Benneꞌ biche Jesús quebe dxeléajle̱ꞌe̱ chee̱ꞌ
7
Gudé naꞌ gudé Jesús naga nababa Galilea.
Quebe guca lazre̱ꞌ tee̱ꞌ naga nababa Judea laweꞌ da dxelaca lazreꞌ judío blau zaj zre̱ꞌe̱ naꞌ xelútie̱ꞌ Le̱ꞌ.
2 Ba za laní gate judío caꞌ dxelezúe̱ꞌ lu xuꞌu lagaꞌ caꞌ.
Los líderes judíos quieren matar a Jesús (Juan 7.1-24)
―Quebe xegáꞌanuꞌ nigáze.
Bexíaj Judea,
chee̱ cáꞌanqueze benneꞌ caꞌ dxeléajle̱ chiuꞌ zaj zre̱ꞌe̱ naꞌ gaca xeleléꞌene̱ꞌ ca da dxunuꞌ.
4 Che nu benneꞌ dxaca lazre̱ꞌ xelúnbeꞌe bénneache le̱ꞌ,
quebe dxune̱ꞌ da caꞌ bagácheze.
Laweꞌ da dxunuꞌ Lueꞌ da caní,
be̱n na lau xúgute̱ bénneache.
5 Caní gulenné̱ꞌ laweꞌ da quebe dxeléajle̱ benneꞌ biche̱ꞌ caꞌ chee̱ Jesús.
6 Nadxa Jesús guzre̱ꞌ benneꞌ caꞌ:
―Quebe ne zrin zra chaꞌa naꞌ.
Chee̱le leꞌe bítete̱ze zra waca chéajle.
7 Benneꞌ caꞌ zaj naca chee̱ xe̱zr la xu nigá quebe gaca xelecuídene̱ꞌ leꞌe.
Dxelecuídene̱ꞌ nedaꞌ laweꞌ da dxuléꞌedaꞌ nedaꞌ naca da cale̱la da dxelún benneꞌ caꞌ.
8 Le chjaca leꞌe laní naꞌ.
Quebe saꞌa nedaꞌ naꞌa laweꞌ da quebe ne zrin zra chaꞌa.
9 Ca gudé guzre Jesús benneꞌ caꞌ da nigá,
naꞌ begáꞌane̱ꞌ naga nababa Galilea naꞌ.
Jesús dxezrine̱ꞌ laní gate judío caꞌ dxelezúe̱ꞌ xuꞌu lagaꞌ caꞌ
10 Ca gudé besiáꞌaca benneꞌ biche Jesús,
naꞌ cáꞌanqueze Le̱ꞌ guxíaje̱ꞌ laní naꞌ.
Bagácheze guxíaje̱ꞌ chee̱ quebe nu leꞌe Le̱ꞌ.
11 Benneꞌ xíchaje̱ chee̱ judío caꞌ belexílaje̱ꞌ Jesús lu laní naꞌ.
Dxelenné̱ꞌ:
―¿Gazra zua bénneaꞌ?
12 Ládujla benneꞌ zan caꞌ,
benneꞌ zan buluchálaje̱ꞌ ca naca chee̱ Jesús.
Bal-le̱ꞌ gulenné̱ꞌ:
“Naque̱ꞌ benneꞌ xrlátaje.”
Xebal-le̱ꞌ gulenné̱ꞌ:
“Quebe naque̱ꞌ xrlátaje laweꞌ da dxezí xe̱ꞌe̱ bénneache.”
13 Quebe nu benneꞌ bchálaje̱ꞌ caníqueze ca naca chee̱ꞌ laweꞌ da dxelezrebe̱ꞌ da xelún benneꞌ xíchaje̱ caꞌ chee̱ judío caꞌ.
14 Ba zeaj gachaj laní naꞌ gate guxúꞌu Jesús lu chaleꞌaj xudauꞌ,
naꞌ guzú lawe̱ꞌ dxusé̱dene̱ꞌ benneꞌ zaj zre̱ꞌe̱ naꞌ.
15 Belexebane benneꞌ judío caꞌ,
dxelenné̱ꞌ:
―¿Ájazra naꞌ benneꞌ nigá da zante̱ nézene̱ꞌ,
ne quebe bsé̱die̱ꞌ chee̱ xudauꞌ?
