―Waca xeche̱buꞌ.

Naꞌ Pablo guchisa ne̱ꞌe̱,

ne guzú lawe̱ꞌ dxuchálaje̱ꞌ,

dxenné̱ꞌ:

2 ―Dxebéle̱ꞌe̱daꞌ dxunuꞌ nedaꞌ lataj dxuchálajaꞌ lau lueꞌ,

wenná bea Agripa,

chee̱ xeche̱baꞌ ca da gulenná benneꞌ judío chiaꞌ nedaꞌ,

3 ne da naca blaudxa,

laweꞌ da nézqueznuꞌ lueꞌ ca naca da zéajle̱ntuꞌ netuꞌ,

benneꞌ judío caꞌ,

ne ca naca dizraꞌ dxutil-la ljwézrentuꞌ.

Chee̱ le̱ naꞌ dxenabaꞌ lueꞌ xennuꞌ chiaꞌ dute̱ xel-laꞌ zren lazreꞌ chiuꞌ.

4 ’Xúgute̱ benneꞌ judío caꞌ zaj nézene̱ꞌ ca be̱naꞌ lazriaꞌ,

ne lu xe̱zre Jerusalén gate nácateaꞌ bidauꞌte̱.

5 Zaj nézqueze benneꞌ caꞌ,

ne waca xelexeche̱be̱ꞌ che dxelaca lazre̱ꞌ,

ca nácateaꞌ benneꞌ cuídeꞌte̱,

nacaꞌ fariseo.

Benneꞌ fariseo caꞌ zjácale̱dxe̱ꞌ ca naca chee̱ da dxeléajle̱ judío caꞌ chee̱ Dios.

6 Naꞌa laweꞌ da dxebeza lazraꞌ gusebán Dios benneꞌ gate caꞌ,

ca guche̱be lazre̱ꞌ chee̱ xra xrtáuntuꞌ caꞌ,

benneꞌ caꞌ buluzúe̱ꞌ nedaꞌ lau xuꞌu laweꞌ.

7 Dxelebeza lazreꞌ chazrinnu cueꞌ zriꞌine zre sua Israel xeleléꞌene̱ꞌ gaca ca naca da nigá guche̱be lazreꞌ Dios,

naꞌ chee̱ le̱ naꞌ dxulucáꞌana szrene̱ꞌ Dios,

ne dxelune̱ꞌ zrin chee̱ꞌ te zra ne chizrela.

Naꞌa,

wenná bea Agripa,

benneꞌ judío caꞌ dxelawe̱ꞌ nedaꞌ zria laweꞌ da dxebeza lazraꞌ ca naca da caníqueze da nache̱be lazreꞌ Dios.

8 ¿Quebe dxéajle̱ꞌu gusebán Dios benneꞌ gate caꞌ?

9 ’Nédaꞌquezaꞌ nédxute̱ gúquedaꞌ da zan da dxal-laꞌ gunaꞌ chee̱ benneꞌ caꞌ dxeléajle̱ꞌe̱ chee̱ Jesús,

benneꞌ Nazaret.

10 Caní be̱naꞌ lu xe̱zre Jerusalén.

Lu xel-laꞌ dxenná bea chee̱ benneꞌ xíchaje̱ caꞌ chee̱ bxruze caꞌ,

benneꞌ zan bzraꞌa lizre xia,

benneꞌ dxeléajle̱ꞌe̱ chee̱ Jesús,

naꞌ gate belútie̱ꞌ benneꞌ caꞌ nedaꞌ bé̱nquezaꞌ tuze benneꞌ caꞌ belútie̱ꞌ le̱ꞌ.

11 Zaneꞌ lásate̱ bdeaꞌ benneꞌ caꞌ ba xaꞌ chee̱ xulusane̱ꞌ xel-laꞌ dxeleajlí lazreꞌ chee̱ꞌ.

Caní be̱naꞌ xúgute̱ lu xuꞌu caꞌ naga dxelezraga judío caꞌ,

naꞌ lu xel-laꞌ dxezráꞌa chiaꞌ benneꞌ caꞌ,

gudáu ziꞌ xuzraꞌ benneꞌ caꞌ zaj zre̱ꞌe̱ lu xe̱zre zituꞌ caꞌ.

