Dios dxuché̱ꞌe̱ ca dxennáꞌ lau Jesús
17
Ca gudé guca xrupa zra,
naꞌ Jesús guché̱ꞌe̱ Pedro,
ne Jacobo,
ne Juan,
bi biche Jacobo,
naꞌ bi cáꞌaze xjácale̱ne̱ꞌ Le̱ꞌ tu lau xiꞌa sibe.
La transfiguración (Mateo 17.1-13)
2 Naꞌ Dios bche̱ꞌe̱ ca dxennáꞌ lau Jesús láwela benneꞌ caꞌ.
Lawe̱ꞌ guca tite na ca gubizra,
naꞌ zra lane̱ꞌ guca na da chiche ca xel-laꞌ naxaníꞌ.
3 Naꞌ benneꞌ caní beleléꞌene̱ꞌ Moisés,
ne Elías,
benneꞌ gulezráꞌ gate nate,
dxuluchálajle̱ne̱ꞌ Jesús.
4 Nadxa Pedro guzre̱ꞌ Jesús:
―Xran,
cháweꞌle̱ꞌe̱ zúadxu nigá.
Che dxaca lazruꞌ,
guntuꞌ chunna xuꞌu lágadauꞌ,
tu chiuꞌ,
ne tu chee̱ Moisés,
ne tu chee̱ Elías.
5 Dxácate̱ dxenné̱ Pedro,
blaꞌ tu beuj da dxaca tite na,
da gucu na benneꞌ caꞌ,
naꞌ lu beuj naꞌ belenne̱ꞌ chiꞌi Dios,
dxenné̱ꞌ:
―Benneꞌ nigá naque̱ꞌ Zriꞌinaꞌ nazríꞌite̱ lazraꞌ,
ne chee̱ Le̱ꞌ dxezaca ba lazraꞌ.
Chee̱ Le̱ꞌ le xene.
6 Gate belenne̱ꞌ da nigá,
naꞌ gulate̱ꞌ sudxúꞌala lu xu.
Dxelezrébele̱ꞌe̱.
7 Nadxa Jesús gubigue̱ꞌ naga zaj zre̱ꞌe̱,
naꞌ bte̱ꞌ benneꞌ caꞌ,
ne guzre̱ꞌ le̱ꞌ:
―Le chasa.
Quebe zrébele.
8 Gate naꞌ belenné̱ꞌe̱,
québedxa nu beleléꞌene̱ꞌ.
Tuze Jesús zue̱ꞌ.
9 Nadxa gate dxelexexétaje̱ꞌ lu xiꞌa naꞌ,
Jesús gunná béꞌene̱ꞌ benneꞌ caꞌ,
dxenné̱ꞌ:
―Quebe nu guchálajle̱le ca da bleꞌele ca zrindxa zra nedaꞌ,
Benneꞌ Gulje̱ꞌ Bénneache,
xebanaꞌ ládujla benneꞌ gate.
10 Nadxa benneꞌ caꞌ dxuse̱de Jesús buluche̱be̱ꞌ Le̱ꞌ:
―¿Bizr chee̱ naꞌ dxelenná benneꞌ caꞌ dxuluxuzájle̱ꞌe̱ da nadxixruj bea Dios dxun na ba xen xeláꞌ Elías nédxudxa ca xeláꞌ Cristo?
11 Jesús guzre̱ꞌ benneꞌ caꞌ:
―Da li xeláꞌ Elías nédxudxa,
ne gucáꞌana chawe̱ꞌ ca naca da dxal-laꞌ gaca.
12 Nedaꞌ dxapaꞌ leꞌe,
ba blaꞌ Elías,
naꞌ benneꞌ caꞌ quebe belexúnbeꞌe̱ le̱ꞌ.
Bulusaque̱ꞌ le̱ꞌ cáte̱ze da gulaca lazre̱ꞌ.
Cáꞌanqueze xulusaque̱ꞌ nedaꞌ,
Benneꞌ Gulje̱ꞌ Bénneache.
13 Nadxa benneꞌ caꞌ dxuse̱de Jesús guléque beꞌene̱ꞌ dxuchalaj Jesús ca naca chee̱ Juan,
bénneaꞌ bchue̱ꞌ bénneache nisa.
Jesús dxexune̱ꞌ tu bi biu dxeꞌebeꞌ chunaꞌ
14 Gate belezrine̱ꞌ naga zaj zraꞌ benneꞌ zante̱,
naꞌ tu benneꞌ gubigue̱ꞌ naga zua Jesús,
ne bzu zribe̱ꞌ lau Le̱ꞌ,
dxenné̱ꞌ:
15 ―Xran,
bexache lazreꞌ zriꞌinaꞌ,
dxeꞌebeꞌ chunaꞌ,
ne da zrente̱ da dxezácabeꞌ.