16 Beche̱be Jesús:
―Da dxusé̱dedaꞌ nedaꞌ leꞌe quebe naca na cheé̱zquezaꞌ.
Naca na chee̱ Xraꞌ nasel-le̱ꞌ nedaꞌ.
17 Che nu benneꞌ dxaca lazre̱ꞌ gune̱ꞌ ca da dxaca lazreꞌ Dios,
naꞌ wanézene̱ꞌ che da dxusé̱dedaꞌ naca na chee̱ Dios,
u che dxennéaꞌ ca da naca cheé̱zquezaꞌ.
18 Benneꞌ dxuchálaje̱ꞌ da naca cheé̱zqueze̱ꞌ dxune̱ꞌ na chee̱ xelapa bénneache le̱ꞌ ba láꞌana.
Bénneaꞌ dxue lazre̱ꞌ xelapa bénneache ba láꞌana bénneaꞌ gusel-le̱ꞌ le̱ꞌ,
benneꞌ nigá dxenné̱ꞌ da li,
ne quebe bi dxenné̱ꞌ da naca na da we̱n lazreꞌ.
19 ’Moisésqueze be̱nne̱ꞌ leꞌe da nadxixruj bea na,
naꞌ netule leꞌe quebe dxuzúale dizraꞌ chee̱ da nadxixruj bea na naꞌ.
¿Bizr chee̱ naꞌ dxaca lázrele gútele nedaꞌ?
20 Belexeche̱be benneꞌ zan caꞌ:
―Xuꞌu lueꞌ beꞌ xriwe̱ꞌ.
¿Núzraqueze dxaca lazreꞌ gutie̱ꞌ lueꞌ?
21 Jesús guzre̱ꞌ benneꞌ caꞌ:
―Tu xel-laꞌ waca be̱naꞌ lu zra dxupáꞌanale,
naꞌ xúgute̱le leꞌe dxebánele.
22 Moisés be̱nne̱ꞌ da zéajle̱le,
dxechúgule lateꞌ weaj be̱laꞌ chee̱ be̱l-laꞌ dxen chee̱ zríꞌinele bi biudu caꞌ chee̱ xelexegáꞌanabeꞌ xrlátaje lau Dios.
Da nigá da dxunle quebe guzú lau na gate naꞌ zua Moisés.
Guzú lau na gate zaj zraꞌ xra xrtau Moisés cáꞌante̱.
Chee̱ le̱ naꞌ leꞌe dxechúgule lateꞌ be̱laꞌ chee̱ be̱l-laꞌ dxen chee̱ tu bi biúdauꞌ chee̱ xegáꞌanabeꞌ xrlátaje lau Dios lácala naca zra dxupáꞌanale.
23 Che caní dxunle lu zra dxupáꞌanale chee̱ quebe gusanle ca naca da bdxixruj beꞌe Moisés,
¿bizr chee̱ naꞌ dxezráꞌale nedaꞌ laweꞌ da bexunaꞌ dute̱ be̱l-laꞌ dxen chee̱ tu benneꞌ gate naca zra dxupáꞌanale?
24 Quebe guchíꞌale leꞌe chee̱ tu da dxun benneꞌ ca naca da dxeléꞌezele.
Gate bi da guchíꞌale,
le gun na lu da naca xrlátaje.
Jesús dxuchálaje̱ꞌ chee̱ naga ze̱ꞌe̱
25 Nadxa bal-la benneꞌ caꞌ zaj zre̱ꞌe̱ Jerusalén gulezú lawe̱ꞌ dxuluche̱be ljwezre̱ꞌ:
―¿Quegá benneꞌ nigá bénneaꞌ dxelexílaje̱ꞌ chee̱ xelútie̱ꞌ le̱ꞌ?
Los líderes tratan de arrestar a Jesús (Juan 7.25-53)
26 Nigá zue̱ꞌ dxuchálaje̱ꞌ láwela bénneache,
naꞌ quebe nu bi dxe̱ Le̱ꞌ.
¿Zaj neze benneꞌ xíchaje̱ caꞌ da li naca benneꞌ nigá Cristo,
Bénneaꞌ nasel-la Dios?
27 Netuꞌ nézentuꞌ ga zaꞌ benneꞌ nigá.
Gate xida Cristo,
quegá nu neze ga ze̱ꞌe̱.
