―Bsa da dxedá laweꞌ nísadauꞌ chiuꞌ naga nácadxa situj nísadauꞌ,

naꞌ le guzal-la xixruj chee̱le naꞌ chee̱ senle bela.

5 Simón beche̱be̱ꞌ:

―Benneꞌ Wese̱de,

bedú xe̱la be̱ntuꞌ zrin,

ne quebe bi bela ne sentuꞌ.

Lu dizraꞌ chiuꞌ,

naꞌa guzal-laꞌ xixruj nigá.

6 Ca belune̱ꞌ ca gunná Jesús,

naꞌ bela zante̱ gulezene̱ꞌ,

naꞌ gúcate̱ wadxeza xixruj naꞌ.

7 Nadxa bulutá ne̱ꞌe̱ gulenné̱ꞌ benneꞌ ljwezre̱ꞌ zaj zre̱ꞌe̱ xetú lu da dxedá laweꞌ nísadauꞌ chee̱ xelácale̱ne̱ꞌ le̱ꞌ.

Benneꞌ caꞌ belezrine̱ꞌ,

naꞌ bulusezrate̱ꞌ dxúpate̱ da dxedá laweꞌ nísadauꞌ caꞌ,

naꞌ gulácate̱ na ziꞌi,

ne dxácate̱ welaze na lu nísadauꞌ.

8 Gate bleꞌe Simón Pedro da nigá,

naꞌ bzu zribe̱ꞌ lau Jesús,

gunné̱ꞌ:

―Gucuasa cuitaꞌ nedaꞌ,

Xran,

laweꞌ da nacaꞌ nedaꞌ benneꞌ dul-la.

9 Caní gunná Simón laweꞌ da dxezrébele̱ꞌe̱ ne̱ chee̱ da guca na,

ne cáꞌanqueze dxelezrebe benneꞌ ljwezre̱ꞌ caꞌ,

gate beleléꞌene̱ꞌ bela zan caꞌ.

10 Cáꞌanqueze belezrebe Jacobo ne Juan,

zriꞌine Zebedeo,

benneꞌ zaj naque̱ꞌ ljwezre Simón naꞌ.

Jesús guzre̱ꞌ Simón:

―Quebe zrebuꞌ.

Náꞌate̱la su lauꞌ senuꞌ bénneache lu da naca chee̱ Dios.

11 Nadxa,

ca belexebéaje̱ꞌ da dxedá laweꞌ nísadauꞌ naꞌ dxúꞌela nísadauꞌ,

naꞌ bulucáꞌane̱ꞌ ca naca da caꞌ,

naꞌ zjácale̱ne̱ꞌ Jesús.

12 Gate Jesús zue̱ꞌ tu xe̱zre,

naꞌ bzrin tu benneꞌ dxéꞌene̱ꞌ we̱ꞌ guzruꞌ,

naꞌ ca bléꞌene̱ꞌ Jesús,

bzu zribe̱ꞌ,

ne gudíxrujte̱ lawe̱ꞌ lu xu,

naꞌ bcaꞌana szrene̱ꞌ Le̱ꞌ,

gunné̱ꞌ:

―Xran,

che dxaca lazruꞌ,

waca xexunuꞌ nedaꞌ.

13 Nadxa Jesús bte̱ꞌ-beꞌ nen ne̱ꞌe̱,

gunné̱ꞌ:

―Dxaca lazraꞌ.

Bache bexacuꞌ.

Ca gunné̱ꞌ caꞌ,

we̱ꞌ guzruꞌ naꞌ bedxúajte̱ na.

14 Jesús bsebague̱ꞌ bénneaꞌ quebe nu xe̱ꞌe̱ da nigá.

Nadxa gunné̱ꞌ:

―Guxíaj naꞌa,

xeajléꞌe cuinuꞌ lau bxruze,

ne gulúꞌu dumí chee̱ xexádxeuꞌ lau Dios ca da gunná beꞌe Moisés chee̱ xeleneze benneꞌ ba bexacuꞌ ca naca xízrawe̱ꞌ chiuꞌ.

15 Ca naca xel-la waca chee̱ Jesús bzrílujdxa na,

naꞌ benneꞌ zante̱ belezrague̱ꞌ lau Jesús chee̱ xelenne̱ꞌ da dxuchálaje̱ꞌ,

ne chee̱ xexune̱ꞌ le̱ꞌ ca naca xízrawe̱ꞌ chee̱ꞌ.

16 Nadxa Jesús bezé̱ꞌe̱ naꞌ,

naꞌ bzrine̱ꞌ naga quebe nu chiláꞌ benneꞌ,

naꞌ bchálajle̱ne̱ꞌ Dios.

