Jesús dxesel-le̱ꞌ benneꞌ gaxún chi caꞌ
10
Ca gudé naꞌ,
Xránadxu guqué̱ꞌe̱ xegaxún chi benneꞌ caꞌ,
naꞌ gusél-le̱ꞌ chupa weaje̱ꞌ xelebía lawe̱ꞌ lau Le̱ꞌ xúgute̱ xe̱zre,
ne xé̱zredu caꞌ naga dxal-laꞌ chéaje̱ꞌ Le̱ꞌ.
2 Guzre̱ꞌ benneꞌ caꞌ:
―Da li dxennéaꞌ,
lina da zren naca na,
naꞌ benneꞌ we̱n zrin bábaze zaj naque̱ꞌ.
Chee̱ le̱ naꞌ le naba lau Xrane zrin naꞌ sel-le̱ꞌ benneꞌ we̱n zrin caꞌ xelexequé̱ꞌe̱ lina naꞌ.
3 ¡Le chjaca!
Le nnaꞌxque,
nedaꞌ dxesel-laꞌ leꞌe,
gácale ca zrílaꞌdu caꞌ ládujla becuꞌ xiꞌa caꞌ.
4 Quebe gúale xixruj,
ne dumí,
ne zrélale,
ne quebe gagale la neza nu guchálajle̱le.
5 Gate chuꞌule tu lu xuꞌu,
naꞌ gugápale diuzre,
nnale:
“Xel-la dxebeza zri lazreꞌ gaca chee̱ benneꞌ zaj zre̱ꞌe̱ lu xuꞌu nigá.”
6 Che zaj zraꞌ naꞌ benneꞌ dxelebeza zri lazre̱ꞌ,
naꞌ da gunábale gaca chee̱ benneꞌ caꞌ,
san che quebe nu chiláꞌ naca caní,
le naba quebe gaca da ba gunábale.
7 Le xegáꞌana lu xuꞌu náꞌqueze,
naꞌ le xiꞌaj le gagu ca da xelunne̱ꞌ laweꞌ da benneꞌ we̱n zrin quebe te le tune̱ꞌ.
Quebe cheajsúale tu xuꞌu xetú xuꞌu.
8 Gate zrinle tu xe̱zre naga xelezíꞌ lu ne̱ꞌe̱ leꞌe,
le gagu ca da xelunne̱ꞌ.
9 Le xexún benneꞌ zaj xuꞌe̱ xízrawe̱ꞌ zaj zre̱ꞌe̱ naꞌ,
naꞌ le xe̱ꞌe̱:
“Xel-la dxenná bea chee̱ Dios ba zua nen leꞌe.”
10 Che zrinle tu xe̱zre naga quebe xelezíꞌ lu ne̱ꞌe̱ leꞌe,
le xedxúaj la neza chee̱ xe̱zre naꞌ,
naꞌ nnale:
11 “Ca naca bxrteduꞌ daꞌ níꞌantuꞌ dxexebíbentuꞌ na chee̱ gaca tu da guléꞌe na leꞌe nabágale zria lau Dios.
Dxal-laꞌ nézele ba blaꞌ ládujla leꞌe xel-la dxenná bea chee̱ Dios.”
12 Dxapaꞌ leꞌe,
ca lu zra guchiꞌa Dios,
da xelezaca benneꞌ zaj zre̱ꞌe̱ lu xe̱zre nigá gácadxa na xel-la ziꞌ ca da xelezaca benneꞌ xe̱zre Sodoma,
xe̱zre naꞌ bzria xiꞌ Dios.
Da gaca chee̱ xe̱zre naga quebe belune̱ꞌ ca dxenná xrtizraꞌ Dios
13 Naꞌ gunná Jesús:
―¡Edxugúa leꞌe,
benneꞌ xe̱zre Corazín!
¡Edxugúa leꞌe,
benneꞌ xe̱zre Betsaida!
Chela lu xe̱zre Tiro,
ne lu xe̱zre Sidón beleléꞌene̱ꞌ ca naca xel-la waca chee̱ xabáa da ba gulaca ládujla leꞌe,
gate naꞌte ba belexebíꞌi lazre̱ꞌ,
belácue̱ꞌ zra lane̱ꞌ tuzruj,
ne buluzríe̱ꞌ de xíchaje̱ꞌ.
14 Lu zra guchiꞌa Dios da dxaca,
naꞌ sácadxale leꞌe xel-la ziꞌ ca da xelezaca benneꞌ Tiro,
ne Sidón.
15 Naꞌ leꞌe,
benneꞌ xe̱zre Capernaum,
¿dxéquele waxásale zrínte̱le xabáa?
¡Lataj chúl-lala xétajle!
16 Nadxa guzre̱ꞌ benneꞌ caꞌ dxusé̱dene̱ꞌ:
―Benneꞌ xenne̱ꞌ chee̱le leꞌe,
chiaꞌ nedaꞌ xenne̱ꞌ,
naꞌ benneꞌ guzúe̱ꞌ leꞌe chaláꞌala,
nedaꞌ naꞌ gusaque̱ꞌ caꞌ,
naꞌ benneꞌ guzúe̱ꞌ nedaꞌ chaláꞌala,
Dios,
Bénneaꞌ gusel-le̱ꞌ nedaꞌ,
guzúe̱ꞌ chaláꞌala.
