Jesús dxexune̱ꞌ tu benneꞌ biu naga nazí le na Betesda
5
Ca gudé naꞌ guxúꞌu tu laní chee̱ judío caꞌ,
naꞌ bezrín Jesús xe̱zre Jerusalén.
2 Lu xe̱zre naꞌ,
gáguze naga zua dxa xuꞌu chee̱ xe̱zre da nazí le na Dxa Xuꞌu Chee̱ Zrilaꞌ Caꞌ,
dxeꞌ tu cueꞌla nisa nazí le na Betesda lu dizraꞌ hebreo,
naꞌ dxuꞌa nisa naꞌ zaj nnita gazxuꞌ lachila.
Jesús cura en Sábado (Juan 5.1-15)
3 Lachila caꞌ zaj de̱ benneꞌ zan zaj xuꞌe̱ we̱ꞌ,
benneꞌ la chul-la caꞌ,
ne benneꞌ zaj zua zri niꞌa ne̱ꞌe̱,
ne benneꞌ zrinnaj caꞌ.
Dxelebeze̱ꞌ ca bixre nisa naꞌ.
4 Caꞌan naca laweꞌ da dxetaj tu gubáz chee̱ xabáa bata gala,
ne dxunibe̱ꞌ nisa naꞌ,
naꞌ benneꞌ nedxu dxeajchuꞌe̱ lu nisa naꞌ ca dxedé dxunibe̱ꞌ na,
dxexaque̱ꞌ chee̱ bítete̱ze xel-laꞌ we̱ꞌ xuꞌe̱.
5 Zua tu benneꞌ naꞌ ba guca chinu chunne dxua iza xuꞌe̱ we̱ꞌ.
6 Gate bleꞌe Jesús benneꞌ nigá,
ne dxeque béꞌene̱ꞌ ba guca zaneꞌ iza xuꞌe̱ we̱ꞌ naꞌ,
naꞌ bche̱be̱ꞌ le̱ꞌ:
―¿Dxaca lazruꞌ xexacuꞌ?
7 Benneꞌ we̱ꞌ naꞌ beche̱be̱ꞌ:
―Benneꞌ,
quebe nu chiláꞌ benneꞌ cuꞌe̱ nedaꞌ lu nisa naꞌ ca dxedé dxebixre na.
Tu tu lasa gate dxaca lazraꞌ chuꞌa,
benneꞌ xula dxuꞌe̱ nédxudxa.
8 Jesús guzre̱ꞌ le̱ꞌ:
―¡Guxasa!
Becáꞌa daꞌa chiuꞌ,
ne bexíaj.
9 Laꞌ náꞌqueze bexaca benneꞌ we̱ꞌ naꞌ,
naꞌ bequé̱ꞌe̱ daꞌa chee̱ꞌ,
ne guzú lawe̱ꞌ dxedé̱ꞌ.
Zra naꞌ naca zra dxulupáꞌana judío caꞌ,
10 naꞌ benneꞌ judío caꞌ gulé̱ꞌe̱ bénneaꞌ bexaque̱ꞌ:
―Naꞌa naca na zra dxupáꞌanadxu.
Quebe naca na guꞌu daꞌa chiuꞌ.
11 Naꞌ benneꞌ naꞌ beche̱be̱ꞌ:
―Bénneaꞌ bexune̱ꞌ nedaꞌ guzre̱ꞌ nedaꞌ:
“Becáꞌa daꞌa chiuꞌ,
ne bexíaj.”
12 Nadxa buluche̱be̱ꞌ le̱ꞌ:
―¿Nuzra naꞌ guzre̱ꞌ lueꞌ:
Becáꞌa daꞌa chiuꞌ,
ne bexiaj?
13 Benneꞌ naꞌ quebe nézene̱ꞌ nu bénneaꞌ bexune̱ꞌ le̱ꞌ laweꞌ da ba zexíaj Jesús láwela benneꞌ zan caꞌ zaj zre̱ꞌe̱ naꞌ.
14 Ca gudé naꞌ Jesús bezrague̱ꞌ bénneaꞌ,
dxedé̱ꞌ chaleꞌaj xudauꞌ,
naꞌ guzre̱ꞌ le̱ꞌ:
―¡Gunnáꞌxque!
Ba bexacuꞌ naꞌa.
Québedxa gunuꞌ dul-la,
chee̱ quebe bi sacuꞌ xetú da wál-ladxa.
15 Nadxa benneꞌ naꞌ bezé̱ꞌe̱ zexíaje̱ꞌ,
naꞌ bzenne̱ꞌ judío caꞌ bexún Jesús le̱ꞌ.
16 Chee̱ le̱ naꞌ benneꞌ judío caꞌ guláu ziꞌ xuzre̱ꞌ Jesús,
ne gulaca lazre̱ꞌ xelútie̱ꞌ Le̱ꞌ laweꞌ da dxune̱ꞌ da caní lu zra dxulupáꞌane̱ꞌ.
