3 Da naca blaudxa,

bzéajniꞌidaꞌ leꞌe da guzíꞌ lu naꞌa,

gute Cristo ne̱ chee̱ dul-la da nabágadxu ca naxúaj na lu dizraꞌ láꞌazxa,

4 naꞌ bulucache̱ꞌ Le̱ꞌ,

naꞌ bebane̱ꞌ zra guxunneꞌ zra ca naxúajqueze na lu dizraꞌ láꞌazxa,

5 naꞌ bleꞌe lawe̱ꞌ lau Pedro,

naꞌ gudé naꞌ bleꞌe lawe̱ꞌ lau benneꞌ gubáz chee̱ꞌ caꞌ.

6 Gudé naꞌ bleꞌe lawe̱ꞌ lau bi bíchedxu zaj nácadxe̱ꞌ ca gazxuꞌ gaxúa benneꞌ zaj nazrague̱ꞌ tu zren,

naꞌ benneꞌ zan,

benneꞌ caꞌ ne zaj naca bane̱ꞌ,

láqueze benneꞌ zan,

benneꞌ caꞌ ba gulatie̱ꞌ.

7 Gudé naꞌ bleꞌe lawe̱ꞌ lau Jacobo,

naꞌ gudé naꞌ bleꞌe lawe̱ꞌ lau xúgute̱ benneꞌ gubáz chee̱ꞌ caꞌ.

8 Bzé̱bedxa,

ca gudé chee̱ xúgute̱ da naꞌ,

bleꞌe lawe̱ꞌ lawaꞌ nedaꞌ,

lácala nedaꞌ nacaꞌ ca tu bidauꞌ,

bi gúlajbeꞌ ba gudé beuꞌ chee̱beꞌ.

9 Nedaꞌ nacaꞌ benneꞌ bzé̱bedxa chee̱ xúgute̱ benneꞌ gubáz chee̱ Cristo,

ne quebe naca chiaꞌ siꞌ laꞌ gubáz chee̱ Cristo laweꞌ da gudáu ziꞌ xuzraꞌ bi caꞌ chee̱ Dios.

10 Nacaꞌ da nacaꞌ laweꞌ da guca Dios zriꞌi lazreꞌ nen nedaꞌ,

naꞌ quebe guca dácheze xel-la zriꞌi lazreꞌ chee̱ꞌ nen nedaꞌ,

laweꞌ da ba nundxaꞌ zrin ca xúgute̱ benneꞌ gubáz caꞌ,

láqueze quegá nedaꞌ nunaꞌ na,

san Dios bchínene̱ꞌ nedaꞌ.

11 Quebe zácadxa na che naca nedaꞌ,

u che naca benneꞌ caꞌ,

da nigá naca na dizraꞌ bzénentuꞌ bénneache,

ne naca na da guxéajle̱le.

12 Che da dxuzénentuꞌ bénneache dxenná na bebán Cristo ládujla benneꞌ gate,

¿ájazra naca na bál-lale leꞌe dxennale quebe xelexebán benneꞌ gate?

13 Che quebe xelexebán benneꞌ gate,

Crístoqueze quebe bebane̱ꞌ ládujla benneꞌ gate,

14 naꞌ che quebe bebán Cristo ládujla benneꞌ gate,

dácheze naca da dxuzénentuꞌ bénneache,

ne dácheze naca da dxeajlí lázrele chee̱ Cristo.

15 Che caní naca na dxexeché̱bentuꞌ chee̱ Dios da we̱n lazreꞌ laweꞌ da dxennantuꞌ bsebán Dios Cristo,

naꞌ che quebe xelexebán benneꞌ gate,

quebe bsebán Dios Cristo.

16 Che quebe xelexebán benneꞌ gate,

Crístoqueze quebe bebane̱ꞌ,

17 naꞌ che quebe bebán Cristo,

dácheze naca da dxeajlí lázrele chee̱ꞌ,

naꞌ ne nabágale dul-la.

18 Che caní naca na,

cáꞌanqueze benneꞌ zaj nate,

benneꞌ caꞌ guleajlí lazre̱ꞌ Cristo zaj nanítequeze̱ꞌ.

19 Che da dxebeza lázrentuꞌ da naca chee̱ Cristo naca na chee̱ze xe̱zr la xu nigá,

nácadxu baxáchedxa ca xúgute̱ bénneache.

20 Naꞌa da li bebán Cristo ládujla benneꞌ gate.

Le̱ꞌ naque̱ꞌ benneꞌ nedxu bebane̱ꞌ ládujla benneꞌ gate quézcala xúgute̱ benneꞌ caꞌ dxal-laꞌ xelexebane̱ꞌ.

21 Ca guca,

blaꞌ xel-la gute lu xe̱zr la xu nigá ne̱ chee̱ tuze benneꞌ,

cáꞌanqueze ne̱ chee̱ tuze benneꞌ blaꞌ xel-la dxexebán chee̱ benneꞌ gate.

