Xel-la zriꞌi lazreꞌ li
13
Che dxuchálajaꞌ dizraꞌ chee̱ benneꞌ,
ne chee̱ gubáz chee̱ xabáa caꞌ,
san quebe napaꞌ xel-la zriꞌi lazreꞌ li,
quebe nácadxaꞌ ca tu xide da dxenné̱ na,
u ca tu xia da dxenné̱ na.
2 Che dxuchálajaꞌ waláz chee̱ Dios,
ne che nezdaꞌ xúgute̱ da zaj nagache,
ne dxéajniꞌidaꞌ xúgute̱ da dxelaca,
ne napaꞌ xel-la dxeajlí lazreꞌ chee̱ séquedaꞌ gucuasaꞌ xiꞌa caꞌ,
san che quebe napaꞌ xel-la zriꞌi lazreꞌ li,
quebe nu nácaquezaꞌ.
3 Che quísiaꞌ xúgute̱ da de̱ chiaꞌ,
ne che guzúaꞌ be̱laꞌ dxen chiaꞌ chee̱ chezxe na,
san che quebe napaꞌ xel-la zriꞌi lazreꞌ li,
quebe bi da ba neza naca na chiaꞌ.
4 Bénneaꞌ nape̱ꞌ xel-la zriꞌi lazreꞌ li:
Naque̱ꞌ zren lazreꞌ.
Naque̱ꞌ zriꞌi lazreꞌ,
ne quebe naque̱ꞌ xa lazreꞌ.
Quebe dxucáꞌana szren cuine̱ꞌ,
ne quebe dxuzé̱cuꞌe̱.
5 Quebe dxune̱ꞌ da cale̱la,
ne quebe naque̱ꞌ zreꞌe lazreꞌ.
Quebe dxezre̱ꞌe̱,
ne quebe dxuꞌu lazre̱ꞌ.
6 Quebe dxebene̱ꞌ gate nu benneꞌ dxeajcházie̱ꞌ lu dul-la,
san dxebene̱ꞌ lu da li.
7 Dxuchaga lawe̱ꞌ xúgute̱ da dxaca nen dute̱ xel-la dxeajlí lazreꞌ chee̱ꞌ,
ne dute̱ xel-la dxebeza lazreꞌ chee̱ꞌ,
ne dute̱ xel-la zren lazreꞌ chee̱ꞌ.
8 Xel-la zriꞌi lazreꞌ li quebe te chee̱ na.
Wazrín zra gate québedxa chínedxu nu benneꞌ guchálajle̱ne̱ꞌ dxiꞌu waláz chee̱ Dios,
ne benneꞌ dxéajniꞌine̱ꞌ xúgute̱.
9 Naꞌa dxéajniꞌidxu látedauze,
ne látedauze dxuchálajdxu waláz chee̱ Dios.
10 Zrin zra gate naꞌ chéajniꞌidxu dute̱ ca naca,
naꞌ te chee̱ da naꞌ naca na látedauze.
11 Gate ne nacaꞌ bidauꞌ bchálajaꞌ ca bidauꞌ,
ne gulaba lazraꞌ ca bidauꞌ,
ne bchiꞌa ca bidauꞌ,
san gate gucaꞌ benneꞌ waca,
bzuaꞌ chaláꞌala da zaj naca chee̱ bidauꞌ.
12 Cáꞌanqueze naꞌa quebe dxeléꞌedxu cáte̱queze,
ne da dxeléꞌedxu ze̱ zrul-la,
san lu zra naꞌ léꞌedxu cáte̱queze.
Naꞌa látedauze núnbeꞌa,
san lu zra naꞌ gúnbeꞌa cáte̱queze ca dxun Dios,
núnbeꞌtequeze̱ꞌ nedaꞌ.
13 Caꞌ naca na,
xel-la dxeajlí lazreꞌ,
ne xel-la dxebeza lazreꞌ,
ne xel-la zriꞌi lazreꞌ li xelezúaqueze na chadía chacanna,
san da blaudxa chee̱ da caní naca na xel-la zriꞌi lazreꞌ li.