4 Benneꞌ zan beledxúaje̱ꞌ lu xe̱zre caꞌ chee̱ xeleléꞌene̱ꞌ Jesús,

naꞌ gate belezraga benneꞌ zan naga zue̱ꞌ,

naꞌ bchálaje̱ꞌ tu da dxuléꞌe na,

dxe̱ꞌe̱ le̱ꞌ:

5 ―Tu benneꞌ dxaze̱ꞌ guzé̱ꞌe̱ zjaze̱ꞌ zruaꞌ xtila.

Ca zéaje̱ꞌ dxaze̱ꞌ na,

bal-la bínnedu caꞌ xeajlechaze na dxuꞌa neza,

naꞌ benneꞌ caꞌ bululéaje̱ꞌ na,

naꞌ belezrín bxínnedauꞌ gulágubaꞌ na.

6 Xebal-la bínnedu caꞌ xeajlechaze na lu xiaj caꞌ,

naꞌ gate bínnedu caní belezría na,

chadite̱ gulebizre na,

laweꞌ da quebe gudxéꞌ gupaꞌ.

7 Xebal-la bínnedu caꞌ xeajlechaze na naga zaj dxeꞌ lue xecheꞌ,

naꞌ bululule xecheꞌ caꞌ le̱ na.

8 Xebal-la bínnedu caꞌ xeajlechaze na lu xu be̱be,

naꞌ gate belegula na,

naꞌ gulezríale̱ꞌe̱ na.

Bal-la na gulezría na tu gaxúa weaj.

Gate bexuzre bchalaj Jesús da nigá,

naꞌ gunné̱ꞌ zizraj:

―¡Che leꞌe zua nágale,

le xene!

9 Nadxa benneꞌ caꞌ dxuse̱de Jesús gulenábene̱ꞌ Le̱ꞌ bizra zéaje̱ da dxuléꞌe nigá.

10 Jesús guzre̱ꞌ le̱ꞌ:

―Dios dxuzéajniꞌine̱ꞌ leꞌe ca naca da nagache chee̱ xel-la dxenná bea chee̱ꞌ,

san benneꞌ xula,

dxuchálajle̱naꞌ le̱ꞌ da dxuléꞌe na caní,

chee̱ gate dxeleléꞌene̱ꞌ xelaque̱ꞌ ca benneꞌ quebe dxeleléꞌene̱ꞌ,

ne gate dxelenne̱ꞌ quebe dxeléajniꞌine̱ꞌ.

11 Naꞌ gunná Jesús:

―Da nigá naca ca zéaje̱ da dxuléꞌe naꞌ:

Bínnedu caꞌ zéaje̱ na xrtizraꞌ Dios.

12 Bínnedu caꞌ xeajlechaze na dxuꞌa neza zéaje̱ na benneꞌ caꞌ dxelenne̱ꞌ xrtizraꞌ Dios,

san zaꞌ da xriwe̱ꞌ,

naꞌ dxegúa na dizraꞌ naꞌ lu xichaj lázrdau benneꞌ caꞌ,

chee̱ quebe xeléajle̱ꞌe̱,

ne quebe xelelé̱ꞌ.

13 Bínnedu caꞌ xeajlechaze na lu xiaj caꞌ zéaje̱ na benneꞌ caꞌ dxelenne̱ꞌ dizraꞌ naꞌ,

ne dxeleziꞌe̱ na dute̱ xel-la dxelebé,

san quebe dxaze na lu xichaj lázrdawe̱ꞌ.

Dxeléajle̱ꞌe̱ tu chíꞌidauꞌze,

naꞌ gate dxeledée̱ꞌ lu da ziꞌ da xaꞌ,

naꞌ dxulusán lazre̱ꞌ na.

14 Bínnedu caꞌ xeajlechaze na naga zaj dxeꞌ lue xecheꞌ zéaje̱ na benneꞌ caꞌ dxelenne̱ꞌ dizraꞌ naꞌ,

naꞌ dxeajxaque̱ꞌ,

naꞌ laweꞌ da dxeleze̱ne̱ꞌ gunne xue da zante̱,

ne dxelezé̱ lazre̱ꞌ xel-la gunníꞌa,

ne da xeleꞌaj xelawe̱ꞌ da zácale̱ꞌe̱,

naꞌ xúgute̱ da caní dxulusunite na dizraꞌ naꞌ,

naꞌ quebe dxun na zrin lu xichaj lázrdawe̱ꞌ.

