2 Naꞌ guxúꞌuntuꞌ tu lu da dxedá laweꞌ nísadauꞌ chee̱ xe̱zre Adramitio,

da ba zua te na xé̱zredu caꞌ chee̱ ga nababa Asia.

Zúale̱queze Aristarco netuꞌ,

tu benneꞌ xe̱zre Tesalónica chee̱ ga nababa Macedonia.

3 Zra xula bzrintuꞌ xe̱zre Sidón,

naga Julio bé̱nle̱ꞌe̱ da chaweꞌ chee̱ Pablo,

naꞌ be̱ꞌe̱ le̱ꞌ lataj xeajnné̱ꞌe̱ bi bíchedxu caꞌ chee̱ bi belune̱ꞌ chee̱ꞌ.

4 Gate bezaꞌntuꞌ xe̱zre Sidón,

naꞌ gudentuꞌ naga dxeꞌ xe̱zr la xu Chipre da naxechaj nísadauꞌ.

Bléꞌentuꞌ na chaláꞌa xéglala laweꞌ da dxaca beꞌ da quebe dxue na da dxedá laweꞌ nísadauꞌ lataj cheaj na lizra lidauꞌ.

5 Gudentuꞌ lu nísadauꞌ le nnaꞌ xe̱zre caꞌ zaj nababa Cilicia,

ne Panfilia,

naꞌ bzrintuꞌ xe̱zre Mira da nababa Licia.

6 Lu xe̱zre naꞌ benneꞌ dxenná beꞌe̱ lu wedil-la bezrague̱ꞌ tu da dxedá laweꞌ nísadauꞌ chee̱ xe̱zre Alejandría da zeaj na xe̱zr la xu Italia,

naꞌ bzre̱ꞌe̱ netuꞌ lawle chee̱ zeajntuꞌ Italia naꞌ.

7 Zaneꞌ zra zéajntuꞌ chaweꞌ lazreꞌ,

naꞌ sté̱bele̱ꞌe̱ bzrintuꞌ le nnaꞌ xe̱zre Gnido.

Laweꞌ da ne za beꞌ naꞌ dxedábaga na da dxedá laweꞌ nísadauꞌ,

naꞌ gudentuꞌ le nnaꞌ Salmón,

ne guxéchajntuꞌ naga dxeꞌ xe̱zr la xu Creta da naxechaj nísadauꞌ.

8 Sté̱bele̱ꞌe̱ gudentuꞌ chaláꞌala naga dxeꞌ Creta naꞌ,

naꞌ bzrintuꞌ tu xé̱zredauꞌ nazí le na Buenos Puertos,

da zua gagu naga zua xe̱zre Lasea.

9 Záneꞌte̱ zra bnítentuꞌ xuꞌuntuꞌ da dxedá laweꞌ nísadauꞌ naꞌ,

naꞌ ba naca ste̱be zéajntuꞌ lu nísadauꞌ naꞌ laweꞌ da ba dxexúꞌudxu beuꞌ zaga.

Chee̱ le̱ naꞌ bzéajniꞌi Pablo benneꞌ caꞌ.

10 Dxenné̱ꞌ:

―Leꞌe,

benneꞌ,

dxeléꞌedaꞌ wácale̱ꞌe̱ ste̱be naga zéajdxu naꞌa,

naꞌ wabía xiꞌ da dxedá laweꞌ nísadauꞌ nigá ne xua da nua na,

naꞌ zrúzrete̱ cuía xidxu dxiꞌu.

11 Benneꞌ dxenná beꞌe̱ lu wedil-la guxéajle̱dxe̱ꞌ chee̱ xrane da dxedá laweꞌ nísadauꞌ naꞌ,

ne chee̱ benneꞌ xuꞌu na lu ne̱ꞌe̱,

ca chee̱ Pablo.

12 Naꞌ laweꞌ da quebe naca lataj naꞌ chaweꞌ súadxu naꞌ beuꞌ zaga caꞌ,

naꞌ xúgute̱ꞌ guléquene̱ꞌ nácadxa chaweꞌ xezáꞌ da dxedá laweꞌ nísadauꞌ naꞌ chee̱ xexéaj na Fenice,

tu xe̱zre chee̱ Creta naꞌ,

da dxeꞌ chaláꞌa chee̱ xe̱zr la xu Creta naga dxebía gubizra,

naꞌ xegáꞌanadxu naꞌ beuꞌ zaga caꞌ.

