Dxuléꞌe Jesús ca naca da xrlátaje da dxelún bénneache
6
Caní gunná Jesús:
―Le guxúe xanneꞌ cuínale chee̱ quebe gunle da naca chee̱ xel-laꞌ benneꞌ xudauꞌ chee̱le lau bénneache chee̱ xeleléꞌene̱ꞌ na.
Che caꞌan dxunle,
naꞌ Xrale Dios zue̱ꞌ xabáa québequeze bi gunne̱ꞌ leꞌe.
2 Chee̱ le̱ naꞌ,
gate lueꞌ dxácale̱nuꞌ benneꞌ dxelexázrjene̱ꞌ,
quebe guzennuꞌ xúgute̱ bénneache ca da dxunuꞌ,
ca dxelún benneꞌ caꞌ dxelune̱ꞌ xrlátaje cúzreze la neza,
ne lu xuꞌu naga dxulucáꞌana szren benneꞌ judío caꞌ Dios.
Dxelune̱ꞌ da caní chee̱ xelenné̱ bénneache xrlátaje chee̱ꞌ.
Da li dxapaꞌ leꞌe,
ba dé̱queze lazruj chee̱ꞌ.
3 Gate lueꞌ gunézrujuꞌ lateꞌ chee̱ benneꞌ dxelexázrjene̱ꞌ,
be̱n na luéze chee̱ quebe neze le saꞌ ljwezruꞌ.
4 Be̱n da caní bagácheze,
naꞌ Xrauꞌ Dios,
Bénneaꞌ dxeléꞌene̱ꞌ ca da dxunuꞌ bagácheze,
Le̱ꞌ gunne̱ꞌ lazruj chiuꞌ.
Jesús dxusé̱dene̱ꞌ ca dxal-laꞌ gundxu xel-laꞌ dxuláwizra Dios
5 Naꞌ gunná Jesús:
―Gate leꞌe gunle xel-laꞌ dxuláwizra Dios,
quebe gunle ca dxelún benneꞌ caꞌ dxelune̱ꞌ xrlátaje cúzreze.
Dxeledánene̱ꞌ dxelune̱ꞌ xel-laꞌ dxuláwizra Dios zaj ze̱ze̱ꞌ lu xuꞌu naga dxulucáꞌana szren benneꞌ judío caꞌ Dios,
ne la neza,
chee̱ xeleléꞌe bénneache da dxelune̱ꞌ.
Da li dxapaꞌ leꞌe,
ba dé̱queze lazruj chee̱ꞌ.
6 Gate lueꞌ dxuláwizruꞌ Dios,
guxúꞌu lu xuꞌu chiuꞌ.
Bsezxuj dxa xuꞌu chiuꞌ,
naꞌ bláwizra Dios guchálajle̱nuꞌ Xrauꞌ Dios zúale̱ne̱ꞌ lueꞌ naga zuꞌ tuzuꞌ.
Nadxa Xrauꞌ Dios,
Bénneaꞌ dxeléꞌene̱ꞌ ca da dxunuꞌ bagácheze,
Le̱ꞌ xuzriꞌe̱ chiuꞌ.
7 ’Gate dxuláwizruꞌ Dios dxuchálajle̱nuꞌ Le̱ꞌ,
quebe tuz ca da nneuꞌ zánete̱ lasa ca dxelún benneꞌ caꞌ quebe zaj núnbeꞌe̱ Dios.
Dxeléquene̱ꞌ wen Dios chee̱ꞌ laweꞌ da dxelenné̱le̱ꞌe̱.
8 Quebe gunle ca dxelún benneꞌ caꞌ,
laweꞌ da Xrale Dios ba nézquezne̱ꞌ ca da dxechínnele leꞌe nédxula ca za nábale na.
9 Chee̱ le̱ naꞌ,
le guláwizra Dios nnale caní:
Xrantuꞌ Dios,
zuꞌ xabáa,
gaca láꞌazxaqueze Lauꞌ.