15 Naꞌ bínnedu caꞌ xeajlechaze na lu xu be̱be zéaje̱ na benneꞌ caꞌ zua chaweꞌ,

ne du lazreꞌ lázrdawe̱ꞌ,

naꞌ gate dxelenne̱ꞌ dizraꞌ naꞌ,

dxuluzúa chache̱ꞌ na,

naꞌ dxun zrin dizraꞌ naꞌ lu xichaj lázrdawe̱ꞌ.

16 Gunná Jesús:

―Netú benneꞌ che gugale̱ꞌ da dxegúꞌu leníꞌ,

quebe gudúsie̱ꞌ na tu xiꞌina,

u zranle ga dxasie̱ꞌ,

san guzúe̱ꞌ na sibe,

chee̱ cuꞌu leníꞌ na chee̱ benneꞌ zaj zre̱ꞌe̱ lu xuꞌu naꞌ.

17 Quebe bi de̱ da nagacheꞌ da quebe guléꞌe lau na,

ne quebe bi xuꞌu lu xichaj lázrdau bénneache da quebe gaca bea na,

ne láꞌte̱queze na.

18 ’Chee̱ le̱ naꞌ,

le xene xanneꞌ.

Tu benneꞌ naziꞌe̱ xrtizraꞌ Dios,

wazidxe̱ꞌ,

san benneꞌ quebe dxeziꞌe̱ na,

wegáꞌa ca da du dxéquene̱ꞌ nape̱ꞌ.

19 Nadxa xrna Jesús,

ne benneꞌ biche̱ꞌ caꞌ belezrine̱ꞌ naga zue̱ꞌ,

san quebe gulezéquene̱ꞌ xelezrine̱ꞌ lau Leꞌ,

laweꞌ da zrále̱ꞌe benneꞌ zan ga naꞌ.

20 Tu benneꞌ naꞌ bzenne̱ꞌ Jesús,

gunné̱ꞌ:

―Xrnaꞌu,

ne bi bichuꞌ caꞌ zaj zre̱ꞌe̱ chaleꞌaj nigá,

dxelaca lazre̱ꞌ xuluchálajle̱ne̱ꞌ Lueꞌ.

21 Jesús guzre̱ꞌ le̱ꞌ:

―Benneꞌ caꞌ dxelenne̱ꞌ xrtizraꞌ Dios,

ne dxelune̱ꞌ ca dxenná na,

benneꞌ caní zaj naque̱ꞌ ca xrnaꞌa,

ne benneꞌ bíchaꞌdauꞌ caꞌ.

22 Tu zra guxúꞌu Jesús tu lu da dxedá laweꞌ nísadauꞌ nen benneꞌ caꞌ dxusé̱dene̱ꞌ,

naꞌ guzre̱ꞌ le̱ꞌ:

―Cheajdxu xecha laꞌa nísadauꞌ.

Naꞌ gusiáꞌque̱ꞌ,

23 ne dxácate̱ zjaque̱ꞌ lu nísadauꞌ naꞌ,

guse Jesús.

Naꞌ guzú lau dxácale̱ꞌe̱ beꞌ bdunuꞌ lu nísadauꞌ,

naꞌ guzú lau dxuꞌu nisa lu da dxedá laweꞌ nísadauꞌ naꞌ,

ne ba dxácate̱ waxaze na lu nísadauꞌ.

24 Nadxa bulusebane̱ꞌ Jesús,

dxelé̱ꞌe̱ Le̱ꞌ:

―¡Benneꞌ Wese̱de!

¡Benneꞌ Wese̱de!

¡Ba dxázedxu lu nisa nigá!

Nadxa guxasa Jesús,

naꞌ gudil-le̱ꞌ beꞌ bdunuꞌ naꞌ,

ne nisa naꞌ,

naꞌ ca naca da caꞌ belezúa zri na.

25 Nadxa Jesús guzre̱ꞌ benneꞌ caꞌ dxusé̱dene̱ꞌ:

―¿Quebe ne chéajle̱le chee̱ Dios?

