Jesús dxenabe̱ꞌ Dios xucáꞌana chawe̱ꞌe̱ benneꞌ caꞌ dxeléajle̱ꞌe̱ chee̱ꞌ
17
Ca gudé gunné̱ꞌ da nigá,
naꞌ Jesús gunné̱ꞌe̱ xabáa,
dxenné̱ꞌ:
―Xrae,
ba bzrin zra.
Bcaꞌana szren nedaꞌ,
Zriꞌinuꞌ,
chee̱ cáꞌanqueze nedaꞌ,
Zriꞌinuꞌ,
gucáꞌana szrenaꞌ Lueꞌ.
2 Lueꞌ ba be̱nnuꞌ nedaꞌ,
Zriꞌinuꞌ,
xel-laꞌ dxenná bea chee̱ nna beꞌedaꞌ xúgute̱ bénneache,
chee̱ gunézrujaꞌ xel-laꞌ nabán da zeajlí canna chee̱ xúgute̱ benneꞌ caꞌ be̱nnuꞌ nedaꞌ.
Jesús ora por sus seguidores (Juan 17.1-26)
3 Xel-laꞌ nabán da zeajlí canna naca na chee̱ xelúnbeꞌe̱ Lueꞌ,
nacuꞌ Dios tu lichaꞌ,
ne li lazreꞌ,
naꞌ chee̱ xelúnbeꞌe̱ nedaꞌ,
Jesucristo,
Bénneaꞌ gusel-luꞌ Lueꞌ.
4 ’Nedaꞌ ba bcaꞌana szrenaꞌ Lueꞌ lu xe̱zr la xu nigá,
ne ba bexuzre be̱naꞌ da bdxixruj beꞌenuꞌ nedaꞌ.
5 Naꞌa,
Xrae,
be̱nna nedaꞌ xel-laꞌ szren lau Lueꞌ,
da naca na xel-laꞌ szren naꞌ da guca na chiaꞌ naga zuꞌ Lueꞌ nédxudaute̱ gate za gataꞌ xe̱zr la xu nigá.
6 ’Benneꞌ caꞌ gucaꞌu Lueꞌ ládujla bénneache,
benneꞌ caꞌ be̱nnuꞌ nedaꞌ,
nedaꞌ ba bzéajniꞌidaꞌ le̱ꞌ Nu nacuꞌ Lueꞌ.
Gulaque̱ꞌ chiuꞌ,
naꞌ Lueꞌ be̱nnuꞌ nedaꞌ benneꞌ caꞌ,
naꞌ ba belune̱ꞌ ca dxenná xrtizruꞌ.
7 Naꞌa zaj nézene̱ꞌ xúgute̱ da be̱nnuꞌ nedaꞌ za na naga zuꞌ Lueꞌ.
8 Ba bnézrujaꞌ chee̱ benneꞌ caní dizraꞌ chiuꞌ da be̱nnuꞌ nedaꞌ,
naꞌ benneꞌ caní ba gulezíꞌ lu ne̱ꞌe̱ na.
Ba guleque béꞌene̱ꞌ da li nedaꞌ zaꞌa naga zuꞌ Lueꞌ,
ne ba guléajle̱ꞌe̱ chiuꞌ,
gusel-luꞌ nedaꞌ.
9 ’Nedaꞌ dxataꞌ xuedaꞌ Lueꞌ gaca chaweꞌ chee̱ benneꞌ caní.
Quebe dxataꞌ xuedaꞌ Lueꞌ ne̱ chee̱ benneꞌ caꞌ zaj naque̱ꞌ chee̱ xe̱zr la xu nigá.
Dxenabaꞌ Lueꞌ ne̱ chee̱ benneꞌ caꞌ be̱nnuꞌ nedaꞌ,
laweꞌ da zaj naque̱ꞌ chiuꞌ.
10 Xúgute̱ da naca chiaꞌ naca na chiuꞌ,
naꞌ da naca chiuꞌ naca na chiaꞌ nedaꞌ,
naꞌ xel-laꞌ szren chiaꞌ dxuléꞌe laweꞌ na ne̱ chee̱ benneꞌ caní.
11 ’Nedaꞌ québedxa suaꞌ lu xe̱zr la xu nigá,
san benneꞌ caní xelexegáꞌane̱ꞌ lu xe̱zr la xu nigá,
naꞌ nedaꞌ wezáꞌa nigá,
ne xedajxezúale̱quezaꞌ Lueꞌ.
Xrae Láꞌazxa,
lu xel-laꞌ dxenná bea chiuꞌ bxue benneꞌ caní,
benneꞌ caꞌ be̱nnuꞌ nedaꞌ,
chee̱ xelácaqueze̱ꞌ tuze ca nácadxu dxiꞌu tuze,
Lueꞌ ne nedaꞌ.
12 Gate ne zuaꞌ nedaꞌ lu xe̱zr la xu nigá,
bxuaꞌ benneꞌ caní nen xel-laꞌ dxenná bea chiuꞌ,
benneꞌ caní be̱nnuꞌ nedaꞌ,
ne bcache chawaꞌ le̱ꞌ.
Netú benneꞌ caní quebe gunite,
san tuze bénneaꞌ ba nanítequeze̱ꞌ,
naꞌ caní guca na chee̱ guca li ca naxúaj na lu xiche chiuꞌ.