10 Gudá nna beꞌu lu xe̱zr la xu nigá.
Gaca lu xe̱zr la xu nigá ca dxaca lazruꞌ Lueꞌ,
cáte̱ze dxaca xabáa.
11 Be̱nna netuꞌ da gáguntuꞌ naꞌa.
12 Bnite lau chee̱ntuꞌ ca naca da cale̱la da be̱ntuꞌ,
ca netuꞌ ba bnite launtuꞌ chee̱ benneꞌ belune̱ꞌ chee̱ntuꞌ
da cale̱la.
13 Quebe guꞌu lataj nu gun zréaje netuꞌ,
2 san bselá netuꞌ lu naꞌ da xriwe̱ꞌ.
Naca chiuꞌ gápaquezuꞌ xel-laꞌ dxenná bea,
ne xel-laꞌ waca,
ne da xabáa chadía chacanna.
¡Caꞌan gaca na!
14 ’Che leꞌe gunite laule chee̱ benneꞌ belune̱ꞌ chee̱le da cale̱la,
naꞌ Xrale Dios zue̱ꞌ xabáa gunite lawe̱ꞌ chee̱le leꞌe.
15 Che leꞌe quebe gunite laule chee̱ benneꞌ caꞌ,
naꞌ Xrale Dios quebe gunite láuqueze̱ꞌ chee̱le leꞌe ca naca dul-la da nabágale.
Jesús dxusédene̱ꞌ ca dxal-laꞌ gundxu gubasa
16 Naꞌ gunná Jesús:
―Gate leꞌe dxunle gubasa,
quebe guzúale baxacheꞌ laule ca dxelún benneꞌ dxelune̱ꞌ xrlátaje cúzreze.
Benneꞌ caní dxelune̱ꞌ caꞌ chee̱ xeleléꞌe bénneache le̱ꞌ dxelune̱ꞌ gubasa.
Da li dxapaꞌ leꞌe,
ba dé̱queze lazruj chee̱ benneꞌ caꞌ.
17 Lueꞌ,
gate dxunuꞌ gubasa,
bza xíchajuꞌ chaweꞌ,
ne gudibe lauꞌ,
18 chee̱ quebe xeléquebeꞌe bénneache dxunuꞌ gubasa.
Tuze Xrauꞌ Dios naꞌ,
Bénneaꞌ zúale̱ne̱ꞌ lueꞌ naga zuꞌ tuzuꞌ,
Le̱ꞌ dxennátequeze̱ꞌ,
naꞌ gunne̱ꞌ da naca na chiuꞌ.
Jesús dxusédene̱ꞌ chee̱ da gunníꞌa chee̱ xabáa
19 Naꞌ gunná Jesús:
―Quebe gutúpale da gunníꞌa lu xe̱zr la xu nigá,
naga gutebaꞌ na,
ne da caꞌ dxelebía xi na,
naꞌ xelúꞌu gubán ne xelebane̱ꞌ na.
20 Leꞌe,
le gun da xrlátaje,
da gaca na ca guzrá cháwele da gunníꞌa xabáa,
naga quebe gutebaꞌ na,
ne da caꞌ quebe bi xeleque na,
naꞌ québequeze xelúꞌu gubán chee̱ xelequé̱ꞌe̱ na.
21 Naga nuzrale da gunníꞌa chee̱le,
naꞌ zúaqueze lázrdaule.
Jesús dxusédene̱ꞌ chee̱ tu xiꞌ da xúꞌudxu
22 Naꞌ gunná Jesús:
―Xiaj laule zaj naca na ca tu xiꞌ chee̱ be̱l-laꞌ dxen chee̱le.
Che xiaj laule zaj naca na chaweꞌ,
dute̱ ca naca be̱l-laꞌ dxen chee̱le naxaníꞌ.
23 Che xiaj laule quebe zaj naca na chaweꞌ,
dute̱ ca naca be̱l-laꞌ dxen chee̱le nachul-la na.
Cáꞌanqueze che xiꞌ da xuꞌule xexaca na tu da chul-la,
chúl-lale̱ꞌe̱dxa súaquezle.
