Ca naca chee̱ nu benneꞌ dxuchálaje̱ꞌ dizraꞌ nazráꞌ da quebe naca na xrtizre̱ꞌ
14
Le gun ba xuzre gápale xel-la zriꞌi lazreꞌ li,
ne cáꞌanqueze le naba Dios gunne̱ꞌ leꞌe xel-la waca caꞌ chee̱ Beꞌ Láꞌazxa,
ne da naca blaudxa,
chee̱ gaca guchálajle waláz chee̱ Dios.
2 Bénneaꞌ dxuchálaje̱ꞌ dizraꞌ nazráꞌ da quebe naca na xrtizre̱ꞌ dxuchálajle̱ne̱ꞌ Dios,
quegá nen bénneache,
laweꞌ da quegá nu dxéajniꞌi da dxenné̱ꞌ.
Dxuchálaje̱ꞌ ne̱ chee̱ Beꞌ Láꞌazxa da zaj nagache.
3 Bénneaꞌ dxuchálaje̱ꞌ waláz chee̱ Dios dxuchálajle̱ne̱ꞌ bénneache chee̱ gusegule̱ꞌ benneꞌ caꞌ lu da naca chee̱ Dios,
ne chee̱ ne̱ xúene̱ꞌ-beꞌ,
ne chee̱ xue zrene̱ꞌ-beꞌ.
4 Bénneaꞌ dxuchálaje̱ꞌ dizraꞌ nazráꞌ naꞌ dxusegula cuine̱ꞌ,
san bénneaꞌ dxuchálaje̱ꞌ waláz chee̱ Dios dxusegule̱ꞌ bi caꞌ chee̱ Cristo lu da naca chee̱ Dios.
5 Dxaca lazraꞌ gapa xúgute̱le xel-la waca guchálajle dizraꞌ nazráꞌ,
san dxaca lázredxaꞌ gaca guchálajle waláz chee̱ Dios,
laweꞌ da nácadxa chaweꞌ guchálajle waláz chee̱ Dios quézcala guchálajle dizraꞌ nazráꞌ,
che quebe zua nu benneꞌ xuzájle̱ꞌe̱ dizraꞌ nazráꞌ naꞌ chee̱ xelegula bi chee̱ Cristo lu da naca chee̱ Dios.
6 Chee̱ le̱ naꞌ,
bi bíchaꞌdauꞌ,
che xidaꞌ xedajnnáꞌa leꞌe,
ne guchálajle̱naꞌ leꞌe dizraꞌ nazráꞌ,
¿bizra da ba neza gaca na chee̱le che quebe guchálajle̱naꞌ leꞌe tu da ba bleꞌe Dios nedaꞌ,
u tu da bzéajniꞌine̱ꞌ nedaꞌ,
u tu da guchálajaꞌ waláz chee̱ Dios,
u tu da guzéajniꞌidaꞌ leꞌe?
7 Nnáꞌxquedxu ca da caꞌ dxelenné̱ na da quebe zaj naca bane na ca bchiuj,
ne bihuel-la.
Che quebe gaca chéajniꞌidxu da dxelenné̱ na,
quebe gaca nezdxu ca da dxelul-la na.
8 Gate dxaca wedil-la,
che quebe dxebezre luzu da dxulucuezre̱ꞌ cáte̱queze,
quebe nu se̱ lu wedil-la.
9 Cáꞌanqueze dxaca chee̱le leꞌe.
Che quebe guchálajaꞌ dizraꞌ da dxéajniꞌile,
¿ájazra gaca nézele da dxenníaꞌ?
Guchálajaꞌ lu beꞌ.
10 Da zante̱ dizraꞌ nazráꞌ zaj de̱ lu xe̱zr la xu nigá,
ne da li xúgute̱ na zaj zéaje̱ na.
11 Naꞌa che quebe dxéajniꞌidaꞌ dizraꞌ dxuchálajle̱ tu benneꞌ nedaꞌ,
gacaꞌ ca tu benneꞌ zituꞌ lau bénneaꞌ,
naꞌ le̱ꞌ gaque̱ꞌ ca tu benneꞌ zituꞌ lawaꞌ nedaꞌ.
12 Chee̱ le̱ naꞌ,
laweꞌ da dxaca lázrele siꞌ lu naꞌle xel-la waca caꞌ da dxunna Beꞌ Láꞌazxa dxiꞌu,
le gun ba xuzre siꞌ lu naꞌle da caꞌ xulusegula na bi caꞌ chee̱ Cristo lu da naca chee̱ Dios.
