Xel-la waca caꞌ da dxunna Beꞌ Láꞌazxa tu tudxu dxiꞌu
12
Bi bichaꞌ,
zaj de̱ da dxaca lazraꞌ chéajniꞌile ca naca chee̱ xel-la waca caꞌ da dxunna Beꞌ Láꞌazxa tu tudxu dxiꞌu.
2 Ba nézquezle gate naꞌ quebe ne chéajle̱le chee̱ Xránadxu,
be̱ꞌe̱le lataj gulezrube xue̱ꞌ leꞌe chee̱ xeajé̱ láꞌanale bedáuꞌ xiaj xaga caꞌ,
da quebe dxelenné̱ na.
3 Chee̱ le̱ naꞌ dxaca lazraꞌ nézele che zua nu benneꞌ nne̱ꞌ:
Nabía xiꞌ Jesús,
quebe dxuchálaje̱ꞌ ne̱ chee̱ Beꞌ Láꞌazxa chee̱ Dios.
Naꞌ netú benneꞌ gaca nne̱ꞌ:
Jesús naque̱ꞌ Xranaꞌ,
che quebe dxuchálaje̱ꞌ ne̱ chee̱ Beꞌ Láꞌazxa.
4 Zaj nazráꞌ xel-la waca caꞌ da gaca siꞌ lu nnadxu,
q san tuze naca Beꞌ Láꞌazxa,
Bénneaꞌ dxunne̱ꞌ dxiꞌu na.
5 Zaj nazráꞌ ca gaca gundxu zrin,
san tuze naca Xránadxu,
Bénneaꞌ dxundxu zrin chee̱ꞌ.
6 Zaj nazráꞌ ca da gaca gundxu,
san tuze naca Dios,
Bénneaꞌ dxunne̱ꞌ dxiꞌu xel-la waca gundxu na.
7 Dios dxunne̱ꞌ cha chee̱dxu tu xel-la waca chee̱ Beꞌ Láꞌazxa chee̱ gaca da ba neza chee̱ xúgute̱dxu.
8 Ne̱ chee̱ Beꞌ Láꞌazxa dxunne̱ꞌ bal-la benneꞌ xel-la waca xuluchálaje̱ꞌ dute̱ xel-la sina,
naꞌ xebal-le̱ꞌ ne̱ chee̱ Beꞌ náꞌqueze dxunne̱ꞌ le̱ꞌ xel-la waca xuluchálaje̱ꞌ dute̱ xel-la naxéajniꞌi.
9 Xebal-le̱ꞌ dxeleziꞌe̱ xel-la dxeajlí lazreꞌ ne̱ chee̱ Beꞌ náꞌqueze,
naꞌ xebal-le̱ꞌ dxeleziꞌe̱ xel-la waca chee̱ xelexune̱ꞌ benneꞌ we̱ꞌ caꞌ.
10 Xebal-le̱ꞌ dxeleziꞌe̱ xel-la waca xelune̱ꞌ xel-la waca caꞌ chee̱ xabáa,
naꞌ xebal-le̱ꞌ dxeleziꞌe̱ xel-la waca chee̱ xuluchálaje̱ꞌ waláz chee̱ Dios.
Xebal-le̱ꞌ,
Dios dxunne̱ꞌ le̱ꞌ xel-la waca xelenézene̱ꞌ nu beꞌ dxuchalaj na lu dxuꞌa bénneache.
Xebal-le̱ꞌ dxeleziꞌe̱ xel-la waca xuluchálaje̱ꞌ dizraꞌ nazráꞌ,
da quebe naca xrtízrqueze̱ꞌ,
naꞌ xebal-le̱ꞌ dxeleziꞌe̱ xel-la waca xuluxuzájle̱ꞌe̱ dizraꞌ nazráꞌ naꞌ.
11 Xúgute̱ da caní dxun tuze Beꞌ náꞌqueze,
Bénneaꞌ dxunne̱ꞌ cha chee̱dxu xel-la waca caní cáte̱ze da dxaca lázrequeze̱ꞌ.
Xúgute̱dxu nuchágadxu tuze be̱laꞌ dxen
12 Zua chee̱dxu tu be̱laꞌ dxen da napa na zánete̱ cueꞌ.
Dxiꞌu,
dxéajle̱dxu chee̱ Cristo,
nácadxu ca tuze be̱laꞌ dxen chee̱ Cristo.
13 Xúgute̱dxu dxiꞌu,
che nácadxu benneꞌ judío,
u benneꞌ quebe nácadxu judío,
ne che nácadxu benneꞌ zaj nadaꞌu,
u benneꞌ quebe zaj nadaꞌu,
gate gudxúadxu nisa da dxuléꞌe na nácadxu Cristo tuze,
cáꞌanqueze bexácadxu ca tuze be̱laꞌ dxen,
da naꞌ be̱n tuze Beꞌ Láꞌazxa,
naꞌ Diosqueze be̱nne̱ꞌ dxiꞌu lataj sidxu tuze Beꞌ náꞌqueze.
14 Tu be̱laꞌ dxen quebe naca na tu cueꞌze,
san naca na zaneꞌ cueꞌ.
15 Che níꞌadxu nna na:
Quebe nacaꞌ naꞌu,
ne chee̱ le̱ naꞌ quebe nacaꞌ chee̱ be̱laꞌ dxen chiuꞌ,
quegá da ni gun na québedxa naca na chee̱ be̱laꞌ dxen naꞌ.