Benneꞌ caꞌ belezrebe̱ꞌ,

ne belexebánene̱ꞌ,

naꞌ buluche̱be ljwezre̱ꞌ:

―¿Núzraqueze benneꞌ nigá,

dxenná béꞌene̱ꞌ beꞌ,

ne nisa,

naꞌ dxuluzúa na dizraꞌ chee̱ꞌ?

26 Nadxa belezrine̱ꞌ xecha laꞌa nisa lu xe̱zr la xu chee̱ xe̱zre Gadara,

chaláꞌa caꞌala chee̱ Galilea.

27 Gate bedxúaj Jesús lu da dxedá laweꞌ nísadauꞌ naꞌ,

naꞌ bzrin tu benneꞌ xe̱zre naꞌ lau Le̱ꞌ.

Zánete̱ iza ba guca xuꞌu beꞌ xriwe̱ꞌ caꞌ benneꞌ nigá.

Quebe gúcue̱ꞌ zra lane̱ꞌ,

ne quebe guzúe̱ꞌ netú lu xuꞌu,

san xeajchuꞌe̱ tu lu ba caꞌ.

28 Gate bléꞌene̱ꞌ Jesús,

naꞌ xeajzú zribe̱ꞌ lau Le̱ꞌ,

naꞌ gudxezre xe̱ꞌe̱,

dxenné̱ꞌ:

―¿Bizr chee̱ naꞌ zaꞌu naga zuaꞌ,

Jesús,

Zriꞌine Dios szrente̱?

Dxataꞌ xuedaꞌ Lueꞌ quebe gusaca ziꞌu nedaꞌ.

29 Gunná na caní laweꞌ da ba gunná beꞌe Jesús beꞌ xriwe̱ꞌ caꞌ xelexedxúaj na lu xichaj lázrdau benneꞌ nigá.

Zaneꞌ lasa beꞌ xriwe̱ꞌ caꞌ ba gule̱la na benneꞌ nigá.

Benneꞌ xe̱zre naꞌ gule̱le̱ꞌ benneꞌ nigá,

ne buluchéaje̱ꞌ le̱ꞌ niꞌa ne̱ꞌe̱ nen du xia,

san le̱ꞌ bzúzxuje̱ꞌ du xia naꞌ,

naꞌ beꞌ xriwe̱ꞌ caꞌ guleché̱ na le̱ꞌ le̱ꞌe̱ xixreꞌ laweꞌ lataj.

30 Jesús bche̱be̱ꞌ beꞌ xriwe̱ꞌ caꞌ:

―¿Bi le̱le?

Naꞌ beche̱be le̱ na:

―Nedaꞌ leaꞌ:

Da Zan.

Caꞌ gunná na laweꞌ da xuꞌu beꞌ xriwe̱ꞌ zante̱ benneꞌ naꞌ.

31 Beꞌ xriwe̱ꞌ caꞌ gulenaba na Jesús quebe sel-le̱ꞌ na lataj chul-la.

32 Lu xiꞌa naga zua Jesús,

naꞌ zrále̱ꞌe̱ cuche zan dxelágubaꞌ,

naꞌ beꞌ xriwe̱ꞌ caꞌ gulataꞌ xue na Jesús guꞌe̱ lataj da caꞌ cheajxezrá na lu cuche caꞌ,

naꞌ bnezruj Jesús na lataj.

33 Nadxa beꞌ xriwe̱ꞌ caꞌ belexedxúaj na lu xichaj lázrdau benneꞌ naꞌ,

naꞌ gulúꞌu na lu cuche caꞌ,

naꞌ xúgute̱ cuche caꞌ buluzrúnnujbaꞌ,

ne gulebíxrebaꞌ dxuꞌa chjéa,

naꞌ xeajlecházebaꞌ lu nísadauꞌ,

naga gulé̱pebaꞌ,

gulátebaꞌ.

34 Benneꞌ caꞌ dxuluxúe̱ꞌ cuche caꞌ,

gate beleléꞌene̱ꞌ ca da guca,

naꞌ buluzrúnnuje̱ꞌ lu xel-la dxelezrebe,

naꞌ gulé̱ꞌe̱ benneꞌ zaj zre̱ꞌe̱ le̱ꞌe̱ xixreꞌ,

ne benneꞌ zaj zre̱ꞌe̱ laweꞌ xe̱zre ca da guca.

