Dxelezrín benneꞌ caꞌ gusel-la Juan lau Jesús
11
Gate bexuzre Jesús bchálajle̱ne̱ꞌ bénneache,
naꞌ bchálajle̱ne̱ꞌ chazrinnu benneꞌ caꞌ dxusé̱dene̱ꞌ.
Bezé̱ꞌe̱ naꞌ chee̱ cheajsédene̱ꞌ,
ne cheajchálaje̱ꞌ lban xúgute̱ xe̱zre caꞌ lu xe̱zr la xu naꞌ.
2 Juan,
bénneaꞌ bchue̱ꞌ bénneache nisa,
xuꞌe̱ lizre xia,
naꞌ benne̱ꞌ ca naca da dxun Cristo.
Nadxa gusel-le̱ꞌ chupa benneꞌ caꞌ dxeledále̱ne̱ꞌ le̱ꞌ lau Jesús.
3 Benneꞌ chupe̱ꞌ caní buluche̱be̱ꞌ Jesús:
―¿Nacuꞌ Lueꞌ Cristo,
Bénneaꞌ dxal-laꞌ xide̱ꞌ,
u che dxal-laꞌ cuézantuꞌ xeláꞌ xetú benneꞌ?
4 Naꞌ beche̱be Jesús:
―Le chjaca cheajé̱zrele Juan da caní dxeléꞌele,
ne da dxenle.
5 Le xe̱ꞌe̱ ca dxaca,
dxelexeléꞌe benneꞌ gulaque̱ꞌ la chul-la.
Dxelexedá benneꞌ gulezúa zri niꞌa ne̱ꞌe̱.
Belexexaca benneꞌ gulezaque̱ꞌ we̱ꞌ guzruꞌ,
ne belexexaca ban benneꞌ caꞌ gulatie̱ꞌ.
Benneꞌ xacheꞌ caꞌ dxelenne̱ꞌ dizraꞌ chaweꞌ chee̱ Dios.
6 Ba neza zrente̱ naca na chee̱ bénneaꞌ quebe xucuán lazre̱ꞌ sále̱ne̱ꞌ nedaꞌ.
7 Ca besíꞌaca benneꞌ chupa caꞌ,
naꞌ guzú lau Jesús dxuchálajle̱ne̱ꞌ benneꞌ zaj zre̱ꞌe̱ naꞌ ca naca chee̱ Juan.
Dxenné̱ꞌ:
―¿Bizra xeajnnaꞌle leꞌe le̱ꞌe̱ xixreꞌ naꞌ?
¿Xeajnnaꞌle tu xia da dxuxrize beꞌ?
8 Che cabí,
¿bizra xeajnnaꞌle naꞌ?
¿Xeajnnaꞌle tu benneꞌ nacue̱ꞌ zra lane̱ꞌ da zaca?
Nézquezle benneꞌ caꞌ zaj nácue̱ꞌ ladxeꞌ zaca,
lizre benneꞌ dxelenná beꞌe̱ zaj zraꞌ benneꞌ caní.
9 ¿Bízraqueze xeajnnaꞌle?
¿Xeajnnaꞌle tu benneꞌ dxuchálaje̱ꞌ waláz chee̱ Dios?
Aweꞌ.
Caꞌan guca.
Bénneaꞌ bleꞌele naꞌ nácadxe̱ꞌ blau ca tu benneꞌ dxuchálaje̱ꞌ waláz chee̱ Dios.
10 Lu xiche chee̱ Dios naxúaj na ca naca chee̱ Juan naꞌ.
Dxenná na:
Nedaꞌ dxesel-laꞌ benneꞌ gubáz chiaꞌ nédxula ca Lueꞌ,
chee̱ gucueze̱ꞌ neza naga teuꞌ.
11 Da li dxapaꞌ leꞌe,
ládujla xúgute̱ bénneache quebe nu chiláꞌ benneꞌ nácadxe̱ꞌ blau ca naca Juan,
bénneaꞌ bchue̱ꞌ bénneache nisa.
Naga dxenná bea Dios,
bénneaꞌ nácadxe̱ꞌ benneꞌ dxexruj lazreꞌ nácadxe̱ꞌ blau ca naca Juan naꞌ.
12 ’Ca lu zra blaꞌ Juan,
bénneaꞌ bchue̱ꞌ bénneache nisa,
bzrinte̱ naꞌa zra,
zaj zraꞌ benneꞌ dxelune̱ꞌ ziꞌ lazreꞌ xeluꞌe̱ naga dxenná bea Dios xabáa,
naꞌ benneꞌ dxelune̱ꞌ ziꞌ lazreꞌ dxelezruéꞌene̱ꞌ na.
13 Ca da bzuaj Moisés lu xiche chee̱ da nadxixruj bea na,
ne ca gulenná xúgute̱ benneꞌ buluchálaje̱ꞌ waláz chee̱ Dios,
dxuchalaj na ca naca chee̱ xel-laꞌ dxenná bea chee̱ Dios,
bzrinte̱ ca blaꞌ Juan naꞌ.
14 Che leꞌe dxaca lázrele chéajle̱le da nigá,
Juan naꞌ naque̱ꞌ Elías,
bénneaꞌ bchálaje̱ꞌ waláz chee̱ Dios gate nate,
naꞌ dxal-laꞌ xelé̱ꞌe̱ chee̱ guchálaje̱ꞌ waláz chee̱ Dios.
15 Che zua nágale,
le xen da nigá.
16 ’¿Ájazra zaj naca benneꞌ zaj zre̱ꞌe̱ naꞌa zra?
