Jesús dxuléꞌe lawe̱ꞌ gazre benneꞌ caꞌ bsé̱dene̱ꞌ
21
Ca gudé naꞌ Jesús bleꞌe lawe̱ꞌ lau benneꞌ caꞌ bsé̱dene̱ꞌ dxuꞌa nísadauꞌ chee̱ Tiberias.
Caní guca na.
Jesús en el mar de Galilea (Juan 21.1-25)
2 Zaj nazraga Simón Pedro,
ne Tomás,
bénneaꞌ lé̱queze̱ꞌ Bi Lideꞌ,
ne Natanael,
benneꞌ xe̱zre Caná da nababa Galilea,
ne chupa zriꞌine Zebedeo,
ne xechupa benneꞌ caꞌ bse̱de Jesús.
3 Simón Pedro guzre̱ꞌ benneꞌ caꞌ:
―Cheajsendxaꞌ bela.
Benneꞌ caꞌ gulenné̱ꞌ:
―Cáꞌanqueze netuꞌ wazáꞌle̱ntuꞌ lueꞌ.
Nadxa xjaque̱ꞌ,
naꞌ guluꞌe̱ tu lu da dxedá laweꞌ nísadauꞌ.
Xe̱la naꞌ quebe nu bela gulezénqueze̱ꞌ.
4 Ca guzú lau dxaníꞌsise̱ꞌ,
bleꞌe lau Jesús dxuꞌa nísadauꞌ naꞌ.
Benneꞌ caꞌ bsé̱dene̱ꞌ quebe zaj nézene̱ꞌ che Jesús naꞌ.
5 Nadxa Jesús guzre̱ꞌ benneꞌ caꞌ:
―Bénneꞌdauꞌ,
¿quebe nu bela ne senle?
Belexeche̱be benneꞌ caꞌ:
―Quebe bi ne sentuꞌ-baꞌ.
6 Nadxa guzre Jesús benneꞌ caꞌ:
―Le guzala xixruj naꞌ chaláꞌa xabe̱la chee̱ da dxedá laweꞌ nísadauꞌ naꞌ,
naꞌ senle bela.
Caꞌ belune̱ꞌ,
naꞌ ca dxelexequé̱ꞌe̱ xixruj naꞌ quebe dxelexeguéꞌene̱ꞌ na laweꞌ da nazrate̱ na bela zan.
7 Nadxa bénneaꞌ nazríꞌidxa Jesús guzre̱ꞌ Pedro:
―Xránadxu naꞌ.
Ca ben Simón Pedro naca Xránadxu,
naꞌ bexázie̱ꞌ ladxeꞌ dxexrúa cuzre̱ꞌ laweꞌ da nagüe̱ꞌ na,
naꞌ bexétaje̱ꞌ lu nisa.
8 Xezícadxa benneꞌ caꞌ belexezrine̱ꞌ dxuꞌa nísadauꞌ naꞌ,
zaj zre̱ꞌe̱ lu da dxedá laweꞌ nísadauꞌ,
dxelexezrube xue̱ꞌ xixruj naꞌ nazrate̱ na bela caꞌ laweꞌ da dxeꞌ da dxedá laweꞌ nísadauꞌ naꞌ lu nísadauꞌ ca tu le guꞌuna xiaj.
9 Gate belexétaje̱ꞌ lu xu bizre,
naꞌ beleléꞌene̱ꞌ ba dxeꞌ xiꞌ,
ne ba zrua tu bela laweꞌ xiꞌ naꞌ,
naꞌ de̱ naꞌ xeta xtila.
10 Nadxa Jesús guzre̱ꞌ benneꞌ caꞌ:
―Le cheajxríꞌ tu chupa bela caꞌ,
be̱ za guzénte̱le.
11 Begüén Simón Pedro lu da dxedá laweꞌ nísadauꞌ naꞌ,
ne bezrube xue̱ꞌ xixruj naꞌ dxuꞌa nísadauꞌ naꞌte̱,
nazrate̱ na bela zriꞌa,
tu gaxúa chiꞌinu xunbaꞌ,
naꞌ lácala naca tu cáꞌante̱baꞌ quebe gudxeza xixruj naꞌ.
12 Nadxa guzre Jesús benneꞌ caꞌ:
―Le da gágule xrsila.
Netú benneꞌ caꞌ quebe dxelexázrene̱ꞌ xuluche̱be̱ꞌ Le̱ꞌ nu Le̱ꞌ,
laweꞌ da zaj nézene̱ꞌ naque̱ꞌ Xránadxu.
13 Nadxa Jesús guqué̱ꞌe̱ xeta xtila naꞌ,
naꞌ bnézruje̱ꞌ na benneꞌ caꞌ,
ne cáꞌanqueze be̱ne̱ꞌ chee̱ bela caꞌ.
14 Da nigá naca na da guxunneꞌ lasa bleꞌe lau Jesús lau benneꞌ caꞌ bsé̱dene̱ꞌ ca gudé bebane̱ꞌ ládujla benneꞌ gate.
Jesús dxuchálajle̱ne̱ꞌ Simón Pedro
15 Ca gudé gulawe̱ꞌ xrsila,
naꞌ Jesús bche̱be̱ꞌ Simón Pedro:
―Simón,
zriꞌine Jonás,
¿nazríꞌidxenuꞌ nedaꞌ ca benneꞌ caní?