22 Ca naca dxelate xúgute̱ bénneache laweꞌ da zaj naque̱ꞌ tuze nen Adán,

cáꞌanqueze xúgute̱ benneꞌ zaj naca tuze nen Cristo xelape̱ꞌ xel-la nabán li lazreꞌ.

23 Xelexebán tu tue̱ꞌ gate xelexexale̱ꞌ,

nédxula bebán Cristo ca tu lina nedxu,

naꞌ gudé naꞌ,

gate xeláꞌ Cristo xelexebán benneꞌ zaj naque̱ꞌ bi chee̱ꞌ caꞌ.

24 Nadxa cheajsé̱ chee̱ xe̱zr la xu nigá gate guzría xiꞌ Cristo xúgute̱ da dxelenná bea,

ne xúgute̱ da dxelixruj bea na,

ne xúgute̱ da zaj napa xel-la waca,

naꞌ gudée̱ꞌ xel-la dxenná bea chee̱ꞌ lu naꞌ Xradxu Dios.

25 Dxun na ba xen nna bea Cristo ca zrin zra ba nuzúa Dios zran niꞌe̱ xúgute̱ benneꞌ guledábague̱ꞌ Le̱ꞌ,

26 naꞌ da bzé̱bedxa da cuía xiꞌ naca na xel-la gute.

27 Ba nuzúa Dios xúgute̱ zran niꞌa Cristo,

san gate dxenná na nuzúe̱ꞌ xúgute̱ zran niꞌe̱,

dxaca bea na quebe zua Dios ládujla da caꞌ,

laweꞌ da Lé̱queze̱ꞌ naque̱ꞌ Bénneaꞌ bzue̱ꞌ xúgute̱ zran niꞌa Cristo.

28 Gate ba zua xúgute̱ lu naꞌ Cristo,

nadxa Crístoqueze,

Bénneaꞌ naque̱ꞌ Zríꞌinequeze Dios guzúa cuine̱ꞌ lu naꞌ Dios,

Bénneaꞌ bdee̱ꞌ xúgute̱ lu naꞌ Le̱ꞌ.

Caꞌ naca na,

Dios gaque̱ꞌ blau laweꞌ xúgute̱ da de̱.

29 Xetú da dxaca,

zaj zua benneꞌ dxeledxúe̱ꞌ nisa waláz chee̱ benneꞌ zaj nate.

¿Bizr chee̱ naꞌ dxelune̱ꞌ caní che quebe xelexebán benneꞌ gate?

¿Bizr chee̱ naꞌ dxeledxúe̱ꞌ nisa waláz chee̱ benneꞌ gate?

30 Cáꞌanqueze,

¿bizr chee̱ naꞌ zúatequezdxu dxiꞌu lu da ste̱be?

31 Xúgute̱ zra zuaꞌ lu da ste̱be chee̱ xel-la gute.

Dxapaꞌ leꞌe,

bi bichaꞌ,

da li naca da nigá ne̱ chee̱ da ba neza da napaꞌ ne̱ chee̱le lu da nácadxu nen Xránadxu Jesucristo.

32 Che ca tu bénneacheze gudíl-lale̱naꞌ benneꞌ zaj naca ca be̱ snia caꞌ lu xe̱zre Efeso ¿bizra da ba neza naca na chiaꞌ?

Che quebe xelexebán benneꞌ gate dxal-laꞌ gundxu ca dxelenná bénneache,

dxelenné̱ꞌ:

“Xiꞌaj gágudxu laweꞌ da wxre gátedxu.”

33 Quebe güele lataj nu si xe̱ leꞌe.

Naca cáte̱ze dxenná na:

35 Guche̱be nu benneꞌ nedaꞌ:

Ájazra xelexebán benneꞌ gate?

¿Ájazra gaca be̱laꞌ dxen chee̱ꞌ?

36 Da nigá naca na tu da xálaze,

laweꞌ da gate dxázadxu tu binne,

dxun na ba xen cuía xiꞌ bínnedu naꞌ chee̱ gaca na tu xágadauꞌ.

37 Da naꞌ dxázadxu quebe naca na da xeláꞌ,

san tu bínnedauze naca na,

che naca na zruaꞌ xtila u xetú bínnedauꞌ.

38 Te naꞌ gun Dios chee̱ bínnedu naꞌ tu xágadauꞌ cáte̱ze dxaca lázrequeze̱ꞌ,

naꞌ chee̱ tu tu bínnedauꞌ dxune̱ꞌ tu tu xágadauꞌ cáte̱ze zaj naca bínnedu caꞌ.

39 Quegá xúgute̱ be̱laꞌ dxen tuz ca zaj naca na.

Tuze ca naca be̱laꞌ dxen chee̱ bénneache,

ne xetuze ca naca be̱laꞌ dxen chee̱ be̱ xixreꞌ caꞌ,

naꞌ xetuze ca naca be̱laꞌ dxen chee̱ bxínnedu caꞌ,

ne xetuze be̱laꞌ dxen chee̱ bela caꞌ.

40 Cáꞌanqueze zaj naca be̱laꞌ dxen chee̱ xabáa,

ne be̱laꞌ dxen da zaj naca na chee̱ xe̱zr la xu nigá.

