Ca guca chee̱ tu zrilaꞌ gunítebaꞌ
15
Benneꞌ zante̱ benneꞌ wechizruj waláz chee̱ Roma,
ne benneꞌ dul-la caꞌ gulebigue̱ꞌ naga zua Jesús chee̱ xelenne̱ꞌ da dxuchálaje̱ꞌ.
2 Chee̱ le̱ naꞌ benneꞌ fariseo caꞌ,
ne benneꞌ dxuluxuzájle̱ꞌe̱ da nadxixruj bea na gulezí tizre̱ꞌ Jesús,
gulenné̱ꞌ:
―Benneꞌ nigá dxune̱ꞌ tu zren benneꞌ dul-la caꞌ,
ne dxágule̱ne̱ꞌ le̱ꞌ.
3 Nadxa bchalaj Jesús da dxuléꞌe na,
gunné̱ꞌ:
4 ―Nu benneꞌ ládujla leꞌe,
che nape̱ꞌ tu gaxúa zrilaꞌ,
naꞌ nite tubaꞌ,
¿quebe gucáꞌane̱ꞌ xetápalalaj che̱nnu zrilaꞌ caꞌ,
bea caꞌ zaj zrabaꞌ le̱ꞌe̱ xixreꞌ,
naꞌ se̱ꞌe̱ cheajdílaje̱ꞌ bea naꞌ gunítebaꞌ cadxa xezrelne̱ꞌ-baꞌ?
5 Naꞌ gate xezrelne̱ꞌ-baꞌ,
bene̱ꞌ,
naꞌ xequé̱ꞌe̱-baꞌ xexrúe̱ꞌ-baꞌ xe̱ꞌa xe̱ne̱ꞌ.
6 Naꞌ ca xezrine̱ꞌ lizre̱ꞌ,
gutupe̱ꞌ ljwezre̱ꞌ caꞌ,
ne benneꞌ walizre chee̱ꞌ caꞌ.
Naꞌ xe̱ꞌe̱ le̱ꞌ:
“Le be nen nedaꞌ,
laweꞌ da bezreldaꞌ zrilaꞌ chiaꞌ gunítebaꞌ.”
7 Naꞌ gunná Jesús,
dxe̱ꞌe̱ benneꞌ caꞌ:
―Cáꞌanqueze zúale̱ꞌe̱dxa xel-la dxebé xabáa gate tu benneꞌ dul-la dxexebíꞌi lazre̱ꞌ,
quézcala chee̱ tápalalaj che̱nnu benneꞌ xrlátaje caꞌ dxeléquene̱ꞌ quebe dxun na ba xen xelexebíꞌi lazre̱ꞌ.
Ca guca chee̱ tu dumí da gunite
8 Nadxa Jesús bchálaje̱ꞌ xetú da dxuléꞌe na,
dxe̱ꞌe̱ benneꞌ caꞌ:
―Tu nuꞌula nape̱ꞌ chi dumí zaca,
naꞌ che nite tu na,
nadxa guzúe̱ꞌ xiꞌ chee̱ꞌ chee̱ gusaní na lu xuꞌu chee̱ꞌ.
Nadxa su lawe̱ꞌ gulúe̱ꞌ lu xuꞌu chee̱ꞌ,
xexílaje̱ꞌ bínnalu ca xezrelne̱ꞌ dumí chee̱ꞌ da gunite na.
9 Naꞌ ca xezrelne̱ꞌ dumí naꞌ,
gutupe̱ꞌ nuꞌula ljwezre̱ꞌ caꞌ,
ne nuꞌula walízr chee̱ꞌ caꞌ,
naꞌ xe̱ꞌe̱ le̱ꞌ:
“Le be nen nedaꞌ,
laweꞌ da bache bezreldaꞌ dumí chiaꞌ da gunite na.”
10 Naꞌ gunná Jesús,
dxe̱ꞌe̱ benneꞌ caꞌ:
―Cáꞌanqueze dxelebé gubáz chee̱ xabáa caꞌ chee̱ Dios gate tu benneꞌ dul-la dxexebíꞌi lazre̱ꞌ.
Ca guca chee̱ zriꞌine tu benneꞌ gunítebeꞌ
11 Nadxa Jesús bchálaje̱ꞌ xetú da dxuléꞌe na,
dxe̱ꞌe̱ le̱ꞌ:
―Tu benneꞌ zaj zraꞌ chupa bi chee̱ꞌ.
El Hijo Perdido (Lucas 15.11-32)
12 Naꞌ bi cuideꞌ chee̱ꞌ gúzrebeꞌ xrabeꞌ:
“Xrae,
be̱nna chiaꞌ da dxal-laꞌ siꞌa chee̱ da naca chiuꞌ.”
Nadxa xrabeꞌ be̱ne̱ꞌ gachaj da bnézruje̱ꞌ cha chee̱beꞌ tubeꞌ,
ne xetubeꞌ.
13 Ca gudé tu chupa zra,
bi cuideꞌ chee̱ bénneaꞌ btúpabeꞌ xúgute̱ da naca chee̱beꞌ,
naꞌ guzabeꞌ zituꞌ,
naꞌ bzrinbeꞌ xetú xe̱zr la xu.
Naꞌ be̱n dítajbeꞌ dumí chee̱beꞌ lu da cale̱la da be̱nbeꞌ.
14 Naꞌ ca gudache xúgute̱ dumí chee̱beꞌ,
bzrin tu gubinaꞌ lu xe̱zr la xu naꞌ,
naꞌ le̱beꞌ gudunbeꞌ.
