Jesús dxexune̱ꞌ tu benneꞌ gúlaje̱ꞌ la chul-la
9
Gate gudé Jesús tu lataj,
naꞌ bléꞌene̱ꞌ tu benneꞌ gúlaje̱ꞌ la chul-la.
2 Benneꞌ caꞌ dxuse̱de Jesús buluche̱be̱ꞌ Le̱ꞌ:
―Benneꞌ Wese̱de,
¿bizr chee̱ naꞌ gulaj benneꞌ nigá la chul-la?
¿Naca na laweꞌ da belún xra xrne̱ꞌe̱ dul-la,
che laweꞌ da be̱n lé̱queze̱ꞌ dul-la?
Jesús cura a un ciego (Juan 9.1-41)
3 Jesús guzre̱ꞌ benneꞌ caꞌ:
―Quebe naca na laweꞌ da be̱n le̱ꞌ dul-la,
ne quebe naca na laweꞌ da belún xra xrne̱ꞌe̱ dul-la.
Naca na chee̱ guléꞌe lau xel-laꞌ szren chee̱ Dios ne̱ chee̱ benneꞌ nigá.
4 Dxácate̱ naca te zra dxal-laꞌ gunaꞌ zrin chee̱ Bénneaꞌ nasel-le̱ꞌ nedaꞌ laweꞌ da ba za da chul-la gate netú benneꞌ quebe sequeꞌ gune̱ꞌ zrin.
5 Dxácate̱ ne zuaꞌ nedaꞌ xe̱zr la xu nigá,
nacaꞌ xel-laꞌ naxaníꞌ chee̱ bénneache.
6 Ca gudé gunná Jesús da nigá,
naꞌ bzre̱ꞌe̱ zrene̱ꞌ lu xu,
ne be̱ne̱ꞌ gunaꞌ nen zrene̱ꞌ naꞌ,
naꞌ btupe̱ꞌ na xiaj lau benneꞌ la chul-la naꞌ.
7 Nadxa guzre̱ꞌ le̱ꞌ:
―Guxíaj xeajtibe lauꞌ lu beaj nisa nazí le na Siloé.
(Dizraꞌ nigá zéaje̱ na:
Da Nasel-la Na.)
Benneꞌ la chul-la naꞌ guxíaje̱ꞌ xeajtibe lawe̱ꞌ,
naꞌ gate bezrine̱ꞌ ba dxeléꞌene̱ꞌ.
8 Nadxa benneꞌ walízr chee̱ꞌ caꞌ,
ne benneꞌ caꞌ beleléꞌene̱ꞌ le̱ꞌ nédxula,
naque̱ꞌ la chul-la,
gulenné̱ꞌ:
―¿Quegá benneꞌ nigá bénneaꞌ dxebéꞌe̱ dxenabe̱ꞌ gunaꞌ?
9 Bal-le̱ꞌ gulenné̱ꞌ:
―Le̱ꞌ naꞌ.
Xebal-le̱ꞌ gulenné̱ꞌ:
―Quegá le̱ꞌ naꞌ,
naꞌ caꞌan ca dxenné̱ꞌe̱.
Benneꞌ náꞌqueze gunné̱ꞌ:
―Nedaꞌ naꞌ.
10 Nadxa buluche̱be̱ꞌ le̱ꞌ:
―¿Ájazra naꞌ ba dxeléꞌenuꞌ?
11 Beche̱be bénneaꞌ:
―Bénneaꞌ le̱ꞌ Jesús be̱ne̱ꞌ gunaꞌ,
ne btupe̱ꞌ na xiaj lawaꞌ,
naꞌ gunné̱ꞌ:
“Guxíaj beaj nisa nazí le na Siloé,
xeajtibe lauꞌ.”
Guxáꞌa naꞌ,
naꞌ gate gudibaꞌ lawaꞌ,
guca bleꞌedaꞌ.
12 Nadxa buluche̱be̱ꞌ le̱ꞌ:
―¿Ga naꞌ zua bénneaꞌ?
Le̱ꞌ guzre̱ꞌ benneꞌ caꞌ:
―Quebe nezdaꞌ.
Benneꞌ fariseo caꞌ dxuluche̱be̱ꞌ bénneaꞌ guque̱ꞌ la chul-la
13 Nadxa benneꞌ caꞌ guleché̱ꞌe̱ bénneaꞌ guque̱ꞌ la chul-la lau benneꞌ fariseo caꞌ.
14 Naca na zra dxulupáꞌana judío caꞌ gate be̱n Jesús gunaꞌ,
ne btupe̱ꞌ na xiaj lau benneꞌ la chul-la naꞌ.
