Dxuchalaj Jesús da dxuléꞌe na ca naca chee̱ leꞌaj chee̱ zrilaꞌ caꞌ
10
Naꞌ gunná Jesús:
―Da li dxapaꞌ leꞌe,
bénneaꞌ quebe dxuꞌe̱ dxuꞌa dxa xuꞌu chee̱ leꞌaj chee̱ zrilaꞌ caꞌ,
naꞌ dxuꞌe̱ naga xula,
naque̱ꞌ gubán,
ne tu dxebánzqueze̱ꞌ.
2 Bénneaꞌ dxuꞌe̱ dxuꞌa dxa xuꞌu naꞌ naque̱ꞌ benneꞌ dxuxúequeze̱ꞌ zrilaꞌ caꞌ.
Jesús el buen pastor (Juan 10.1-21)
3 Bénneaꞌ zue̱ꞌ dxuꞌa dxa xuꞌu dxesálaje̱ꞌ chee̱ chuꞌu bénneaꞌ dxuxúequeze̱ꞌ-baꞌ,
naꞌ zrilaꞌ caꞌ dxelexúnbeabaꞌ chiꞌe̱.
Benneꞌ nigá dxuꞌe̱ la tu tu zrilaꞌ caꞌ,
ne dxebéaje̱ꞌ-baꞌ lu leꞌaj chee̱baꞌ.
4 Ca dxedé dxebéaje̱ꞌ xúgute̱baꞌ,
naꞌ dxebía lawe̱ꞌ laubaꞌ,
naꞌ zrilaꞌ caꞌ zjácale̱baꞌ Le̱ꞌ,
laweꞌ da dxelexúnbeabaꞌ chiꞌe̱.
5 Quebe zjácale̱baꞌ tu benneꞌ quebe zaj núnbeabaꞌ.
Dxuluzrúnnujbaꞌ lau benneꞌ naꞌ laweꞌ da quebe dxelexúnbeabaꞌ chiꞌi benneꞌ quebe zaj núnbeabaꞌ.
6 Bchálajle̱ Jesús benneꞌ caꞌ da dxuléꞌe nigá,
naꞌ benneꞌ caꞌ quebe guléajniꞌine̱ꞌ bi zéaje̱ da guzre Jesús le̱ꞌ.
Jesús naque̱ꞌ benneꞌ chaweꞌ dxuxúe̱ꞌ zrilaꞌ caꞌ
7 Nadxa Jesús guzre̱ꞌ benneꞌ caꞌ da xula:
―Da li dxapaꞌ leꞌe,
nedaꞌ nacaꞌ dxa xuꞌu naga dxelúꞌu bénneache zaj naque̱ꞌ ca zrilaꞌ chiaꞌ caꞌ.
8 Xúgute̱ benneꞌ dxuluxúe̱ꞌ zrilaꞌ,
benneꞌ belelé̱ꞌe̱ nédxudxa ca nedaꞌ,
gulaque̱ꞌ gubán,
ne tu gulebánzqueze̱ꞌ.
Zrilaꞌ caꞌ quebe belénebaꞌ chee̱ benneꞌ caꞌ.
9 Nedaꞌ nacaꞌ dxa xuꞌu.
Bénneaꞌ chuꞌe̱ ne̱ chiaꞌ nedaꞌ,
láqueze bénneaꞌ.
Gaque̱ꞌ ca tu zrilaꞌ dxuꞌubaꞌ,
ne dxuajbaꞌ leꞌaj chee̱baꞌ,
naꞌ dxezrélebaꞌ zríe̱du dxágubaꞌ.
10 ’Benneꞌ gubán ze̱ꞌe̱ tuze chee̱ cuane̱ꞌ-baꞌ,
ne chee̱ gútete̱ꞌ-ba,
ne chee̱ guzría xiꞌte̱ꞌ-baꞌ.
Nedaꞌ blaꞌa chee̱ gápale xel-laꞌ nabán,
ne chee̱ gapa xánnele na.
11 Nedaꞌ nacaꞌ benneꞌ chaweꞌ dxuxúaꞌ zrilaꞌ caꞌ.
Benneꞌ chaweꞌ dxuxúe̱ꞌ zrilaꞌ caꞌ dxuzúe̱ꞌ xel-laꞌ nabán chee̱ꞌ chee̱ guselé̱ꞌ zrilaꞌ caꞌ.
