16
Gunná Jesús:
―Dxapaꞌ leꞌe da caní chee̱ quebe gusán lázrele da naca chiaꞌ.
2 Welexebéaje̱ꞌ leꞌe lu xuꞌu naga dxelezrague̱ꞌ,
naꞌ zrin zra gate nútete̱ze benneꞌ gutie̱ꞌ leꞌe guéquene̱ꞌ gune̱ꞌ zrin chee̱ Dios.
3 Caní xelune̱ꞌ laweꞌ da quebe ne xelúnbeꞌe̱ Xraꞌ,
ne nedaꞌ.
4 Dxapaꞌ leꞌe da nigá chee̱ gate zrin zra naꞌ,
naꞌ cheajsá lázrele ba guchaꞌ leꞌe da nigá.
Da dxun Beꞌ Láꞌazxa
Nadxa gunná Jesús:
―Quebe guchaꞌ leꞌe da nigá nédxute̱ laweꞌ da zúale̱quezaꞌ leꞌe.
5 Naꞌa wexáꞌa cheajxezúale̱naꞌ Xraꞌ nasel-le̱ꞌ nedaꞌ,
naꞌ netule leꞌe quebe dxuché̱bele nedaꞌ ga chaꞌa.
Más enseñanza sobre el Espíritu Santo (Juan 16.5-33)
6 Dxewíꞌine lázrele laweꞌ da guchaꞌ leꞌe da caní.
7 Naꞌa dxapaꞌ leꞌe da li:
Cháweꞌdxa gaca chee̱le leꞌe che xexáꞌa nedaꞌ laweꞌ da che quebe xexáꞌa,
quebe xida Beꞌ Láꞌazxa xedajsúale̱ne̱ꞌ leꞌe,
Bénneaꞌ gácale̱ne̱ꞌ leꞌe.
Che xexáꞌa nedaꞌ,
sel-laꞌ Le̱ꞌ chee̱le.
8 Gate xida Le̱ꞌ,
naꞌ guléꞌene̱ꞌ bénneache zaj naque̱ꞌ benneꞌ dul-la,
ne quebe dxelune̱ꞌ da xrlátaje,
naꞌ Dios guzría xiꞌe̱ benneꞌ caní.
9 Zaj naque̱ꞌ benneꞌ dul-la laweꞌ da quebe dxeléajle̱ꞌe̱ chiaꞌ nedaꞌ.
10 Xeleque béꞌene̱ꞌ quebe dxelune̱ꞌ da xrlátaje laweꞌ da xexáꞌa nedaꞌ naga zua Xraꞌ,
naꞌ leꞌe québedxa léꞌele nedaꞌ.
11 Xeleque béꞌene̱ꞌ Dios guzría xiꞌe̱ le̱ꞌ laweꞌ da ba guchugue̱ꞌ chee̱ da xriwe̱ꞌ,
da naꞌ dxenná bea na lu xe̱zr la xu nigá.
12 ’Ne dé̱le̱ꞌe̱ da dxal-laꞌ xapaꞌ leꞌe,
san leꞌe quebe gaca chéajniꞌile na naꞌa.
13 Gate xida Beꞌ Láꞌazxa,
Bénneaꞌ dxuléꞌene̱ꞌ da li,
Le̱ꞌ guléꞌene̱ꞌ leꞌe ca naca xúgute̱ da li laweꞌ da quebe guchálaje̱ꞌ cheé̱zqueze̱ꞌ.
Wanné̱ꞌ xúgute̱ da xénene̱ꞌ,
naꞌ guzéajniꞌine̱ꞌ leꞌe ca da dxal-laꞌ gaca na.
14 Le̱ꞌ gucáꞌana szrene̱ꞌ nedaꞌ laweꞌ da waziꞌe̱ chee̱ da naca chiaꞌ nedaꞌ,
naꞌ guzéajniꞌine̱ꞌ na leꞌe.
15 Xúgute̱ da napa Xraꞌ,
cheé̱quezaꞌ naca na,
naꞌ chee̱ le̱ naꞌ gunnéaꞌ,
wazíꞌ Beꞌ Láꞌazxa da naca chiaꞌ,
naꞌ guzéajniꞌine̱ꞌ na leꞌe.
Xel-laꞌ dxelewíꞌine lazreꞌ chee̱ benneꞌ caꞌ xexaca na xel-laꞌ dxelebé
16 Gunná Jesús:
―Xetú chíꞌidauꞌ,
naꞌ leꞌe québedxa léꞌele nedaꞌ,
naꞌ xetú chiꞌi,
naꞌ xeléꞌele nedaꞌ laweꞌ da xexáꞌa nedaꞌ naga zua Xraꞌ.
17 Nadxa bal-la benneꞌ caꞌ dxuse̱de Jesús buluche̱be ljwezre̱ꞌ:
―¿Bizra zéaje̱ da nigá?
Dxe̱ꞌe̱ dxiꞌu,
xetú chíꞌidauꞌ québedxa léꞌedxu Le̱ꞌ,
naꞌ xetú chiꞌi,
naꞌ xeléꞌedxu Le̱ꞌ laweꞌ da xexíaje̱ꞌ naga zua Xre̱ꞌ.