Jesús defiende su autoridad (Juan 5.16-47)
―Dios,
Xraꞌ,
tu dxúnzqueze̱ꞌ zrin,
naꞌ nedaꞌ dxunaꞌ zrin.
18 Chee̱ le̱ naꞌ benneꞌ judío caꞌ gulaca lázredxe̱ꞌ xelútie̱ꞌ Jesús laweꞌ da quegá tuze dxuzúe̱ꞌ chaláꞌala da nadxixruj bea na chee̱ zra dxulupáꞌane̱ꞌ,
naꞌ cáꞌanqueze dxun cuine̱ꞌ ca Dios gate gunné̱ꞌ Dios nácaqueze̱ꞌ Xre̱ꞌ.
Xel-laꞌ dxenná bea da napa Zriꞌine Dios
19 Nadxa Jesús guzre̱ꞌ benneꞌ judío caꞌ:
―Da li dxapaꞌ leꞌe,
nedaꞌ,
Zriꞌine Dios,
quebe gaca bi gunaꞌ cheé̱zquezaꞌ.
Tuze dxunaꞌ da dxeléꞌedaꞌ dxun Xraꞌ.
Xúgute̱ da dxun Xraꞌ,
cáꞌanqueze dxunaꞌ nedaꞌ,
Zríꞌine̱ꞌ.
20 Dios,
Xraꞌ,
nazríꞌine̱ꞌ nedaꞌ,
Zríꞌine̱ꞌ,
ne dxuléꞌene̱ꞌ nedaꞌ xúgute̱ da dxúnqueze̱ꞌ Le̱ꞌ,
naꞌ guléꞌene̱ꞌ nedaꞌ da zaj nácadxa szren ca da caꞌ dxunaꞌ,
naꞌ xebánequezle leꞌe ca xelaca na.
21 Ca dxun Xradxu Dios,
dxusebane̱ꞌ benneꞌ gate,
ne dxuxunézruje̱ꞌ xel-laꞌ nabán chee̱ꞌ,
cáꞌanqueze nedaꞌ,
Zríꞌine̱ꞌ,
dxuxunézrujaꞌ xel-laꞌ nabán chee̱ benneꞌ caꞌ dxaca lazraꞌ xunézrujaꞌ na.
22 Xradxu Dios quebe dxuchiꞌe̱ nu benneꞌ,
san ba be̱nne̱ꞌ nedaꞌ,
Zríꞌine̱ꞌ,
xel-laꞌ dxenná bea guchiꞌa da dxelún tu tu bénneache,
23 chee̱ xelapa xúgute̱ benneꞌ nedaꞌ,
Zríꞌine̱ꞌ,
ba láꞌana,
cáte̱ze naꞌ dxelape̱ꞌ ba láꞌana Dios,
Xraꞌ.
Nu benneꞌ quebe dxape̱ꞌ ba láꞌana nedaꞌ,
Zríꞌine̱ꞌ,
cáꞌanqueze quebe dxape̱ꞌ ba láꞌana Xradxu Dios nasel-le̱ꞌ nedaꞌ.
24 ’Da li dxapaꞌ leꞌe,
benneꞌ dxenne̱ꞌ da dxennéaꞌ nedaꞌ,
ne dxéajle̱ꞌe̱ chee̱ Dios nasel-le̱ꞌ nedaꞌ,
benneꞌ nigá nape̱ꞌ xel-laꞌ nabán da zeajlí canna,
naꞌ quebe cuía xiꞌe̱ laweꞌ da ba bedxúaje̱ꞌ lu naꞌ xel-laꞌ gute,
ne ba zue̱ꞌ lu xel-laꞌ nabán.
25 Da li dxapaꞌ leꞌe,
wazrín zra,
ne ba dxezrín zra naꞌ gate benneꞌ gate caꞌ xelenne̱ꞌ chiꞌa nedaꞌ,
Zriꞌine Dios,
naꞌ benneꞌ xuluzúa xrtizraꞌ welaca bánqueze̱ꞌ.
26 Xráquezaꞌ nape̱ꞌ xel-laꞌ dxenná bea xunézruje̱ꞌ xel-laꞌ nabán da naca na li lazreꞌ chee̱ bénneache,
ne cáꞌanqueze ba be̱nne̱ꞌ nedaꞌ,
Zríꞌine̱ꞌ,
xel-laꞌ dxenná bea xunézrujaꞌ bénneache xel-laꞌ nabán caní,
27 ne ba be̱nne̱ꞌ nedaꞌ xel-laꞌ dxenná bea guchiꞌa chee̱ bénneache laweꞌ da nacaꞌ Benneꞌ Gulje̱ꞌ Bénneache.
28 Quebe xebánele chee̱ da nigá laweꞌ da zrin zra gate xúgute̱ benneꞌ gate xelenne̱ꞌ chiꞌa
29 xelexedxúaje̱ꞌ lu xe̱dxu ba.
Benneꞌ caꞌ belune̱ꞌ da xrlátaje xelexebane̱ꞌ chee̱ xelape̱ꞌ xel-laꞌ nabán da zeajlí canna.
