Lban da bchalaj Jesús tu lu xiꞌa
5
Gate bleꞌe Jesús xúgute̱ benneꞌ zan caꞌ záꞌaque̱ꞌ naga zue̱ꞌ,
nadxa guluéne̱ꞌ tu lu xiꞌa,
ne gudxéꞌe̱ naꞌ.
Nadxa benneꞌ caꞌ dxuse̱de Jesús beledube̱ꞌ cuite̱ꞌ.
2 Nadxa guzú lau Jesús dxusé̱dene̱ꞌ benneꞌ caꞌ.
Nu benneꞌ naca chee̱ꞌ tu da ba neza
3 Gunná Jesús:
―Da ba neza zrente̱ naca na chee̱ benneꞌ caꞌ dxelexúnbeꞌe̱ ca naca xel-laꞌ dxexazrje chee̱ꞌ lau Dios.
Benneꞌ caní zaj naca chee̱ꞌ xelexúꞌe̱ naga dxenná bea Dios xabáa.
4 ’Da ba neza zrente̱ naca na chee̱ benneꞌ caꞌ dxeleléꞌele̱ꞌ zaj zue̱ꞌ lu da baxacheꞌ laweꞌ da zaj nabague̱ꞌ dul-la.
Dios dxexúe zrene̱ꞌ benneꞌ caní.
5 ’Da ba neza zrente̱ naca na chee̱ benneꞌ zaj naque̱ꞌ zren lazreꞌ.
Benneꞌ caní xelezíꞌe̱ chee̱ꞌ xe̱zr la xu da nache̱be lazreꞌ Dios gunézruje̱ꞌ benneꞌ caní.
6 ’Da ba neza zrente̱ naca na chee̱ benneꞌ du lazreꞌ dxelaca lazre̱ꞌ xelune̱ꞌ da naca xrlátaje lau Dios.
Dios gácale̱ne̱ꞌ benneꞌ caní.
7 ’Da ba neza zrente̱ naca na chee̱ benneꞌ dxelexexache lazre̱ꞌ benneꞌ xula.
Dios wexache lazre̱ꞌ benneꞌ caní.
8 ’Da ba neza zrente̱ naca na chee̱ benneꞌ caꞌ zaj xuꞌu xichaj lázrdawe̱ꞌ da xrlátaje.
Benneꞌ caní weleléꞌene̱ꞌ Dios.
9 ’Da ba neza zrente̱ naca na chee̱ benneꞌ dxelebeza zri lazre̱ꞌ nen bénneache.
Dios guzúe̱ꞌ le̱ꞌ ca bi cheé̱queze̱ꞌ.
10 ’Da ba neza zrente̱ naca na chee̱ benneꞌ dxeledée̱ꞌ xel-laꞌ ziꞌ lu naꞌ benneꞌ caꞌ dxelune̱ꞌ chee̱ꞌ da cale̱la cateꞌ dxelune̱ꞌ da xrlátaje.
Benneꞌ caní zaj naca chee̱ꞌ xelexúꞌe̱ naga dxenná bea Dios xabáa.
11 ’Da ba neza zrente̱ naca na chee̱le leꞌe che benneꞌ dxelenné̱ꞌ schanniꞌ chee̱le,
ne dxelune̱ꞌ chee̱le da cale̱la,
ne dxelenné̱ꞌ chee̱le xúgute̱ dizraꞌ we̱n lazreꞌ laweꞌ da nácale chiaꞌ nedaꞌ.
12 Le be,
ne le xezaca ba lázrele laweꞌ da wazile tu da zrente̱ da gunna Dios leꞌe xabáa.
Caní gaca na laweꞌ da cáꞌanqueze caní guláu ziꞌ xuzre̱ꞌ benneꞌ caꞌ buluchálaje̱ꞌ waláz chee̱ Dios,
benneꞌ caꞌ gulezré̱ꞌe̱ nédxudxa ca leꞌe.
Nácale ca zedeꞌ, ne ca tu xiꞌ lu xe̱zr la xu
13 Naꞌ gunná Jesús:
―Leꞌe nácale ca zedeꞌ chee̱ bénneache lu xe̱zrla xu nigá.
Che zedeꞌ nigá xenite xel-laꞌ snaꞌa chee̱ na,
¿ájazra gácale̱le bénneache caꞌ?
Québedxa gaca guchínedxu zedeꞌ caní.
¡Chúꞌunadxu na,
naꞌ xululéaj bénneache le̱ na!
14 ’Leꞌe nácale ca tu xiꞌ chee̱ bénneache zaj zre̱ꞌe̱ xe̱zr la xu.
Tu xe̱zre da zua na tu lu xiꞌa,
quebe gáchequeze na.
