2 Zra xula,

gate guxaníꞌ,

naꞌ bezrín Jesús chaleꞌaj xudauꞌ naꞌ.

Xúgute̱ benneꞌ caꞌ gulebigue̱ꞌ naga zua Jesús,

naꞌ Le̱ꞌ gudxéꞌe̱,

ne guzú lawe̱ꞌ dxusé̱dene̱ꞌ benneꞌ caꞌ.

3 Nadxa benneꞌ caꞌ dxuluxuzájle̱ꞌe̱ da nadxixruj bea Dios,

ne benneꞌ fariseo caꞌ guleché̱ꞌe̱ tu nuꞌula naga zua Jesús,

beleléꞌene̱ꞌ le̱ꞌ dxune̱ꞌ dul-la dxíchaje̱ꞌ xrba chee̱ xel-laꞌ nuchaga naꞌ.

Buluzé̱ꞌ nuꞌula naꞌ laduj benneꞌ zaj zre̱ꞌe̱ naꞌ,

4 naꞌ gulé̱ꞌe̱ Jesús:

―Benneꞌ Wese̱de,

nuꞌula nigá bléꞌentuꞌ le̱ꞌ dxune̱ꞌ dul-la dxíchaje̱ꞌ xrba chee̱ xel-laꞌ nuchaga naꞌ.

5 Da bdxixruj beꞌe Moisés dxenná beꞌe netuꞌ gútentuꞌ nuꞌula caní,

güentuꞌ le̱ꞌ xiaj.

¿Bizra dxennáuꞌ Lueꞌ?

6 Caní gulenná benneꞌ caꞌ chee̱ xuludxixre̱ꞌ Jesús chee̱ xelezéquene̱ꞌ xelagu zria Le̱ꞌ.

Nadxa gudxéꞌ luche Jesús,

ne guzú lawe̱ꞌ dxuzúaje̱ꞌ lu xu nen zrube ne̱ꞌe̱.

7 Benneꞌ caꞌ buluché̱bequeze̱ꞌ Jesús,

naꞌ Le̱ꞌ bezé̱ꞌ dxe̱ꞌe̱ benneꞌ caꞌ:

―Nútete̱zlale leꞌe quebe nabágale dul-la,

waca su laule güele nuꞌula nigá xiaj.

8 Naꞌ bebéꞌ luche Jesús,

ne bzúajqueze̱ꞌ lu xu.

9 Benneꞌ caꞌ,

gate belenne̱ꞌ da nigá,

quebe bzua xichaj lázrdawe̱ꞌ le̱ꞌ zrize,

naꞌ belexedxúaje̱ꞌ tu weaje̱ꞌ.

Belexedxúaj zaꞌa benneꞌ gúladxa,

naꞌ ca belexedxúaj xúgute̱ benneꞌ caꞌ dxelagu zrie̱ꞌ nuꞌulaꞌ,

naꞌ begáꞌana Jesús tuze̱ꞌ nen nuꞌula naꞌ,

ze̱ꞌ laduj benneꞌ caꞌ dxuluzé̱ nague̱ꞌ chee̱ꞌ.

10 Nadxa bezé̱ꞌ Jesús,

ne gate québedxa nu benneꞌ caꞌ bleꞌe Jesús,

benneꞌ dxulagu zrie̱ꞌ nuꞌula naꞌ,

nadxa guzre̱ꞌ le̱ꞌ:

―Nuꞌula,

¿gazra naꞌ benneꞌ caꞌ gulagu zrie̱ꞌ lueꞌ?

¿Quebe nu chiláꞌ benneꞌ guzría xiꞌe̱ lueꞌ?

11 Nuꞌula naꞌ gunné̱ꞌ:

―Quebe nu chiláꞌ,

Xran.

Nadxa Jesús guzre̱ꞌ nuꞌula naꞌ:

―Cáꞌanqueze nedaꞌ,

quebe guzría xiꞌa lueꞌ.

Bexíaj,

ne québedxa gunuꞌ dul-la.

12 Bchálajle̱ Jesús benneꞌ caꞌ xecha lasa,

gunné̱ꞌ:

―Nedaꞌ nacaꞌ xel-laꞌ naxaníꞌ chee̱ lu xichaj lázxdau bénneache.

Benneꞌ dxedále̱ne̱ꞌ nedaꞌ gape̱ꞌ xel-laꞌ naxaníꞌ nigá da gunezruj na le̱ꞌ xel-laꞌ nabán li lazreꞌ,

naꞌ cabataꞌ tadxe̱ꞌ lu da chul-la chee̱ dul-la da zaj nabague̱ꞌ.

13 Nadxa benneꞌ fariseo caꞌ gulé̱ꞌe̱ Le̱ꞌ:

―Lueꞌ dxexeche̱buꞌ cheé̱zquezuꞌ,

naꞌ da dxexeche̱buꞌ quebe bi zaca na.

