Ca da guca gate bexúꞌu Jesús Jerusalén
21
Gate belezrín Jesús,
ne benneꞌ caꞌ dxusé̱dene̱ꞌ gagu naga zua xe̱zre Jerusalén,
ne ba belezrine̱ꞌ xe̱zre Betfagé,
da zua na gagu naga zua xiꞌa naga zaj daꞌ xaga olivo,
naꞌ Jesús gusel-le̱ꞌ chupa benneꞌ caꞌ dxusé̱dene̱ꞌ chee̱ tu da xelune̱ꞌ.
2 Dxe̱ꞌe̱ le̱ꞌ:
―Le chjaca xé̱zredu naꞌ da zua le nnaꞌ nigá.
Naꞌ léꞌele tu burro bzriseꞌ daꞌbaꞌ xaga,
naꞌ tu búrrodauꞌ zúale̱baꞌ le̱baꞌ.
Le se̱zre-baꞌ,
ne le che̱ꞌe̱ dxúpate̱baꞌ nigá.
3 Che nu benneꞌ bi xe̱ꞌe̱ leꞌe,
le xe̱ꞌe̱:
“Xránadxu nachinne̱ꞌ le̱baꞌ,
naꞌ la xesél-laꞌte̱queze̱ꞌ-baꞌ.”
4 Da nigá guca na chee̱ guxá ca da gunná benneꞌ bchálaje̱ꞌ waláz chee̱ Dios,
gunné̱ꞌ:
5 Le xe̱ benneꞌ zaj zraꞌ xe̱zre Sión:
“Le nnaꞌ,
Benneꞌ nna béꞌene̱ꞌ leꞌe ze̱ꞌe̱ naga zúale.
Dute̱ xel-laꞌ dxexruj lazreꞌ zrie̱ꞌ tu burro bzriseꞌ.
Zrie̱ꞌ tu búrrodauꞌ,
zriꞌine tu be̱ dxua xua.”
6 Nadxa dxupa benneꞌ caꞌ dxuse̱de Jesús besiáꞌque̱ꞌ,
ne belune̱ꞌ ca da ba gunná beꞌe Jesús le̱ꞌ.
7 Xeajlexríꞌe̱ burro bzriseꞌ,
ne zríꞌinebaꞌ,
naꞌ belezrúe̱ꞌ zra lane̱ꞌ cúzrubaꞌ,
naꞌ guzría Jesús le̱baꞌ.
8 Benneꞌ zan caꞌ gulechílaje̱ꞌ zra lane̱ꞌ la neza naꞌ,
naꞌ xebal-le̱ꞌ buluchibe̱ꞌ zinaꞌ da buluzale̱ꞌ la neza.
9 Benneꞌ zjaque̱ꞌ láwela,
ne benneꞌ záꞌaque̱ꞌ bze̱be gulezú lawe̱ꞌ dxelebezre xe̱ꞌe̱,
dxelenné̱ꞌ:
―¡Gaca ba láꞌazxa Zriꞌine wenná bea David!
¡Ba neza zrente̱ naca na chee̱ bénneaꞌ ze̱ꞌe̱ waláz chee̱ Xránadxu Dios!
¡Gaca ba láꞌazxa Dios!
10 Gate guxúꞌu Jesús xe̱zre Jerusalén,
ca naca bénneache zaj zre̱ꞌe̱ naꞌ beledxéꞌena zrague̱ꞌ,
naꞌ buluche̱be ljwezre̱ꞌ:
―¿Nuzra benneꞌ nigá?
11 Bal-la benneꞌ caꞌ gulenné̱ꞌ:
―Benneꞌ nigá naque̱ꞌ Jesús,
benneꞌ dxuchálaje̱ꞌ waláz chee̱ Dios,
ze̱ꞌe̱ xe̱zre Nazaret da nababa Galilea.
Jesús dxuchiꞌe̱ lu xudauꞌ
12 Ca gudé naꞌ guxúꞌu Jesús dxaleꞌaj xudauꞌ chee̱ Dios,
naꞌ bebéaje̱ꞌ xúgute̱ benneꞌ we̱te,
ne benneꞌ dxeláꞌawe̱ꞌ naꞌ.
Bdxixre̱ꞌ blag caꞌ chee̱ benneꞌ caꞌ dxuluché̱ꞌe̱ dumí,
ne bdxixre̱ꞌ da caꞌ zaj dxeꞌ benneꞌ caꞌ dxelútie̱ꞌ bgúgudu caꞌ.
