Jesús dxugawe̱ꞌ chi xun gaxúa benneꞌ biu
6
Ca gudé naꞌ guxíaj Jesús xecha laꞌa dxuꞌa nísadauꞌ chee̱ Galilea,
da nazíqueze le na nísadauꞌ chee̱ Tiberias.
2 Benneꞌ zante̱ zjácale̱ne̱ꞌ Jesús laweꞌ da ba beleléꞌene̱ꞌ xel-laꞌ waca zren caꞌ da dxun Le̱ꞌ,
dxexune̱ꞌ benneꞌ we̱ꞌ caꞌ.
Jesús alimenta una multitud (Juan 6.1-15)
3 Nadxa Jesús guluéne̱ꞌ tu lu xiꞌa,
naꞌ gudxéꞌe̱ naꞌ nen benneꞌ caꞌ dxusé̱dene̱ꞌ.
4 Ba zua gagu Laní Pascua chee̱ judío caꞌ.
5 Gate bleꞌe Jesús benneꞌ zan caꞌ záꞌaque̱ꞌ zeaj nawe̱ꞌ Le̱ꞌ,
naꞌ guzre̱ꞌ Felipe:
―¿Gazra cheajxridxu da xelagu benneꞌ zan caní?
6 Gunná caní Jesús chee̱ laꞌ bi nna Felipe,
laweꞌ da ba neze Jesús ca da gune̱ꞌ.
7 Nadxa beche̱be Felipe:
―Che sidxu xeta xtila lazruj da sidxu chee̱ chupa gaxúa zra,
quebe gueque na xelezíꞌ benneꞌ caní lateꞌ weaj.
8 Nadxa Andrés,
xetú benneꞌ caꞌ dxuse̱de Jesús,
ne naque̱ꞌ bi biche Simón Pedro,
guzre̱ꞌ Jesús:
9 ―Ze̱ tu bi cuideꞌ nigá nápabeꞌ gazxuꞌ xeta xtila zruaꞌ cebada,
ne chupa bela.
¿Ájazra gun da nigá gueque na chee̱ xúgute̱ benneꞌ caní?
10 Nadxa gunná Jesús:
―Le xe̱ xúgute̱ꞌ xelebéꞌe̱.
Naca lu daca lataj naꞌ,
naꞌ gulebéꞌ ca du chi xun gaxúa benneꞌ biu.
11 Nadxa gucáꞌa Jesús xeta xtila caꞌ,
naꞌ ca gudé guzre̱ꞌ Dios “Xcalenuꞌ”,
bnézruje̱ꞌ na benneꞌ caꞌ dxusé̱dene̱ꞌ,
naꞌ benneꞌ caní gulísie̱ꞌ na láwele benneꞌ zan caꞌ zaj dxeꞌe̱ naꞌ.
Cáꞌanqueze be̱n Jesús chee̱ bela caꞌ,
naꞌ bnézruje̱ꞌ ca da gulaca lazreꞌ benneꞌ caꞌ.
12 Gate gulélaje benneꞌ caꞌ,
naꞌ Jesús guzre̱ꞌ benneꞌ caꞌ dxusé̱dene̱ꞌ:
―Le xutupa da bízrujdu caꞌ da dxelexegáꞌana na,
chee̱ quebe bi gaca dítaje.
13 Belexequé̱ꞌe̱ na,
naꞌ buluzré̱ꞌe̱ chazrinnu xcuite da bizruj caꞌ zaj nagáꞌana na chee̱ da gazxuꞌ xeta xtila zruaꞌ cebada caꞌ.
14 Nadxa benneꞌ zan caꞌ,
gate beleléꞌene̱ꞌ xel-laꞌ waca zren nigá da be̱n Jesús,
gulenné̱ꞌ:
―Da li benneꞌ nigá naque̱ꞌ bénneaꞌ guchálaje̱ꞌ waláz chee̱ Dios,
bénneaꞌ dxal-laꞌ le̱ꞌe̱.
15 Guque béꞌene̱ꞌ Jesús dxelaca lazre̱ꞌ xeleché̱ꞌe̱ Le̱ꞌ xadía chee̱ xuluzúe̱ꞌ Le̱ꞌ ca benneꞌ wenná bea,
naꞌ bezé̱ꞌe̱ naꞌ,
ne begüéne̱ꞌ lu xiꞌa sibe naꞌ chee̱ sue̱ꞌ le̱ze̱ꞌ.