15 Gate guzálajdxu tu xiꞌ,
quebe gudúsedxu na.
Guzúadxu na sibe naga gusení na chee̱ xeleléꞌe xúgute̱ benneꞌ zaj zre̱ꞌe̱ lu xuꞌu.
16 Cáꞌanqueze le gun leꞌe.
Le güe lataj gusení xiꞌ da nácale lau bénneache caꞌ chee̱ xeleléꞌene̱ꞌ ca da xrlátaje da dxunle.
Nadxa xelúe láꞌane̱ꞌ Xrale Dios zue̱ꞌ xabáa.
Da bchalaj Jesús ca naca chee̱ da nadxixruj bea Dios
17 Gunná Jesús:
―Quebe dxal-laꞌ guéquele leꞌe zaꞌa nedaꞌ chee̱ cuaꞌ ca naca da bdxixruj beꞌe Moisés,
ne ca naca dizraꞌ da buluchalaj benneꞌ caꞌ buluchálaje̱ꞌ waláz chee̱ Dios.
Quebe zaꞌa chee̱ cuaꞌ na.
Zaꞌa chee̱ guléꞌedaꞌ cáte̱ze zéaje̱ na.
18 Da li dxapaꞌ leꞌe.
Dxácate̱ zaj zua xabáa,
ne xe̱zr la xu nigá,
quebe dúaqueze tu dizraꞌ,
ne tu da daꞌ lu da nadxixruj bea na nigá ca zrindxa zra gaca xúgute̱ ca da dxal-laꞌ gaca na.
19 Chee̱ le̱ naꞌ,
che tu benneꞌ guzúe̱ꞌ chaláꞌala bítete̱zla da nigá da bdxixruj bea Dios,
láqueze naca na tu da dauze,
ne che guzéajniꞌine̱ꞌ bénneache chee̱ xelúnqueze̱ꞌ caꞌ,
benneꞌ nigá xegáꞌane̱ꞌ cáꞌaze naga dxenná bea Dios xabáa.
Bénneaꞌ guzúe̱ꞌ dizraꞌ da nadxixruj bea nigá,
ne guléꞌene̱ꞌ bénneache chee̱ xelúnqueze̱ꞌ caꞌ,
benneꞌ nigá wegáꞌanaqueze̱ꞌ ba láꞌana naga dxenná bea Dios xabáa.
20 Dxapaꞌ leꞌe,
che quebe gunle da nácadxa xrlátaje ca da dxelún benneꞌ caꞌ dxuluxuzájle̱ꞌe̱ da nadxixruj bea Dios,
ne ca da dxelún benneꞌ xudauꞌ fariseo caꞌ,
cabataꞌ xexúꞌule leꞌe naga dxenná bea Dios xabáa.
Da bchalaj Jesús ca naca chee̱ xel-laꞌ dxezráꞌa
21 Naꞌ gunná Jesús:
―Leꞌe ba bénele ca gulenná xrtíale gula caꞌ:
“Quebe gútele benneꞌ,”
naꞌ “Nútete̱ze benneꞌ gutie̱ꞌ benneꞌ waxíaje̱ꞌ chee̱ cuía xiꞌe̱.”
22 Nedaꞌ dxapaꞌ leꞌe,
nútete̱ze benneꞌ dxezré̱ꞌe̱ le saꞌ ljwezre̱ꞌ waxíaje̱ꞌ chee̱ cuía xiꞌe̱.
Naꞌ bénneaꞌ dxenné̱ꞌ schanniꞌ chee̱ le saꞌ ljwezre̱ꞌ waxíaje̱ꞌ lau benneꞌ chee̱ xuꞌu laweꞌ blau,
naꞌ xuludée̱ꞌ le̱ꞌ chee̱ cuía xiꞌe̱.
Bénneaꞌ dxenné̱ꞌ chee̱ le saꞌ ljwezre̱ꞌ tu dizraꞌ sban,
benneꞌ nigá nácaqueze chee̱ꞌ chéaje̱ꞌ lu lataj ba xaꞌ.
23 ’Che guꞌu lu xudauꞌ tu da gunézrujuꞌ lau Dios,
ne naꞌ cheajsá lazruꞌ chee̱ tu da nunuꞌ chee̱ le saꞌ ljwezruꞌ,
24 bcaꞌana da naꞌ gunézrujuꞌ naꞌ,
teca xexíajuꞌ xegáꞌanuꞌ chaweꞌ nen le saꞌ ljwezruꞌ.
Nadxa waca xexíajuꞌ lu xudauꞌ chee̱ bi gunézrujuꞌ lau Dios.