Xel-la xrtan chee̱ da zaj naca chee̱ xabáa nazráꞌ ca xel-la xrtan chee̱ da zaj naca chee̱ xe̱zr la xu.

41 Xel-la naxaníꞌ chee̱ gubizra nazráꞌ ca xel-la naxaníꞌ chee̱ beuꞌ,

ne cáꞌanqueze nazráꞌ ca xel-la naxaníꞌ chee̱ belaj caꞌ,

naꞌ ládujla belaj caꞌ,

xel-la naxaníꞌ chee̱ tu belaj nazráꞌ ca xel-la naxaníꞌ chee̱ xetú belaj.

42 Cáꞌanqueze dxaca chee̱ benneꞌ caꞌ xelexebane̱ꞌ ládujla benneꞌ gate.

Dxucáchedxu lu ba tu da guzruꞌ,

naꞌ xebán tu da québedxa gate.

43 Dxucáchedxu tu da xálaze,

naꞌ xebán tu da xabáa.

Dxucáchedxu tu da nate niꞌa naꞌ,

naꞌ xebán tu da wál-lale̱ꞌe̱.

44 Dxucáchedxu tu be̱laꞌ dxen chee̱ beniácheze,

naꞌ xebán tu be̱laꞌ dxen da naca na chee̱ beꞌ nácaquezdxu.

Che zua tu be̱laꞌ dxen da naca na bénneacheze,

cáꞌanqueze zua tu be̱laꞌ dxen da naca na chee̱ beꞌ nácaquezdxu.

45 Cáꞌanqueze caní naxúaj lu dizraꞌ láꞌazxa da dxenná na:

Benneꞌ nedxu Adán guque̱ꞌ bénneache ban,

naꞌ Adán,

benneꞌ bze̱be,

naque̱ꞌ Beꞌ da dxunna xel-la nabán.

46 Bénneaꞌ naque̱ꞌ Beꞌ quebe ble̱ꞌe̱ nedxu,

san bénneaꞌ naque̱ꞌ bénneacheze.

Gudé naꞌ blaꞌ Bénneaꞌ naque̱ꞌ Beꞌ.

47 Benneꞌ nedxu guque̱ꞌ xu bxrte,

ne guque̱ꞌ chee̱ xe̱zr la xu nigá,

naꞌ Benneꞌ gudxupeꞌ naque̱ꞌ Xránadxu,

Benneꞌ chee̱ xabáa.

48 Be̱laꞌ dxen caꞌ chee̱ xe̱zr la xu nigá zaj naca na ca guca bénneaꞌ guque̱ꞌ xu bxrte,

naꞌ be̱laꞌ dxen caꞌ da zaj naca na chee̱ xabáa zaj naca na ca Bénneaꞌ naque̱ꞌ chee̱ xabáa.

49 Ca naca,

nácadxu ca bénneaꞌ guque̱ꞌ xu bxrte,

cáꞌanqueze gácadxu ca Bénneaꞌ naque̱ꞌ chee̱ xabáa.

50 Dxaca lazraꞌ xapaꞌ leꞌe,

bi bíchaꞌdauꞌ,

be̱laꞌ dxen chee̱dxu da naca na xu bxrte quebe gaca chuꞌu na naga dxenná bea Dios laweꞌ da naꞌ guzru quebe gaca zraga na da naꞌ si bea chadía chacanna.

51 Dxapaꞌ leꞌe tu da nagache nédxute:

Quegá xúgute̱dxu gátedxu,

san xúgute̱dxu sidxu tu be̱laꞌ dxen cube.

52 Chadite̱ gaca na,

ca dxun benneꞌ guchudie̱ꞌ xexrate̱ lawe̱ꞌ,

gate xendxu chiꞌi luzu da dxulucuezre̱ꞌ da bze̱be.

Cuézrequeze luzu da dxulucuezre̱ꞌ,

naꞌ xelexebán benneꞌ gate naga cabátadxa xelatie̱ꞌ,

naꞌ dxiꞌu sidxu tu be̱laꞌ dxen cube.

53 Be̱laꞌ dxen chee̱dxu da guzru dxal-laꞌ xexaca na tu da québedxa guzru,

naꞌ be̱laꞌ dxen chee̱dxu da gate dxal-laꞌ xexaca na tu be̱laꞌ dxen da québedxa gate.

54 Gate be̱laꞌ dxen chee̱dxu da guzru ba bexaca na da québedxa guzru,

ne be̱laꞌ dxen chee̱dxu da gate ba bexaca na tu da québedxa gate,

nadxa gaca li da naxúaj na lu dizraꞌ láꞌazxa,

da dxenná na:

Ba beladxu lu naꞌ xel-la gute.

58 Chee̱ le̱ naꞌ,

bi bichaꞌ nazriꞌite̱ lazraꞌ,

le se̱ chacha,

ne le súate̱ze lu zrin dxúndxale chee̱ Xránadxu laweꞌ da nézele quebe naca dácheze zrin dxunle tu zren nen Xránadxu.