13 Caꞌ naca na,
bénneaꞌ dxuchálaje̱ꞌ dizraꞌ nazráꞌ dxal-laꞌ naba lau Dios gunne̱ꞌ le̱ꞌ xel-la waca xuzájle̱ꞌe̱ dizraꞌ nazráꞌ naꞌ.
14 Che guchálajle̱naꞌ Dios tu dizraꞌ nazráꞌla,
da li dxuchálajle̱naꞌ Le̱ꞌ lu beꞌ nácaquezaꞌ,
san quebe bi da ba neza naca na chee̱ xel-la dxéajniꞌi chiaꞌ.
15 ¿Bizra da dxal-laꞌ gunaꞌ xcaꞌ?
Dxal-laꞌ guchálajle̱naꞌ Dios lu beꞌ nácaquezaꞌ,
ne cáꞌanqueze nen xel-la dxéajniꞌi chiaꞌ.
Dxal-laꞌ gul-laꞌ chee̱ Dios lu beꞌ nácaquezaꞌ,
ne cáꞌanqueze nen xel-la dxéajniꞌi chiaꞌ.
16 Che dxue laꞌanuꞌ Dios tuze lu beꞌ nácaquezuꞌ,
naꞌ benneꞌ ljwezruꞌ dxenne̱ꞌ chiuꞌ quebe gaca gune̱ꞌ tu zren lueꞌ gate dxuꞌu Dios:
Xcalenuꞌ,
laweꞌ da quebe dxéajniꞌine̱ꞌ da dxennáuꞌ.
17 Da dxuchálajle̱nuꞌ Dios nácale̱ꞌe̱ na chaweꞌ,
san bénneaꞌ dxenne̱ꞌ quebe dxegule̱ꞌ lu da naca chee̱ Dios.
18 Dxapaꞌ Dios:
Xcale̱ne̱ꞌ laweꞌ da dxuchálajdxaꞌ dizraꞌ nazráꞌ ca xúgute̱le leꞌe,
19 san naga zaj nazraga bi chee̱ Cristo dxaca lázredxaꞌ guchálajaꞌ gázxuze dizraꞌ da xeléajniꞌibeꞌ chee̱ gusé̱dedaꞌ-beꞌ,
quézcala guchálajaꞌ chi mila dizraꞌ nazráꞌ da quebe gaca xeléajniꞌibeꞌ.
20 Bi bíchaꞌdauꞌ.
Quebe gulaba lázrele ca bidauꞌ.
Le gaca ca bidauꞌ chee̱ quebe gunle da cale̱la,
san le gaca benneꞌ wal-la chee̱ gulaba lázrele cháweꞌdauꞌ.
21 Naxúaj lu xiche láꞌazxa chee̱ da dxenná bea Dios,
da dxenná na:
Guchálajle̱naꞌ benneꞌ xe̱zr la xu nigá nen dizraꞌ nazráꞌ,
ne lu dxuꞌa benneꞌ zituꞌ caꞌ,
san ne caní quebe xelenne̱ꞌ chiaꞌ.
Caní dxenná Xránadxu.
22 Caꞌ naca na,
xel-la waca chee̱ guchálajdxu dizraꞌ nazráꞌ naca na tu da dxuléꞌe na lau benneꞌ quebe dxeléajle̱ꞌe̱ chee̱ Dios,
ne quegá lau benneꞌ dxeléajle̱ꞌe̱ chee̱ꞌ.
23 Naꞌa,
gate nazrágale,
che xúgute̱le dxuchálajle dizraꞌ nazráꞌ,
naꞌ che xelexúꞌu benneꞌ quebe zaj nazé̱dene̱ꞌ,
u benneꞌ quebe dxeléajle̱ꞌe̱ chee̱ Dios,
¿quebe xelenné̱ꞌ zaj nadá xichaj lázrdaule?
24 Naꞌa che dxuchalaj xúgute̱le waláz chee̱ Dios,
naꞌ che chuꞌu tu benneꞌ quebe dxéajle̱ꞌe̱ chee̱ Dios,
u tu benneꞌ quebe nazé̱dene̱ꞌ,
naꞌ guéquene̱ꞌ nabague̱ꞌ dul-la,
naꞌ lé̱queze̱ꞌ guchiꞌa cuine̱ꞌ gate xenne̱ꞌ da dxennale xúgute̱le.