15 Nadxa guzabeꞌ xeajtílajbeꞌ zrin gunbeꞌ chee̱ tu benneꞌ lu xe̱zr la xu naꞌ.
Benneꞌ naꞌ gusél-le̱ꞌ-beꞌ le̱ꞌe̱ xixreꞌ chee̱ꞌ chee̱ cheajxúebeꞌ cuche chee̱ꞌ caꞌ.
16 Guca lázrebeꞌ gágubeꞌ da cale̱la da dxelagu cuche caꞌ.
Netú benneꞌ quebe bi bnézruje̱ꞌ da gágubeꞌ.
17 Nadxa xeajsá lázrebeꞌ,
dxennabeꞌ:
“Benneꞌ zante̱,
benneꞌ we̱n zrin zaj zre̱ꞌe̱ lizre xraꞌ,
naꞌ dé̱le̱ꞌe̱ da dxelawe̱ꞌ.
Nedaꞌ dxátequezaꞌ xel-la dxedún.
18 Webíꞌizaꞌ xexáꞌa naga zua xraꞌ,
naꞌ xapaꞌ le̱ꞌ:
Xrae,
be̱naꞌ dul-la lau Dios,
ne lau lueꞌ.
19 Québedxa naca chiaꞌ gacaꞌ zriꞌinuꞌ.
Bzua nedaꞌ ca tu benneꞌ we̱n zrin chiuꞌ.”
20 Nadxa begúꞌubeꞌ neza,
bezrinbeꞌ lizre xrabeꞌ.
’Tu chi naꞌ,
bleꞌe xrabeꞌ le̱beꞌ ba zezabeꞌ,
naꞌ bexache lazre̱ꞌ-beꞌ.
Naꞌ guzá chégüe̱ꞌ xeajchague̱ꞌ-beꞌ,
naꞌ bnide̱ꞌ-beꞌ,
ne bnúpete̱ꞌ-beꞌ.
21 Nadxa gunabeꞌ:
“Xrae,
be̱naꞌ dul-la lau Dios,
ne lau lueꞌ.
Québedxa naca chiaꞌ gacaꞌ zriꞌinuꞌ.”
22 Naꞌ gunná xrabeꞌ,
dxe̱ꞌe̱ benneꞌ we̱n zrin chee̱ꞌ caꞌ:
“Le cueaj zra lanaꞌ da zaca,
ne le gugacu-beꞌ.
Le cuꞌu tu da naca oro zrube nabeꞌ,
ne le cuꞌu xel-la níꞌabeꞌ.
23 Le cheajzríꞌ tu be̱zre be̱ dxanne,
naꞌ gútele-baꞌ.
Gágudxu,
ne gundxu laní,
24 laweꞌ da bi chiaꞌ nigá guca chee̱beꞌ ca tu benneꞌ ba gute,
naꞌ bebanbeꞌ.
Gunítebeꞌ,
naꞌ ba bezrágadxu-beꞌ.”
Naꞌ gulezú lawe̱ꞌ dxelune̱ꞌ laní.
25 ’Dxácate̱ naꞌ,
zríꞌine̱ꞌ bi waca zúabeꞌ le̱ꞌe̱ xixreꞌ dxunbeꞌ zrin.
Naꞌ chizrelaꞌ ca bezrinbeꞌ gagu cuita xuꞌu lizre xrabeꞌ,
naꞌ benbeꞌ dxaca wil-la,
ne dxaca wexáꞌa.
26 Nadxa gunné̱beꞌ tu bi we̱n zrin naꞌ,
dxe̱ꞌe̱beꞌ le̱beꞌ:
“¿Bi dxaca nigá?”
27 Bi we̱n zrin nigá cúnnabeꞌ:
“Ba beláꞌ bi bichuꞌ,
naꞌ xrauꞌ gunná béꞌene̱ꞌ nu gute tu be̱zre be̱ dxanne,
laweꞌ da belabeꞌ zúabeꞌ zriꞌa chaweꞌ.”
28 Bzraꞌa bi waca naꞌ,
naꞌ quebe guca lázrebeꞌ xexúꞌubeꞌ.
Nadxa bdxuaj xrabeꞌ,
ne gutaꞌ xuene̱ꞌ le̱beꞌ xexúꞌubeꞌ.
29 Naꞌ cúnnabeꞌ,
dxe̱ꞌe̱beꞌ xrabeꞌ:
“Nézqueznuꞌ zaneꞌ iza ba be̱naꞌ zrin chiuꞌ,
ne cabataꞌ bchaꞌa lueꞌ,
naꞌ ne tu lasa quebe ne gunnuꞌ chiaꞌ tu chíbudauꞌ chee̱ gunaꞌ tu laní nen ljwezraꞌ caꞌ.
30 Naꞌa beláꞌ bi chiuꞌ nigá,
bi ba be̱n dítajbeꞌ dumí chiuꞌ,
guzúale̱beꞌ nuꞌula dxeledá zraga caꞌ,
naꞌ be̱te lizuꞌ be̱zre be̱ dxanne ne̱ chee̱ le̱beꞌ.”
31 Nadxa gunná xrabeꞌ,
dxe̱ꞌe̱-beꞌ:
“Zriꞌinaꞌ,
lueꞌ tu zúale̱zquezuꞌ nen nedaꞌ,
naꞌ xúgute̱ da de̱ chiaꞌ naca na chiuꞌ.
32 Naꞌa dxun na ba xen gundxu laní,
ne bedxu,
laweꞌ da bi bichuꞌ gúcabeꞌ ca tu benneꞌ ba gute,
ne naca banbeꞌ.
Gunítebeꞌ,
naꞌ ba bezrágadxu-beꞌ.”