15 Chee̱ le̱ naꞌ benneꞌ fariseo caꞌ buluche̱be̱ꞌ bénneaꞌ guque̱ꞌ la chul-la ájazra guca dxeléꞌene̱ꞌ.
Le̱ꞌ guzre̱ꞌ benneꞌ caꞌ:
―Bzrie̱ꞌ gunaꞌ xiaj lawaꞌ,
naꞌ bexibaꞌ na,
ne dxeléꞌedaꞌ.
16 Nadxa bal-la benneꞌ judío caꞌ gulenné̱ꞌ:
―Bénneaꞌ be̱ne̱ꞌ da nigá quebe naque̱ꞌ chee̱ Dios laweꞌ da quebe dxape̱ꞌ ba láꞌana zra dxupáꞌanadxu.
Naꞌ xebal-le̱ꞌ gulenné̱ꞌ:
―¿Ájazra naꞌ dxune̱ꞌ xel-laꞌ waca zrente̱ caní che naque̱ꞌ benneꞌ dul-la?
Caꞌan guca,
gulaca chupa laꞌa benneꞌ fariseo caꞌ.
17 Xecha lasa buluche̱be̱ꞌ bénneaꞌ guque̱ꞌ la chul-la:
―¿Bi dxennáuꞌ lueꞌ chee̱ bénneaꞌ bexune̱ꞌ lueꞌ?
Le̱ꞌ gunné̱ꞌ:
―Nedaꞌ dxennéaꞌ naque̱ꞌ benneꞌ dxuchalaje̱ꞌ waláz chee̱ Dios.
18 Benneꞌ judío caꞌ quebe guléajle̱ꞌe̱ guque̱ꞌ la chul-la,
ne naꞌa dxeléꞌene̱ꞌ,
naꞌ gulenné̱ꞌ xra xrna bénneaꞌ bexaque̱ꞌ.
19 Naꞌ buluche̱be̱ꞌ xra xrna bénneaꞌ:
―¿Nácaqueze benneꞌ nigá zríꞌinele,
dxennale leꞌe gúlaje̱ꞌ la chul-la?
¿Ájazra naꞌ dxaca dxeléꞌene̱ꞌ?
20 Belexeche̱be xra xrne̱ꞌe̱:
―Nézentuꞌ benneꞌ nigá naque̱ꞌ zríꞌinentuꞌ,
ne gúlaje̱ꞌ la chul-la.
21 Quebe nézentuꞌ aja guca dxeléꞌene̱ꞌ naꞌa,
ne quebe nézentuꞌ nu bexún xiaj lawe̱ꞌ.
Le guche̱be le̱ꞌ.
Ba nápaqueze̱ꞌ iza,
ne waca xeché̱bequeze̱ꞌ.
22 Caní gulenná xra xrne̱ꞌe̱ lu xel-laꞌ dxelezrebe laweꞌ da ba zaj nun benneꞌ xíchaje̱ chee̱ judío caꞌ tuze dizraꞌ xelexebéaje̱ꞌ xuꞌu naꞌ nútete̱ze benneꞌ xeche̱be̱ꞌ Jesús naque̱ꞌ Cristo.
23 Chee̱ le̱ naꞌ gulenná xra xrne̱ꞌe̱:
“Le guche̱be le̱ꞌ.
Ba nápaqueze̱ꞌ iza.”
24 Nadxa benneꞌ judío caꞌ belenné̱ꞌ bénneaꞌ guque̱ꞌ la chul-la,
naꞌ gulé̱ꞌe̱ le̱ꞌ:
―¡Gunné̱ da li lau Dios!
Nézentuꞌ naca benneꞌ nigá benneꞌ dul-la.
25 Le̱ꞌ beche̱be̱ꞌ:
―Quebe nezdaꞌ che naque̱ꞌ benneꞌ dul-la,
che cabí.
Tuze da nezdaꞌ.
Nedaꞌ gucaꞌ la chul-la,
naꞌ naꞌa dxeléꞌedaꞌ.
26 Naꞌ buluché̱bequeze̱ꞌ le̱ꞌ:
―¿Bizra be̱ne̱ꞌ chiuꞌ?