28 Jesús zue̱ꞌ dxusé̱dene̱ꞌ benneꞌ caꞌ chaleꞌaj xudauꞌ,
naꞌ gate benne̱ꞌ da nigá,
naꞌ gunné̱ꞌ zizraj:
―Dxennale núnbeale nedaꞌ,
ne dxennale nézele ga zaꞌa.
Blaꞌa nigá,
quegá cheé̱zquezaꞌ.
Bénneaꞌ nasel-le̱ꞌ nedaꞌ naque̱ꞌ li lazreꞌ,
naꞌ Bénneaꞌ quebe núnbeale leꞌe.
29 Nedaꞌ núnbeꞌa Le̱ꞌ laweꞌ da zaꞌa naga zua Le̱ꞌ,
naꞌ Le̱ꞌ gusél-le̱ꞌ nedaꞌ.
30 Nadxa gulaca lazre̱ꞌ xele̱l-le̱ꞌ Jesús.
Quebe nu gude̱la Le̱ꞌ laweꞌ da quebe ne zrin zra chee̱ xelútie̱ꞌ Le̱ꞌ.
31 Benneꞌ zan guléajle̱ꞌe̱ chee̱ Jesús,
naꞌ gulenné̱ꞌ:
―Gate xida Cristo,
¿gúnljadxe̱ꞌ xel-laꞌ waca zrente̱ ca da dxun benneꞌ nigá?
Benneꞌ fariseo caꞌ dxelesel-le̱ꞌ xraꞌaga we̱n zrin chee̱ꞌ chee̱ xele̱l-le̱ꞌ Jesús
32 Benneꞌ fariseo caꞌ belenne̱ꞌ ca da dxelenná bénneache ca naca chee̱ Jesús,
naꞌ le̱ꞌ,
ne benneꞌ xíchaje̱ caꞌ chee̱ bxruze caꞌ gulesel-le̱ꞌ xraꞌaga we̱n zrin chee̱ xudauꞌ chee̱ xele̱l-le̱ꞌ Jesús.
33 Nadxa gunná Jesús:
―Wazúale̱naꞌ leꞌe xetú chíꞌidauꞌ,
naꞌ xezrínquezaꞌ naga zua Bénneaꞌ gusél-le̱ꞌ nedaꞌ.
34 Leꞌe wexílajle nedaꞌ,
naꞌ quebe xezrélele nedaꞌ,
laweꞌ da quebe gaca saꞌle naga suaꞌ nedaꞌ.
35 Nadxa benneꞌ judío caꞌ gulezú lawe̱ꞌ dxuluche̱be ljwezre̱ꞌ:
―¿Gazra cheaj benneꞌ nigá,
naga quebe gaca xezreldxu Le̱ꞌ?
¿Waxíaje̱ꞌ naga zaj zraꞌ benneꞌ judío caꞌ zaj nase dínnaje̱ꞌ ládujla benneꞌ xe̱zr la xu caꞌ chee̱ gusé̱dene̱ꞌ benneꞌ quebe zaj naque̱ꞌ judío?
36 ¿Bizra zéaje̱ da nigá guzre̱ꞌ dxiꞌu:
Wexílajle nedaꞌ,
naꞌ quebe xezrélele nedaꞌ laweꞌ da quebe gaca saꞌle naga suaꞌ nedaꞌ?
Jesús dxuchálaje̱ꞌ chee̱ xe̱gu nisa da dxunna xel-laꞌ nabán li lazreꞌ
37 Zra bze̱be chee̱ laní naꞌ naca na zra blaudxa.
Lu zra naꞌ guzé̱ Jesús,
naꞌ gunné̱ꞌ zizraj:
―Che nu benneꞌ dxebílene̱ꞌ,
dxal-laꞌ xide̱ꞌ naga zuaꞌ nedaꞌ,
naꞌ xíꞌaje̱ꞌ.
38 Naca na ca naxúaj na lu xiche chee̱ Dios,
dxenné̱ꞌ:
“Benneꞌ dxéajle̱ꞌe̱ chiaꞌ,
lu lázrdawe̱ꞌ galaj xe̱gu nisa da gunna na xel-laꞌ nabán.”
