Benneꞌ we̱n zrin blau quebe naque̱ꞌ xrlátaje
16
Nadxa Jesús guzre̱ꞌ benneꞌ caꞌ dxusé̱dene̱ꞌ:
―Guzúa tu benneꞌ gunníꞌa,
naꞌ zua tu benneꞌ we̱n zrin blau chee̱ꞌ.
Naꞌ bal-la benneꞌ xeajlegue̱zre̱ꞌ le̱ꞌ benneꞌ we̱n zrin blau naꞌ dxun dítaje̱ꞌ da de̱ chee̱ xrane̱ꞌ.
2 Nadxa xrane̱ꞌ gunné̱ꞌ le̱ꞌ,
ne guzre̱ꞌ le̱ꞌ:
“¿Bizra da nigá dxelenné̱ꞌ chiuꞌ?
Bluéꞌe nedaꞌ ca naca chee̱ zrin dxunuꞌ,
laweꞌ da québedxa gaca gacuꞌ we̱n zrin blau chiaꞌ.”
3 Nadxa benneꞌ we̱n zrin blau naꞌ guzú lawe̱ꞌ dxenné̱ꞌ lu xichaj lázrdawe̱ꞌ:
¿ájazra gunaꞌ naꞌa,
laweꞌ da xebéaj xranaꞌ nedaꞌ lu zrin chiaꞌ?
Quebe suedaꞌ gunaꞌ zrin le̱ꞌe̱ xixreꞌ,
ne weduéꞌedaꞌ nabaꞌ gunaꞌ.
4 Naꞌa ba nezdaꞌ tu da gunaꞌ chee̱ xelezúa benneꞌ xelezíꞌ lu ne̱ꞌe̱ nedaꞌ gate québedxa de̱ zrin chiaꞌ.
5 Nadxa gunné̱ꞌ tu tu benneꞌ dxelal-le̱ꞌ chee̱ xrane̱ꞌ naꞌ.
Naꞌ bche̱be̱ꞌ benneꞌ nedxu:
“¿ájate̱ dxal-luꞌ chee̱ xranaꞌ?”
6 Benneꞌ naꞌ beche̱be̱ꞌ:
“Dxal-laꞌ chee̱ꞌ tu gaxúa zruaga da za.”
Nadxa benneꞌ we̱n zrin blau naꞌ guzre̱ꞌ le̱ꞌ:
“Nigá de̱ xiche chiuꞌ.
Gudxéꞌe bexún xetú na,
naꞌ bzuaj na dxebaguꞌ chi xun zruaga caꞌ.”
7 Gudé naꞌ bche̱be̱ꞌ xetú benneꞌ caꞌ:
“¿Gazra lueꞌ,
ájate̱ dxebaguꞌ?”
Naꞌ benneꞌ nigá guzre̱ꞌ le̱ꞌ:
“Dxebagaꞌ tu gaxúa bzudeꞌ zruaꞌ xtila.”
Nadxa benneꞌ we̱n zrin blau guzre̱ꞌ le̱ꞌ:
“Nigá de̱ xiche chiuꞌ.
Be̱n xetú na,
naꞌ bzuaj na dxebaguꞌ tápalalajze.”
8 Xrane̱ꞌ gúquebeꞌene̱ꞌ nácale̱ꞌe̱ sina benneꞌ we̱n zrin blau naꞌ ca be̱ne̱ꞌ da caꞌ.
Nadxa gunná Jesús:
―Caꞌ naca na,
benneꞌ zaj zre̱ꞌe̱ naꞌa zra zaj nácadxe̱ꞌ sina lu da dxelune̱ꞌ nen le saꞌ ljwezre̱ꞌ caꞌ,
ca zaj naca benneꞌ zaj naque̱ꞌ chee̱ Dios.
9 ’Nedaꞌ dxapaꞌ leꞌe,
le guchine xel-la gunníꞌa chee̱ xe̱zr la xu nigá chee̱ cha benneꞌ ljwézrele,
chee̱ gate te chee̱ xel-la gunníꞌa naꞌ,
naꞌ sua nu siꞌ lu naꞌ leꞌe naga gaca banle chadía chacanna.