13 Nadxa guzú lau dxaca lase beꞌ da zaꞌ chaláꞌa naga dxedé gubizra beuꞌ zaga,

naꞌ guléquene̱ꞌ waca chéajte̱zentuꞌ lu nísadauꞌ,

naꞌ gudentuꞌ gáguze lu xe̱zr la xu Creta naꞌ.

14 Nadxa chíte̱ze guca guzú lau dxácale̱ꞌe̱ beꞌ bdunuꞌ da zaꞌ chaláꞌa ga zaꞌ beꞌ zaga.

15 Beꞌ naꞌ guzú lau dxuzriga na chaláꞌala da dxedá laweꞌ nísadauꞌ naꞌ,

naꞌ laweꞌ da québedxa guca chéajdxantuꞌ naga zaꞌ beꞌ naꞌ be̱n na ba xen be̱ntuꞌ lataj bzriga na da dxedá laweꞌ nísadauꞌ naꞌ.

16 Naꞌ gudentuꞌ cúzrela tu xe̱zr la xudauꞌ naxechaj nísadauꞌ da nazí le na Clauda,

naga québedxa dxácate̱ na beꞌ naꞌ wal-la,

naꞌ sté̱bele̱ꞌe̱ gúquentuꞌ bcuentuꞌ da dauꞌ da dxedá laweꞌ nísadauꞌ da nazrube xu da zren naꞌ xuꞌuntuꞌ,

naꞌ bzuantuꞌ na lu da zren da dxedá laweꞌ nísadauꞌ naꞌ.

17 Ca gudé bulucuene̱ꞌ da dauꞌ naꞌ,

naꞌ buludée̱ꞌ du zriꞌa caꞌ zran da dxedá laweꞌ nísadauꞌ naꞌ da xeluxru chacha na.

Nadxa,

laweꞌ da belezrebe̱ꞌ chaze da dxedá laweꞌ nísadauꞌ naꞌ lu xuzreꞌ naga nazí le Sirte,

naꞌ bululétaje̱ꞌ ladxeꞌ caꞌ da dxelecáꞌa beꞌ lu da dxedá laweꞌ nísadauꞌ naꞌ,

naꞌ belúe lataj beꞌ naꞌ bzriga na le̱n.

18 Zra xula,

laweꞌ da ne dxácale̱ꞌe̱ beꞌ bdunuꞌ,

gulezú lawe̱ꞌ dxeledxúꞌune̱ꞌ xua caꞌ lu nísadauꞌ,

da nua da dxedá laweꞌ nísadauꞌ naꞌ.

19 Zra guxunneꞌ zra nen náꞌquezentuꞌ gudxúꞌunantuꞌ lu nísadauꞌ da dxuluchínene̱ꞌ chee̱ da dxedá laweꞌ nísadauꞌ naꞌ.

20 Zaneꞌ zra quebe bléꞌentuꞌ gubizra ne belaj caꞌ,

ne ca naca beꞌ bdunuꞌ zren naꞌ ne dxuzriga na da dxedá laweꞌ nísadauꞌ naꞌ,

naꞌ québedxa guleza lázrentuꞌ láquezentuꞌ.

21 Zaneꞌ zra gudentuꞌ quebe náguntuꞌ,

naꞌ guzé̱ Pablo láwela benneꞌ caꞌ,

ne gunné̱ꞌ:

―Leꞌe,

benneꞌ,

cháwedxa la guca chee̱dxu la be̱nle da guchaꞌ leꞌe,

naꞌ quebe bedxúajdxu lu xe̱zr la xu Creta,

ne quebe bi guque da dxedá laweꞌ nísadauꞌ nigá,

naꞌ xuaꞌ da nua na quebe guzría xiꞌ.

22 Naꞌa,

quebe guchebe lázrele.

Netudxu dxiꞌu quebe cuía xidxu,

lácala cuía xiꞌ da dxedá laweꞌ nísadauꞌ nigá.

23 Ba dxe̱le bleꞌe lau tu gubáz chee̱ xabáa chee̱ Dios nedaꞌ.

Nacaꞌ chee̱ Dios nigá ne dxunaꞌ zrin chee̱ꞌ.

