Nu benneꞌ nácadxa blau xabáa
18
Tu lasa gulebiga benneꞌ caꞌ dxuse̱de Jesús naga zue̱ꞌ,
naꞌ buluche̱be̱ꞌ Le̱ꞌ:
―¿Nuzra benneꞌ nácadxe̱ꞌ blau naga dxenná bea Dios?
―Da li dxapaꞌ leꞌe,
che quebe xexácale ca bidu nigá,
québequeze chuꞌule naga dxenná bea Dios xabáa.
4 Caꞌan naca,
benneꞌ nácadxe̱ꞌ blau naga dxenná bea Dios xabáa,
naca benneꞌ gaque̱ꞌ dxexruj lazreꞌ,
ne xexaque̱ꞌ ca bidu nigá.
5 Benneꞌ gape̱ꞌ ba láꞌana tu bidauꞌ caní lu Laꞌ nedaꞌ,
nédaꞌquezaꞌ gape̱ꞌ ba láꞌana.
Ca naca da dxun na gundxu dul-la
6 Naꞌ gunná Jesús:
―Nútete̱ze benneꞌ gune̱ꞌ gun tu bidu caní dul-la,
bi dxeajlí lázrebeꞌ nedaꞌ,
cháwela guchéajladxu lbe̱ꞌe̱ tu xiaj ziꞌi da dxutu,
naꞌ cheajchúꞌunadxu le̱ꞌ situj lu nísadauꞌ.
7 Edxugúa bénneache laweꞌ da dé̱le̱ꞌe̱ da dxun na xelún bénneache dul-la.
Tu gátazqueze da caní,
naꞌ edxugúa bénneache dxelune̱ꞌ xelún bénneache dul-la.
8 Chee̱ le̱ naꞌ,
che naꞌu u niꞌu dxun na gunuꞌ dul-la,
guchugu na,
ne gudxúꞌuna na zituꞌ.
Cháwedxa xexúꞌu lu xel-laꞌ nabán li lazreꞌ nadxugu niꞌu u naꞌu,
quézcala xelegúꞌe̱ lueꞌ lataj ba xaꞌ,
zua dxúpate̱ naꞌu,
ne dxúpate̱ niꞌu.
9 Che xiaj lauꞌ dxun na gunuꞌ dul-la,
guleaj na,
ne gudxúꞌuna na zituꞌ.
Wenla chuꞌu lu xel-laꞌ nabán li lazreꞌ nen tuze xiaj lauꞌ,
quézcala xelegúꞌe̱ lueꞌ lu xiꞌ gabila,
zua dxúpate̱ xiaj lauꞌ.
Da dxuléꞌe na ca naca chee̱ zrilaꞌ nanítebaꞌ
10 Naꞌ gunná Jesús:
―Gutu guzúꞌ chaláꞌala netú bidu caní.
Nedaꞌ dxapaꞌ leꞌe,
zaj zraꞌ gubáz chee̱ xabáa chee̱ bidu caní lau Xraꞌ xabáa.
11 Nedaꞌ,
Benneꞌ Gulje̱ꞌ Bénneache,
blaꞌa bedajseláꞌ benneꞌ zaj nanitie̱ꞌ.
12 ’¿Ájazra dxéquele leꞌe?
Che tu benneꞌ nape̱ꞌ tu gaxúa zrilaꞌ,
naꞌ nite tubaꞌ,
¿quebe gucáꞌane̱ꞌ be̱ tápalalaj che̱nnu naꞌ le̱ꞌe̱ xixreꞌ,
naꞌ cheajdilje̱ꞌ zrilaꞌ naꞌ nanítebaꞌ?
13 Gate ba bezrelne̱ꞌ-baꞌ,
wabéle̱ꞌe̱dxene̱ꞌ chee̱ be̱ tu naꞌ quézcala chee̱ be̱ tápalalaj che̱nnu caꞌ quebe gulenítebaꞌ.
14 Cáꞌanqueze Xrale leꞌe,
zue̱ꞌ xabáa,
quebe dxaca lazre̱ꞌ nite netú bidu caní.
Ca dxal-laꞌ gunite laudxu chee̱ le saꞌ ljwézredxu
(Lc. 17.3)
15 Naꞌ gunná Jesús:
―Che bi bichuꞌ dxunbeꞌ chiuꞌ da cale̱la,
bchálajle̱ tuze le̱beꞌ,
chee̱ xúnbeabeꞌ da cale̱la da be̱nbeꞌ.
Che xenbeꞌ da dxuꞌu-beꞌ,
naꞌ ba bexacuꞌ tuze bi bichuꞌ.
16 Che quebe xenbeꞌ da dxuꞌu-beꞌ,
guché̱ꞌ tu chupa benneꞌ chee̱ gaca chupa u chunna benneꞌ xelexeche̱be̱ꞌ ca naca da dxuꞌu-beꞌ.
17 Che quebe xenbeꞌ chee̱ benneꞌ caꞌ,
guzre ca naca benneꞌ dxelezraga lu xudauꞌ.
Che quebe xenbeꞌ chee̱ benneꞌ caꞌ,
le guzúa-beꞌ ca tu benneꞌ quebe dxéajle̱ꞌe̱ chee̱ Dios,
u ca tu benneꞌ dxuchízruje̱ꞌ waláz chee̱ benneꞌ zituꞌ caꞌ.
18 ’Da li dxapaꞌ leꞌe,
da guchéajle lu xe̱zr la xu nigá,
naca na da ba nadxéajqueze na xabáa,
ne da xesé̱zrele lu xe̱zr la xu nigá naca na da ba nazé̱zrequeze na xabáa.