Zánete̱ lasa ba xeajcházebeꞌ lu xiꞌ,
ne lu nisa.
16 Ba bedajguꞌa-beꞌ lau benneꞌ caní dxusé̱denuꞌ,
naꞌ quebe guca xelexune̱ꞌ-beꞌ.
17 Jesús beche̱be̱ꞌ:
―Leꞌe,
benneꞌ we̱n chupa lazreꞌ,
ne benneꞌ lázrdau zideꞌ.
¿Bátate̱ zúale̱naꞌ leꞌe?
¿Bátate̱ nacaꞌ zren lazreꞌ nen leꞌe?
Le cheajxríꞌ bi cuideꞌ naꞌ nigá.
18 Nadxa Jesús gudil-le̱ꞌ beꞌ xriwe̱ꞌ naꞌ,
naꞌ bebéaje̱ꞌ na lu be̱l-laꞌ dxen chee̱ bi cuideꞌ naꞌ,
naꞌ zra náꞌqueze bexácate̱beꞌ.
19 Gudé naꞌ benneꞌ caꞌ dxuse̱de Jesús gulenné̱ꞌ Le̱ꞌ chaláꞌala,
naꞌ buluche̱be̱ꞌ Le̱ꞌ:
―¿Bizr chee̱ naꞌ quebe guca netuꞌ xebéajntuꞌ beꞌ xriwe̱ꞌ naꞌ?
20 Jesús guzre̱ꞌ benneꞌ caꞌ:
―Laweꞌ da naca láteze ca dxéajle̱le chiaꞌ.
Da li dxapaꞌ leꞌe,
che la nápale xel-laꞌ dxeajlí lazreꞌ,
lácala naca na láteze ca naca tu bínnedauꞌ chee̱ mostaza,
waca xe̱le xiꞌa nigá:
“Gucuasa nigá chéajuꞌ xetú lataj”,
naꞌ xiꞌa naꞌ wacuasa na.
Quebe bi de̱ da quebe gaca gunle che nápale xel-laꞌ dxeajlí lazreꞌ.
21 Ca naca beꞌ xriwe̱ꞌ caní,
dxun na ba xen guchálajle̱le Dios,
ne gunle gubasa chee̱ séquele xebéajle beꞌ xriwe̱ꞌ caní.
Jesús dxuchálaje̱ꞌ xecha lasa ca gaca gate gatie̱ꞌ
22 Dxácate̱ naꞌ dxeledé̱ꞌ naga nababa Galilea,
Jesús guzre̱ꞌ benneꞌ caꞌ:
―Nedaꞌ,
Benneꞌ Gulje̱ꞌ Bénneache wadéaꞌ lu naꞌ bénneache.
23 Xelútie̱ꞌ nedaꞌ,
naꞌ gate gaca chunna zra,
xebanaꞌ.
Gate belenne̱ꞌ dizraꞌ nigá,
naꞌ bewiꞌine lázrele̱ꞌe̱ne̱ꞌ.
Da dxuluchízruje̱ꞌ bénneache chee̱ xudauꞌ
24 Gate Jesús ne benneꞌ caꞌ dxusé̱dene̱ꞌ belezrine̱ꞌ lu xe̱zre Capernaum,
naꞌ benneꞌ dxuluchízruje̱ꞌ chee̱ xudauꞌ belezrine̱ꞌ lau Pedro,
naꞌ buluche̱be̱ꞌ le̱ꞌ:
―¿Quebe dxizruj benneꞌ dxusé̱dene̱ꞌ leꞌe chee̱ xudauꞌ?
25 Pedro beche̱be̱ꞌ:
―Aweꞌ.
Dxízruje̱ꞌ na.
Nadxa,
gate naꞌ guxúꞌu Pedro lu xuꞌu,
guzre Jesús le̱ꞌ:
―¿Aja dxéquenuꞌ,
Simón?
¿Nuzra naꞌ dxuluchizruj lazruj chee̱ xe̱zr la xu benneꞌ caꞌ dxelenná bea lu xe̱zr la xu nigá?
¿Dxuluchízruje̱ꞌ benneꞌ walázr chee̱ꞌ,
u benneꞌ zituꞌ caꞌ?
26 Beche̱be Pedro:
―Benneꞌ zituꞌ dxuluchízruje̱ꞌ.
Jesús guzre̱ꞌ le̱ꞌ: