Dxuchalaj Jesús ca gaca gate xrinnaj xudauꞌ
13
Gate bedxúaj Jesús lu xudauꞌ,
naꞌ tu benneꞌ dxusé̱dene̱ꞌ guzre̱ꞌ Le̱ꞌ:
―Benneꞌ Wese̱de,
gunnáꞌxque ca zren naca xudauꞌ,
ne xiaj xrtante̱ caní.
2 Beche̱be Jesús:
―¿Dxeléꞌenuꞌ naꞌa ca zren naca xudauꞌ nigá?
Québedxa xegáꞌana tu xiaj cuzru ljwezre nigá.
Ca naca xudauꞌ nigá wabía xíꞌqueze na.
Da xelunna bea na gate cheajsé̱ chee̱ xe̱zr la xu nigá
3 Nadxa xjaque̱ꞌ lu xiꞌa chee̱ xaga olivo caꞌ,
da zua na chaláꞌa ca li dxa xuꞌu xudauꞌ.
Gate dxeꞌ Jesús ga naꞌ,
naꞌ Pedro,
ne Jacobo,
ne Juan,
ne Andrés gulé̱ꞌe̱ Jesús le̱ze̱ꞌ:
4 ―Dxaca lázrentuꞌ guléꞌenuꞌ netuꞌ bata gaca caní.
¿Bizra da caꞌ xelunna bea na gaca xúgute̱ da caní?
5 Naꞌ beche̱be Jesús:
―Le gapa chiꞌi cuínale chee̱ quebe nu si xe̱ leꞌe,
6 laweꞌ da xeleláꞌ benneꞌ zante̱ xelún luꞌa nedaꞌ,
welenné̱ꞌ zaj naque̱ꞌ Cristo,
naꞌ welezí xe̱ꞌe̱ benneꞌ zante̱.
7 ’Leꞌe,
gate xénele gaca wedil-la,
ne ba dxaca wedil-la,
quebe zrébele.
Cáꞌqueze dxal-laꞌ gaca na,
san quegá ne zrin zra cheajsé̱ chee̱ na,
8 laweꞌ da xeledíl-lale̱ benneꞌ tu xe̱zr la xu benneꞌ xetú xe̱zr la xu,
naꞌ tu xe̱zre benneꞌ tíl-lale̱ na xetú xe̱zre.
Wazrúꞌ zánete̱ xe̱zre,
ne wataꞌ gubinaꞌ,
ne wadxéꞌe na zraga bénneache.
Da caní zaj naca na naga su lauze ca naca da xelezaca ziꞌ bénneache.
9 ’Le guxúe cuínale laweꞌ da xuludée̱ꞌ leꞌe lu naꞌ benneꞌ xuꞌu laweꞌ,
naꞌ xuluzalje̱ꞌ leꞌe lu xuꞌu naga dxulucáꞌana szrene̱ꞌ Dios.
Xuludée̱ꞌ leꞌe lau benneꞌ xuꞌu laweꞌ caꞌ,
ne lau benneꞌ dxelenná beꞌe̱ laweꞌ da nácale chiaꞌ nedaꞌ.
Gate caꞌan gaca,
naꞌ guchálajle chiaꞌ nedaꞌ lau benneꞌ caꞌ.
10 Nédxudxa ca zrin zra cheajsé̱ chee̱ na,
dizraꞌ chaweꞌ chiaꞌ gaca lban chee̱ na lau bénneache zaj zre̱ꞌe xúgute̱ xe̱zr la xu.
11 Gate xeleché̱ꞌe̱ leꞌe chee̱ xuludée̱ꞌ leꞌe lu naꞌ benneꞌ xuꞌu laweꞌ caꞌ,
quebe cueꞌle gunne xue bi nnale,
ne quebe quilaj lázrele ájala guchálajle.
Nne̱le ca da gunna Dios leꞌe zra naꞌ laweꞌ da quegá leꞌeze nne̱le,
san Beꞌ Láꞌazxa,
Le̱ꞌ nne̱ꞌ.