Jesús dxusédene̱ꞌ chee̱ Dios, ne chee̱ da gunníꞌa
24 Naꞌ gunná Jesús:
―Netú benneꞌ quebe séquene̱ꞌ guzúa cuine̱ꞌ lu naꞌ chupa xrane̱ꞌ,
laweꞌ da wazré̱ꞌe̱ tu xrane̱ꞌ ne wazríꞌine̱ꞌ xetúe̱ꞌ,
u wéquene̱ꞌ ba láꞌana tu xrane̱ꞌ naꞌ xetúe̱ꞌ guzúe̱ꞌ chaláꞌala.
Quebe séquele guzúa cuinle lu naꞌ Dios,
ne lu naꞌ da gunníꞌa.
Jesús dxusédene̱ꞌ ca dxun Dios, dxuxúe̱ꞌ xúgute̱ bi chee̱ꞌ caꞌ
25 Naꞌ gunná Jesús:
―Chee̱ le̱ naꞌ dxapaꞌ leꞌe,
quebe cueꞌle gunne xue ga saꞌ da gágule da xíꞌajle chee̱ gaca banle,
ne ga saꞌ zra lánale da gácule.
Zácadxa xel-laꞌ nabán chee̱le ca da dxágule,
ne zácadxa be̱l-laꞌ dxen chee̱le ca zra lánale.
26 Le nnaꞌxque bxínnedu caꞌ dxeledabaꞌ lu beꞌ.
Quebe dxelázabaꞌ.
Quebe dxelelápabaꞌ.
Quebe ga dxuluxuzrá cháwebaꞌ na.
Xrale Dios zue̱ꞌ xabáa dxunézruje̱ꞌ da dxelágubaꞌ.
Zácadxale leꞌe ca bxínnedu caꞌ.
27 ¿Nuzra benneꞌ ládujla leꞌe gaca gusetunna cuine̱ꞌ xateꞌ laweꞌ da dxeꞌe̱ gunne xue?
28 ’¿Bizr chee̱ naꞌ dxeꞌle leꞌe gunne xue chee̱ zra lánale?
Le nnaꞌxque ca dxelegula xiaj caꞌ zaj ze̱ le̱ꞌe̱ xixreꞌ.
Quebe dxelún na zrin,
ne quebe dxelache na du.
29 Dxapaꞌ leꞌe,
Salomón benneꞌ wenná bea naꞌ quebe gucue̱ꞌ ca da xrtan chee̱ xiaj caní,
naꞌ le̱ꞌ gútaꞌle̱ꞌe̱ chee̱ꞌ da gunníꞌa.
30 Che Dios dxudxe̱ne̱ꞌ xrtánle̱ꞌe̱ xiaj caní da caꞌ zaj zua na naꞌa le̱ꞌe̱ xixreꞌ,
naꞌ wxre xelezxe na lu xiꞌ,
quegá gundxe̱ꞌ da chaweꞌ chee̱le leꞌe,
benneꞌ québete̱ ca dxeajlí lazreꞌ.
31 Chee̱ le̱ naꞌ,
quebe cuéꞌtecale gunne xue,
nnale:
“¿Ga saꞌ da gágudxu?
¿Ga saꞌ da xíꞌajdxu?
¿Ga saꞌ da gácudxu?”
32 Chee̱ da caní zaj dxeꞌ gunne xue benneꞌ quebe zaj núnbeꞌe̱ Dios,
san leꞌe,
zua tu Xrale xabáa ba nézquezne̱ꞌ ca naca xúgute̱ da dxechínnele.
33 Zria laudxa cuele gunne xue chee̱ nna bea Dios lu xichaj lázrdaule,
ne chee̱ gunle da xrlátaje da xezaca ba lazreꞌ Dios,
naꞌ sile xúgute̱ da caꞌ dxechínnele.
34 Quebe cuele gunne xue naꞌa da naca na chee̱ wxre,
laweꞌ da wxre caꞌan gátaꞌqueze da cuele gunne xue.
Tu zra tu zra dé̱queze da guchaga laudxu.