12 Benneꞌ dxuxúe̱ꞌ-baꞌ laweꞌ da dxeziꞌe̱ lazruj,
gate dxeléꞌene̱ꞌ za becuꞌ xiꞌa,
naꞌ dxusane̱ꞌ zrilaꞌ caꞌ,
ne dxuzrúnnuje̱ꞌ,
laweꞌ da quebe nácaqueze̱ꞌ benneꞌ dxuxúe̱ꞌ le̱baꞌ,
naꞌ zrilaꞌ caꞌ quebe zaj nácabaꞌ be̱ cheé̱zqueze̱ꞌ.
13 Benneꞌ nigá dxuzrúnnuje̱ꞌ laweꞌ da dxunze̱ꞌ zrin chee̱ siꞌe̱ lázruje̱ꞌ,
naꞌ quebe dxeꞌe̱ gunne xue chee̱baꞌ.
14-15 ’Nedaꞌ nacaꞌ benneꞌ chaweꞌ dxuxúaꞌ zrilaꞌ caꞌ.
Cáte̱ze núnbea Xraꞌ nedaꞌ,
naꞌ nedaꞌ núnbeꞌa Xraꞌ,
cáꞌanqueze nedaꞌ núnbeꞌa zrilaꞌ chiaꞌ caꞌ,
naꞌ le̱baꞌ zaj núnbeabaꞌ nedaꞌ.
Nedaꞌ dxuzúaꞌ xel-laꞌ nabán chiaꞌ chee̱ guseláꞌ zrilaꞌ caꞌ.
16 Cáꞌanqueze zaj zraꞌ zrilaꞌ chiaꞌ quebe zaj zrabaꞌ lu leꞌaj nigá.
Dxal-laꞌ cheajxexriꞌa-baꞌ.
Zrilaꞌ caꞌ xelunbaꞌ ca dxenná xrtizraꞌ,
ne xelácabaꞌ tu cueze,
naꞌ tuze benneꞌ guxúe̱ꞌ le̱baꞌ.
17 ’Xraꞌ nazríꞌine̱ꞌ nedaꞌ laweꞌ da dxuzúaꞌ xel-laꞌ nabán chiaꞌ,
naꞌ xecáꞌa na.
18 Quebe nu sequeꞌ cua xel-laꞌ nabán chiaꞌ.
Nedaꞌ xuzúaꞌ na cáte̱ze dxaca lázrequezaꞌ nedaꞌ.
Napaꞌ xel-laꞌ dxenná bea guzúaꞌ na,
ne chee̱ xecáꞌa na.
Da nigá naca na da gunná beꞌe Xraꞌ nedaꞌ gunaꞌ.
19 Gate benneꞌ judío caꞌ belenne̱ꞌ dizraꞌ caní,
naꞌ gulaque̱ꞌ chupa laꞌa xetú.
20 Benneꞌ zan benneꞌ caꞌ gulenné̱ꞌ:
―¿Bizr chee̱ naꞌ dxuzé̱ nágale chee̱ benneꞌ nigá?
Xuꞌe̱ beꞌ xriwe̱ꞌ,
ne nadá xichaj lázrdawe̱ꞌ.
21 Xebal-le̱ꞌ gulenné̱ꞌ:
―Tu benneꞌ xuꞌe̱ beꞌ xriwe̱ꞌ quebe séquene̱ꞌ guchálaje̱ꞌ caní.
¿Waca tu beꞌ xriwe̱ꞌ xexún na xiaj lau tu benneꞌ la chul-la?
Dxuluzúa benneꞌ judío caꞌ Jesús chaláꞌala
22 Naca na beuꞌ zaga,
naꞌ lu xe̱zre Jerusalén zaj zue̱ꞌ laní gate dxulusá lazre̱ꞌ ca guca gate gulegúꞌe̱ xudauꞌ naꞌ lu naꞌ Dios.
Jesús acusado de blasfemia (Juan 10.22-42)
23 Jesús dxedé̱ꞌ chaleꞌaj xudauꞌ naꞌ naga naca lachila chee̱ Salomón.
24 Nadxa benneꞌ judío caꞌ guléchaje̱ꞌ Le̱ꞌ,
ne gulé̱ꞌe̱ Le̱ꞌ:
―¿Bátalaqueze québedxa gunuꞌ lueꞌ chupa lázrentuꞌ?
Che lueꞌ nacuꞌ Cristo,
Bénneaꞌ sel-la Dios,
gunnáte̱gala.
25 Beche̱be Jesús:
―Ba guchaꞌ leꞌe,
naꞌ quebe guxéajle̱le chiaꞌ.
Ca naca da dxunaꞌ nedaꞌ,
ne dxuchínedaꞌ xel-laꞌ dxenná bea chee̱ Xraꞌ,
dxululéꞌe na nu nacaꞌ nedaꞌ.