18 ¿Bi zéaje̱ da naꞌ,
xetú chíꞌidauꞌ?
Quebe dxéajniꞌidxu bi chee̱ dxuchálaje̱ꞌ.
19 Guque beꞌe Jesús dxelaca lazre̱ꞌ xuluche̱be̱ꞌ Le̱ꞌ,
naꞌ guzre̱ꞌ benneꞌ caꞌ:
―Nedaꞌ guchaꞌ leꞌe,
xetú chíꞌidauꞌ québedxa léꞌele nedaꞌ,
naꞌ xetú chiꞌi,
naꞌ xeléꞌele nedaꞌ.
¿Da nigá naꞌ dxuche̱be ljwézrele?
20 Da li dxapaꞌ leꞌe,
wabézrele leꞌe,
ne xewiꞌine lázrele,
san bénneache chee̱ xe̱zr la xu nigá xelebene̱ꞌ.
Lácala leꞌe xewiꞌine lázrele,
xel-laꞌ dxewíꞌine lazreꞌ chee̱le xexaca na xel-laꞌ dxebé.
21 Gate tu nuꞌula zua sane̱ꞌ bidauꞌ zue̱ꞌ ste̱be laweꞌ da ba bzrin zra sua xel-laꞌ dxudía chee̱ꞌ.
Gate te galaj bidu naꞌ,
naꞌ québedxa dxeajsá lazre̱ꞌ da guzaque̱ꞌ laweꞌ da dxebéle̱ꞌe̱ne̱ꞌ chee̱ bidu naꞌ ba gúlajbeꞌ.
22 Cáꞌanqueze leꞌe zúale ste̱be naꞌa,
san nedaꞌ weláꞌquezaꞌ xedajxennáꞌa leꞌe,
naꞌ lu xichaj lázrdaule súate̱queze xel-laꞌ dxebé,
da naca na tu xel-laꞌ dxebé da quebe nu sequeꞌ cua.
23 ’Lu zra naꞌ québedxa bi guché̱bele nedaꞌ.
Da li dxapaꞌ leꞌe,
Xraꞌ gunne̱ꞌ leꞌe xúgute̱ da nábale lu Laꞌ nedaꞌ.
24 Nédxula quebe bi gunábale lu Laꞌ nedaꞌ.
Naꞌa le naba,
naꞌ siꞌle,
chee̱ súale̱ꞌe̱le xel-laꞌ dxebé.
Jesús guchuchuj guléaje̱ꞌ da dxaca lu xe̱zr la xu nigá
25 Gunná Jesús:
―Ba guchaꞌ leꞌe da caní nen dizraꞌ caꞌ da dxululéꞌe na.
Wazrín zra gate québedxa guchálajle̱naꞌ leꞌe da naca da dxuléꞌe na.
Guchálajle̱naꞌ leꞌe caníqueze da naca chee̱ Xraꞌ.
26 Lu zra naꞌ nábale Xraꞌ lu Laꞌ nedaꞌ,
naꞌ quebe dxennéaꞌ nedaꞌ gataꞌ xuedaꞌ Xraꞌ waláz chee̱le,
27 laweꞌ da Xráꞌqueze nazríꞌine̱ꞌ leꞌe.
Nazríꞌine̱ꞌ leꞌe laweꞌ da nazríꞌile leꞌe nedaꞌ,
ne dxéajle̱le chiaꞌ zaꞌa naga zua Dios.
28 Guzáꞌa lau Xraꞌ chee̱ blaꞌa lu xe̱zr la xu nigá chee̱ xexáꞌa naga zua Xraꞌ.
29 Nadxa benneꞌ caꞌ dxuse̱de Jesús gulé̱ꞌe̱ Le̱ꞌ:
―Naꞌa dxuchálajle̱nuꞌ netuꞌ caníqueze.
Quebe dxuchínenuꞌ dizraꞌ caꞌ da dxululéꞌe na.
30 Naꞌa dxeque béꞌentuꞌ nézenuꞌ xúgute̱ da caꞌ,
naꞌ quebe dxal-laꞌ nu guche̱be Lueꞌ.
Chee̱ le̱ naꞌ dxéajle̱ntuꞌ chiuꞌ zaꞌu naga zua Dios.
31 Jesús guzre̱ꞌ benneꞌ caꞌ:
―¿Dxéajle̱le chiaꞌ naꞌa?
32 Zaꞌ zra,
ne ba naca zra náꞌqueze gate leꞌe gase dínnajle caꞌale xrneza cha chee̱le,
naꞌ gucáꞌanale nedaꞌ tuzaꞌ.
Quebe zúaquezaꞌ tuzaꞌ laweꞌ da zúale̱ Xraꞌ nedaꞌ.
33 Dxapaꞌ leꞌe da nigá chee̱ gápale xel-laꞌ dxebeza zri lazreꞌ laweꞌ da nácale nedaꞌ tuze.
Lu xe̱zr la xu nigá dxun na ba xen si sácale.
Le gun chuchu lázrdaule,
laweꞌ da ba bchuchuj bléajaꞌ da dxaca lu xe̱zr la xu nigá.