24 Gubáz naꞌ guzre̱ꞌ nedaꞌ:

“Quebe zrebuꞌ,

Pablo,

laweꞌ da dxun na ba xen zrinuꞌ lau César,

naꞌ ne̱ chiuꞌ lueꞌ Dios guselé̱ꞌ lu xel-laꞌ gute xúgute̱ benneꞌ zaj zraꞌ nen lueꞌ lu da dxedá laweꞌ nísadauꞌ nigá.”

25 Chee̱ le̱ naꞌ,

benneꞌ,

le gun dipa lázrele,

laweꞌ da dxuxrén lazraꞌ Dios,

ne nezdaꞌ waca ca gunná gubáz chee̱ xabáa naꞌ bchálajle̱ne̱ꞌ nedaꞌ.

26 Naꞌa dxun na ba xen cheajchaze da dxedá laweꞌ nísadauꞌ nigá tu lu xe̱zr la xu da naxechaj nísadauꞌ.

27 Ca gudé chinuꞌ zra gate naca chizrela,

ne zrantuꞌ lu nísadauꞌ nazí le na Adria,

naꞌ beꞌ naꞌ dxaca dxuzriga na da dxedá laweꞌ nísadauꞌ quela caꞌala,

naꞌ dxe̱la guleque beꞌe benneꞌ caꞌ dxulusá da dxedá laweꞌ nísadauꞌ naꞌ ba dxezrín na dxuꞌa xu bizre.

28 Naꞌ buludxixre̱ꞌ cátite situj dxeꞌ nisa naꞌ,

naꞌ dxeꞌ na galaj esa.

Naꞌ xetú chíꞌidauꞌ gudé buludxixre̱ꞌ da xula,

naꞌ dxeꞌ na chinuꞌ ésaze.

29 Belezrebe̱ꞌ cheajtá da dxedá laweꞌ nísadauꞌ naꞌ xiaj,

naꞌ buluzale̱ꞌ tapa xia da nácale̱ꞌe̱ ziꞌi zran nisa zeaj zranla da dxedá laweꞌ nísadauꞌ naꞌ,

naꞌ gulebeze̱ꞌ chaníꞌ dudxuze dxelezrebe̱ꞌ.

30 Nadxa benneꞌ caꞌ dxulusá da dxedá laweꞌ nísadauꞌ naꞌ guléquene̱ꞌ xelexedxúaje̱ꞌ lu da dxedá laweꞌ nísadauꞌ naꞌ,

naꞌ gulezú lawe̱ꞌ dxululétaje̱ꞌ da dauꞌ naꞌ zria laweꞌ da zren naꞌ dxedá laweꞌ nísadauꞌ,

dxelune̱ꞌ ca benneꞌ xuluzáladxa xia da guxru na da dxedá laweꞌ nísadauꞌ zren naꞌ da zeaj laula na.

31 Pablo bzenne̱ꞌ benneꞌ dxenná beꞌe̱ lu wedil-la,

ne benneꞌ dxjaque̱ꞌ wedil-la,

dxenné̱ꞌ:

―Che quebe xelegáꞌana benneꞌ caní lu da dxedá laweꞌ nísadauꞌ,

quebe lale leꞌe.

32 Nadxa benneꞌ dxjaque̱ꞌ wedil-la gulechugue̱ꞌ du zriꞌa da nadxéaj da dauꞌ naꞌ,

naꞌ belúꞌe̱ na lataj bexruj na lu nísadauꞌ.

33 Ca guxaníꞌsise̱ꞌ bzéajniꞌi Pablo xúgute̱ benneꞌ caꞌ dxal-laꞌ xelawe̱ꞌ xeta,

gunné̱ꞌ:

―Ba zeaj chinuꞌ zra quebe dxásele ne quebe dxágule.

34 Dxataꞌ xuedaꞌ leꞌe gágule.

Da nigá dxun na ba xen chee̱ lale.

Netudxu dxiꞌu quebe cuía xiꞌ netú xicha xíchajdxu.

35 Ca gunné̱ꞌ caní,

Pablo guqué̱ꞌe̱ tu xeta xtila,

naꞌ guzre̱ꞌ Dios:

“Xcalenuꞌ”,

lau xúgute̱ benneꞌ caꞌ.

