―¿Gazra bse̱de benneꞌ nigá ca nácate̱?

¿Bizra xel-la sina da nunezruj Le̱ꞌ,

ne xel-la waca zren caní da dxune̱ꞌ?

3 ¿Quegá benneꞌ nigá gubizre xaga,

zriꞌine María,

naꞌ benneꞌ biche̱ꞌ caꞌ zaj naque̱ꞌ Jacobo,

ne José,

ne Judas,

ne Simón,

naꞌ nuꞌula zane̱ꞌ caꞌ cáꞌanqueze zaj zrále̱ne̱ꞌ dxiꞌu?

Chee̱ le̱ naꞌ quebe guléajle̱ꞌe̱ chee̱ Jesús.

4 Naꞌ gunná Jesús,

dxe̱ꞌe̱ benneꞌ caꞌ:

―Xúgute̱ benneꞌ dxelape̱ꞌ ba láꞌana tu benneꞌ dxuchálaje̱ꞌ waláz chee̱ Dios,

san benneꞌ walázr chee̱ꞌ caꞌ,

ne benneꞌ xrtie̱ꞌ caꞌ,

ne benneꞌ zaj zre̱ꞌe̱ xuꞌu lizre̱ꞌ quebe dxelape̱ꞌ le̱ꞌ ba láꞌana.

5 Chee̱ le̱ naꞌ quebe be̱n Jesús lazrie̱ꞌ naꞌ netú xel-la waca zren.

Tuze bexune̱ꞌ bál-laze benneꞌ we̱ꞌ gate naꞌ guxrúa ne̱ꞌe̱ xichaj benneꞌ caꞌ.

6 Bebane Jesús laweꞌ da quebe guléajle̱ꞌe̱ chee̱ꞌ.

Ca gudé naꞌ bedé Jesús xecha lasa xé̱zredu caꞌ zaj nnita gáguze,

naꞌ bsé̱dene̱ꞌ benneꞌ zaj zre̱ꞌe̱ ga naꞌ.

7 Gunné̱ꞌ benneꞌ chazrinnu dxusé̱dene̱ꞌ,

ne guzú lawe̱ꞌ dxesel-le̱ꞌ le̱ꞌ chupa weaje̱ꞌ,

ne bnézruje̱ꞌ le̱ꞌ xel-la waca xulucuase̱ꞌ beꞌ xriwe̱ꞌ caꞌ lu be̱l-laꞌ dxen chee̱ bénneache caꞌ.

8 Gunná béꞌene̱ꞌ le̱ꞌ quebe bi xeluꞌe̱ chee̱ la neza,

con tuze xaga da xuluchiche̱ꞌ.

Quebe xeluꞌe̱ xixruj xeta,

ne xeta,

ne dumí.

9 Waca xululéaje̱ꞌ zrele̱ꞌ,

ne xelácue̱ꞌ tu cueze zra lane̱ꞌ.

10 Gunnadxa Jesús,

dxe̱ꞌe̱ benneꞌ caꞌ:

―Gate naꞌ chuꞌule leꞌe tu lu xuꞌu chee̱ benneꞌ,

waca xegáꞌanate̱le lizre bénneaꞌ ca zrindxa zra xezáꞌale lu xe̱zre naꞌ.

11 Che zrinle tu lu xe̱zre naga quebe xuluxé lawe̱ꞌ leꞌe,

ne quebe xelénene̱ꞌ chee̱le,

waca xezáꞌale,

naꞌ cuíbete̱le bxrte xu da dxedáꞌ níꞌale.

Da nigá gaca na tu da dxuléꞌe na zaj nabaga benneꞌ xe̱zre naꞌ zria,

benneꞌ dxeledábagaꞌ leꞌe.

Da li dxennéaꞌ,

lu zra guchiꞌa Dios chee̱ bénneache,

waxacheꞌ gácadxa da ba xaꞌ da xeledé benneꞌ xe̱zre Sodoma,

ne benneꞌ xe̱zre Gomorra quézcala da xeledé benneꞌ xe̱zre caꞌ naga quebe buluzé̱ nague̱ꞌ chee̱le.