35 Nadxa benneꞌ caꞌ beledxúaje̱ꞌ xeajlenné̱ꞌe̱ ca da guca.

Gate belezrine̱ꞌ naga zua Jesús,

naꞌ beleléꞌene̱ꞌ bénneaꞌ belexedxúaj beꞌ xriwe̱ꞌ caꞌ lu xichaj lázrdawe̱ꞌ,

dxeꞌe̱ zran niꞌa Jesús,

ba nácue̱ꞌ ladxeꞌ,

ne ba bezúa chaweꞌ xichaj lázrdawe̱ꞌ,

naꞌ benneꞌ caꞌ belezrebe̱ꞌ.

36 Naꞌ benneꞌ beleléꞌe ca da guca buluchálajle̱ne̱ꞌ benneꞌ xula caꞌ ca guca gate bexaca bénneaꞌ guxúꞌe̱ beꞌ xriwe̱ꞌ caꞌ.

37 Gate belenne̱ꞌ caní,

ca naca benneꞌ zaj zre̱ꞌe̱ lu xe̱zr la xu chee̱ xe̱zre Gadara gulezú lawe̱ꞌ dxelataꞌ xúene̱ꞌ Jesús xezé̱ꞌe̱ lazrieꞌ,

laweꞌ da dxelezrébele̱ꞌe̱.

Caꞌan guca,

guxúꞌu Jesús lu da dxedá laweꞌ nísadauꞌ,

chee̱ xezé̱ꞌe̱ xéaje̱ꞌ.

38 Bénneaꞌ belexedxúaj beꞌ xriwe̱ꞌ caꞌ lu xichaj lázrdawe̱ꞌ gunabe̱ꞌ lau Jesús gunézruje̱ꞌ lataj chéajle̱ne̱ꞌ Le̱ꞌ,

san Jesús busebague̱ꞌ le̱ꞌ xegáꞌane̱ꞌ lázrie̱ꞌ,

naꞌ guzre̱ꞌ le̱ꞌ:

39 ―Bexiaj lizruꞌ,

naꞌ bchalaj chee̱ xúgute̱ ca da ba be̱n Dios chiuꞌ.

Naꞌ benneꞌ naꞌ bezé̱ꞌe̱ zexíaje̱ꞌ,

naꞌ bchálajle̱ne̱ꞌ benneꞌ xe̱zre caꞌ ca da be̱n Jesús chee̱ le̱ꞌ.

40 Gate bezrín Jesús xecha laꞌa dxuꞌa nísadauꞌ,

benneꞌ caꞌ zaj zre̱ꞌe̱ naꞌ gulezíꞌ lu ne̱ꞌe̱ Le̱ꞌ nen dute̱ xel-la dxelebé,

laweꞌ da xúgute̱ꞌ dxelebeze̱ꞌ Le̱ꞌ.

41 Nadxa bzrin tu benneꞌ le̱ꞌ Jairo,

benneꞌ blau chee̱ xuꞌu naga dxelezraga judío caꞌ,

naꞌ bzu zribe̱ꞌ lau Jesús,

ne gutaꞌ xúene̱ꞌ Le̱ꞌ chéaje̱ꞌ lizre̱ꞌ,

42 laweꞌ da zua tuze bi nuꞌula chee̱ꞌ.

Xuꞌubeꞌ chazrinnu iza,

naꞌ ba dxaca wátebeꞌ.

Gate guzáꞌ Jesús zéaje̱ꞌ,

benneꞌ zante̱ zjácale̱ne̱ꞌ Le̱ꞌ,

ne buluchídete̱ ljwezre̱ꞌ.

43 Ládujla benneꞌ caꞌ zeaj tu nuꞌula quebe chaweꞌ zue̱ꞌ,

naꞌ chazrinnu iza ba zeaj dxéꞌene̱ꞌ we̱ꞌ dxen da dxaca chee̱ nuꞌula caꞌ.

Ba gudízruje̱ꞌ benneꞌ dxelexún bénneache caꞌ xúgute̱ ca da gudape̱ꞌ,

naꞌ quebe bi gulezéquene̱ꞌ xelune̱ꞌ chee̱ xexaca nuꞌula naꞌ.