12 Ca xelún bénneache lu zra naꞌ,
xuludée̱ꞌ bi biche̱ꞌ caꞌ lu naꞌ benneꞌ xelútie̱ꞌ le̱beꞌ.
Cáꞌanqueze xelún xruze xrnaꞌ caꞌ,
xuludée̱ꞌ zríꞌinequeze̱ꞌ.
Naꞌ zríꞌine̱ꞌ caꞌ weledábagabeꞌ xruze xrnabeꞌ,
ne xelunbeꞌ xelátie̱ꞌ.
13 Xúgute̱ bénneache xelezré̱ꞌe̱ leꞌe laweꞌ da nácale chiaꞌ nedaꞌ.
Bénneaꞌ ze̱ tipe̱ꞌ ca zrindxa zra cheajsé̱ chee̱ na,
la bénneaꞌ.
14 ’Daniel,
bénneaꞌ bchálaje̱ꞌ waláz chee̱ Dios bzuaje̱ꞌ ca naca chee̱ da sban da guzría xi na.
Gate léꞌele leꞌe zria da nigá lataj láꞌazxa naga quebe dxal-laꞌ cuía na,
nadxa benneꞌ zaj zre̱ꞌe̱ xe̱zre caꞌ zaj nababa xe̱zr la xu Judea dxal-laꞌ xuluzrúnnuje̱ꞌ,
ne chjaque̱ꞌ lu xiꞌa zren.
(Benneꞌ dxulabe̱ꞌ da nigá dxal-laꞌ cheajníꞌine̱ꞌ da naca chee̱ na.)
15 Nu benneꞌ zria chjuꞌu lizre̱ꞌ lu zra naꞌ quebe dxal-laꞌ xexétaje̱ꞌ chee̱ bi xebéaje̱ꞌ lu xuꞌu.
16 Benneꞌ ze̱ le̱ꞌe̱ xixreꞌ quebe dxal-laꞌ xezrine̱ꞌ lizre̱ꞌ chee̱ xequé̱ꞌe̱ zra lane̱ꞌ.
Dxal-laꞌ xuluzrúnnujte̱ benneꞌ caní.
17 Baxacheꞌ xelaca nuꞌula zaj zue̱ꞌ ziꞌi,
ne nuꞌula caꞌ zaj nuxre̱ꞌ bidu dxeꞌene lu zra naꞌ.
18 Le naba lau Dios chee̱ quebe gaca beuꞌ zaga gate naꞌ dxal-laꞌ guzrúnnujle,
19 laweꞌ da xelezaca zidxa bénneache lu zra caꞌan ca da quebe ne xelezácate̱ꞌ,
gulala be̱n Xránadxu Dios xe̱zr la xu nigá,
ne québedxa xelezácadxe̱ꞌ caꞌ.
20 Che Xránadxu Dios quebe guzáchie̱ꞌ zra caꞌ,
québedxa nu láqueze̱ꞌ,
san ba bzachie̱ꞌ zra caꞌan laweꞌ da nazríꞌine̱ꞌ bi chee̱ꞌ caꞌ,
bi caꞌ ba gucáꞌa Le̱ꞌ.
21 ’Lu zra naꞌ,
che nu benneꞌ dxe̱ꞌe̱ leꞌe:
“Le naꞌ xque,
nigá zua Cristo”,
u che nne̱ꞌ:
“Le naꞌ xque,
naꞌ ze̱ꞌ”,
quebe chéajle̱le chee̱ꞌ.
22 Weleláꞌ benneꞌ xelezí xe̱ꞌe̱,
benneꞌ xelune̱ꞌ luꞌa Cristo,
ne xelune̱ꞌ luꞌa xel-la waca chee̱ xabáa chee̱ xelezí xe̱ꞌe̱ bi caꞌ ba gucáꞌa Dios che xelezéquene̱ꞌ.