12 Nadxa gusáꞌaca benneꞌ caꞌ dxuse̱de Jesús,

naꞌ buluchálajle̱ne̱ꞌ bénneache chee̱ xelexebíꞌi lazre̱ꞌ.

13 Cáꞌanqueze belexebéaje̱ꞌ zánete̱ beꞌ xriwe̱ꞌ caꞌ lu be̱l-laꞌ dxen chee̱ bénneache caꞌ,

naꞌ gulegüe̱ꞌe̱ da za zaneꞌ benneꞌ we̱ꞌ,

naꞌ belexexaque̱ꞌ.

14 Naꞌ ben wenná bea Herodes ca naca da zren caꞌ da dxun Jesús laweꞌ da guzé̱ dizraꞌ chee̱ꞌ.

Bal-la benneꞌ dxelenné̱ꞌ:

―Juan,

benneꞌ bchue̱ꞌ bénneache nisa,

bache bebane̱ꞌ ládujla benneꞌ gate,

naꞌ chee̱ le̱ naꞌ nape̱ꞌ xel-la waca zren nigá.

15 Benneꞌ xula dxelenné̱ꞌ:

―Elías,

bénneaꞌ bchálaje̱ꞌ waláz chee̱ Dios benneꞌ nigá.

Benneꞌ xula dxelenné̱ꞌ:

―Nácalje̱ꞌ bénneaꞌ dxal-laꞌ xeláꞌ guchálaje̱ꞌ waláz chee̱ Dios,

che nácalje̱ꞌ benneꞌ gulasa,

benneꞌ bchálaje̱ꞌ waláz chee̱ Dios.

16 Ca ben Herodes da caní,

naꞌ gunné̱ꞌ:

―Benneꞌ nigá naque̱ꞌ Juan,

bénneaꞌ gunná beꞌedaꞌ nedaꞌ gulechugue̱ꞌ xíchaje̱ꞌ.

Benneꞌ nigá ba bebane̱ꞌ ládujla benneꞌ gate.

17 Caní gunná Herodes laweꞌ da gunná beꞌe le̱ꞌ buluzúe̱ꞌ Juan naꞌ lizre xia,

ne buluchéaje̱ꞌ le̱ꞌ du xia,

da naꞌ be̱ne̱ꞌ laweꞌ da dxezráꞌa Herodías le̱ꞌ.

Herodías nigá guque̱ꞌ zruꞌula Felipe,

benneꞌ biche Herodes.

Herodes nigá bequé̱ꞌe̱ nuꞌulaꞌ chee̱ guque̱ꞌ zruꞌule̱ꞌ.

18 Gunná Juan,

dxe̱ꞌe̱ Herodes:

―Quebe dxal-laꞌ súale̱nuꞌ zruꞌula bi bichuꞌ.

19 Chee̱ le̱ naꞌ Herodías guzré̱ꞌe̱ Juan,

ne guca lazre̱ꞌ gútete̱ꞌ le̱ꞌ.

Quebe guca chee̱ꞌ

20 laweꞌ da neze Herodes naca Juan nigá tu benneꞌ xrlátaje,

ne benneꞌ naque̱ꞌ tuze nen Dios,

naꞌ bezrebe̱ꞌ le̱ꞌ.

Chee̱ le̱ naꞌ quebe be̱ꞌe̱ lataj Herodías naꞌ gútete̱ꞌ Juan nigá,

naꞌ lácala quebe guxéajniꞌine̱ꞌ ca naca xúgute̱ da bchalaj Juan,

Herodes nigá bze̱ nague̱ꞌ chee̱ꞌ du lazre̱ꞌ.

21 Herodías naꞌ bzrélene̱ꞌ ájala gune̱ꞌ ca da dxaca lazre̱ꞌ gate naꞌ guxúꞌu laní ca gula la Herodes.

Guléꞌaj gulagu benneꞌ xíchaje̱ caꞌ,

ne benneꞌ dxelenná beꞌe̱ lu wedil-la,

ne benneꞌ zaj naque̱ꞌ blau lu xe̱zre caꞌ zaj nababa Galilea.

22 Nadxa guxúꞌu bi nuꞌula chee̱ Herodías naꞌ lu xuꞌu naga dxeléꞌaj dxelawe̱ꞌ,

ne bxáꞌabeꞌ lau benneꞌ caꞌ.