14 Beche̱be Jesús:

―Da dxexeche̱baꞌ zaca na lácala nédaꞌquezaꞌ dxexeche̱baꞌ cheé̱zquezaꞌ.

Nedaꞌ nezdaꞌ gala zaꞌa,

ne gala chaꞌa.

Leꞌe quebe nézele gala zaꞌa,

ne gala chaꞌa.

15 Leꞌe dxuchíꞌale cáte̱ze dxenná xichaj lázrdaule.

Blaꞌa nedaꞌ,

quegá chee̱ guchiꞌa ca da dxun nu benneꞌ.

16 Che dxuchiꞌa,

dxuchiꞌa cáte̱ze naca na,

laweꞌ da quebe dxuchiꞌa nédaꞌzaꞌ.

Xraꞌ nasel-le̱ꞌ nedaꞌ dxuchiꞌe̱ tu zren nen nedaꞌ ca naca da dxelún bénneache.

17 Lu da nadxixruj bea chee̱le leꞌe naxúaj gate zaj zraꞌ chupa benneꞌ dxelexeche̱be̱ꞌ tuz ca dxelenné̱ꞌ,

naca da li xrtizraꞌ benneꞌ caꞌ.

18 Nédaꞌquezaꞌ dxexeche̱baꞌ da naca cheé̱zquezaꞌ,

naꞌ Xraꞌ nasel-le̱ꞌ nedaꞌ,

cáꞌanqueze dxexeche̱be̱ꞌ chiaꞌ.

19 Nadxa benneꞌ caꞌ buluche̱be̱ꞌ Jesús:

―¿Ga naꞌ Xrauꞌ?

Jesús beche̱be̱ꞌ:

―Leꞌe quebe núnbeale da nácaquezaꞌ nedaꞌ,

ne quebe núnbeaquezle Xraꞌ.

Chela da li núnbeale nedaꞌ,

cáꞌanqueze núnbeale Xraꞌ.

20 Da caní bchalaj Jesús dxácate̱ naꞌ dxusé̱dene̱ꞌ bénneache chaleꞌaj xudauꞌ naga zaj nnita xiꞌina dumí chee̱ xudauꞌ.

Quebe nu gude̱la Le̱ꞌ laweꞌ da quebe ne zrin zra chee̱ꞌ.

21 Nadxa Jesús guzre̱ꞌ benneꞌ caꞌ:

―Wexáꞌa nedaꞌ,

naꞌ leꞌe xexílajle nedaꞌ,

naꞌ wátele lu dul-la nabágale,

laweꞌ da naga chaꞌa nedaꞌ,

leꞌe quebe gaca saꞌle.

22 Nadxa benneꞌ judío caꞌ gulé̱ ljwezre̱ꞌ:

―¿Gute cuine̱ꞌ,

ne chee̱ le̱ naꞌ dxenné̱ꞌ quebe gaca chéajdxu naga cheaj Le̱ꞌ?

23 Nadxa Jesús guzre̱ꞌ benneꞌ caꞌ:

―Leꞌe nácale chee̱ zran xabáa nigá.

Nedaꞌ nacaꞌ chee̱ xabáa naꞌla.

Leꞌe nácale chee̱ xe̱zr la xu nigá.

Nedaꞌ quebe nacaꞌ chee̱ xe̱zr la xu nigá.

24 Chee̱ le̱ naꞌ guchaꞌ leꞌe wátele lu dul-la nabágale,

laweꞌ da che quebe dxéajle̱le zúaquezaꞌ nedaꞌ,

wátele lu dul-la nabágale.

25 Nadxa benneꞌ caꞌ buluche̱be̱ꞌ Jesús:

―¿Nuzra nacuꞌ Lueꞌ?

Beche̱be Jesús:

―Nácaquezaꞌ ca ba guchaꞌ leꞌe nédxudaute̱.

26 Dé̱le̱ꞌe̱ da dxal-laꞌ nniaꞌ chee̱le,

ne da dxal-laꞌ guchiꞌa ca naca da dxunle.

Bénneaꞌ gusél-le̱ꞌ nedaꞌ dxenné̱ꞌ da li,

naꞌ da dxapaꞌ bénneache naca na da ba bendaꞌ gunné̱ Le̱ꞌ,

lácala quebe dxezaca ba lázrele̱nle na.

27 Benneꞌ caꞌ quebe guléajniꞌine̱ꞌ dxuchálajle̱ Jesús le̱ꞌ ca naca chee̱ Dios,

Xre̱ꞌ.

28 Nadxa Jesús guzre̱ꞌ benneꞌ caꞌ:

―Gate leꞌe chísale sibe nedaꞌ,

Benneꞌ Gulje̱ꞌ Bénneache,

nadxa xúnbeale zúaquezaꞌ nedaꞌ,

ne quebe bi dxunaꞌ da naca cheé̱zquezaꞌ.

Tuze dxennéaꞌ ca da ba bleꞌe Xraꞌ nedaꞌ.

29 Bénneaꞌ gusél-le̱ꞌ nedaꞌ zúale̱queze̱ꞌ nedaꞌ.

Xraꞌ quebe nucáꞌane̱ꞌ nedaꞌ tuzaꞌ laweꞌ da tu dxúnzquezaꞌ ca da dxezaca ba lazreꞌ Le̱ꞌ.

30 Ca gunná Jesús da caní,

guléajle̱ benneꞌ zan chee̱ꞌ.

31 Nadxa Jesús guzre̱ꞌ benneꞌ judío caꞌ,

benneꞌ dxeléajle̱ꞌe̱ chee̱ꞌ:

―Che leꞌe se̱ típale lu da dxapaꞌ leꞌe,

da li nácale nedaꞌ tuze.

32 Gúnbeale da li,

naꞌ da li naꞌ guselá na leꞌe.

33 Belexeche̱be benneꞌ zan caꞌ:

―Netuꞌ nácantuꞌ xrtia Abraham,

ne quebe ne chúꞌuntuꞌ lu naꞌ nu benneꞌ ca benneꞌ zaj nadaꞌu.

¿Bizr chee̱ naꞌ dxennáuꞌ Lueꞌ lantuꞌ?

34 Jesús guzre̱ꞌ benneꞌ caꞌ:

―Da li dxapaꞌ leꞌe,

xúgute̱ benneꞌ dxelúnqueze̱ꞌ dul-la,

dúl-laqueze naꞌ nuxru na benneꞌ caꞌ.

35 Nu benneꞌ xuꞌe̱ lu naꞌ tu benneꞌ ca benneꞌ nadaꞌu quebe tu súazqueze̱ꞌ xuꞌu naꞌ.

Zríꞌinequeze bénneaꞌ wazúatequezebeꞌ.

36 Chee̱ le̱ naꞌ,

che nedaꞌ,

Zriꞌine Xraꞌ,

guseláꞌ leꞌe,

da li láquezle leꞌe.

37 Nezdaꞌ nácale leꞌe xrtia Abraham.

Naꞌa dxaca lázrele gútele nedaꞌ laweꞌ da quebe dxezíꞌ lu naꞌle da dxapaꞌ leꞌe.

38 Nedaꞌ dxuchálajaꞌ ca naca da bleꞌe Xraꞌ nedaꞌ,

naꞌ leꞌe dxunle ca da guzre xráquezle leꞌe.

39 Belexeche̱be benneꞌ caꞌ:

―Xra xrtauntuꞌ naca Abraham.

Naꞌ Jesús guzre̱ꞌ benneꞌ caꞌ:

―Chela nácale da li xrtia Abraham,

naꞌ gunle ca da be̱n Abraham.

40 Lácala guchaꞌ leꞌe da li da bleꞌe Xraꞌ nedaꞌ,

leꞌe dxaca lázrele gútele nedaꞌ.

Abraham cabataꞌ be̱ne̱ꞌ da caní.

41 Leꞌe dxúnquezle ca da dxun xráquezle.

Nadxa benneꞌ caꞌ gulé̱ꞌe̱ Jesús:

―Netuꞌ quebe nácantuꞌ bi lan.

Zua tuze Xrantuꞌ,

Dios.

42 Nadxa Jesús guzre̱ꞌ benneꞌ caꞌ:

―Chela naca Dios da li Xrale,

leꞌe wazríꞌile nedaꞌ laweꞌ da zaꞌa nedaꞌ naga zua Dios,

ne zúaquezaꞌ nigá.

Quebe zaꞌa da naca cheé̱zquezaꞌ.

Dios nasel-le̱ꞌ nedaꞌ.

43 ¿Bizr chee̱ naꞌ quebe dxezéquele chéajniꞌile da dxennéaꞌ?

Naca na laweꞌ da quebe dxaca lázrele xénele dizraꞌ chiaꞌ.

44 Xráquezle leꞌe naca da xriwe̱ꞌ.

Leꞌe nácale chee̱ da naꞌ,

ne dxaca lázrele gunle ca da dxaca lazreꞌ le̱ na.

Da xriwe̱ꞌ naꞌ naca na we̱te benneꞌ nédxudaute̱.

Cabataꞌ dxenné̱ na da li laweꞌ da quebe bi zua da li nen le̱ na.