13 Nadxa guzre̱ꞌ benneꞌ caꞌ:
―Lu xiche láꞌazxa naxúaj da dxenná Dios:
“Lizraꞌ nigá naca na xuꞌu naga xelenaba bénneache lawaꞌ nedaꞌ”,
san leꞌe ba nunle na ca tu lizre gubán.
14 Lu dxaleꞌaj xudauꞌ naꞌ gulebiga lau Jesús bal-la benneꞌ la chul-la,
ne benneꞌ zrinnaj caꞌ,
naꞌ Le̱ꞌ bexune̱ꞌ benneꞌ caꞌ.
15 Belezráꞌ benneꞌ xíchaje̱ caꞌ chee̱ bxruze caꞌ,
ne benneꞌ caꞌ dxuluxuzájle̱ꞌe̱ da nadxixruj bea Dios,
gate naꞌ belenne̱ꞌ ca dxelebezre xaꞌa bidu caꞌ lu xudauꞌ,
dxelennabeꞌ:
“¡Gaca ba láꞌazxa zriꞌine wenná bea David!”
16 Gulé̱ꞌe̱ Jesús:
―¿Dxennuꞌ ca dxelenná benneꞌ caní?
Beche̱be Jesús:
―Dxendaꞌ na.
¿Quebe ne gulábale leꞌe lu xiche láꞌazxa naga naxúaj na chee̱ da dxaca nigá?
Dxenná na caní:
Ba be̱nuꞌ xelúl-la bidu caꞌ,
ne bidu dxeꞌene caꞌ.
Da dxelúe láꞌanabeꞌ Dios naca na da li.
17 Nadxa bcaꞌana Jesús benneꞌ caꞌ.
Bezé̱ꞌe̱ xe̱zre naꞌ,
naꞌ bezrine̱ꞌ xe̱zre Betania,
naga bejgáꞌane̱ꞌ xe̱la naꞌ.
Jesús dxuguꞌe̱ deꞌ xaga higo
18 Che zílala ca zexíaj Jesús xe̱zre naꞌ,
naꞌ gudune̱ꞌ.
19 Zítuꞌla bléꞌene̱ꞌ tu xaga higo dxuꞌa neza,
naꞌ gate bzrine̱ꞌ naga zua na,
quebe bi da zixre chee̱ na bléꞌene̱ꞌ.
Lágaze zria na.
Nadxa Jesús guzre̱ꞌ xaga higo naꞌ:
―Cabataꞌ cuíaquezuꞌ da zixre.
Gubízrete̱ xaga higo naꞌ.
20 Ca beleléꞌe benneꞌ caꞌ dxuse̱de Jesús da nigá,
naꞌ belexebánene̱ꞌ,
ne buluche̱be̱ꞌ Jesús:
―¿Ájazra naꞌ chadite̱ gubizre xaga higo nigá?
21 Beche̱be Jesús:
―Da li dxapaꞌ leꞌe,
che nápale xel-laꞌ dxeajlí lazreꞌ,
ne quebe gun chupa lázrele,
quegaze da nigá gaca gunle ca da be̱naꞌ nedaꞌ chee̱ xaga higo nigá,
san waca xe̱le xiꞌa nigá:
Gucuasa nigá,
xeajsúa lu nísadauꞌ,
naꞌ gaca na.
22 Che dxeajlí lázrele,
naꞌ xeziꞌle bítete̱ze da nábale Dios.
Xel-laꞌ dxenná bea da xuꞌu lu naꞌ Jesús
23 Nadxa guxúꞌu Jesús lu chila xudauꞌ,
naꞌ dxácate̱ naꞌ dxusé̱dene̱ꞌ benneꞌ zaj zre̱ꞌe̱ naꞌ,
gulebiga naga zua Jesús benneꞌ xíchaje̱ caꞌ chee̱ bxruze caꞌ,
ne benneꞌ gula chee̱ judío caꞌ,
naꞌ buluche̱be̱ꞌ Le̱ꞌ:
―¿Bi xel-laꞌ dxenná bea napuꞌ dxunuꞌ da caní?
¿Núzraqueze be̱nna lueꞌ xel-laꞌ dxenná bea nigá?
24 Beche̱be Jesús:
―Cáꞌanqueze nedaꞌ guche̱baꞌ leꞌe tu.