Bezaca ba lazreꞌ Herodes ca bxáꞌabeꞌ,

ne tuze ca belún benneꞌ caꞌ zaj zraꞌ dxelawe̱ꞌ tu zren nen le̱ꞌ.

Gunná wenná bea Herodes,

dxe̱ꞌe̱ nuꞌula cuideꞌ nigá:

―Gunaba nedaꞌ ca da dxedánenuꞌ,

naꞌ gunnaꞌ na chiuꞌ.

23 Guche̱be lazreꞌ Herodes,

ne bzétaje̱ꞌ Dios gunézruje̱ꞌ bítete̱ze da nábabeꞌ,

lácala nábabeꞌ gáchajte̱ naga dxenná beꞌe̱ le̱ꞌ.

24 Nadxa nuꞌula cuideꞌ nigá bdxúajbeꞌ,

xeajchálajle̱beꞌ xrnabeꞌ,

gunabeꞌ:

―¿Bizra nabaꞌ?

Gunná xrnabeꞌ:

―Gunaba xichaj Juan,

bénneaꞌ bchue̱ꞌ bénneache nisa.

25 La guxuꞌute̱ nuꞌula cuideꞌ nigá naga zua wenná bea,

naꞌ gunabeꞌ,

dxe̱ꞌe̱beꞌ le̱ꞌ:

―Dxaca lazraꞌ gunnuꞌ nedaꞌ naꞌa tu lu xéꞌena xichaj Juan,

bénneaꞌ bchue̱ꞌ bénneache nisa.

26 Nadxa wenná bea nigá bewíꞌinele̱ꞌe̱,

ne laweꞌ da ba bzétaje̱ꞌ Dios,

naꞌ belénete̱ benneꞌ caꞌ da gunné̱ꞌ,

quebe guca lazre̱ꞌ guzrune̱ꞌ ca da gunaba bi nuꞌula nigá.

27 Chee̱ le̱ naꞌ gusel-la wenná bea tu benneꞌ dxeje̱ꞌ wedil-la,

ne gunná béꞌene̱ꞌ le̱ꞌ cheajxríꞌe̱ xichaj Juan naꞌ.

28 Guxíaj benneꞌ nigá lu xuꞌu lizre xia,

naꞌ bdxixre̱ꞌ xichaj Juan naꞌ,

ne bexuꞌe̱ na tu lu xéꞌena.

Bnézrujte̱ꞌ na bi nuꞌula naꞌ,

naꞌ le̱beꞌ bnézrujbeꞌ na xrnabeꞌ.

29 Gate gulénneze benneꞌ caꞌ da nigá,

benneꞌ caꞌ bse̱de Juan,

naꞌ xeajlexexríꞌe̱ be̱l-laꞌ dxen chee̱ꞌ,

naꞌ xeajlecáchete̱ꞌ na.

30 Ca gudé naꞌ belexezrín benneꞌ gubáz caꞌ chee̱ Jesús naga zua Le̱ꞌ,

ne buluzenne̱ꞌ Le̱ꞌ xúgute̱ ca da belune̱ꞌ,

ne ca da bulusé̱dene̱ꞌ benneꞌ caꞌ naga xjaque̱ꞌ.

31 Nadxa gunná Jesús,

dxe̱ꞌe̱ benneꞌ caꞌ:

―Le chuꞌu.

Chéajdxu xezíꞌ lázredxu chaditeꞌ naga xuꞌu lataj.

Gunné̱ꞌ caní laweꞌ da dxesáꞌaca benneꞌ dxesáꞌaca,

ne dxelexezrín benneꞌ dxelexezrín,

naꞌ quebe dxeluꞌe̱ lataj xelawe̱ꞌ.

32 Nadxa Jesús ne benneꞌ gubáz chee̱ꞌ caꞌ belexexúꞌe̱ le̱ze̱ꞌ tu lu da dxedá laweꞌ nísadauꞌ,

naꞌ belezrine̱ꞌ tu lataj naga quebe nu chiláꞌ benneꞌ.

33 Benneꞌ zan caꞌ beleléꞌene̱ꞌ ca zjaque̱ꞌ,

ne belexexúnbeꞌe̱ Jesús,

naꞌ gusáꞌaca chégüe̱ꞌ xjáꞌaque̱ꞌ naꞌ.

Benneꞌ xúgute̱ xe̱zre caꞌ belezrine̱ꞌ lataj naꞌ nédxudxa ca Jesús.

34 Gate bedxúaj Jesús lu da dxedá laweꞌ nísadauꞌ,

naꞌ bléꞌene̱ꞌ benneꞌ zante̱,

ne bexache lazre̱ꞌ le̱ꞌ laweꞌ da zaj zre̱ꞌe̱ ca zrilaꞌ caꞌ quebe zua benneꞌ dxuxúe̱ꞌ le̱baꞌ.

Naꞌ guzú lawe̱ꞌ dxusé̱dene̱ꞌ benneꞌ caꞌ da zante̱.

35 Ca gula guzréꞌ,

belezrín benneꞌ caꞌ dxuse̱de Jesús lau Le̱ꞌ,

naꞌ gulé̱ꞌe̱ Le̱ꞌ:

―Ba dxaca waxrinne,

naꞌ quegá nu lizre benneꞌ zua lataj nigá.

36 Besel-la benneꞌ caní chee̱ cheajxaque̱ꞌ xe̱zre caꞌ zaj nnita gálaze chee̱ xelezíꞌe̱ xeta xelawe̱ꞌ laweꞌ da quebe bi de̱ nigá da xelawe̱ꞌ.

37 Naꞌ gunná Jesús,

dxe̱ꞌe̱ le̱ꞌ:

―Le gunezruj leꞌe da xelawe̱ꞌ.

Naꞌ gulenné̱ꞌ,

dxelé̱ꞌe̱ Jesús:

―¿Waca chéajntuꞌ cheajgáꞌuntuꞌ xeta xtila,

quízrujntuꞌ lazruj chee̱ chupa gaxúa zra chee̱ gugágudxu benneꞌ zan caní?

38 Naꞌ gunná Jesús,

dxe̱ꞌe̱ le̱ꞌ:

―¿Bal-la xeta xtila nápale?

Le cheajnnáꞌ.

Ca gulenézene̱ꞌ,

naꞌ gulenné̱ꞌ,

dxelé̱ꞌe̱ Jesús:

―Gazxuꞌ xeta xtila,

ne chupa béladauꞌ.

39 Nadxa gunná beꞌe Jesús gulebéꞌe xúgute̱ bénneache caꞌ tu cueꞌ weaj lu xrguíe xaꞌa.

40 Naꞌ gulebéꞌe̱ tu cueꞌ weaj,

du tu gaxúe̱ꞌ,

du chi xune̱ꞌ.

41 Nadxa Jesús bé̱xrue̱ꞌ gazxuꞌ xeta xtila caꞌ,

ne da chupa béladauꞌ.

Naꞌ guchisa lawe̱ꞌ xabaala,

gunabe̱ꞌ lau Dios gun laꞌazxe̱ꞌ na,

naꞌ bzúzruje̱ꞌ xeta xtila caꞌ,

ne bnézruje̱ꞌ na benneꞌ caꞌ dxusé̱dene̱ꞌ chee̱ gulísie̱ꞌ na chee̱ benneꞌ caꞌ.

Cáꞌanqueze gudísie̱ꞌ da chupa béladauꞌ chee̱ xúgute̱ benneꞌ caꞌ.

42 Naꞌ gulagu xúgute̱ꞌ ne gulélajte̱ꞌ.

43 Nadxa buluxutube̱ꞌ ca da begáꞌana chee̱ xeta xtila,

ne chee̱ béladu caꞌ,

naꞌ guca chazrinnu xcuite xcaꞌa.

44 Benneꞌ caꞌ gulawe̱ꞌ xeta xtila caꞌ zaj naque̱ꞌ chi xun gaxúa benneꞌ biu.

45 La gunná béꞌete̱ Jesús benneꞌ caꞌ dxusé̱dene̱ꞌ guluꞌe̱ lu da dxedá laweꞌ nísadauꞌ chee̱ gulelague̱ꞌ nísadauꞌ naꞌ nédxudxa ca Le̱ꞌ,

chee̱ xelexezrine̱ꞌ lu xe̱zre Betsaida dxácate̱ Le̱ꞌ dxuzé̱ꞌ dizraꞌ bénneꞌ caꞌ.

46 Ca gudé bze̱ꞌ dizraꞌ benneꞌ caꞌ,

naꞌ guzé̱ꞌe̱ zéaje̱ꞌ lu xiꞌa zeajchálajle̱ne̱ꞌ Dios.

47 Gate gula guxrínnequeze,

ba zeaj da dxedá laweꞌ nísadauꞌ naꞌ gachaj laweꞌ nísadauꞌ,

naꞌ begáꞌana Jesús tuze̱ꞌ lu xu dxuꞌa nísadauꞌ.

48 Gate bléꞌene̱ꞌ ca dxelezraga lawe̱ꞌ dxulusé̱ꞌe̱ da dxedá laweꞌ nísadauꞌ laweꞌ da za beꞌ naꞌ,

dxuzríꞌi na da dxedá laweꞌ nísadauꞌ naꞌ,

naꞌ gula baláꞌ gubiga Jesús naga zaj zre̱ꞌe̱,

dxezé̱ꞌe̱ laweꞌ nísadauꞌ naꞌ,

ne guca lazre̱ꞌ tée̱ꞌ lau da dxedá laweꞌ nísadauꞌ naꞌ.

49 Gate beleléꞌene̱ꞌ Le̱ꞌ ze̱ꞌe̱ laweꞌ nísadauꞌ naꞌ,

guléquene̱ꞌ da dxedá dxe̱la,

naꞌ gulebezre xe̱ꞌe̱.

50 Beleléꞌe xúgute̱ꞌ ca dxezé̱ꞌe̱ laweꞌ nísadauꞌ,

naꞌ belezrébele̱ꞌe̱.

Naꞌ gunná Jesús,

dxe̱ꞌe̱ benneꞌ caꞌ dxusé̱dene̱ꞌ:

―Ga zrébele.

Nedaꞌ nigá.

Le gun chuchu lázrele.

51 Nadxa guluén Jesús lu da dxedá laweꞌ nísadauꞌ naga zaj zre̱ꞌe̱,

naꞌ guleza beꞌ naꞌ.

Naꞌ guleque zréajene̱ꞌ,

ne belexebánele̱ꞌe̱ne̱ꞌ,

52 laweꞌ da quebe ne xeléajniꞌine̱ꞌ ca naca xel-la waca zren da be̱ne̱ꞌ chee̱ xeta xtila caꞌ,

laweꞌ da ne dxun zideꞌ xichaj lázrdawe̱ꞌ.

53 Gate naꞌ gulelague̱ꞌ nísadauꞌ,

belezrine̱ꞌ lu xe̱zr la xu chee̱ benneꞌ xe̱zre Genesaret,

naꞌ buluchéaje̱ꞌ xaga da dxedá laweꞌ nísadauꞌ dxuꞌa nísadauꞌ naꞌ.

54 Ca beledxúaje̱ꞌ lu da dxedá laweꞌ nísadauꞌ,

la belexexúnbeate̱ bénneache caꞌ Jesús.

55 La gusáꞌaca chégute̱ꞌ zjaque̱ꞌ lu xe̱zre caꞌ xeajlexríꞌe̱ benneꞌ we̱ꞌ caꞌ tu tu lu taꞌa,

naꞌ zeajlegüé̱ꞌe̱ le̱ꞌ naga zaj nézene̱ꞌ xedé Jesús.

56 Gátete̱ze xé̱zredu caꞌ,

ne xe̱zre caꞌ,

ne le̱ꞌe̱ xixreꞌ naga dxedé Jesús,

naꞌ buluzúe̱ꞌ benneꞌ we̱ꞌ caꞌ du la neza,

ne gulataꞌ xuene̱ꞌ Jesús gunézruje̱ꞌ lataj cheajletaze̱ꞌ zra lane̱ꞌ,

naꞌ xúgute̱ benneꞌ caꞌ xeajleté̱ꞌ zra lane̱ꞌ belexexácate̱ꞌ.