19 ’Cáꞌanqueze dxapaꞌ leꞌe,
che chúpale leꞌe gácale tuze ca da nábale Dios,
naꞌ Xraꞌ zua xabáa gunne̱ꞌ na.
20 Naga zaj zraꞌ chúpabeꞌ,
u chúnnabeꞌ zaj nazrágabeꞌ lu Laꞌ nedaꞌ,
naꞌ zúaquezaꞌ nedaꞌ laduj le̱beꞌ.
21 Nadxa Pedro bche̱be̱ꞌ Jesús:
―Xran,
che bi bíchaꞌdauꞌ gunbeꞌ chiaꞌ da cale̱la,
¿bal-la lasa dxun na ba xen gunite lawaꞌ chee̱beꞌ?
¿Gazre lasa?
22 Beche̱be Jesús:
―Dxapaꞌ lueꞌ,
quegá gazre lasa,
san ga xun chi da gazre lasa.
Benneꞌ we̱n zrin quebe guca lazre̱ꞌ gunite lawe̱ꞌ chee̱ le saꞌ ljwezre̱ꞌ
23 Naꞌ gunná Jesús:
―Da gaca naga dxenná bea Dios xabáa naca na ca da guca gate tu benneꞌ dxenná bea guca lazre̱ꞌ gucáꞌana chawe̱ꞌ da dxelal-la benneꞌ we̱n zrin chee̱ꞌ.
24 Gate guzú lawe̱ꞌ dxucáꞌana chawe̱ꞌ na,
naꞌ guleché̱ꞌe̱ lau le̱ꞌ tu benneꞌ dxebague̱ꞌ chee̱ꞌ zaneꞌ cueꞌ chi gaxúa dumí.
25 Laweꞌ da quebe de̱ chee̱ benneꞌ we̱n zrin naꞌ da quízruje̱ꞌ xrane̱ꞌ,
naꞌ gunná beꞌe xrane̱ꞌ taꞌu benneꞌ we̱n zrin naꞌ,
ne zruꞌule̱ꞌ,
ne zríꞌine̱ꞌ caꞌ,
ne ca nácaqueze da nape̱ꞌ,
chee̱ gazruj da naꞌ dxebague̱ꞌ.
26 Nadxa bzu zribe benneꞌ we̱n zrin naꞌ lau xrane̱ꞌ,
naꞌ gutaꞌ xuene̱ꞌ le̱ꞌ,
dxenné̱ꞌ:
“Xran,
be̱n zren lazreꞌ nedaꞌ,
naꞌ quízrujquezaꞌ ca naca na.”
27 Naꞌ xrane̱ꞌ bexache lazre̱ꞌ le̱ꞌ,
ne bnite lawe̱ꞌ da naꞌ dxebague̱ꞌ chee̱ꞌ,
ne bsane̱ꞌ le̱ꞌ.
28 Gate benneꞌ we̱n zrin naꞌ bedxúaje̱ꞌ,
naꞌ bezrague̱ꞌ xetú benneꞌ we̱n zrin ljwezre̱ꞌ,
benneꞌ dxebague̱ꞌ chee̱ꞌ látedauꞌ.
Naꞌ gude̱le̱ꞌ lba bénneaꞌ,
ne guzú lawe̱ꞌ dxusézxuje̱ꞌ chiꞌi bénneaꞌ,
dxe̱ꞌe̱ le̱ꞌ:
“Gudizruj nedaꞌ da dxal-luꞌ chiaꞌ.”
29 Nadxa benneꞌ we̱n zrin ljwezre̱ꞌ naꞌ bzu zribe̱ꞌ lau le̱ꞌ,
ne gutaꞌ xuene̱ꞌ le̱ꞌ,
dxenné̱ꞌ:
“Be̱n zren lazreꞌ nedaꞌ,
naꞌ quízrujquezaꞌ ca naca na.”
30 Bénneaꞌ quebe guca lazre̱ꞌ,
naꞌ guxíaje̱ꞌ xeajluꞌe̱ we̱n zrin ljwezre̱ꞌ naꞌ lizre xia dxácate̱ quízruje̱ꞌ da naꞌ dxebague̱ꞌ.
31 Gate benneꞌ we̱n zrin caꞌ xezícala guleque béꞌene̱ꞌ da nigá,
naꞌ belewíꞌine lázrele̱ꞌe̱ne̱ꞌ,
naꞌ xjaque̱ꞌ xeajlegue̱zre̱ꞌ xrane̱ꞌ xúgute̱ da ba guca.
32 Nadxa xrane̱ꞌ naꞌ gunná béꞌene̱ꞌ xeajlenné̱ꞌ benneꞌ we̱n zrin naꞌ,
naꞌ guzre̱ꞌ le̱ꞌ:
“Bi we̱n zrin cale̱la.
Nedaꞌ bnite lawaꞌ chiuꞌ ca naca da naꞌ dxebaguꞌ chiaꞌ laweꞌ da gutaꞌ xúenuꞌ nedaꞌ.
33 Cáꞌanqueze lueꞌ dxal-laꞌ xexache lazruꞌ le saꞌ ljwezruꞌ naꞌ ca be̱naꞌ nedaꞌ bexache lazraꞌ lueꞌ.”
34 Xrane̱ꞌ naꞌ bzráꞌale̱ꞌe̱ bénneaꞌ,
naꞌ bdee̱ꞌ le̱ꞌ xel-laꞌ ziꞌ dxácate̱ naꞌ quízruje̱ꞌ ca naca da naꞌ dxal-le̱ꞌ chee̱ꞌ.
35 Nadxa gunná Jesús:
―Cáꞌanqueze gun Xraꞌ zua xabáa chee̱le leꞌe che quebe gunite laule dute̱ lázrdaule chee̱ le saꞌ ljwézrele.