Beche̱be Pedro:
―Aweꞌ,
Xran,
nézenuꞌ dxeléꞌedaꞌ Lueꞌ chaweꞌ.
Naꞌ Jesús guzre̱ꞌ le̱ꞌ:
―Bxue zrílaꞌdu chiaꞌ caꞌ.
16 Nadxa Jesús bche̱be̱ꞌ le̱ꞌ da xula:
―Simón,
zriꞌine Jonás,
¿nazríꞌinuꞌ nedaꞌ?
Pedro beche̱be̱ꞌ:
―Aweꞌ,
Xran,
Lueꞌ nézenuꞌ dxeléꞌedaꞌ Lueꞌ chaweꞌ.
Jesús guzre̱ꞌ le̱ꞌ:
―Bxue zrilaꞌ chiaꞌ caꞌ.
17 Da guxunneꞌ lasa Jesús bche̱be̱ꞌ le̱ꞌ:
―Simón,
zriꞌine Jonás,
¿dxeléꞌenuꞌ nedaꞌ chaweꞌ?
Pedro bewiꞌine lazre̱ꞌ laweꞌ da bche̱be Jesús le̱ꞌ da guxunneꞌ lasa che dxeléꞌene̱ꞌ Le̱ꞌ chaweꞌ,
naꞌ guzre̱ꞌ Jesús:
―Xran,
Lueꞌ nézquezenuꞌ xúgute̱.
Lueꞌ nézenuꞌ dxeléꞌedaꞌ Lueꞌ chaweꞌ.
Naꞌ Jesús guzre̱ꞌ le̱ꞌ:
―Bxue zrilaꞌ chiaꞌ caꞌ.
18 Da li dxapaꞌ lueꞌ,
gate ne nacuꞌ benneꞌ cuideꞌ gucuꞌ zra lanuꞌ,
ne guxíajuꞌ naga dxaca lazruꞌ.
Gate bache nacuꞌ benneꞌ gula,
chiljuꞌ naꞌu,
naꞌ benneꞌ xula gugácue̱ꞌ lueꞌ,
ne che̱ꞌe̱ lueꞌ naga quebe gaca lazruꞌ chéajuꞌ.
19 Gate gunná Jesús da nigá,
dxuzéajniꞌine̱ꞌ benneꞌ caꞌ ca dxal-laꞌ gateꞌ Pedro chee̱ gucáꞌana szrene̱ꞌ Dios.
Ca gudé naꞌ Jesús guzre̱ꞌ le̱ꞌ:
―Be̱n nedaꞌ tuze.
Da gaca chee̱ bénneaꞌ nazríꞌidxa Jesús
20 Gate bexechaj Pedro,
bléꞌene̱ꞌ bénneaꞌ nazríꞌidxa Jesús zéaje̱ nawe̱ꞌ le̱ꞌ,
naque̱ꞌ bénneaꞌ dxeꞌe̱ cuita Jesús gate naꞌ gulawe̱ꞌ xrcheꞌ naꞌ,
ne bche̱be̱ꞌ Jesús:
“Xran,
¿nuzra naꞌ gudé Lueꞌ lu naꞌ benneꞌ caꞌ dxeledábague̱ꞌ lueꞌ?”
21 Gate Pedro bléꞌene̱ꞌ bénneaꞌ,
naꞌ bche̱be̱ꞌ Jesús:
―Xran,
¿gazra benneꞌ nigá?
¿Aja gaca chee̱ꞌ?
22 Jesús beche̱be̱ꞌ:
―Che nedaꞌ dxaca lazraꞌ xegáꞌane̱ꞌ nigá ca zrindxa zra xeláꞌa nedaꞌ,
¿naca na chiuꞌ lueꞌ nézenuꞌ?
Lueꞌ,
be̱n nedaꞌ tuze.
23 Belén benneꞌ caꞌ zaj de̱ꞌe̱ Jesús quebe gate benneꞌ naꞌ.
Jesús quebe guzre̱ꞌ le̱ꞌ quebe gatie̱ꞌ.
Guzre̱ꞌ le̱ꞌ:
“Che nedaꞌ dxaca lazraꞌ xegáꞌane̱ꞌ ca zrindxa zra xeláꞌa nedaꞌ,
¿naca na chiuꞌ lueꞌ nézenuꞌ?”
24 Benneꞌ nigá naque̱ꞌ benneꞌ dxexeche̱be̱ꞌ chee̱ da nigá,
ne ba nuzúaje̱ꞌ na.
Nézentuꞌ dxenné̱ꞌ da li.
25 Cáꞌanqueze ne zaj de̱dxa da zante̱ da be̱n Jesús,
naꞌ chela xuaj tu tu na,
dxéquedaꞌ quebe gueque lu xe̱zr la xu nigá chaꞌ xiche caꞌ dxal-laꞌ guzúajdxu.
Caꞌ naca na.