¿Ájazra be̱ne̱ꞌ chee̱ bexune̱ꞌ xiaj lauꞌ?
27 Naꞌ beche̱be bénneaꞌ:
―Ba guchaꞌ leꞌe,
ne quebe dxénele chiaꞌ.
¿Bizr chee̱ naꞌ dxaca lázrele nniaꞌ xetú?
¿Cáꞌanqueze leꞌe dxaca lázrele gácale Le̱ꞌ tuze?
28 Nadxa benneꞌ judío caꞌ gulenné̱ꞌ schanniꞌ chee̱ bénneaꞌ guque̱ꞌ la chul-la,
dxelenné̱ꞌ:
―Lueꞌ daꞌu bénneaꞌ,
naꞌ netuꞌ daꞌntuꞌ Moisés.
29 Netuꞌ nézentuꞌ Dios bchálajle̱ne̱ꞌ Moisés.
Quebe nézentuꞌ ga benneꞌ benneꞌ nigá.
30 Nadxa bénneaꞌ beche̱be̱ꞌ:
―Da nigá naca na da dxebánedaꞌ.
Leꞌe quebe nézele ga bénneaꞌ,
naꞌ bexune̱ꞌ xiaj lawaꞌ.
31 Nézquezdxu Dios quebe dxenne̱ꞌ chee̱ benneꞌ dul-la.
Tuze dxenne̱ꞌ chee̱ benneꞌ caꞌ dxulucáꞌana szrene̱ꞌ Le̱ꞌ,
ne dxelune̱ꞌ ca da dxaca lazreꞌ Le̱ꞌ.
32 Quebe ne xendxu che nu benneꞌ xexune̱ꞌ tu benneꞌ gúlaje̱ꞌ la chul-la.
33 Chela benneꞌ nigá quebe naque̱ꞌ chee̱ Dios,
quebe gaca bi gune̱ꞌ.
34 Nadxa gulé̱ꞌe̱ le̱ꞌ:
―Ca gúlajquezuꞌ dxuléꞌe na nabaguꞌ dul-la.
Naꞌa,
¿dxaca lazruꞌ guzéajniꞌinuꞌ netuꞌ?
Nadxa belexebéaje̱ꞌ le̱ꞌ lu xuꞌu naꞌ.
Benneꞌ zaj naque̱ꞌ la chul-la lu xichaj lázrdawe̱ꞌ
35 Jesús benne̱ꞌ belexebéaje̱ꞌ bénneaꞌ guque̱ꞌ la chul-la,
naꞌ gate bezrague̱ꞌ le̱ꞌ,
guzre̱ꞌ le̱ꞌ:
―¿Dxéajle̱ꞌu lueꞌ chee̱ Zriꞌine Dios?
36 Benneꞌ naꞌ guzre̱ꞌ Jesús:
―Xran,
guzre nedaꞌ Nu naꞌ,
chee̱ chéajle̱ꞌa chee̱ꞌ.
37 Beche̱be Jesús:
―Ba bléꞌequeznuꞌ Le̱ꞌ.
Nedaꞌ,
dxuchálajle̱naꞌ lueꞌ nacaꞌ Bénneaꞌ.
38 Nadxa benneꞌ naꞌ bzu zribe̱ꞌ lau Jesús,
naꞌ gunné̱ꞌ:
―Dxéajle̱ꞌa chiuꞌ,
Xran.
39 Nadxa gunná Jesús:
―Nedaꞌ blaꞌa lu xe̱zr la xu nigá chee̱ guchiꞌa ca da dxelún bénneache,
chee̱ xeleléꞌe la chul-la caꞌ,
ne chee̱ xelexaca ca la chul-la benneꞌ caꞌ dxelenné̱ꞌ dxeleléꞌene̱ꞌ.
40 Nadxa bal-la benneꞌ fariseo caꞌ,
benneꞌ zaj zre̱ꞌe̱ nen Jesús,
gate belenne̱ꞌ da nigá gunná Jesús,
buluche̱be̱ꞌ Le̱ꞌ:
―¿Cáꞌanqueze netuꞌ nácantuꞌ la chul-la?
41 Jesús beche̱be̱ꞌ:
―Chela nácale leꞌe la chul-la quebe nabágale ca naca dul-la da be̱nle.
Dxennale dxeléꞌele,
naꞌ chee̱ le̱ naꞌ nabágale dul-la.