10 ’Benneꞌ dxuchínene̱ꞌ láteze lu dute̱ xel-la li lazreꞌ chee̱ꞌ,
cáꞌanqueze guchínene̱ꞌ tu da zrendxa dute̱ xel-la li lazreꞌ chee̱ꞌ,
naꞌ benneꞌ quebe naque̱ꞌ li lazreꞌ ca dxuchínene̱ꞌ láteze,
cáꞌanqueze quebe gaque̱ꞌ li lazreꞌ ca guchínene̱ꞌ tu da zrendxa.
11 Caꞌ naca na,
che quebe nácale li lazreꞌ ca dxuchínele xel-la gunníꞌa chee̱ xe̱zr la xu nigá,
¿nuzra guxrén lazre̱ꞌ leꞌe chee̱ guchínele xel-la gunníꞌa li?
12 Che quebe nácale li lazreꞌ ca dxuchínele da naca chee̱ benneꞌ xula,
¿nuzra gunna leꞌe da gaca cheé̱quezle?
13 ’Quebe gaca tu benneꞌ we̱n zrin gune̱ꞌ zrin chee̱ chupa xrane̱ꞌ,
laweꞌ da cuídene̱ꞌ tue̱ꞌ,
naꞌ xetúe̱ꞌ zríꞌine̱ꞌ,
u gaque̱ꞌ li lazreꞌ nen tue̱ꞌ,
naꞌ xetúe̱ꞌ guzúe̱ꞌ chaláꞌala.
Quebe gaca nu gun zrin chee̱ Dios,
ne chee̱ da gunníꞌa da nape̱ꞌ.
14 Benneꞌ fariseo caꞌ,
benneꞌ dxulucúdee̱ꞌ dumí,
ne dxuluzé̱ nague̱ꞌ da dxenná Jesús,
belún le̱ꞌ chee̱ꞌ.
15 Nadxa gunná Jesús:
―Leꞌe dxuléꞌe cuínale xrlátaje lau bénneache caꞌ,
san Dios núnbeꞌe̱ lázrdaule.
Da dxeleque bénneache naca na xrlátaje,
naca na da dxuzúa Dios chaláꞌala.
Da nadxixruj bea na, ne xel-la dxenná bea chee̱ Dios
16 Naꞌ gunná Jesús:
―Ca bzrin zra zua Juan gulenná bea da nadxixruj bea na,
ne da bululéꞌe benneꞌ caꞌ buluchálaje̱ꞌ waláz chee̱ Dios.
Naꞌa,
ca naꞌte̱ dxendxu dizraꞌ chaweꞌ ca gaca chúꞌudxu naga dxenná bea Dios,
naꞌ xúgute̱ benneꞌ dxelune̱ꞌ ba xuzre xeluꞌe̱ naꞌ.
17 ’Waca te chee̱ xabáa,
ne chee̱ xe̱zr la xu nigá,
san quebe te chee̱ tu da naxúaj na lu da nadxixruj bea na.
Benneꞌ biu dxulusáne̱ꞌ nuꞌula chee̱ꞌ
18 Naꞌ gunná Jesús:
―Che tu benneꞌ biu gusane̱ꞌ zruꞌule̱ꞌ,
ne súale̱ne̱ꞌ nuꞌula xula,
benneꞌ biu nigá dxune̱ꞌ dul-la dxáchajne̱ꞌ xrba chee̱ xel-la wechaga naꞌ,
naꞌ benneꞌ biu zúale̱ne̱ꞌ tu nuꞌula ba bsan benneꞌ chee̱ꞌ le̱ꞌ,
benneꞌ nigá cáꞌanqueze dxune̱ꞌ dul-la dxáchajne̱ꞌ xrba chee̱ xel-la wechaga naꞌ.
Tu benneꞌ gunníꞌa, ne tu benneꞌ xacheꞌ
19 Naꞌ gunná Jesús:
―Guzúa tu benneꞌ gunníꞌa,
gúcue̱ꞌ zra lane̱ꞌ da zaca,
ne da zriꞌa xrtan,
naꞌ xúgute̱ zra be̱ne̱ꞌ laní zren.
20 Cáꞌanqueze guzúa tu benneꞌ xacheꞌ le̱ꞌ Lázaro,
nazrate̱ we̱ꞌ lu be̱l-laꞌ dxen chee̱ꞌ,
naꞌ dxeajchéꞌe̱ lu xu dxuꞌa lizre benneꞌ gunníꞌa naꞌ.