Zaj naque̱ꞌ ca bidu caꞌ dxelebéꞌebeꞌ dxelítajbeꞌ laweꞌ xiꞌa,
ne dxelenne̱beꞌ zizraj,
dxelé̱ ljwézrebeꞌ caꞌ:
17 “Bcuézrentuꞌ bchiuj san quebe bxáꞌale leꞌe.
Bil-la xáchentuꞌ san quebe gudxézrele.”
18 Caní zaj naque̱ꞌ laweꞌ da blaꞌ Juan,
quebe dxawe̱ꞌ,
ne quebe dxíꞌaje̱ꞌ da zaca,
naꞌ leꞌe dxennale xuꞌe̱ beꞌ xriwe̱ꞌ.
19 Nadxa blaꞌ nedaꞌ,
Benneꞌ Gulje̱ꞌ Bénneache,
dxawaꞌ,
ne dxíꞌajaꞌ,
naꞌ dxennale nacaꞌ nedaꞌ benneꞌ wagu xrata,
ne benneꞌ dxiꞌaj,
ne ljwezre benneꞌ dul-la,
ne benneꞌ wechizruj chee̱ Roma.
Naca bea nu benneꞌ nape̱ꞌ xel-laꞌ sina chee̱ Dios ne̱ chee̱ da dxun bénneaꞌ.
Ca gaca chee̱ bénneache quebe dxuluzúe̱ꞌ xrtizraꞌ Dios
20 Nadxa guzú lau Jesús dxedil-le̱ꞌ bénneache chee̱ xe̱zre caꞌ naga be̱ne̱ꞌ xel-laꞌ waca caꞌ chee̱ xabáa,
laweꞌ da quebe belexebíꞌi lazreꞌ benneꞌ zaj zre̱ꞌe̱ naꞌ.
Naꞌ gunné̱ꞌ:
21 ―Baxacheꞌ nácale leꞌe zrale xe̱zre Corazín.
Baxacheꞌ nácale leꞌe zrale xe̱zre Betsaida.
Caní nácale laweꞌ da checaꞌ la ba guca lu xe̱zre Tiro,
ne lu xe̱zre Sidón ca naca xel-laꞌ waca caꞌ chee̱ xabáa ca da gulaca ládujla leꞌe,
da zrente̱ ba zeaj gulácue̱ꞌ zra lane̱ꞌ tuzruj,
ne gulegúꞌe̱ de xíchaje̱ꞌ da zaj naca bea na belexebíꞌi lazre̱ꞌ.
22 Nedaꞌ dxapaꞌ leꞌe,
lu zra guchiꞌa Dios,
gundxe̱ꞌ da ba xaꞌ chee̱le quez ca da ba xaꞌ gune̱ꞌ chee̱ benneꞌ Tiro,
ne benneꞌ Sidón.
23 Leꞌe zrale xe̱zre Capernaum,
¿dxéquele Dios wechise̱ꞌ leꞌe xabáa?
Dios gudée̱ꞌ leꞌe lataj ba xaꞌ.
Caní gaca na laweꞌ da checaꞌ la ba guca lu xe̱zre Sodoma ca naca xel-laꞌ waca caꞌ chee̱ xabáa ca da gulaca ládujla leꞌe,
nagáꞌanate̱queze xe̱zre naꞌ lu zra naꞌa zra.
24 Nedaꞌ dxapaꞌ leꞌe,
lu zra guchiꞌa Dios,
gundxe̱ꞌ da ba xaꞌ chee̱le quez ca gune̱ꞌ da ba xaꞌ chee̱ benneꞌ Sodoma caꞌ.
Dxenná Jesús: “Le da naga zuaꞌ xezíꞌ lázrele”
25 Ca lu zra naꞌ gunná Jesús:
―Dxue láꞌanaꞌ Lueꞌ,
Xrae,
nacuꞌ Xrana xabáa,
ne Xrana xe̱zr la xu nigá.
Dxue láꞌanaꞌ Lueꞌ laweꞌ da bcácheuꞌ da caní lau benneꞌ sina caꞌ,
ne lau benneꞌ dxeléajniꞌine̱ꞌ,
san bléꞌenuꞌ na bidu caní.
26 Caꞌan naca,
Xrae,
laweꞌ da naca na ca dxaca lazruꞌ Lueꞌ.
27 ’Xraꞌ ba bdee̱ꞌ lu naꞌa xúgute̱ da caní.
Quegá nu benneꞌ núnbeꞌe̱ nedaꞌ,
Zriꞌine Dios,
san Xraꞌ Dios núnbeꞌe̱ nedaꞌ.
Quegá nu benneꞌ núnbeꞌe̱ Xraꞌ,
san nedaꞌ,
Zriꞌine Dios,
núnbeꞌa Le̱ꞌ,
ne zaj núnbea benneꞌ caꞌ Le̱ꞌ,
benneꞌ caꞌ dxaca lazraꞌ guléꞌedaꞌ le̱ꞌ ca naca Xraꞌ.
28 Le da naga zuaꞌ,
xúgute̱le leꞌe dxeajxréquele lu zrin dxunle chee̱ xudauꞌ,
ne ca naca xua da núale,
naꞌ nedaꞌ gunaꞌ xezíꞌ lázrele.
29 Le gunna lataj xruaꞌ leꞌe ca nu benneꞌ xrue̱ꞌ be̱zre xuguꞌ chee̱baꞌ,
ne le guse̱de chiaꞌ laweꞌ da nacaꞌ dxexruj lazreꞌ,
ne dxeꞌene lazreꞌ,
naꞌ wazruéꞌele xezíꞌ lázrele lu bénneꞌdu xuꞌule.
30 Da naꞌ naca na ca xuguꞌ chee̱ be̱zre da xruaꞌ leꞌe québete̱ ca naca na ste̱be chee̱ gúale na,
naꞌ xua da xruaꞌ leꞌe naca na zraze.