche̱be Jesús:

―Naga dxenná beꞌa quebe naca na chee̱ xe̱zr la xu nigá.

Chela naca na chee̱ xe̱zr la xu nigá,

naꞌ benneꞌ caꞌ zaj naque̱ꞌ nedaꞌ tuze welásaqueze̱ꞌ chee̱ quebe teaꞌ nedaꞌ lu naꞌ benneꞌ judío caní.

Naga dxenná beꞌa quebe naca na nigá.

37 Nadxa guzre Pilato Jesús:

―¿Nacuꞌ Lueꞌ wenná bea?

Beche̱be Jesús:

―Nacaꞌ wenná bea,

cáte̱ze dxennáuꞌ lueꞌ.

Nedaꞌ gúlajaꞌ,

ne blaꞌa lu xe̱zr la xu nigá chee̱ nniaꞌ da li.

Xúgute̱ benneꞌ caꞌ dxelune̱ꞌ ca dxenná dizraꞌ chee̱ da li dxelenne̱ꞌ da dxennéaꞌ nedaꞌ.

38 Pilato gunné̱ꞌ:

―¿Bizra naꞌ da li?

Ca gudé bche̱be Pilato Jesús caní,

naꞌ bdxúaje̱ꞌ xetú.

Bchálajle̱ne̱ꞌ benneꞌ judío caꞌ,

naꞌ guzre̱ꞌ le̱ꞌ:

―Nedaꞌ quebe bi da cale̱la dxezreldaꞌ nun benneꞌ nigá.

39 Leꞌe zua tu da zéajle̱le.

Gusanaꞌ nedaꞌ tu benneꞌ xuꞌu lizre xia lu Laní Pascua nigá.

¿Dxaca lázrele gusanaꞌ wenná bea chee̱ judío caꞌ?

40 Nadxa xúgute̱ꞌ gulenné̱ꞌ zizraj:

―¡Quegá benneꞌ nigá!

¡Bsan Barrabás!

Barrabás naꞌ naque̱ꞌ gubán.