Benneꞌ caꞌ belune̱ꞌ da cale̱la xelexebane̱ꞌ chee̱ xelebía xiꞌe̱.
Da dxelunna bea na napa Jesús xel-laꞌ dxenná bea
30 Naꞌ gunná Jesús:
―Nedaꞌ quebe bi gaca gunaꞌ cheé̱zquezaꞌ.
Nedaꞌ dxuchiꞌa chee̱ bénneache ca gunná bea Dios,
Xraꞌ,
nedaꞌ,
naꞌ ca dxuchiꞌa naca na xrlátaje laweꞌ da quebe dxunaꞌ ca da dxaca lázrequezaꞌ nedaꞌ.
Dxunaꞌ ca da dxaca lazreꞌ Xraꞌ,
nasel-le̱ꞌ nedaꞌ.
31 Che nedaꞌ dxexeche̱baꞌ da nácaze cheé̱quezaꞌ,
da dxennéaꞌ quebe naca na da dxunna bea na.
32 Zua tu benneꞌ xula dxexeche̱be̱ꞌ da nácaqueze chiaꞌ,
naꞌ da dxenné̱ꞌ naca na da dxunna bea na.
33 Leꞌe gusél-lale benneꞌ xeajleche̱be̱ꞌ Juan,
naꞌ ca da beche̱be̱ꞌ naca na da li.
34 Da dxunna bea na da dxuxrén lazraꞌ nedaꞌ quebe naca na chee̱ bénneacheze.
Dxapaꞌ leꞌe da nigá chee̱ lale leꞌe.
35 Juan naꞌ guque̱ꞌ ca tu xiꞌ da gula na,
ne bsení na,
naꞌ leꞌe bezaca ba lázrele lu xiꞌ naꞌ tu chíꞌidauꞌ.
36 Zua tu da dxunna bea na chiaꞌ nedaꞌ,
da nácadxa szren ca da bchalaj Juan.
Da caꞌ dxunaꞌ nedaꞌ,
da bsebaga Xraꞌ nedaꞌ dxunaꞌ.
Da caní dxelunna bea na da li Dios,
Xraꞌ,
gusél-le̱ꞌ nedaꞌ.
37 Cáꞌanqueze Xraꞌ nasel-le̱ꞌ nedaꞌ dxexeche̱be̱ꞌ chiaꞌ.
Lácala ba bchalaj Le̱ꞌ,
leꞌe quebe ne xénele chiꞌe̱,
ne quebe ne léꞌele Le̱ꞌ,
38 ne quebe nuzúale dizraꞌ chee̱ꞌ xichaj lázrdaule laweꞌ da quebe dxéajle̱le chiaꞌ nedaꞌ,
nasel-la Xraꞌ nedaꞌ.
39 Leꞌe dxusé̱dele du lázrele da naxúaj na lu xiche chee̱ Dios laweꞌ da dxéquele xezrélele xel-laꞌ nabán da zeajlí canna lu xiche naꞌ,
naꞌ da naxúaj na lu xiche chee̱ Dios dxuchalaj na ca naca chiaꞌ nedaꞌ.
40 Leꞌe quebe dxaca lázrele xídale naga zuaꞌ nedaꞌ chee̱ gápale xel-laꞌ nabán naꞌ.
41 ’Nedaꞌ quebe dxeziꞌa xel-laꞌ ba láꞌana ca da dxelunna bénneache,
da quebe naca na li lazreꞌ.
42 Nedaꞌ núnbeꞌa leꞌe,
ne nezdaꞌ quebe nazríꞌile Dios.
43 Blaꞌa nedaꞌ waláz chee̱ Dios,
Xraꞌ,
naꞌ leꞌe quebe dxezíꞌ lu naꞌle nedaꞌ.
Che zaꞌ tu benneꞌ lu da naca cheé̱zqueze̱ꞌ,
benneꞌ naꞌ wazíꞌ lu naꞌle.
44 ¿Ájazra gaca chéajle̱le leꞌe chiaꞌ che dxunle zrin chee̱ xelapa ljwézrele leꞌe ba láꞌana,
ne quebe dxue lázrele sile xel-laꞌ ba láꞌana da dxunna Dios tu lichaꞌ?
45 Quebe guéquele nédaꞌquezaꞌ gusebagaꞌ leꞌe zria lau Dios,
Xraꞌ.
Da gusebaga leꞌe zria naca na da ba gunná Moisésqueze,
da naꞌ dxuxrén lázrele guselá na leꞌe.
46 Che da li guxéajle̱le leꞌe chee̱ da gunná Moisés,
cáꞌanqueze chéajle̱le chiaꞌ nedaꞌ laweꞌ da bzuaj Moisés ca naca chiaꞌ nedaꞌ.
47 Naꞌa,
che quebe dxéajle̱le chee̱ da bzuaj le̱ꞌ,
¿ájazra gaca chéajle̱le chee̱ da dxapaꞌ leꞌe?