25 ’Che zua nu benneꞌ dxebaguꞌ chee̱ꞌ,
naꞌ che̱ꞌe̱ lueꞌ lau benneꞌ guchiꞌe̱ chiuꞌ,
bexaca chaweꞌ nen le̱ꞌ la neza naꞌ,
chee̱ quebe gudée̱ꞌ lueꞌ lau bénneaꞌ dxuchiꞌe̱ da dxaca.
Che quebe gunuꞌ caní,
nadxa benneꞌ dxuchiꞌe̱ da dxaca naꞌ gudée̱ꞌ lueꞌ lu naꞌ benneꞌ dxusézxuje̱ꞌ bénneꞌ caꞌ lizre xia,
naꞌ xelegúꞌe̱ lueꞌ lizre xia naꞌ.
26 Da li dxapaꞌ lueꞌ.
Quebe xedxúajuꞌ naꞌ che quebe quízrujuꞌ xúgute̱ da dxebaguꞌ chee̱ benneꞌ naꞌ.
Da bchalaj Jesús ca naca chee̱ benneꞌ dxíchaje̱ꞌ xrba chee̱ xel-laꞌ nuchaga naꞌ
27 Naꞌ gunná Jesús:
―Leꞌe bache bénquezle ca gulenné̱ꞌ nédxute̱:
“Quebe gunuꞌ dul-la da dxichaj na xrba chee̱ xel-laꞌ nuchaga naꞌ.”
28 Nedaꞌ dxapaꞌ leꞌe,
nútete̱ze benneꞌ ne̱ꞌe̱ tu nuꞌula,
ne sa lazre̱ꞌ le̱ꞌ,
báchequeze be̱ne̱ꞌ dul-la nen nuꞌula naꞌ lu xichaj lázrdawe̱ꞌ.
29 ’Che xiaj lauꞌ da zua xabe̱la dxuzúa na lueꞌ lu dul-la,
guleaj na,
ne gudxúꞌuna na zítuꞌla.
Nácadxa chaweꞌ nite lateꞌ da naca na chee̱ be̱l-laꞌ dxen chiuꞌ quézcala chuꞌu lataj ba xaꞌ dute̱ be̱l-laꞌ dxen chiuꞌ.
30 Che naꞌu da zua xabe̱la chiuꞌ dxuzúa na lueꞌ lu dul-la,
guchugu na,
ne gudxúꞌuna na zituꞌ.
Nácadxa chaweꞌ nite lateꞌ da naca na chee̱ be̱l-laꞌ dxen chiuꞌ,
quézcala chuꞌu lataj ba xaꞌ dute̱ be̱l-laꞌ dxen chiuꞌ.
Jesús dxusédene̱ꞌ ca naca chee̱ benneꞌ dxexelé̱ꞌe̱ nen zruꞌule̱ꞌ
31 Naꞌ gunná Jesús:
―Cáꞌanqueze gulenné̱ꞌ nédxute̱:
“Nútete̱ze benneꞌ dxexelé̱ꞌe̱ nen zruꞌule̱ꞌ,
dxal-laꞌ gunézruje̱ꞌ nuꞌula naꞌ tu xiche da dxuléꞌe na belexelé̱ꞌe̱.”
32 Nedaꞌ dxapaꞌ leꞌe,
che tu benneꞌ dxexelé̱ꞌe̱ nen zruꞌule̱ꞌ,
naꞌ nuꞌula nigá quebe guzúale̱ne̱ꞌ benneꞌ xula,
benneꞌ chee̱ nuꞌula nigá dxuzúe̱ꞌ le̱ꞌ lu dul-la chee̱ da dxichaj na xrba chee̱ xel-laꞌ nuchaga naꞌ che tu benneꞌ biu xula guchaga ne̱ꞌe̱ nen nuꞌula naꞌ bsan benneꞌ chee̱ꞌ le̱ꞌ.
Cáꞌanqueze le̱ꞌ dxune̱ꞌ dul-la nen nuꞌula naꞌ.
Jesús dxusédene̱ꞌ ca naca chee̱ benneꞌ dxucáꞌana lie̱ꞌ xrtizre̱ꞌ
33 Naꞌ gunná Jesús:
―Cáꞌanqueze ba bénele ca gulenná benneꞌ gula caꞌ,
gulenné̱ꞌ:
“Quebe gucáꞌanuꞌ cáꞌaze ca da nache̱be lazruꞌ nen dizraꞌ bcaꞌana liuꞌ lau Xránadxu Dios.”
34 Nedaꞌ dxapaꞌ leꞌe:
Quebe dxal-laꞌ guzétjale xabáa chee̱ gucaꞌana lile dizraꞌ chee̱le,
laweꞌ da naca na naga dxeꞌ Dios,
35 ne quebe guzétjale xe̱zr la xu nigá laweꞌ da naca na naga nuzúa Dios niꞌe̱,
ne quebe guzétjale Jerusalén laweꞌ da naca na xe̱zre chee̱ Benneꞌ Blau naque̱ꞌ Wenná Bea.