17 Tu zra zua Jesús dxusé̱dene̱ꞌ,

naꞌ bal-la benneꞌ xudauꞌ fariseo caꞌ,

ne benneꞌ dxuluxuzájle̱ꞌe̱ da nadxixruj beꞌe Moisés,

zaj dxeꞌe̱ naꞌ,

benneꞌ záꞌaque̱ꞌ ca naca xé̱zredu caꞌ zaj nababa Galilea,

ne xe̱zre caꞌ zaj nababa Judea,

ne chee̱ xe̱zre Jerusalén,

naꞌ zúale̱ xel-la waca chee̱ Xránadxu Dios Jesús,

naꞌ bexune̱ꞌ benneꞌ caꞌ quebe chaweꞌ zaj zue̱ꞌ.

18 Nadxa belezrín tapa benneꞌ zaj nuꞌe̱ tu benneꞌ zua zri niꞌa ne̱ꞌe̱,

dee̱ꞌ tu lu blagaꞌ,

naꞌ gulaca lazre̱ꞌ xelegúꞌe̱ le̱ꞌ lu xuꞌu chee̱ xelíxrue̱ꞌ le̱ꞌ lau Jesús.

19 Quebe guca xelezrine̱ꞌ lau Jesús laweꞌ da zrále̱ꞌe̱ benneꞌ zan ga naꞌ.

Nadxa gulegüéne̱ꞌ chjuꞌula,

ne gulesaluje̱ꞌ chjuꞌu,

naꞌ bululétaje̱ꞌ benneꞌ naꞌ de̱ꞌ lu blagaꞌ ládujla benneꞌ zan caꞌ lau Jesús.

20 Gate bleꞌe Jesús ca dxeléajle̱ benneꞌ caꞌ chee̱ꞌ,

naꞌ guzre̱ꞌ benneꞌ quebe chaweꞌ zue̱ꞌ:

―Bénneꞌdauꞌ,

ba bnite lawaꞌ dul-la chiuꞌ.

21 Nadxa benneꞌ caꞌ dxuluxuzájle̱ꞌe̱ da nadxixruj bea na,

ne benneꞌ xudauꞌ fariseo caꞌ gulezú lawe̱ꞌ dxelenné̱ꞌ lu xichaj lázrdawe̱ꞌ:

¿Nuzra benneꞌ nigá,

dxenné̱ꞌ schanniꞌ chee̱ Dios?

Quebe nu benneꞌ séquene̱ꞌ gunite lawe̱ꞌ dul-la chee̱ bénneache.

Tuze Dios gaque̱ꞌ.

22 Jesús dxéquebeꞌene̱ꞌ da dxelenné̱ꞌ lu xichaj lázrdawe̱ꞌ,

naꞌ guzre̱ꞌ benneꞌ caꞌ:

―¿Bizr chee̱ naꞌ dxéquele leꞌe caní?

23 ¿Bízrala na quebe naca na ste̱be gunaꞌ,

che xapaꞌ benneꞌ nigá:

Ba bnite lawaꞌ dul-la chiuꞌ,

u che xapaꞌ le̱ꞌ:

Guxasa bexíaj?

24 Guléꞌedaꞌ leꞌe nedaꞌ,

Benneꞌ Gulje̱ꞌ Bénneache,

napaꞌ xel-la dxenná bea lu xe̱zr la xu nigá chee̱ gunite lawaꞌ dul-la chee̱ bénneache.

Nadxa guzre̱ꞌ benneꞌ naꞌ naxrúꞌune niꞌa ne̱ꞌe̱:

―Lueꞌ dxapaꞌ,

bexasa,

bexúa blagaꞌ chiuꞌ,

ne bexíaj.

25 Ca gunné̱ꞌ caꞌ,

bexásate̱ benneꞌ naꞌ lau xúgute̱ benneꞌ caꞌ,

naꞌ bequé̱ꞌe̱ blagaꞌ chee̱ꞌ,

ne bezé̱ꞌe̱ zexíaje̱ꞌ lizre̱ꞌ zeajxé̱ láꞌane̱ꞌ Dios.

26 Xúgute̱ benneꞌ caꞌ belexebánene̱ꞌ,

naꞌ belúe láꞌane̱ꞌ Dios,

ne nen xel-la dxelezrebe gulenné̱ꞌ:

―Naꞌa bleꞌedxu da dxebánequezdxu.