Che xeché̱bele da nigá,
naꞌ nedaꞌ xapaꞌ leꞌe bi xel-laꞌ dxenná bea napaꞌ dxunaꞌ da caní.
25 ¿Nu benneꞌ gusel-le̱ꞌ Juan dxuchúe̱ꞌ bénneache nisa?
¿Dios,
che bénneacheze?
Gulezú lawe̱ꞌ dxuluchálajle̱ ljwezre̱ꞌ,
dxelenné̱ꞌ:
―Che nnadxu Dios gusel-le̱ꞌ le̱ꞌ,
naꞌ xe̱ꞌe̱ dxiꞌu:
“¿Bizr chee̱ naꞌ quebe guxéajle̱le chee̱ꞌ?”
26 Che nnadxu bénneache gusel-le̱ꞌ le̱ꞌ,
dxal-laꞌ zrébedxu bi xelún benneꞌ zan caꞌ chee̱dxu dxiꞌu,
laweꞌ da dxeleque xúgute̱ bénneache bchalaj Juan naꞌ waláz chee̱ Dios.
27 Chee̱ le̱ naꞌ gulé̱ꞌe̱ Jesús:
―Quebe nézentuꞌ.
Nadxa Jesús guzre̱ꞌ benneꞌ caꞌ:
―Cáꞌanqueze nedaꞌ quebe xapaꞌ leꞌe bi xel-laꞌ dxenná bea napaꞌ dxunaꞌ da caní.
Da dxuléꞌe na ca naca chee̱ chupa bi biu chee̱ tu benneꞌ
28 Naꞌ guzre Jesús benneꞌ caꞌ:
―¿Aja dxéquele leꞌe chee̱ da nigá?
Tu benneꞌ zaj zraꞌ chupa zríꞌine̱ꞌ bi biu,
naꞌ guzre̱ꞌ tubeꞌ:
“Zriꞌinaꞌ,
guxíaj xeajé̱n zrin lu lina chee̱ uva chiaꞌ.”
29 Zríꞌine̱ꞌ naꞌ beché̱bebeꞌ:
“Quebe dxaca lazraꞌ.”
Ca gudé naꞌ bexíaje lázrebeꞌ,
naꞌ guxíajbeꞌ xeajé̱nquezbeꞌ zrin.
30 Cáꞌanqueze xrabeꞌ naꞌ guxíaje̱ꞌ xeajné̱ꞌe̱ xetubeꞌ,
ne guzre̱ꞌ-beꞌ,
naꞌ bi nigá beché̱bebeꞌ:
“Waca,
xrae.
Naꞌa chaꞌa.”
Quebe guxíajbeꞌ.
31 ¿Núlabeꞌ bi chupa caní be̱nbeꞌ ca da guca lazreꞌ xrabeꞌ?
Gulenná benneꞌ caꞌ:
―Bi nedxu.
Naꞌ gunná Jesús,
dxe̱ꞌe̱ benneꞌ caꞌ:
―Da li dxapaꞌ leꞌe,
benneꞌ wechizruj caꞌ,
ne nuꞌula dxeledále̱ benneꞌ biu zante̱ xelexúꞌe̱ naga dxenná bea Dios nédxudxa ca leꞌe
32 laweꞌ da blaꞌ Juan,
bedajléꞌene̱ꞌ leꞌe da naca xrlátaje,
naꞌ leꞌe quebe guxéajle̱le chee̱ꞌ.
Benneꞌ wechizruj caꞌ,
ne nuꞌula caꞌ dxeledále̱ benneꞌ biu zante̱ guléajle̱ꞌe̱ chee̱ꞌ.
Leꞌe,
gate bleꞌele da nigá,
quebe bexíaje lázrele chee̱ chéajle̱le chee̱ꞌ.
Da dxuléꞌe na ca naca chee̱ benneꞌ we̱n zrin cale̱la caꞌ
33 Nadxa gunná Jesús:
―Le xene ca naca da nadxixruj bea nigá.
Tu benneꞌ xrane tu xe̱zr la xu guze̱ꞌ lba uva caꞌ,
ne be̱ne̱ꞌ leꞌaj chee̱ na.
Be̱ne̱ꞌ tu xe̱dxu naga xelesíe̱ꞌ uva caꞌ,
ne guchise̱ꞌ tu xuꞌu sibe chee̱ gaca nu guxúe ca naca na.
Naꞌ bcaꞌane̱ꞌ na lu naꞌ benneꞌ we̱n zrin caꞌ,
ne guzé̱ꞌe̱ zéaje̱ꞌ zituꞌ.
34 Gate bzrin zra xuluchibe̱ꞌ uva caꞌ,
naꞌ gusel-le̱ꞌ tu chupa bi we̱n zrin chee̱ꞌ zeajlexezriꞌbeꞌ da dxal-laꞌ xezíꞌ xrane naꞌ.
35 Benneꞌ we̱n zrin caꞌ gulequé̱ꞌe̱ bi we̱n zrin chee̱ꞌ caꞌ.
Belúele̱ꞌe̱ tubeꞌ,
ne belutie̱ꞌ xetubeꞌ,
naꞌ xetubeꞌ buluzríe̱ꞌ-beꞌ xiaj.
36 Nadxa xrane naꞌ gusél-ladxe̱ꞌ bi we̱n zrin chee̱ꞌ bi zandxa ca nedxu.
Benneꞌ we̱n zrin caꞌ tuz ca bulusaque̱ꞌ bi caꞌ.
37 Naga xeajchéꞌtequeze na gusel-le̱ꞌ zríꞌinequeze̱ꞌ laweꞌ da dxéquene̱ꞌ:
Welape̱ꞌ ba láꞌana zriꞌinaꞌ.
38 Gate beleléꞌene̱ꞌ zríꞌine̱ꞌ,
naꞌ benneꞌ we̱n zrin caꞌ gulé̱ ljwezre̱ꞌ:
“Bi nigá xezíꞌ lu naꞌbeꞌ ca naca da caní.
Du gute-beꞌ chee̱ xegáꞌana chee̱dxu da caní.”
39 Chee̱ le̱ naꞌ gule̱le̱ꞌ-beꞌ,
ne belexebéaje̱ꞌ-beꞌ lu xe̱zr la xu naꞌ,
naꞌ belutie̱ꞌ-beꞌ.
40 Nadxa Jesús bche̱be̱ꞌ benneꞌ caꞌ:
―Gate xida xrane xe̱zr la xu naꞌ,
¿ájazra gune̱ꞌ chee̱ benneꞌ we̱n zrin caꞌ?
41 Gulé̱ꞌe̱ Le̱ꞌ:
―Gutie̱ꞌ benneꞌ caꞌ dxelune̱ꞌ da cale̱la ne quebe xexache lazre̱ꞌ le̱ꞌ.
Nadxa gucáꞌanale̱ne̱ꞌ xe̱zr la xu naꞌ benneꞌ we̱n zrin xula,
benneꞌ xuluxunézruje̱ꞌ da dxal-laꞌ xezíꞌ le̱ꞌ gate zrin zra chee̱ na.
42 Nadxa Jesús guzre̱ꞌ benneꞌ caꞌ:
―¿Quebe ne gulábale leꞌe xiche láꞌazxa?
Caní dxenná na:
Xiaj naꞌ da buluzúa benneꞌ we̱n xuꞌu caꞌ chaláꞌala,
le̱ naꞌ naca na xiaj blau naꞌa.
Da nigá naca na da be̱n Xránadxu,
ne naca na tu da dxexebánedxu.
43 Chee̱ le̱ naꞌ dxapaꞌ leꞌe,
Dios wequé̱ꞌe̱ da naca chee̱le leꞌe naga dxenná beꞌe̱,
naꞌ gunézruje̱ꞌ na benneꞌ xelune̱ꞌ da naca chee̱ xel-laꞌ dxenná bea chee̱ Dios.
44 Che tu benneꞌ cheajchazie̱ꞌ laweꞌ xiaj nigá waxúzruje̱ꞌ,
naꞌ che xexruj na laweꞌ tu benneꞌ,
naꞌ guzuzruj na le̱ꞌ.
45 Gate benneꞌ xíchaje̱ caꞌ chee̱ bxruze caꞌ,
ne benneꞌ xudauꞌ fariseo caꞌ belenne̱ꞌ da bchalaj Jesús,
guleque béꞌene̱ꞌ chee̱ lé̱queze̱ꞌ bchalaj Jesús da caní.
46 Gate gulaca lazre̱ꞌ xele̱le̱ꞌ Le̱ꞌ,
belezrebe̱ꞌ benneꞌ xe̱zre caꞌ laweꞌ da dxeléajle̱ benneꞌ caꞌ naca Jesús benneꞌ dxuchálaje̱ꞌ waláz chee̱ Dios.