36 Quebe guzétjale xíchajle chee̱ gucaꞌana lile dizraꞌ chee̱le laweꞌ da quebe séquele gunle da chiche,
ne da gasaj netú xicha xíchajle.
37 Le nnaze:
“Aweꞌ,”
u le nnaze:
“Cabí,”
laweꞌ da gate tu benneꞌ dxudadxe̱ꞌ chee̱ꞌ chee̱ da nigá,
naca na chee̱ da xriwe̱ꞌ.
Dxuléꞌe Jesús ca naca chee̱ nu benneꞌ dxexebéaj lazreꞌ
38 Naꞌ gunná Jesús:
―Leꞌe ba bénele ca da gulenné̱ꞌ nédxute̱:
“Che tu benneꞌ cuéaje̱ꞌ xiaj lauꞌ,
cáꞌanqueze gunuꞌ chee̱ꞌ,
ne che cuéaje̱ꞌ lazxuꞌ,
cáꞌanqueze gunuꞌ chee̱ꞌ.”
39 Nedaꞌ dxapaꞌ leꞌe,
quebe tíl-lale̱le nu benneꞌ,
san che tu benneꞌ guꞌe̱ chaláꞌa xraguꞌ,
be̱ꞌ lataj guꞌe̱ xechaláꞌa xraguꞌ.
40 Che tu benneꞌ gaca xúzreꞌle̱ne̱ꞌ lueꞌ,
ne dxaca lazre̱ꞌ cue̱ꞌ zrauꞌ,
be̱ꞌ lataj xúate̱ꞌ xicha chiuꞌ.
41 Che dxulusebágue̱ꞌ lueꞌ guꞌu xua chee̱ꞌ tu cuéndauꞌ,
bia na chupa cuenla.
42 Che nútete̱ze benneꞌ bi dxenabe̱ꞌ chiuꞌ,
bnézruje̱ꞌ na,
ne quebe guzaguꞌ ca gunézrujuꞌ chee̱ nu benneꞌ bi dxenabe̱ꞌ chite̱.
Jesús dxusédene̱ꞌ ca dxal-laꞌ zriꞌidxu benneꞌ caꞌ dxeledábague̱ꞌ dxiꞌu
(Lc. 6.27-28, 32-36)
43 Naꞌ gunná Jesús:
―Cáꞌanqueze ba bénele ca da gulenné̱ꞌ nédxute̱:
“Bzriꞌi le saꞌ ljwezruꞌ,
ne gucuide benneꞌ dxedábague̱ꞌ lueꞌ.”
44 Nedaꞌ dxapaꞌ leꞌe,
le zriꞌi benneꞌ caꞌ dxeledábague̱ꞌ leꞌe.
Le naba gaca chaweꞌ chee̱ benneꞌ dxelenné̱ꞌ chee̱le.
Le gun da chaweꞌ chee̱ benneꞌ dxelecuídene̱ꞌ leꞌe.
Le naba lau Dios gaca chaweꞌ chee̱ benneꞌ dxelenné̱ꞌ schanniꞌ chee̱le ne dxelune̱ꞌ chee̱le da cale̱la.
45 Che gunle caní gácale bi cheé̱queze Xrale zue̱ꞌ xabáa,
laweꞌ da dxun Le̱ꞌ dxusaníꞌ gubizra naga zaj zraꞌ benneꞌ we̱n da cale̱la ne naga zaj zraꞌ benneꞌ xrlátaje caꞌ,
ne dxusel-laꞌ nisa xiuj lu xe̱zr la xu chee̱ benneꞌ chaweꞌ caꞌ,
ne lu xe̱zr la xu chee̱ benneꞌ caꞌ dxelune̱ꞌ da cale̱la.
46 Che nazríꞌile tuze benneꞌ zaj nazríꞌine̱ꞌ leꞌe,
¿ájazra naꞌ dxezá lázrele quizruj Dios leꞌe?
Cáꞌanqueze dxelún benneꞌ wechizruj caꞌ,
zaj nazríꞌine̱ꞌ le saꞌ ljwezre̱ꞌ.
47 Che leꞌe dxugápale diuzre tuze le saꞌ ljwézrele,
¿bizra da xrlátaje dxunle?
Cáꞌanqueze dxelún benneꞌ quebe zaj núnbeꞌe̱ Dios.
48 Le gaca benneꞌ xrlátaje cáte̱ze naca Xrale zue̱ꞌ xabáa,
naque̱ꞌ xrlátaje.