Dxelexezrín benneꞌ gaxún chi caꞌ
17 Benneꞌ gaxún chi caꞌ belexezrine̱ꞌ lu xel-la dxelebé,
dxelenné̱ꞌ:
―Xran,
beꞌ xriwe̱ꞌ caꞌ dxuluzúaqueze na dizraꞌ chee̱ntuꞌ gate dxuchínentuꞌ Lauꞌ.
18 Jesús guzre̱ꞌ benneꞌ caꞌ:
―Caꞌ naca,
naꞌ nedaꞌ bleꞌedaꞌ da xriwe̱ꞌ be̱xruj na zran xabáa ca tu xesa da dxeajsúa na lu xu.
19 Nedaꞌ ba be̱nnaꞌ leꞌe xel-la dxenná bea chee̱ guléajle be̱ snia caꞌ,
ne bé̱xrujni,
ne chee̱ guchúchujle dute̱ xel-la dxenná bea chee̱ da xriwe̱ꞌ,
naꞌ quebe bi seque gune na leꞌe.
20 Quebe bele laweꞌ da dxelún beꞌ xriwe̱ꞌ ca dxennale leꞌe,
san le be laweꞌ da ba naxúaj lale xabáa naꞌla.
Jesús dxebene̱ꞌ
21 Lu zra náꞌqueze gubéle̱ꞌe̱ Jesús,
zúale̱ Beꞌ Láꞌazxa Le̱ꞌ,
naꞌ gunné̱ꞌ:
―Dxue láꞌanaꞌ Lueꞌ,
Xrae,
Xrane xabáa ne xe̱zr la xu,
laweꞌ da ba bléꞌenuꞌ bénneꞌdu caní da bcácheuꞌ chee̱ benneꞌ sina caꞌ,
ne benneꞌ dxeléajniꞌine̱ꞌ.
¡Caꞌ naca,
Xrae,
laweꞌ da caꞌan guca lazruꞌ Lueꞌ!
22 ’Xraꞌ ba be̱nne̱ꞌ nedaꞌ xúgute̱.
Quegá nu neze nu naꞌ naca Zríꞌine̱ꞌ,
san tuze Xráꞌquezaꞌ,
ne quegá nu neze nu naꞌ naca Xraꞌ,
san tuze Zríꞌinequeze̱ꞌ,
ne nu benneꞌ caꞌ dxaca lazreꞌ Zríꞌine̱ꞌ guzéajniꞌine̱ꞌ le̱ꞌ Nu naꞌ naca Xre̱ꞌ.
23 Nadxa guné̱ꞌe̱ benneꞌ caꞌ dxusé̱dene̱ꞌ,
naꞌ guzre̱ꞌ benneꞌ cáꞌanze:
―Ba neza naca na chee̱ benneꞌ caꞌ dxeleléꞌene̱ꞌ ca da dxeléꞌele leꞌe,
24 laweꞌ da dxapaꞌ leꞌe,
zánete̱ benneꞌ caꞌ,
benneꞌ buluchálaje̱ꞌ waláz chee̱ Dios,
ne benneꞌ wenná bea caꞌ gulaca lazre̱ꞌ xeleléꞌene̱ꞌ ca da dxeléꞌele leꞌe,
san quebe beleléꞌene̱ꞌ na.
Gulaca lazre̱ꞌ xelenne̱ꞌ ca da dxenle leꞌe,
san quebe belenne̱ꞌ na.
Da dxuléꞌe na ca be̱n benneꞌ Samaria, benneꞌ naque̱ꞌ chaweꞌ
25 Nadxa tu benneꞌ dxuxuzájle̱ꞌe̱ da nadxixruj bea Dios bdxúaje̱ꞌ,
ne guxíaje̱ꞌ xeajchálajle̱ne̱ꞌ Jesús chee̱ gaca guzúa zrie̱ꞌ Le̱ꞌ,
naꞌ bche̱be̱ꞌ Le̱ꞌ:
―Benneꞌ Wese̱de,
¿bizra dxal-laꞌ gunaꞌ chee̱ gataꞌ chiaꞌ xel-la nabán da zeajlí canna?
26 Jesús beche̱be̱ꞌ:
―¿Bizra da naxúaj na lu da nadxixruj bea Dios?
¿Aja dxéquenuꞌ da dxulabuꞌ?
27 Bénneaꞌ dxuxuzájle̱ꞌe̱ da nadxixruj bea Dios beche̱be̱ꞌ:
―Bzriꞌi Xranuꞌ Dios dute̱ lázrdaꞌu,
ne nen dute̱ bénneꞌdu xuꞌu,
ne nen dute̱ xel-la dxun ziꞌ lazreꞌ chiuꞌ,
ne nen dute̱ xel-la dxulaba lazreꞌ chiuꞌ,
naꞌ bzriꞌi le saꞌ ljwezruꞌ ca nazríꞌi cuinuꞌ.