Jesús dxedé̱ꞌ laweꞌ nísadauꞌ
16 Gate ba za xrinne,
benneꞌ caꞌ dxuse̱de Jesús belétaje̱ꞌ dxuꞌa nísadauꞌ,
Jesús camina sobre el agua (Juan 6.16-22)
17 naꞌ guluꞌe̱ lu da dxedá laweꞌ nísadauꞌ,
ne gulezú lawe̱ꞌ zjaque̱ꞌ xeledée̱ꞌ xechaláꞌa nísadauꞌ chee̱ xelezrine̱ꞌ xe̱zre Capernaum.
Ca guxrinne,
quebe ne xezrín Jesús naꞌ.
18 Nadxa guzú lau dxaca tu beꞌ bdunuꞌ laweꞌ nísadauꞌ naꞌ,
naꞌ xeajxruza chee̱ nísadauꞌ naꞌ guxásale̱ꞌe̱ na.
19 Gate ba guledée̱ꞌ lu nísadauꞌ naꞌ catite sadxu tu chiꞌi zren,
naꞌ beleléꞌene̱ꞌ Jesús ba dxezrine̱ꞌ naga ziaj da dxedá laweꞌ nísadauꞌ,
dxezé̱ꞌe̱ laweꞌ nísadauꞌ,
naꞌ belezrebe̱ꞌ.
20 Nadxa Jesús guzre̱ꞌ benneꞌ caꞌ:
―Nedaꞌ naꞌ.
Quebe zrébele.
21 Nadxa lu dute̱ xel-laꞌ dxelebé gulezíꞌ lu ne̱ꞌe̱ Le̱ꞌ lu da dxedá laweꞌ nísadauꞌ naꞌ,
naꞌ chadite̱ belezrine̱ꞌ lu xe̱zr la xu naga zjaque̱ꞌ.
Benneꞌ zan caꞌ dxelexílaje̱ꞌ Jesús
22 Zra xula benneꞌ zan caꞌ,
benneꞌ belexegáꞌana xecha laꞌa nísadauꞌ,
guleque béꞌene̱ꞌ ba zeajxaca benneꞌ caꞌ dxuse̱de Jesús lu da dxedá laweꞌ nísadauꞌ tu lichaꞌ da dxeꞌ chaláꞌa naꞌ,
naꞌ Jesús quebe guxíajle̱ne̱ꞌ benneꞌ caꞌ.
El pan de vida (Juan 6.22-71)
23 Dxácate̱ naꞌ xezícala da dxeledá laweꞌ nísadauꞌ,
da caꞌ beledxúaj na xe̱zre Tiberias,
belezrín na tu lataj da zua gáguze naga gulawe̱ꞌ xeta xtila naꞌ ca gudé guzre Xránadxu Dios:
“Xcalenuꞌ.”
24 Chee̱ le̱ naꞌ gate benneꞌ zan caꞌ guleque béꞌene̱ꞌ québedxa zua Jesús naꞌ,
ne cáꞌanqueze benneꞌ caꞌ dxusé̱dene̱ꞌ,
naꞌ guluꞌe̱ lu da dxeledá laweꞌ nísadauꞌ,
ne xjaque̱ꞌ xe̱zre Capernaum zeajlexedílaje̱ꞌ Jesús.
Jesús naque̱ꞌ xeta xtila da dxunna na xel-laꞌ nabán li lazreꞌ
25 Gate benneꞌ zan caꞌ belezrine̱ꞌ xecha laꞌa dxuꞌa nísadauꞌ,
naꞌ belexezrague̱ꞌ Jesús,
ne buluche̱be̱ꞌ Le̱ꞌ:
―Benneꞌ Wese̱de,
¿bata blaꞌu nigá?
26 Jesús guzre̱ꞌ benneꞌ caꞌ:
―Da li dxapaꞌ leꞌe,
dxexílajle leꞌe nedaꞌ laweꞌ da gudágule,
ne béljele,
ne quegá laweꞌ da bleꞌele xel-laꞌ waca caꞌ da bleꞌedaꞌ leꞌe.
27 Quebe cueꞌle gunne xue sile da gágule da te chee̱ na.
Le cueꞌ gunne xue sile da gágule da zeajlí canna,
da naꞌ gunna na leꞌe xel-laꞌ nabán da zeajlí canna.
Da nigá naca na xel-laꞌ wagu da gunnaꞌ nedaꞌ,
Benneꞌ Gulje̱ꞌ Bénneache,
leꞌe,
laweꞌ da bzua Xraꞌ Dios nen nedaꞌ da dxunna bea na nacaꞌ Zríꞌine̱ꞌ.