16 Naꞌ che nágadxu nna na:
Quebe nacaꞌ lauꞌ,
ne chee̱ le̱ naꞌ quebe nacaꞌ chee̱ be̱laꞌ dxen chiuꞌ,
quegá da ni gun na québedxa naca na chee̱ be̱laꞌ dxen naꞌ.
17 Che dute̱ be̱laꞌ dxen chee̱dxu naca na laudxu,
¿ájazra gundxu xendxu?
Che dute̱ be̱laꞌ dxen chee̱dxu naca na nágadxu,
¿ájazra gundxu léꞌedxu?
18 Dios nuzúe̱ꞌ cha chee̱ cueꞌ be̱laꞌ dxen naꞌ naga dxaca lazreꞌ Le̱ꞌ.
19 Che dute̱ naꞌ naca na tuze cueꞌ,
¿gazra zúaqueze be̱laꞌ dxen naꞌ?
20 Ca naca na,
lácala naca na zaneꞌ cueꞌ,
tuze be̱laꞌ dxen naca na.
21 Xia laudxu quebe dxal-laꞌ xe̱ na nadxu:
Quebe nachindaꞌ lueꞌ,
ne quebe dxal-laꞌ nna xíchajdxu,
xe̱ na níꞌadxu:
Quebe nachindaꞌ leꞌe.
22 Da naca na,
da zaj naca chee̱ be̱laꞌ dxen chee̱dxu da dxéquedxu quebe zaj nácateca na blau,
zaj naca na da dxechínedxadxu,
23 Da zaj naca na chee̱ be̱laꞌ dxen chee̱dxu da quebe dxápadxu ba láꞌana zaj naca na da dxugacu xánnedxadxu.
Da caꞌ dxéquedxadxu quebe dxal-laꞌ guléꞌedxu zaj naca na da dxucáchedxu,
24 da quebe dxun na ba xen gundxu chee̱ da caꞌ gaca guléꞌedxu.
Caꞌ naca na,
Dios be̱ne̱ꞌ be̱laꞌ dxen chee̱dxu chee̱ gápadxadxu ba láꞌana da caꞌ dxéquedxu quebe nácateca na da gápadxu ba láꞌana,
25 chee̱ quebe gaca chupa laꞌa be̱laꞌ dxen chee̱dxu.
Tu tu cueꞌ chee̱ be̱laꞌ dxen cueꞌ na gunne xue chee̱ ljwezre na.
26 Che dxedé xel-la ziꞌ tu da naca na chee̱ be̱laꞌ dxen chee̱dxu,
xúgute̱ da caꞌ dxeledé na xel-la ziꞌ,
naꞌ che tu da naꞌ gaca da ba neza chee̱ na,
naꞌ xúgute̱ da caꞌ dxelebé na tu zren.
27 Caꞌ naca na,
leꞌe nácale be̱laꞌ dxen chee̱ Cristo,
naꞌ tu tule nácale ca tu tu cueꞌ chee̱ be̱laꞌ dxen chee̱ꞌ naꞌ.
28 Caꞌ naca na,
Dios nunézruje̱ꞌ lataj blau chee̱ bal-la benneꞌ ládujla bi chee̱ Cristo.
Lu lataj blau nuzré̱ꞌe̱ benneꞌ gubáz chee̱ꞌ caꞌ,
naꞌ lu lataj gudxupeꞌ nuzré̱ꞌe̱ benneꞌ dxuluchálaje̱ꞌ waláz chee̱ꞌ,
naꞌ lu lataj guxunneꞌ nuzré̱ꞌe̱ benneꞌ dxulusé̱dene̱ꞌ bi chee̱ꞌ caꞌ,
naꞌ gudé naꞌ nuzré̱ꞌe̱ benneꞌ dxelune̱ꞌ xel-la waca da za xabáa.
Gudé naꞌ nuzré̱ꞌe̱ benneꞌ caꞌ dxelexune̱ꞌ benneꞌ we̱ꞌ caꞌ,
ne benneꞌ caꞌ dxelácale̱ne̱ꞌ bi chee̱ꞌ caꞌ,
ne benneꞌ caꞌ dxelenná beꞌe̱,
ne benneꞌ caꞌ dxuluchálaje̱ꞌ dizraꞌ nazráꞌ da quebe zaj nézene̱ꞌ.
29 ¿Zaj naca xúgute̱ꞌ benneꞌ gubáz chee̱ꞌ?
¿Dxuluchalaj xúgute̱ꞌ waláz chee̱ꞌ?
¿Dxuluse̱de xúgute̱ꞌ bi chee̱ꞌ caꞌ?
¿Dxelún xúgute̱ꞌ xel-la waca chee̱ xabáa?
30 ¿Dxelexún xúgute̱ꞌ benneꞌ we̱ꞌ caꞌ?
¿Dxuluchalaj xúgute̱ꞌ dizraꞌ nazráꞌ da quebe naca xrtizre̱ꞌ?
¿Dxuluxuzájlaꞌa xúgute̱ꞌ dizraꞌ nazráꞌ naꞌ?
¡Cabí!
31 Le gun ba xuzre siꞌ lu naꞌle chee̱ Dios xel-la waca caꞌ da nácadxa chaweꞌ.
Naꞌa guléꞌedaꞌ leꞌe tu da cháwedxa.