44 Nuꞌula naꞌ gubigue̱ꞌ cúzrula Jesús,

naꞌ xeajté̱ꞌ zran niꞌa zre̱ꞌ,

naꞌ la náꞌqueze bexágate̱ dxen da dxaca nuꞌula naꞌ.

45 Nadxa Jesús bche̱be̱ꞌ:

―¿Nuzra bta nedaꞌ?

Xúgute̱ꞌ gulenné̱ꞌ:

“Quebe nu ne gutá Lueꞌ”,

naꞌ Pedro,

ne benneꞌ ljwezre̱ꞌ caꞌ gulenné̱ꞌ:

―Benneꞌ Wese̱de,

benneꞌ caní dxuluchídee̱ꞌ Lueꞌ,

ne dxuluzrigue̱ꞌ Lueꞌ,

naꞌ dxuché̱bequezuꞌ,

dxennáuꞌ:

“¿Nuzra bta nedaꞌ?”

46 Jesús gunné̱ꞌ:

―Tu benneꞌ bte̱ꞌ nedaꞌ laweꞌ da gúquebeꞌedaꞌ ben zrin xel-la waca chiaꞌ da bexún na tu benneꞌ.

47 Gate gúquebeꞌe nuꞌula naꞌ ba neze Jesús da guca,

nadxa gudée̱ꞌ dxezrízete̱ꞌ,

naꞌ bzu zribe̱ꞌ lau Jesús,

ne guxrúale̱pe̱ꞌ lau xúgute̱ benneꞌ caꞌ bizr chee̱ naꞌ bte̱ꞌ Jesús,

ne ca guca bexácate̱ꞌ.

48 Nadxa gunná Jesús,

guzre̱ꞌ nuꞌula naꞌ:

―Zríꞌinaꞌdauꞌ,

ba bexacuꞌ laweꞌ da guxéajle̱ꞌu chiaꞌ.

Bexíaj naꞌa,

dute̱ xel-la dxebeza zri lazreꞌ.

49 Ne dxuchálajte̱ Jesús,

bzrin tu benneꞌ naga ze̱ Jesús,

benneꞌ guzé̱ꞌe̱ lizre Jairo,

benneꞌ blau chee̱ xuꞌu ga naꞌ dxelezraga judío caꞌ,

naꞌ guzre̱ꞌ Jairo:

―Ba gute bi nuꞌula chiuꞌ.

Québedxa guzúa xuzruꞌ Benneꞌ Wese̱de nigá.

50 Gate ben Jesús ca gunné̱ꞌ,

naꞌ guzre̱ꞌ Jairo:

―Quebe zrebuꞌ.

Con guxeajle̱.

Bi nuꞌula chiuꞌ naꞌ xexácabeꞌ.

51 Gate bzrin Jesús xuꞌu naꞌ,

netú quebe be̱ꞌ lataj chúꞌule̱ Le̱ꞌ,

san tuze Pedro,

ne Jacobo,

ne Juan,

ne xra xrna bi nuꞌula naꞌ.

52 Xúgute̱ benneꞌ zaj zre̱ꞌe̱ naꞌ dxelebezre̱ꞌ,

ne dxelebezre xache̱ꞌ chee̱ bi nuꞌula naꞌ.

Jesús gunné̱ꞌ:

―Quebe cuézrele.

Bi núꞌuladu nigá quebe nátebeꞌ.

Dxásezebeꞌ naꞌ.

53 Naꞌ benneꞌ caꞌ buluzrizre̱ꞌ chee̱ꞌ,

laweꞌ da zaj nézquezne̱ꞌ ba gútebeꞌ.

54 Nadxa Jesús guqué̱ꞌe̱ naꞌ bi naꞌ,

naꞌ gunné̱ꞌ zizraj:

―¡Bi nuꞌula,

bexasa!

55 Naꞌ bebanbeꞌ,

ne bexásate̱beꞌ.

Naꞌ Jesús busebague̱ꞌ le̱ꞌ xulunézruje̱ꞌ da gágubeꞌ.

56 Xra xrnabeꞌ belexebánele̱ꞌe̱ne̱ꞌ.

Jesús busebague̱ꞌ le̱ꞌ quebe nu xelé̱ꞌe̱ ca da guca.