Nadxa bzúzruje̱ꞌ na,

naꞌ guzú lawe̱ꞌ dxawe̱ꞌ.

36 Nadxa xúgute̱ꞌ belún dipa lazre̱ꞌ,

naꞌ gulezú lau dxelawe̱ꞌ.

37 Cátite netuꞌ zrantuꞌ lu da dxedá laweꞌ nísadauꞌ naꞌ nácantuꞌ chupa gaxúa ga xun chinu tuntuꞌ.

38 Ca gudé gulawe̱ꞌ cátite guléljene̱ꞌ,

naꞌ buluzale̱ꞌ zruaꞌ xtila lu nísadauꞌ chee̱ bezráꞌ da dxedá laweꞌ nísadauꞌ naꞌ.

39 Gate guxaníꞌ,

benneꞌ caꞌ dxulusá da dxedá laweꞌ nísadauꞌ naꞌ quebe belexúnbeꞌe̱ xe̱zr la xu naꞌ da zua na le nnaꞌ naga zaj zre̱ꞌe̱.

Beleléꞌene̱ꞌ naga dxexúꞌu nísadauꞌ gachaj láwela xe̱zr la xu naꞌ,

naꞌ dxuꞌe naꞌ naca lacheꞌ.

Naꞌ gulaca lazre̱ꞌ xuluxudée̱ꞌ da dxedá laweꞌ nísadauꞌ laduj naꞌ.

40 Gulechugue̱ꞌ du zriꞌa caꞌ zaj nacáꞌa xia caꞌ,

ne bulucáꞌane̱ꞌ xia caꞌ lu nísadauꞌ.

Gulese̱zre̱ꞌ du zriꞌa da nadxéaj ne̱ꞌe xaga da dxuzechaj na da dxedá laweꞌ nísadauꞌ.

Nadxa gulechise̱ꞌ ladxeꞌ da dxecáꞌa beꞌ da zeaj láwela da dxedá laweꞌ nísadauꞌ,

naꞌ da dxedá laweꞌ nísadauꞌ naꞌ guzú lau dxebiga na naga naca lacheꞌ.

41 Bzrin na naga dxezraga nisa naꞌ dxupa laꞌa,

naꞌ da dxedá laweꞌ nísadauꞌ naꞌ guxaze na lu xuzreꞌ da dxeꞌ zran nisa naꞌ.

Zeaj láwela da dxedá laweꞌ nísadauꞌ,

naꞌ begáꞌana na chalásaze lu xuzreꞌ naꞌ,

ne québedxa gulezéquene̱ꞌ xuluté̱ꞌ na.

Da zeaj zranla guzú lau dxuzruj na laweꞌ da dxeajé̱le̱ꞌe̱ xeajxruza chee̱ nísadauꞌ naꞌ zran da dxedá laweꞌ nísadauꞌ naꞌ.

42 Benneꞌ dxjaque̱ꞌ wedil-la gulaca lazre̱ꞌ xelútie̱ꞌ benneꞌ zaj nadxéaje̱ꞌ chee̱ quebe xuluxuzrúnnuje̱ꞌ xelezrúe̱ꞌ laweꞌ nisa naꞌ.

43 Benneꞌ dxenná beꞌe̱ lu wedil-la guca lazre̱ꞌ guselé̱ꞌ Pablo,

naꞌ quebe be̱ꞌe̱ lataj benneꞌ dxjaque̱ꞌ wedil-la xelútie̱ꞌ benneꞌ caꞌ.

Naꞌ gunná béꞌene̱ꞌ benneꞌ caꞌ dxelaque̱ꞌ dxelezrúe̱ꞌ nisa cheajlexexrítie̱ꞌ lu nisa naꞌ chee̱ xelexezrine̱ꞌ lu xu bizre.

44 Benneꞌ caꞌ xezícala,

bal-le̱ꞌ gulequé̱ꞌe̱ blagaꞌ,

ne xebal-le̱ꞌ gulequé̱ꞌe̱ blagaꞌ bizruj chee̱ da dxedá laweꞌ nísadauꞌ naꞌ,

naꞌ caní guca,

xúgute̱ꞌ belexezrine̱ꞌ lu xu bizre.