28 Nadxa gunná Jesús,
guzre̱ꞌ le̱ꞌ:
―Cháweꞌle̱ꞌe̱ beche̱buꞌ.
Che dxunuꞌ caní,
naꞌ gapuꞌ xel-la nabán naꞌ.
29 Bénneaꞌ dxuxuzájle̱ꞌe̱ da nadxixruj bea Dios guca lazre̱ꞌ gucáꞌana chaweꞌ cuine̱ꞌ,
naꞌ guzre̱ꞌ Jesús:
―¿Nuzra naꞌ le saꞌ lwezraꞌ?
30 Beche̱be Jesús:
―Tu benneꞌ guzé̱ꞌe̱ Jerusalén,
bétaje̱ꞌ zíaje̱ꞌ Jericó.
Lu neza naꞌ xuꞌe̱,
naꞌ gule̱la gubán le̱ꞌ,
ne gulebane̱ꞌ ca naca da nape̱ꞌ,
ne zra lane̱ꞌ.
Naꞌ buluzálaje̱ꞌ le̱ꞌ,
ne besiáꞌque̱ꞌ zaj nucáꞌane̱ꞌ le̱ꞌ ca benneꞌ gate.
31 Nadxa gudé tu bxruze neza naꞌ,
naꞌ gate bléꞌene̱ꞌ le̱ꞌ,
gudée̱ꞌ chaláꞌala.
32 Cáꞌanqueze gudé naꞌ tu benneꞌ xrtia Leví,
benneꞌ dxune̱ꞌ zrin chee̱ xudauꞌ,
naꞌ gate bléꞌene̱ꞌ bénneaꞌ,
gudée̱ꞌ chaláꞌala.
33 Nadxa tu benneꞌ Samaria gudée̱ꞌ neza naꞌ,
naꞌ gate bléꞌene̱ꞌ le̱ꞌ bexache lazre̱ꞌ le̱ꞌ.
34 Gubigue̱ꞌ cuita benneꞌ naꞌ,
ne btupe̱ꞌ tu da za lu we̱ꞌ chee̱ꞌ,
ne xrise uva wal-la,
naꞌ bchele̱ꞌ na ladxeꞌ.
Nadxa bcuene̱ꞌ le̱ꞌ cuzru bea chee̱ꞌ,
naꞌ beche̱ꞌe̱ le̱ꞌ tu lu xuꞌu naga xegáꞌane̱ꞌ,
ne bxue̱ꞌ le̱ꞌ naꞌ.
35 Zra xula,
ca bezáꞌ benneꞌ Samaria naꞌ,
naꞌ guléaje̱ꞌ chupa dumí da bnézruje̱ꞌ xrane xuꞌu naꞌ,
ne guzre̱ꞌ le̱ꞌ:
“Bxue benneꞌ nigá,
naꞌ che ba gucáꞌadxa xelateꞌ dumí chiuꞌ,
nedaꞌ xexunnaꞌ na gate xeláꞌa.”
36 Nadxa Jesús guzre̱ꞌ benneꞌ dxuxuzájle̱ꞌe̱ da nadxixruj bea Dios:
―¿Nula benneꞌ chunna caní guque̱ꞌ le saꞌ ljwezre bénneaꞌ gule̱la gubán caꞌ?
37 Naꞌ gunná bénneaꞌ dxuxuzájle̱ꞌe̱ da nadxixruj bea Dios:
―Bénneaꞌ bexache lazre̱ꞌ le̱ꞌ.
Nadxa Jesús guzre̱ꞌ le̱ꞌ:
―Bexíaj lueꞌ,
naꞌ gúnquezuꞌ caꞌ.
Parábola del Buen Samaritano
Jesús dxezrine̱ꞌ lizre Marta ne María
38 Jesús bexuꞌe̱ neza,
naꞌ bezrine̱ꞌ tu xé̱zredauꞌ,
naꞌ lu xe̱zre naꞌ zua tu nuꞌula le̱ꞌ Marta,
naꞌ guluꞌe̱ Jesús lizre̱ꞌ.
39 Marta naꞌ,
zua tu bi bile̱ꞌ le̱ꞌ María,
naꞌ María naꞌ gudxéꞌe̱ zran niꞌa Jesús chee̱ xenne̱ꞌ da dxuchálaje̱ꞌ.
40 Marta dé̱le̱ꞌe̱ da dxune̱ꞌ,
naꞌ bzrine̱ꞌ lau Jesús,
ne guzre̱ꞌ Le̱ꞌ:
―Xran,
¿quebe dxexache lazruꞌ nedaꞌ laweꞌ da dxucáꞌana bi bilaꞌ nedaꞌ chee̱ gunaꞌ tuzaꞌ zrin chee̱ntuꞌ?
Guzre-beꞌ gácale̱beꞌ nedaꞌ.
41 Jesús beche̱be̱ꞌ: