Da be̱n Pablo lu xe̱zr la xu naꞌ nazí le na Malta
28
Ca gulá xúgute̱ntuꞌ,
naꞌ gunézentuꞌ xe̱zr la xu naꞌ da naxechaj nísadauꞌ nazí le na Malta.
2 Benneꞌ zaj zre̱ꞌe̱ naꞌ belúnle̱ꞌe̱ netuꞌ cháwedauꞌ.
Gulebécheꞌle̱ꞌe̱ xiꞌ laweꞌ da dxúnle̱ꞌe̱ zaga,
ne dxaca xiuj,
naꞌ gulenné̱ꞌ netuꞌ cheajse̱ntuꞌ dxuꞌa xiꞌ chee̱ xezréꞌentuꞌ.
3 Nadxa Pablo guqué̱ꞌe̱ tu xrunu zruze xaga,
naꞌ ca dxuzré̱ꞌe̱ na lu xiꞌ,
bedxúaj tu be̱laꞌ da naꞌ dxuzrúnnujbaꞌ lu da la naꞌ,
naꞌ gudagu xaꞌabaꞌ naꞌ Pablo.
4 Gate beleléꞌe benneꞌ caꞌ zaj zre̱ꞌe̱ lu xe̱zr la xu naꞌ,
nal-laꞌ be̱laꞌ naꞌ naꞌ Pablo,
naꞌ gulé̱ ljwezre̱ꞌ:
―Benneꞌ nigá naque̱ꞌ we̱te benneꞌ laweꞌ da lácala gulé̱ꞌ lu nísadauꞌ,
quebe dxue lataj dios naꞌ nazíꞌi le̱ꞌ Xrlátaje gaca ban le̱ꞌ.
5 Pablo guzribe̱ꞌ be̱laꞌ naꞌ lu xiꞌ,
ne quebe bi gúquene̱ꞌ.
6 Xúgute̱ꞌ gulebeze̱ꞌ chee̱ gataꞌ xiꞌ naꞌ Pablo u cheꞌe̱ gatie̱ꞌ.
Ca gudé gulebeze̱ꞌ tu chiꞌi wal-la,
ne beleléꞌene̱ꞌ quebe bi gúquene̱ꞌ,
naꞌ buluché̱ꞌe̱ ca da dxeléquene̱ꞌ,
ne gulezú lawe̱ꞌ dxelenné̱ꞌ naca Pablo tu dios.
7 Gágute̱ naga zrantuꞌ de̱ xe̱zr la xu chee̱ benneꞌ blau chee̱ xe̱zr la xu naꞌ,
le̱ꞌ Publio.
Benneꞌ nigá guzíꞌ lu ne̱ꞌe̱ netuꞌ,
ne bxúele̱ꞌe̱ netuꞌ cháwedauꞌ laweꞌ chunna zra.
8 Xra Publio de̱ze̱ꞌ,
quebe chaweꞌ zue̱ꞌ,
naꞌ xuꞌe̱ da la,
ne dxaque̱ꞌ xízrawe̱ꞌ dxen.
Pablo guxíaje̱ꞌ xeajnné̱ꞌe̱ le̱ꞌ,
naꞌ ca gudé bchálajle̱ne̱ꞌ Dios,
bze̱ ne̱ꞌe̱ laweꞌ le̱ꞌ,
naꞌ bexaque̱ꞌ.
9 Gate belenne̱ꞌ da nigá,
naꞌ benneꞌ caꞌ xezícadxa,
benneꞌ we̱ꞌ caꞌ zaj zre̱ꞌe̱ xe̱zr la xu naꞌ,
belezrine̱ꞌ lau Pablo,
naꞌ belexaque̱ꞌ.
10 Gulápale̱ꞌe̱ netuꞌ ba láꞌana,
naꞌ ca gudé naꞌ,
gate ba zua chúꞌuntuꞌ da xula tu lu da dxedá laweꞌ nísadauꞌ,
belunne̱ꞌ xúgute̱ da nachínnentuꞌ.