Gate dxun lazreꞌ na,

dxenné̱ na cáte̱ze naca na,

laweꞌ da tu dxun lázrezqueze na,

ne naca na da guzú lau na be̱n lazreꞌ na.

45 Lácala dxapaꞌ leꞌe da li,

leꞌe quebe dxéajle̱le chiaꞌ.

46 ¿Núlale leꞌe séquele guléꞌele nabaga nedaꞌ tu dul-la?

Che dxennéaꞌ da li,

¿bizr chee̱ naꞌ quebe dxéajle̱le chiaꞌ?

47 Benneꞌ naque̱ꞌ chee̱ Dios dxenne̱ꞌ dizraꞌ chee̱ Dios.

Leꞌe quebe nácale chee̱ Dios.

Chee̱ le̱ naꞌ quebe dxaca lázrele xénele chee̱ Dios.

48 Nadxa benneꞌ judío caꞌ gulé̱ꞌe̱ Jesús:

―Da li dxennantuꞌ gate dxennantuꞌ nacuꞌ benneꞌ Samaria,

ne xuꞌu beꞌ xriwe̱ꞌ.

49 Jesús beche̱be̱ꞌ:

―Quebe xuꞌa beꞌ xriwe̱ꞌ.

Nedaꞌ dxapaꞌ ba láꞌana Xraꞌ Dios,

naꞌ leꞌe dxuzúale nedaꞌ chaláꞌala.

50 Quebe dxeꞌa gunne xue chee̱ gápale nedaꞌ ba láꞌana,

ne siꞌ lu naꞌle nedaꞌ.

Zua Benneꞌ xabáa dxezá lazre̱ꞌ gápale nedaꞌ ba láꞌana,

ne Le̱ꞌ dxuchiꞌe̱ ca da dxunle.

51 Da li dxapaꞌ leꞌe:

Benneꞌ dxune̱ꞌ ca naca dizraꞌ chiaꞌ,

cabataꞌ gátequeze bénneaꞌ.

52 Nadxa benneꞌ judío caꞌ belexeche̱be̱ꞌ:

―Naꞌa nézquezentuꞌ xuꞌu beꞌ xriwe̱ꞌ.

Ba gulátequeze Abraham,

ne xúgute̱ benneꞌ caꞌ buluchálaje̱ꞌ waláz chee̱ Dios,

naꞌ lueꞌ dxennáuꞌ benneꞌ gune̱ꞌ ca naca dizraꞌ chiuꞌ cabataꞌ gátequeze̱ꞌ.

53 ¿Nácadxuꞌ szrendxa ca xra xrtáudxu Abraham?

Gútequeze Le̱ꞌ,

ne cáꞌanqueze gulate benneꞌ caꞌ buluchálaje̱ꞌ waláz chee̱ Dios.

¿Bízraqueze dxugune cuinuꞌ?

54 Beche̱be Jesús:

―Che nedaꞌ dxucáꞌana cuinaꞌ ba láꞌana,

quebe bi zaca na.

Benneꞌ dxape̱ꞌ nedaꞌ ba láꞌana naque̱ꞌ Xraꞌ,

Bénneaꞌ dxennale leꞌe naque̱ꞌ Xrale.

55 Leꞌe quebe núnbeale Le̱ꞌ.

Nedaꞌ núnbeaquezaꞌ Le̱ꞌ.

Chela dxennéaꞌ quebe núnbeꞌa Le̱ꞌ,

nacaꞌ we̱n lazreꞌ ca nácale leꞌe.

Nedaꞌ da li núnbeꞌa Le̱ꞌ,

ne dxunaꞌ ca da dxenné̱ꞌ.

56 Xra xrtáule Abraham,

bénneaꞌ gutie̱ꞌ nédxudaute̱,

gubéle̱ꞌe̱ne̱ꞌ laweꞌ da dxal-laꞌ léꞌene̱ꞌ zra zua nedaꞌ.

Bléꞌene̱ꞌ na,

naꞌ gubéle̱ꞌe̱ne̱ꞌ.

57 Nadxa benneꞌ judío caꞌ gulé̱ꞌe̱ Jesús:

―Québequeze ne suꞌ chi xun iza,

naꞌ ¿dxennáuꞌ bléꞌenuꞌ Abraham?

58 Jesús beche̱be̱ꞌ:

―Da li dxapaꞌ leꞌe,

nédxudaute̱ gate quebe ne sua Abraham,

báchequeze zuaꞌ nedaꞌ.

59 Nadxa gulequé̱ꞌe̱ xiaj chee̱ xeluꞌe̱ Jesús,

naꞌ Le̱ꞌ bcache cuine̱ꞌ.

Bdee̱ꞌ ládujla benneꞌ caꞌ,

naꞌ bedxúaje̱ꞌ chaleꞌaj xudauꞌ,

ne bezé̱ꞌe̱.