23 Le sua leꞌe ban lazreꞌ.
Nedaꞌ ba guchaꞌ leꞌe xúgute̱ nédxute̱ ca gaca na.
Ca gaca gate xida Benneꞌ Gulje̱ꞌ Bénneache
24 Nadxa gunná Jesús:
―Lu zra caꞌ,
gate te zra chee̱ xel-la ziꞌ caní,
naꞌ chul-la gubizra,
ne québedxa guseníꞌ beuꞌ.
25 Belaj caꞌ xelexruj na zran xabáa,
naꞌ ca da zaj naláꞌ zaj ze̱ tipa zran xabáa welezrízete̱ na.
26 Ca nadxa xeleléꞌene̱ꞌ nedaꞌ,
Benneꞌ Gulje̱ꞌ Bénneache,
zaꞌa lu beuj bza,
napaꞌ xel-la waca zren,
ne da xabáa chiaꞌ.
27 Naꞌ la sél-lateaꞌ gubáz chee̱ xabáa chiaꞌ caꞌ chee̱ xuluchague̱ꞌ benneꞌ caꞌ gunníaꞌ,
benneꞌ zaj zre̱ꞌe̱ dapa saca chee̱ xe̱zr la xu nigá,
benneꞌ zituꞌ záꞌaca nila,
záꞌaca naꞌla.
28 ’Le guse̱de ca naca da dxuléꞌe na ca naca chee̱ xaga higo.
Gate naꞌ dxelexedxéꞌene zruze na,
ne záꞌaca xrlegue na,
naꞌ ba nézele za beuꞌ la.
29 Cáꞌanqueze,
gate naꞌ léꞌele ba dxelaca da caní,
nézele ba zua gáguze zra cheajsé̱ na,
ne gácate̱ na.
30 Da li dxapaꞌ leꞌe,
xúgute̱ da caní gaca na nédxudxa ca xelate bénneache zaj zre̱ꞌe̱ lu zra naꞌ.
31 Xabáa ne xe̱zr la xu nigá wadé chee̱ na.
Xrtizraꞌ nigá quebe te na caꞌanze,
san waca li na.
32 ’Ca naca chee̱ zra naꞌ,
ne chee̱ beuꞌ naꞌ quegá nu neze bata gaca na.
Quebe zaj neze gubáz chee̱ xabáa,
ne Zríꞌinequeze Dios quebe nézene̱ꞌ.
Tuze Xradxu Dios nézene̱ꞌ.
33 ’Chee̱ le̱ naꞌ,
le sua leꞌe ban lazreꞌ.
Le guxúe,
ne le guchálajle̱ Dios laweꞌ da quebe nézele bátala zrin zra naꞌ.
34 Gaca na ca guca chee̱ tu benneꞌ biu,
benneꞌ guzé̱ꞌe̱ zéaje̱ꞌ zituꞌ.
Gate naꞌ za dxúaje̱ꞌ xuꞌu,
naꞌ dxudée̱ꞌ da nape̱ꞌ lu naꞌ bi we̱n zrin chee̱ꞌ caꞌ,
ne dxunézruje̱ꞌ tu tubeꞌ zrin da xelunbeꞌ,
ne dxusebague̱ꞌ benneꞌ ze̱ꞌ dxa xuꞌu guxúe xánnie̱ꞌ.
35 Chee̱ le̱ naꞌ,
le sua leꞌe ban lazreꞌ laweꞌ da quebe nézele leꞌe bátala xeláꞌ xrane xuꞌu,
che dxe xrínneze,
che dxe̱la,
che ca cuezre xjeaj,
che che zílala,
36 ga gaze xelé̱ꞌe̱ chadí dute̱,
naꞌ cheajxraque̱ꞌ leꞌe dxásele.
37 Ca da dxenníaꞌ,
dxapaꞌ leꞌe,
dxapaꞌ xúgute̱ benneꞌ:
¡Le sua ban lazreꞌ!