39 Da nigá gunná Jesús ca naca chee̱ Beꞌ Láꞌazxa,
Bénneaꞌ xelezíꞌ benneꞌ caꞌ xeléajle̱ꞌe̱ chee̱ Jesús,
laweꞌ da quebe ne laꞌ Beꞌ Láꞌazxa laweꞌ da quebe ne xegáꞌana szren Jesús naga zua Xre̱ꞌ.
Bénneache dxelaque̱ꞌ chupa laꞌa
40 Bal-la bénneache,
gate belenne̱ꞌ da nigá,
gulenné̱ꞌ:
―Da li benneꞌ nigá naque̱ꞌ Bénneaꞌ guchalaje̱ꞌ waláz chee̱ Dios,
Bénneaꞌ dxal-laꞌ xide̱ꞌ.
41 Xebal-le̱ꞌ gulenné̱ꞌ:
―Benneꞌ nigá naque̱ꞌ Cristo,
Benneꞌ guche̱be lazreꞌ Dios sel-le̱ꞌ.
Xebal-le̱ꞌ gulenné̱ꞌ:
―¿Waca Cristo benneꞌ Galilea?
42 Lu da naxúaj na lu xiche chee̱ Dios dxenná na gaca Cristo zriꞌine zre sua David,
ne gaque̱ꞌ benneꞌ xe̱zre Belén,
xe̱zre naꞌ naga gulaj David.
43 Caꞌan guca,
gulaca benneꞌ caꞌ chupa laꞌa ne̱ chee̱ Jesús.
44 Bal-le̱ꞌ gulaca lazre̱ꞌ xele̱l-le̱ꞌ Jesús,
naꞌ quebe nu bexazre gune̱ꞌ na.
Benneꞌ xíchaje̱ caꞌ chee̱ judío caꞌ quebe dxeléajle̱ꞌe̱ chee̱ Jesús
45 Xraꞌaga we̱n zrin caꞌ chee̱ xudauꞌ belexezrine̱ꞌ naga zaj zraꞌ fariseo caꞌ,
ne benneꞌ xíchaje̱ caꞌ chee̱ bxruze caꞌ,
naꞌ benneꞌ caní buluche̱be̱ꞌ xraꞌaga we̱n zrin caꞌ:
―¿Bizr chee̱ naꞌ quebe guche̱le bénneaꞌ?
46 Belexeche̱be xraꞌaga we̱n zrin caꞌ:
―Quebe ne guchalaj nu bénneache ca dxuchalaj benneꞌ nigá.
47 Nadxa fariseo caꞌ gulé̱ꞌe̱ xraꞌaga we̱n zrin caꞌ:
―¿Cáꞌanqueze leꞌe be̱le lataj guzí xe̱ꞌe̱ leꞌe?
48 Quebe nu ne chéajle̱ chee̱ bénneaꞌ,
benneꞌ xíchaje̱ caní,
ne cáꞌanqueze benneꞌ fariseo caꞌ.
49 Benneꞌ caꞌ dxeléajle̱ꞌe̱ chee̱ bénneaꞌ quebe zaj núnbeꞌe̱ da nadxixruj bea na,
ne zaj nabía xiꞌe̱.
50 Nicodemo,
bénneaꞌ guxíaje̱ꞌ xeajnné̱ꞌe̱ Jesús chizrela naque̱ꞌ tu benneꞌ fariseo caꞌ,
naꞌ guzre̱ꞌ benneꞌ caꞌ:
51 ―Cate̱ze dxenná da nadxixruj bea chee̱dxu quebe gaca guzría xidxu tu benneꞌ che quebe ne xénedxu xeche̱be̱ꞌ chee̱ nézedxu che bi da nabague̱ꞌe̱.
52 Nadxa belexeche̱be benneꞌ caꞌ:
―¿Nácaquezuꞌ lueꞌ benneꞌ Galilea?
Gunnáꞌ xanneꞌ da naxúaj na lu xiche chee̱ Dios,
naꞌ leꞌenuꞌ netú benneꞌ dxuchalaje̱ꞌ waláz chee̱ Dios quebe ne gálaje̱ꞌ naga nababa Galilea,
naga zaj zraꞌ bénneache quebe zaj naca xánnie̱ꞌ judío.
53 Nadxa tu tu benneꞌ caꞌ xeajxaque̱ꞌ lizre̱ꞌ.