Pablo dxezrine̱ꞌ xe̱zre Roma
11 Ca gudé guca chunna beuꞌ zúantuꞌ lu xe̱zr la xu naꞌ,
naꞌ bexúꞌuntuꞌ tu lu da dxedá laweꞌ nísadauꞌ da gudxéꞌ na naꞌ dxácate̱ naca beuꞌ zaga caꞌ.
Naca na tu da dxedá laweꞌ nísadauꞌ chee̱ xe̱zre Alejandría,
naꞌ luzrgue da dxedá laweꞌ nísadauꞌ naꞌ zaj da bedáuꞌ chee̱ dios bi lideꞌ caꞌ zaj le̱ꞌ Cástor ne Pólux.
12 Bzrintuꞌ dxuꞌa xe̱zre Siracusa naga begáꞌanantuꞌ chunna zra.
13 Gate bezaꞌntuꞌ naꞌ,
naꞌ gudentuꞌ dxuꞌa xe̱zr la xu naꞌ,
ne bzrintuꞌ xe̱zre Regio.
Zra xula dxaca beꞌ da zaꞌ chaláꞌa naga dxedé gubizra beuꞌ zaga caꞌ,
naꞌ zra gudxupeꞌ zra bzrintuꞌ xe̱zre Puteoli.
14 Lu xe̱zre naꞌ bezrágantuꞌ bal-la bi bíchedxu,
benneꞌ gulenné̱ꞌ netuꞌ lizre̱ꞌ xegáꞌanale̱ntuꞌ le̱ꞌ xrunuꞌ zra,
naꞌ ca gudé naꞌ guzaꞌntuꞌ níꞌantuꞌ zéajntuꞌ Roma.
15 Bi bíchedxu zaj zraꞌ Roma ba belenne̱ꞌ chee̱ntuꞌ,
naꞌ beledxúaje̱ꞌ xe̱zre naꞌ,
bedajlechague̱ꞌ netuꞌ tu xé̱zredauꞌ nazí le na Xiꞌa Chee̱ Apio,
naꞌ xebal-le̱ꞌ belexezrague̱ꞌ netuꞌ tu lataj nazí le na Chunna Xúꞌudauꞌ.
Gate bleꞌe Pablo bi bíchedxu caꞌ,
naꞌ guzre̱ꞌ Dios:
“Xcalenuꞌ”,
ne be̱n dipa lazre̱ꞌ.
16 Gate bzrintuꞌ Roma,
benneꞌ dxenná beꞌe̱ lu wedil-la bdee̱ꞌ benneꞌ zaj nadxéaje̱ꞌ lu naꞌ benneꞌ xíchaje̱ chee̱ bi xraꞌaga caꞌ,
san be̱ꞌe̱ lataj Pablo sue̱ꞌ chee̱ze̱ꞌ nen tu benneꞌ dxéaje̱ꞌ wedil-la,
benneꞌ guxúe̱ꞌ le̱ꞌ chee̱ quebe xuzrúnnuje̱ꞌ.
Pablo dxuchálaje̱ꞌ chee̱ Jesús lu xe̱zre Roma
17 Ca gudé chunna zra Pablo gusel-le̱ꞌ benneꞌ xeajnné̱ꞌ benneꞌ judío blau caꞌ zaj zre̱ꞌe̱ Roma,
naꞌ gate belezrague̱ꞌ,
guzre̱ꞌ benneꞌ caꞌ:
―Leꞌe,
bi bichaꞌ.
Nedaꞌ quebe gudábagaꞌ judío caꞌ,
ne quebe gudábagaꞌ da xjácale̱ xra xrtáudxu caꞌ,
san benneꞌ judío caꞌ zaj zre̱ꞌe̱ Jerusalén buludée̱ꞌ nedaꞌ lu naꞌ benneꞌ Roma caꞌ.
18 Gate benneꞌ Roma zaj zre̱ꞌe̱ naꞌ buluche̱be̱ꞌ nedaꞌ,
gulaca lazre̱ꞌ xulusane̱ꞌ nedaꞌ laweꞌ da quebe belezrelne̱ꞌ bi da be̱naꞌ da gun na xelechugue̱ꞌ chiaꞌ gatiaꞌ.
19 Judío caꞌ guledábague̱ꞌ,
naꞌ be̱n na ba xen gunabaꞌ nedaꞌ zriꞌa chiaꞌ lau César.
Quebe nacan chee̱ gawaꞌ zria benneꞌ lázredxu.
20 Chee̱ le̱ naꞌ gunnéaꞌ leꞌe chee̱ leꞌedaꞌ leꞌe,
ne guchálajle̱naꞌ leꞌe laweꞌ da naca ne̱ chee̱ da dxebeza lázredxu dxiꞌu,
benneꞌ Israel,
zuaꞌ nigá nadxéajaꞌ xia.
21 Nadxa gulé̱ꞌe̱ le̱ꞌ:
―Netuꞌ quebe bi xiche ne siꞌ lu naꞌntuꞌ da za na Judea ca naca chiuꞌ lueꞌ,
naꞌ netú bi bíchedxu,
benneꞌ judío,
benneꞌ ba bele̱ꞌe̱ nigá bezé̱ꞌe̱ Judea,
quebe bi da cale̱la dxenné̱ꞌ be̱nuꞌ.
22 Dxaca lázrentuꞌ xénentuꞌ ca da dxéquenuꞌ lueꞌ laweꞌ da nézentuꞌ gátete̱ze naꞌ dxelenné̱ꞌ chee̱ benneꞌ caꞌ dxeléajle̱ꞌe̱ dizraꞌ cube nigá.
23 Buluzúe̱ꞌ tu zra gate xelexezrague̱ꞌ,
naꞌ lu zra naꞌ benneꞌ zan belezrague̱ꞌ naga zua Pablo.
Bchálajle̱ne̱ꞌ benneꞌ caꞌ ca naca xel-laꞌ dxenná bea chee̱ Dios che zílate̱la guxrínnele̱te̱.
Be̱ne̱ꞌ ba xuzre guzéajniꞌine̱ꞌ benneꞌ caꞌ ca naca chee̱ Jesús ne̱ chee̱ da bdxixruj beꞌe Moisés,
ne ne̱ chee̱ da buluzúaj benneꞌ caꞌ buluchálaje̱ꞌ waláz chee̱ Dios.
24 Bal-le̱ꞌ gulezíꞌe̱ xrtizraꞌ Pablo,
san xebal-le̱ꞌ quebe guléajle̱ꞌe̱.
25 Quebe belune̱ꞌ tuze dizraꞌ,
naꞌ gulezú lawe̱ꞌ dxelexedxúaje̱ꞌ.
Nadxa gunná Pablo:
―Da li naca da gunná Beꞌ Láꞌazxa,
guzre̱ꞌ xra xrtáudxu caꞌ lu dxuꞌa Isaías,
bénneaꞌ bchalaje̱ꞌ waláz chee̱ Dios,
gunné̱ꞌ:
26 Guxíaj,
xeaje̱zre benneꞌ caꞌ:
Da li wenle leꞌe san quebe chéajniꞌile.
Da li waléꞌele,
ne quebe gueque beꞌele.
27 Zaj naca zideꞌ lázxdau benneꞌ caní,
ne quebe dxelenne̱ꞌ chaweꞌ.
Zaj naxezxuj xiaj lawe̱ꞌ
chee̱ quebe xeleléꞌene̱ꞌ nen xiaj lawe̱ꞌ,
ne quebe xelénene̱ꞌ nen nague̱ꞌ,
ne quebe xeléajniꞌine̱ꞌ nen lázrdawe̱ꞌ,
ne quebe xelexelé̱ꞌe̱ lawaꞌ nedaꞌ chee̱ xexunaꞌ nedaꞌ le̱ꞌ.
28 ’Dxal-laꞌ nézele leꞌe,
naꞌa ne da za zaꞌ xel-laꞌ weselá chee̱ Dios guchálajle̱ntuꞌ benneꞌ quebe zaj naque̱ꞌ judío,
naꞌ benneꞌ caꞌ xelezíꞌe̱ na.
29 Gate gunná Pablo da nigá,
naꞌ besiáꞌaca judío caꞌ,
dxuluché̱bele̱ꞌe̱ ljwezre̱ꞌ.