25 Caꞌ gaca na,
da zaj nagache xichaj lázrdawe̱ꞌ xululéꞌe lau na,
naꞌ guzúa zribe̱ꞌ,
ne güe láꞌane̱ꞌ Dios,
naꞌ nne̱ꞌ da li zúale̱ Dios leꞌe.
26 Caꞌ naca na,
bi bíchaꞌdauꞌ,
gate dxezrágale,
bál-lale leꞌe nápale salmo caꞌ,
ne xebál-lale nápale da gusé̱dele ljwézrele,
ne xebál-lale nápale tu da bleꞌe Dios leꞌe,
ne xebál-lale nápale tu dizraꞌ nazráꞌ da guchálajle,
ne xebál-lale nápale xel-la waca xuzájlaꞌale dizraꞌ nazráꞌ naꞌ.
Cháweꞌdauꞌ naca na,
san xúgute̱ da caꞌ dxal-laꞌ xulusegula na bi caꞌ chee̱ Cristo lu da naca chee̱ Dios.
27 Gate guchálajle dizraꞌ nazráꞌ,
waca xuluchalaj chupa benneꞌ,
u chunna benneꞌ,
ne tuwéaj tuwéajle,
naꞌ tu benneꞌ dxal-laꞌ xuzájle̱ꞌe̱ da dxennale.
28 Naꞌa che quebe nu chiláꞌ benneꞌ xuzájle̱ꞌe̱ dizraꞌ nazráꞌ naꞌ,
gácadxa chaweꞌ quebe bi da nne̱ꞌ naga nazrágale.
Tu tule dxal-laꞌ nnale léꞌequezle,
ne nen Dios.
29 Cáꞌanqueze benneꞌ dxuluchálaje̱ꞌ waláz chee̱ Dios waca xelenné̱ꞌ chupa chúnnaze̱ꞌ,
naꞌ xezícadxale dxal-laꞌ guchíꞌale da naꞌ dxenné̱ꞌ.
30 Che dxuléꞌe Dios xetú benneꞌ dxeꞌe̱ naꞌ tu dizraꞌ,
naꞌ bénneaꞌ dxuchálaje̱ꞌ dxal-laꞌ gusane̱ꞌ ca da dxuchálaje̱ꞌ.
31 Xúgute̱le leꞌe waca guchálajle waláz chee̱ Dios tuwéaj tuwéajle chee̱ chéajniꞌi xúgute̱le,
ne sile da gun chacha na leꞌe.
32 Benneꞌ caꞌ dxuluchálaje̱ꞌ waláz chee̱ Dios dxun na ba xen nna béꞌene̱ꞌ beꞌ nácaqueze̱ꞌ,
33 laweꞌ da naca Dios Bénneaꞌ dxunne̱ꞌ dxiꞌu xel-la dxebeza zri lazreꞌ,
ne quebe dxun zréajene̱ꞌ bénneache.
Ca zaj xuꞌu lau xúgute̱ cueꞌ bi bíchedxu,
bi chee̱ Dios,
34 dxal-laꞌ xelezúa zrize nuꞌula caꞌ naga nazrágale,
laweꞌ da quebe naca chee̱ꞌ xuluchálaje̱ꞌ.
Dxal-laꞌ xuluzúe̱ꞌ dizraꞌ ca naxúaj na lu da nadxixruj bea Dios.
35 Che dxelaca lazre̱ꞌ bi xeléajniꞌine̱ꞌ,
dxal-laꞌ xuluche̱be̱ꞌ benneꞌ cha chee̱ꞌ lizre tu tue̱ꞌ laweꞌ da quebe dxuléꞌe na chaweꞌ tu nuꞌula guchálaje̱ꞌ naga nazrágale.
36 Dxal-laꞌ gueque beꞌele quebe guzú lau xrtizra Dios sua na ládujla leꞌe,
ne quegá leꞌeze nazíꞌ lu naꞌle na.
37 Che nu benneꞌ dxéquene̱ꞌ naque̱ꞌ benneꞌ dxuchálaje̱ꞌ waláz chee̱ Dios,
u zúale̱ Beꞌ Láꞌazxa le̱ꞌ,
dxal-laꞌ gueque béꞌene̱ꞌ da nigá dxuzúajaꞌ chee̱le naca na tu da gunná beꞌe Xránadxu.
38 Che quebe dxaca lazre̱ꞌ gueque béꞌene̱ꞌ da nigá,
quebe dxal-laꞌ siꞌ lu naꞌle bénneaꞌ.