26 Leꞌe quebe dxéajle̱le chiaꞌ laweꞌ da quebe nácale zrilaꞌ chiaꞌ,
ca ba guchaꞌ leꞌe nédxula.
27 Zrilaꞌ chiaꞌ dxelexúnbeabaꞌ chiꞌa,
naꞌ nedaꞌ núnbeꞌa-baꞌ,
naꞌ le̱baꞌ dxelaubaꞌ nedaꞌ.
28 Benneꞌ zaj naque̱ꞌ zrilaꞌ chiaꞌ,
dxunézrujaꞌ chee̱ benneꞌ caꞌ xel-laꞌ nabán da zeajlí canna,
ne cabátaꞌquezdxa xelebía xiꞌe̱,
naꞌ quebe nu sequeꞌ xecáꞌa le̱ꞌ lu naꞌa nedaꞌ.
29 Xraꞌ be̱nne̱ꞌ nedaꞌ benneꞌ caní,
naꞌ Le̱ꞌ nácadxe̱ꞌ szren ca xúgute̱ bénneache,
naꞌ quebe nu sequeꞌ xecáꞌa benneꞌ caꞌ lu naꞌ Xraꞌ.
30 Nedaꞌ,
ne Xraꞌ tuze nácantuꞌ.
31 Nadxa benneꞌ judío caꞌ gulequé̱ꞌe̱ xiaj xetú chee̱ xelútie̱ꞌ Jesús.
32 Nadxa Jesús guzre̱ꞌ benneꞌ caꞌ:
―Ba bé̱nquezaꞌ da zan da chaweꞌ laule leꞌe,
dxuchínedaꞌ xel-laꞌ waca chee̱ Xraꞌ.
¿Nula chee̱ da chaweꞌ caní güele nedaꞌ xiaj?
33 Belexeche̱be benneꞌ judío caꞌ:
―Quebe güentuꞌ lueꞌ xiaj laweꞌ da nunuꞌ da chaweꞌ.
Dxuntuꞌ na laweꞌ da gunnéuꞌ schanniꞌ chee̱ Dios.
Lueꞌ nacuꞌ bénneache,
naꞌ dxun cuinuꞌ Dios.
34 Nadxa Jesús guzre̱ꞌ benneꞌ caꞌ:
―Lu da nadxixruj bea chee̱le leꞌe naxúaj xrtizraꞌ Dios,
dxenná na:
Leꞌe nácale dios caꞌ.
35 Quebe gaca tábagadxu ca da naxúaj na lu xiche chee̱ Dios,
naꞌ Diósqueze̱ꞌ gunné̱ꞌ chee̱ benneꞌ caꞌ gulezíꞌe̱ xrtizre̱ꞌ zaj naque̱ꞌ dios caꞌ.
36 Che Dios bzue̱ꞌ nedaꞌ,
ne gusél-le̱ꞌ nedaꞌ lu xe̱zr la xu nigá,
¿bizr chee̱ naꞌ dxennale leꞌe gunnéaꞌ schanniꞌ chee̱ Dios laweꞌ da gunnéaꞌ nacaꞌ Zriꞌine Dios?
37 Che quebe dxunaꞌ ca naca da dxun Xraꞌ,
quebe chéajle̱le chiaꞌ.
38 Che dxunaꞌ na,
lácala quebe dxéajle̱le chiaꞌ ne̱ chee̱ da dxennéaꞌ,
le chéajle̱ chiaꞌ ne̱ chee̱ da caꞌ dxunaꞌ,
chee̱ nézele Xraꞌ zúale̱ne̱ꞌ nedaꞌ,
naꞌ nedaꞌ zúale̱naꞌ Xraꞌ.
39 Xetú lasa gulaca lazre̱ꞌ xele̱l-le̱ꞌ Jesús,
naꞌ Le̱ꞌ gulé̱ꞌ lu naꞌ benneꞌ caꞌ.
40 Nadxa bezrín Jesús dxuꞌa xe̱gu Jordán chaláꞌa naga dxalaj gubizra,
naꞌ begáꞌane̱ꞌ naꞌ,
naga guzúa Juan nédxute̱ dxuchúe̱ꞌ bénneache nisa.
41 Benneꞌ zan xjaque̱ꞌ xeajlenné̱ꞌe̱ Jesús,
naꞌ gulenné̱ꞌ:
―Juan,
da li quebe bi xel-laꞌ waca zren be̱ne̱ꞌ,
naꞌ xúgute̱ da gunné̱ꞌ ca naca chee̱ benneꞌ nigá naca na da li.
42 Benneꞌ zan guléajle̱ꞌe̱ chee̱ Jesús lataj naꞌ.