21 Benneꞌ xacheꞌ nigá guzá lazre̱ꞌ gawe̱ꞌ ca da dxelexruj zranla ga dxelagu benneꞌ gunníꞌa naꞌ,
naꞌ bécudu caꞌ dxelelé̱ꞌe̱baꞌ lu we̱ꞌ caꞌ chee̱ Lázaro.
22 Bzrin zra gute benneꞌ xacheꞌ naꞌ,
naꞌ belexeché̱ꞌ gubáz chee̱ xabáa caꞌ le̱ꞌ zeajxezúale̱ne̱ꞌ Abraham lu lataj chaweꞌ chee̱ Dios.
Cáꞌanqueze gute benneꞌ gunníꞌa naꞌ,
naꞌ bulucache̱ꞌ le̱ꞌ.
23 Gate benneꞌ gunníꞌa naꞌ dxezaca ziꞌe̱ lataj chul-la chee̱ benneꞌ gate,
naꞌ guchisa lawe̱ꞌ,
naꞌ bléꞌene̱ꞌ Abraham zue̱ꞌ zituꞌ,
ne Lázaro zúale̱ne̱ꞌ le̱ꞌ.
24 Nadxa gudxezre xe̱ꞌe̱,
gunné̱ꞌ:
“¡Xrae,
Abraham,
bexache lazreꞌ nedaꞌ,
ne gusel-la Lázaro,
cheajsebise̱ꞌ tu zrube ne̱ꞌe̱,
naꞌ xide̱ꞌ xucule̱ꞌ luzraꞌ nigá!
Dxezaca ziꞌa lu xiꞌ nigá.”
25 Naꞌ Abraham gunné̱ꞌ:
“Bi chiaꞌ,
bsa lazreꞌ gúcale̱ꞌe̱ chaweꞌ chiuꞌ lu xe̱zr la xu,
san Lázaro gúcale̱ꞌe̱ da ziꞌ da xaꞌ chee̱ꞌ.
Naꞌa le̱ꞌ dxeziꞌe̱ da ba neza nigá,
naꞌ lueꞌ dxezaca ziꞌu naꞌ.
26 Xetú da zua,
zua tu chejéa zrente̱ laduj netuꞌ ne leꞌe.
Caꞌ naca na,
che nu benneꞌ zua nigá dxaca lazre̱ꞌ chéaje̱ꞌ naga zuꞌ,
quebe gaca,
ne quebe gaca benneꞌ zua naga zuꞌ xide̱ꞌ naga zúantuꞌ netuꞌ.”
27 Nadxa gunná benneꞌ gunníꞌa naꞌ:
“Dxataꞌ xuedaꞌ lueꞌ,
xrae Abraham,
sel-luꞌ Lázaro lizre xraꞌ,
28 naga zaj zraꞌ gazxuꞌ bi bíchaꞌdauꞌ,
chee̱ cheajchálajle̱ne̱ꞌ-beꞌ,
chee̱ quebe xeleláꞌ le̱beꞌ nigá xelezaca ziꞌbeꞌ ca dxaca chiaꞌ.”
29 Abraham gunné̱ꞌ:
“Zaj nape̱ꞌ da buluzúaj Moisés,
ne benneꞌ caꞌ buluchálaje̱ꞌ waláz chee̱ Dios.
Dxal-laꞌ xelenáꞌ xánnie̱ꞌ da naꞌ naxúaj na.”
30 Benneꞌ gunníꞌa naꞌ beche̱be̱ꞌ:
“Aweꞌ,
xrae Abraham,
san che nu benneꞌ ládujla benneꞌ gate chéaje̱ꞌ cheajchálajle̱ne̱ꞌ le̱ꞌ,
welexebíꞌi lazre̱ꞌ.”
31 Abraham gunné̱ꞌ:
“Che quebe xelenne̱ꞌ ca da gulenná Moisés,
ne benneꞌ caꞌ buluchálaje̱ꞌ waláz chee̱ Dios,
québequeze xeléajle̱ꞌe̱ che tu benneꞌ xebane̱ꞌ ládujla benneꞌ gate.”