28 Nadxa buluche̱be̱ꞌ Le̱ꞌ:
―¿Bi dxal-laꞌ guntuꞌ chee̱ gaca ca da dxaca lazreꞌ Dios guntuꞌ?
29 Jesús beche̱be̱ꞌ:
―Da dxaca lazreꞌ Dios gunle naca na chéajle̱le chiaꞌ nedaꞌ,
nacaꞌ Bénneaꞌ gusel-la Dios.
30 Nadxa buluche̱be̱ꞌ Le̱ꞌ:
―¿Bizra xel-laꞌ waca gunuꞌ chee̱ leꞌentuꞌ na,
naꞌ chéajle̱ntu chiuꞌ?
¿Bizra dxunuꞌ?
31 Xra xrtauntuꞌ caꞌ gulawe̱ꞌ xeta maná le̱ꞌe̱ xixreꞌ laweꞌ lataj,
ca naxúaj na lu xiche chee̱ Dios,
dxenná na:
Dios bgawe̱ꞌ benneꞌ caꞌ xeta xtila da za xabáa.
32 Beche̱be Jesús:
―Da li dxapaꞌ leꞌe,
quegá Moisés naꞌ bnézruje̱ꞌ benneꞌ caꞌ xeta xtila da za xabáa.
Dios,
Xraꞌ,
dxunne̱ꞌ leꞌe xeta xtila da za xabáa da naca na li lazreꞌ.
33 Xeta xtila naꞌ da dxunna Dios leꞌe naca na Bénneaꞌ bétaje̱ꞌ xabáa,
ne dxunézruje̱ꞌ chee̱ bénneache xel-laꞌ nabán li lazreꞌ.
34 Nadxa benneꞌ caꞌ gulé̱ꞌe̱ Le̱ꞌ:
―Xran,
tu bé̱nnazqueze chee̱ntuꞌ xeta xtila caní.
35 Jesús guzre̱ꞌ benneꞌ caꞌ:
―Nedaꞌ nacaꞌ xeta xtila da dxunna na xel-laꞌ nabán li lazreꞌ.
Benneꞌ xide̱ꞌ naga zuaꞌ nedaꞌ cabátadxa tune̱ꞌ,
naꞌ benneꞌ chéajle̱ꞌe̱ chiaꞌ cabátadxa bílene̱ꞌ.
36 Naca na ca ba guchaꞌ leꞌe.
Leꞌe naꞌ quebe dxéajle̱le chiaꞌ,
lácala ba bleꞌele nedaꞌ.
37 Xúgute̱ benneꞌ caꞌ dxunna Xraꞌ nedaꞌ,
xelelé̱ꞌe̱ lawaꞌ,
naꞌ benneꞌ caꞌ xelelé̱ꞌe̱ naga zuaꞌ,
quebe guzúaꞌ benneꞌ caꞌ chaláꞌala.
38 Nedaꞌ guzáꞌa xabáa,
quegá chee̱ gunaꞌ ca dxaca lázrequezaꞌ nedaꞌ.
Blaꞌa chee̱ gunaꞌ ca da dxaca lazreꞌ Xraꞌ,
gusel-le̱ꞌ nedaꞌ.
39 Da dxaca lazreꞌ Xraꞌ,
nasel-le̱ꞌ nedaꞌ,
naca na chee̱ quebe gunitiaꞌ netú benneꞌ caꞌ ba be̱nne̱ꞌ chiaꞌ.
Nacan chee̱ gusebanaꞌ benneꞌ caꞌ lu zra bze̱be.
40 Da dxaca lazreꞌ Xraꞌ,
nasel-le̱ꞌ nedaꞌ,
naca na chee̱ xelapa bénneache xel-laꞌ nabán da zeajlí canna,
xúgute̱ benneꞌ caꞌ xelenné̱ꞌe̱ nedaꞌ,
Zriꞌine Dios,
ne xeléajle̱ꞌe̱ chiaꞌ nedaꞌ,
naꞌ chee̱ gusebanaꞌ nedaꞌ benneꞌ caꞌ lu zra bze̱be naꞌ.
41 Gate belenne̱ꞌ da nigá,
naꞌ judío caꞌ gulezú lawe̱ꞌ dxelezí tizre̱ꞌ Jesús laweꞌ da gunné̱ꞌ:
“Nedaꞌ nacaꞌ xeta xtila da betaj xabáa.”
42 Nadxa gulenné̱ꞌ:
―¿Quegá benneꞌ nigá zriꞌine José?
Dxiꞌu núnbeadxu xra xrne̱ꞌe̱.
¿Bizr chee̱ naꞌ dxenné̱ꞌ bétaje̱ꞌ xabáa?
43 Nadxa Jesús guzre̱ꞌ benneꞌ caꞌ:
―Québedxa si tízrale.
44 Quebe nu benneꞌ gaca xide̱ꞌ naga zuaꞌ nedaꞌ,
che quebe xedajgúa Xraꞌ nasel-le̱ꞌ nedaꞌ bénneaꞌ,
naꞌ nedaꞌ gusebanaꞌ bénneaꞌ lu zra bze̱be naꞌ.
45 Lu xiche caꞌ naga naxúaj da gulenná benneꞌ caꞌ buluchalaje̱ꞌ waláz chee̱ Dios,
dxenná na:
Dios gusé̱dene̱ꞌ xúgute̱ bénneache.
Caꞌ gaca na,
xúgute̱ benneꞌ caꞌ dxuluzé̱ nague̱ꞌ ca da dxuse̱de Xraꞌ,
dxelelé̱ꞌe̱ naga zuaꞌ.
46 ’Quebe ne leꞌe nu benneꞌ Xraꞌ.
Benneꞌ tu lichaꞌ,
bénneaꞌ bléꞌene̱ꞌ Le̱ꞌ,
naca bénneaꞌ guzé̱ꞌe̱ naga zua Dios.
47 Da li dxapaꞌ leꞌe,
nu benneꞌ dxéajle̱ꞌe̱ chiaꞌ nedaꞌ nape̱ꞌ xel-laꞌ nabán da zeajlí canna.
48 Nedaꞌ nacaꞌ xeta xtila da dxunna na xel-laꞌ nabán li lazreꞌ.
49 Xra xrtáule caꞌ gulawe̱ꞌ xeta maná le̱ꞌe̱ xixreꞌ laweꞌ lataj,
naꞌ gudé naꞌ xúgute̱ benneꞌ caꞌ gulatie̱ꞌ.
50 Xeta xtila nigá naca na da za xabáa,
naꞌ che nu benneꞌ gawe̱ꞌ na,
quebe gatie̱ꞌ tu chiꞌize.
51 Nédaꞌquezaꞌ nacaꞌ xeta xtila da dxunna na xel-laꞌ nabán da za xabáa.
Benneꞌ gawe̱ꞌ xeta xtila nigá waca bánqueze̱ꞌ chadía chacanna.
Xeta xtila naꞌ da dxunnaꞌ nedaꞌ naca na be̱laꞌ dxen cheé̱zquezaꞌ,
da gunnaꞌ chee̱ xelaca bánqueze bénneache.
52 Nadxa benneꞌ judío caꞌ gulezú lawe̱ꞌ dxuluche̱be ljwezre̱ꞌ,
dxelenné̱ꞌ:
―¿Ájazra gun benneꞌ nigá,
gunne̱ꞌ dxiꞌu be̱laꞌ dxen cheé̱zqueze̱ꞌ chee̱ gágudxu na?
53 Jesús guzre̱ꞌ benneꞌ caꞌ:
―Da li dxapaꞌ leꞌe,
che leꞌe quebe gágule be̱laꞌ dxen chiaꞌ nedaꞌ,
Benneꞌ Gulje̱ꞌ Bénneache,
ne che quebe xíꞌajle dxen chiaꞌ,
quebe gápale xel-laꞌ nabán li lazreꞌ.
54 Benneꞌ dxawe̱ꞌ be̱laꞌ dxen chiaꞌ,
ne dxíꞌaje̱ꞌ dxen chiaꞌ nape̱ꞌ xel-laꞌ nabán da zeajlí canna,
naꞌ nedaꞌ gusebanaꞌ bénneaꞌ lu zra bze̱be naꞌ.
55 Be̱laꞌ dxen chiaꞌ naca na xel-laꞌ wagu li lazreꞌ chee̱ bénneꞌdu xuꞌule,
naꞌ dxen chiaꞌ naca na da xeleꞌaj bénneache da naca na li lazreꞌ.
56 Benneꞌ dxawe̱ꞌ be̱laꞌ dxen chiaꞌ,
ne dxíꞌaje̱ꞌ dxen chiaꞌ,
naque̱ꞌ nedaꞌ tuze,
naꞌ nédaꞌquezaꞌ nacaꞌ bénneaꞌ tuze.