13 ’Naꞌa ba zezáꞌa naga zuꞌ Lueꞌ.
Dxácate̱ ne zuaꞌ lu xe̱zr la xu nigá dxennéaꞌ da caní chee̱ xelápale̱ꞌe̱ benneꞌ caní xel-laꞌ dxebé ca da nápaquezaꞌ nedaꞌ.
14 Nedaꞌ bnézrujaꞌ benneꞌ caní dizraꞌ chiuꞌ.
Bénneache chee̱ xe̱zr la xu nigá dxelecuídene̱ꞌ benneꞌ caní laweꞌ da québedxa zaj naque̱ꞌ tuze nen benneꞌ caꞌ chee̱ xe̱zr la xu nigá,
ca naꞌ nedaꞌ quebe nacaꞌ tuze nen da naca chee̱ xe̱zr la xu nigá.
15 Quebe dxenabaꞌ Lueꞌ xecaꞌu benneꞌ caní lu xe̱zr la xu nigá.
Dxenabaꞌ guzrá chawuꞌ benneꞌ caní chee̱ quebe sequeꞌ da xriwe̱ꞌ bi gun na chee̱ꞌ le̱ꞌ.
16 Ca nedaꞌ quebe nacaꞌ chee̱ xe̱zr la xu nigá,
cáꞌanqueze benneꞌ caní quebe zaj naque̱ꞌ chee̱ xe̱zr la xu nigá.
17 Bzua benneꞌ caní chee̱ xelaque̱ꞌ cheé̱quezuꞌ Lueꞌ ne̱ chee̱ da li.
Dizraꞌ chiuꞌ naca na da li.
18 Ca gusel-luꞌ Lueꞌ nedaꞌ ládujla bénneache zaj naque̱ꞌ chee̱ xe̱zr la xu nigá,
cáꞌanqueze nedaꞌ dxusel-le̱ꞌ benneꞌ caní ládujla bénneache zaj naque̱ꞌ chee̱ xe̱zr la xu nigá.
19 Ne̱ chee̱ benneꞌ caní nuzúa cuinaꞌ cheé̱quezuꞌ Lueꞌ,
chee̱ cáꞌanqueze benneꞌ caní xelaque̱ꞌ cheé̱quezuꞌ Lueꞌ ne̱ chee̱ da li.
20 ’Dxataꞌ xuedaꞌ Lueꞌ,
quegaze chee̱ benneꞌ caní,
san cáꞌanqueze chee̱ benneꞌ caꞌ xeléajle̱ꞌe̱ chiaꞌ gate xelenne̱ꞌ da xuluchalaj benneꞌ caní.
21 Dxenabaꞌ Lueꞌ chee̱ xelaca xúgute̱ benneꞌ caní túzqueze,
ca Lueꞌ,
Xrae,
nácaquezuꞌ nedaꞌ tuze,
ne nedaꞌ nácaquezaꞌ Lueꞌ tuze,
ne chee̱ xelaca benneꞌ caní tuze nen dxiꞌu,
chee̱ xeléajle̱ bénneache zaj naca chee̱ xe̱zr la xu nigá Lueꞌ gusel-luꞌ nedaꞌ.
22 Nedaꞌ ba bnézrujaꞌ chee̱ benneꞌ caní xel-laꞌ szren naꞌ da be̱nnuꞌ nedaꞌ chee̱ xelaque̱ꞌ tuze ca nácaquezdxu tuze dxiꞌu.
23 Nedaꞌ súale̱naꞌ benneꞌ caní,
naꞌ Lueꞌ súale̱nuꞌ nedaꞌ,
chee̱ xelácaqueze benneꞌ caní tuze,
naꞌ caní xeleque beꞌe bénneache Lueꞌ gusel-luꞌ nedaꞌ,
ne nazríꞌinuꞌ benneꞌ caní cáte̱ze nazríꞌinuꞌ nedaꞌ.
24 ’Xrae,
Lueꞌ be̱nnuꞌ nedaꞌ benneꞌ caní,
naꞌ dxaca lazraꞌ xelezúale̱ne̱ꞌ nedaꞌ naga suaꞌ nedaꞌ,
chee̱ xeleléꞌene̱ꞌ xel-laꞌ szren da ba be̱nnuꞌ nedaꞌ,
laweꞌ da nazríꞌinuꞌ nedaꞌ nédxudaute̱ gate quebe ne gunuꞌ xe̱zr la xu nigá.
25 Xrae chaweꞌ,
benneꞌ zaj naque̱ꞌ chee̱ xe̱zr la xu nigá quebe zaj núnbeꞌe̱ Lueꞌ,
san nedaꞌ núnbeꞌa Lueꞌ,
naꞌ benneꞌ caní ba zaj nézene̱ꞌ Lueꞌ gusel-luꞌ nedaꞌ.
26 Nedaꞌ bzéajniꞌidaꞌ benneꞌ caní Nu nacuꞌ Lueꞌ,
ne zúaquezaꞌ dxuzéajniꞌidaꞌ le̱ꞌ chee̱ sua xel-laꞌ zriꞌi lazreꞌ dxéquenuꞌ Lueꞌ nedaꞌ lu xichaj lázrdau benneꞌ caní,
ne chee̱ súale̱ nédaꞌquezaꞌ le̱ꞌ.