27 Ca gudé naꞌ bezáꞌa Jesús,

naꞌ bléꞌene̱ꞌ tu benneꞌ dxuchizruje̱ꞌ waláz chee̱ xe̱zre Roma,

le̱ꞌ Leví.

Dxeꞌe̱ naga dxuchízruje̱ꞌ,

naꞌ guzre̱ꞌ le̱ꞌ:

―Be̱n nedaꞌ tuze.

28 Naꞌ guxasa Leví,

bcaꞌane̱ꞌ ca naca chee̱ꞌ caꞌ,

naꞌ guxíajle̱ne̱ꞌ Jesús.

29 Ca gudé naꞌ,

Leví guluꞌe̱ tu xrcheꞌ zrente̱ lizre̱ꞌ chee̱ bcaꞌana szrene̱ꞌ Jesús,

naꞌ zrále̱ꞌe̱queze naꞌ xezícadxa wechizruj caꞌ,

ne xezícadxa benneꞌ zaj dxeꞌe̱ dxágule̱ne̱ꞌ benneꞌ caꞌ.

30 Naꞌ benneꞌ xudauꞌ fariseo caꞌ,

ne benneꞌ caꞌ dxuluxuzájle̱ꞌe̱ da nadxixruj bea na gulezú lawe̱ꞌ dxelezí tizre̱ꞌ benneꞌ caꞌ dxuse̱de Jesús,

dxelé̱ꞌe̱ le̱ꞌ:

―¿Bizr chee̱ naꞌ dxeꞌaj dxágule̱le benneꞌ wechizruj caní,

ne benneꞌ dul-la caꞌ?

31 Jesús beche̱be̱ꞌ:

―Quebe zaj nachine benneꞌ zaj zua chaweꞌ nu benneꞌ dxexúne̱ꞌ le̱ꞌ.

Benneꞌ quebe chaweꞌ zaj zue̱ꞌ dxelechínene̱ꞌ le̱ꞌ.

32 Nedaꞌ quegá zaꞌa dxennéaꞌ benneꞌ xrlátaje.

Zaꞌa dxennéaꞌ benneꞌ dul-la,

chee̱ xelexebíꞌi lazre̱ꞌ.

33 Nadxa buluche̱be̱ꞌ Jesús:

―¿Bizr chee̱ naꞌ dxelúnle̱ꞌe̱ gubasa,

ne dxuluchálajle̱ Dios benneꞌ caꞌ zjácale̱ne̱ꞌ Juan,

ne benneꞌ caꞌ zjácale̱ne̱ꞌ benneꞌ xudauꞌ fariseo caꞌ,

san benneꞌ caꞌ dxusé̱denuꞌ tu dxeléꞌaj dxeláguzqueze̱ꞌ?

34 Jesús beche̱be̱ꞌ:

―¿Wazéquele xe̱le benneꞌ zaj zraꞌ laní chee̱ wechaga naꞌ xelune̱ꞌ gubasa dxácate̱ naꞌ zua benneꞌ wechaga naꞌ nen benneꞌ caꞌ?

35 Wazrín zra gate wechaga naꞌ naꞌ xecuase̱ꞌ nen benneꞌ caꞌ.

Ca lu zra naꞌ xelune̱ꞌ gubasa.

36 Nadxa bchálajle̱ne̱ꞌ le̱ꞌ ca naca da dxuléꞌe nigá:

―Quegá nu benneꞌ cheze̱ꞌ tu zre̱ꞌ cube chee̱ xudé̱ꞌe̱ na tu zre̱ꞌ gula.

Che caꞌ gune̱ꞌ,

naꞌ guzría xiꞌe̱ ca naca zre̱ꞌ cube naꞌ,

naꞌ ládxeꞌdu cube naꞌ quebe guléꞌe na cháwedauꞌ nen ladxeꞌ gula naꞌ.

37 Cáꞌanqueze quebe gaca cáꞌadxu xrise uva cube lu bzude xide gula,

laweꞌ da che caꞌ gundxu,

xrise uva cube naꞌ gutín na bzude xide gula,

naꞌ gaca ditje xrise uva naꞌ,

ne bzude xide naꞌ.

38 Chee̱ le̱ naꞌ dxal-laꞌ cáꞌadxu xrise uva cube lu bzude xide cube,

naꞌ dxúpate̱ naꞌ xegáꞌana chaweꞌ na.

39 Che tu benneꞌ xíꞌaje̱ꞌ xrise uva wal-la gula,

québedxa nna na chee̱ꞌ xíꞌaje̱ꞌ xrise uva cube,

laweꞌ da dxenné̱ꞌ:

“Nétajdxa da gula naꞌ.”