57 Xraꞌ nasel-le̱ꞌ nedaꞌ xuꞌu lu ne̱ꞌe̱ xel-laꞌ nabán li lazreꞌ,
naꞌ nedaꞌ naca banaꞌ ne̱ chee̱ Le̱ꞌ.
Cáꞌanqueze bénneaꞌ dxawe̱ꞌ da naca chiaꞌ nedaꞌ gaca bánqueze̱ꞌ ne̱ chiaꞌ nedaꞌ.
58 Da nigá naca na xeta xtila da za xabáa.
Xeta xtila nigá quebe naca na ca xeta maná da gulagu xra xrtáule caꞌ,
naꞌ gudé naꞌ gulate xúgute̱ꞌ.
Benneꞌ dxawe̱ꞌ xeta xtila nigá waca bánqueze̱ꞌ chadía chacanna.
59 Bse̱de Jesús ca naca da caní naga zaj zraꞌ benneꞌ zan caꞌ lu xuꞌu naga dxelezraga bénneache chee̱ xe̱zre Capernaum.
Ca naca dizraꞌ naꞌ da dxunna na xel-laꞌ nabán da zeajlí canna
60 Gate belén benneꞌ zan caꞌ da nigá dxuse̱de Jesús,
naꞌ benneꞌ caꞌ zjácale̱ Jesús gulenné̱ꞌ:
―Dizraꞌ caní dxenná Jesús zaj nácale̱ꞌe̱ na ste̱be sidxu.
¿Nuzra gaca gun caní?
61 Guque béꞌene̱ꞌ Jesús dxelenné̱ꞌ chee̱ xrtizre̱ꞌ,
naꞌ bche̱be̱ꞌ benneꞌ caꞌ:
―¿Dxuzúa dizraꞌ nigá leꞌe ste̱be?
62 ¿Ájazra gunle checaꞌ léꞌele nedaꞌ,
Benneꞌ Gulje̱ꞌ Bénneache,
xegüénaꞌ xabáa naga zuaꞌ nédxute̱?
63 Beꞌ naca na da dxunna xel-laꞌ nabán li lazreꞌ.
Da naca na be̱laꞌ dxen quebe bi zaca na.
Dizraꞌ caꞌ da ba guchaꞌ leꞌe zaj naca na chee̱ Beꞌ,
ne zaj naca na da dxelunna na xel-laꞌ nabán li lazreꞌ.
64 Bál-lale leꞌe quebe dxéajle̱le chiaꞌ.
Caní gunná Jesús laweꞌ da nézene̱ꞌ nédxudaute̱ nu benneꞌ caꞌ quebe dxeléajle̱ꞌe̱ chee̱ꞌ,
ne nuaꞌ gudé Le̱ꞌ lu naꞌ benneꞌ guledábague̱ꞌ Le̱ꞌ.
65 Nadxa gunná Jesús:
―Chee̱ le̱ naꞌ guchaꞌ leꞌe,
quebe nu benneꞌ gaca xide̱ꞌ naga zuaꞌ nedaꞌ che quebe xedajgúa Xraꞌ bénneaꞌ.
66 Lu zra náꞌqueze benneꞌ zan caꞌ,
benneꞌ xjácale̱ne̱ꞌ Jesús,
québedxa xjácale̱ne̱ꞌ Le̱ꞌ.
67 Nadxa Jesús bche̱be̱ꞌ benneꞌ chazrinnu caꞌ dxusé̱dene̱ꞌ,
gunné̱ꞌ:
―¿Cáꞌanqueze leꞌe dxaca lázrele xexíajle?
68 Beche̱be Simón Pedro:
―Xran,
¿nuzra chéajle̱ntuꞌ?
Dizraꞌ chiuꞌ naca na da dxunna na xel-laꞌ nabán da zeajlí canna.
69 Netuꞌ dxéajle̱ntuꞌ chiuꞌ,
ne nézentuꞌ nacuꞌ Cristo,
Zriꞌine Dios ban.
70 Jesús beche̱be̱ꞌ:
―Nedaꞌ gucáꞌa leꞌe,
benneꞌ chazrinnu,
naꞌ tu benneꞌ ládujla leꞌe xuꞌe̱ da xriwe̱ꞌ.
71 Da nigá gunná Jesús,
bchálaje̱ꞌ ca naca chee̱ Judas Iscariote,
zriꞌine tu benneꞌ le̱ꞌ Simón,
laweꞌ da gudé Judas nigá Jesús lu naꞌ benneꞌ guledábague̱ꞌ Le̱ꞌ.
Naque̱ꞌ tu benneꞌ chazrinnu caꞌ dxuse̱de Jesús.