12 ’Chee̱ gunaꞌ da nigá zexáꞌa xe̱zre Damasco,

zaj nasel-la benneꞌ xíchaje̱ caꞌ chee̱ bxruze caꞌ nedaꞌ nen xel-laꞌ dxenná bea chee̱ꞌ.

13 Ca zexáꞌa xuꞌa neza naꞌ,

du wagubizra bleꞌedaꞌ tu xiꞌ da zaꞌ xabáa da nácadxa ca xel-laꞌ dxennáꞌ chee̱ gubizra,

naꞌ gusení na naga zexáꞌa nedaꞌ nen benneꞌ zjácale̱ne̱ꞌ nedaꞌ.

14 Nadxa xúgute̱ntuꞌ xeajcházentuꞌ lu xu,

naꞌ bendaꞌ chiꞌi tu benneꞌ gunné̱ꞌ dizraꞌ hebreo,

guzre̱ꞌ nedaꞌ:

“Saulo,

Saulo,

¿bizr chee̱ naꞌ nau ziꞌ xuzruꞌ nedaꞌ?

Lueꞌze dxun ziꞌ cuinuꞌ ca dxun be̱zre gate dxulíbebaꞌ laweꞌ xágala da dxádue̱ꞌ-baꞌ.”

15 Nadxa gunnéaꞌ:

¿Nuzra Lueꞌ,

Xran?

naꞌ Xránadxu guzre̱ꞌ nedaꞌ:

“Nedaꞌ nacaꞌ Jesús,

bénneaꞌ nau ziꞌ xuzruꞌ.

16 Bexasa,

guzé̱,

laweꞌ da bleꞌe lawaꞌ lueꞌ chee̱ gunuꞌ zrin chiaꞌ,

ne chee̱ xeche̱buꞌ ca naca da ba bléꞌenuꞌ,

ne ca naca da za leꞌenuꞌ gate te naꞌa.

17 Guseláꞌ lueꞌ lu naꞌ benneꞌ judío caꞌ,

ne lu naꞌ benneꞌ zituꞌ caꞌ naga dxusel-laꞌ lueꞌ naꞌa.

18 Dxusel-laꞌ lueꞌ lau benneꞌ caꞌ chee̱ sálajuꞌ xiaj lau benneꞌ caꞌ chee̱ xulusane̱ꞌ da naca chee̱ da chul-la,

naꞌ xelune̱ꞌ da naca chee̱ xel-laꞌ naxaníꞌ,

ne chee̱ xelexedxúaje̱ꞌ lu naꞌ da xriwe̱ꞌ,

ne xelexúꞌe̱ lu naꞌ Dios,

ne chee̱ xeléajle̱ꞌe̱ chiaꞌ nedaꞌ,

naꞌ xunite lau Dios ca naca dul-la chee̱ꞌ,

ne gaca chee̱ꞌ tu da xelape̱ꞌ láwela benneꞌ caꞌ ba gucáꞌa Dios.”

19 ’Caꞌ guca,

wenná bea Agripa.

Bzuaꞌ dizraꞌ ca naca da bleꞌe Dios nedaꞌ da naca chee̱ xabáa.

20 Nedxu bchálajaꞌ dizraꞌ chee̱ Dios lau benneꞌ zaj zre̱ꞌe̱ xe̱zre Damasco,

naꞌ gudé naꞌ lau benneꞌ zaj zre̱ꞌe̱ Jerusalén,

ne ca naca naga nababa Judea,

ne lau benneꞌ caꞌ quebe zaj naque̱ꞌ judío.

Guchaꞌ benneꞌ caꞌ dxal-laꞌ xelexebíꞌi lazre̱ꞌ,

ne xelexexaque̱ꞌ chee̱ Dios,

naꞌ xelune̱ꞌ da xelunna bea na ca da ba zaj naque̱ꞌ.

21 Chee̱ le̱ naꞌ benneꞌ judío caꞌ gule̱l-le̱ꞌ nedaꞌ lu xudauꞌ,

ne gulaca lazre̱ꞌ xelútie̱ꞌ nedaꞌ.

22 Dios dxácale̱ne̱ꞌ nedaꞌ,

naꞌ ze̱ chúchuquezaꞌ lu zra naꞌa zra,

dxuchálajle̱naꞌ xúgute̱ benneꞌ ca naca chee̱ Dios,

benneꞌ cáꞌaze caꞌ,

ne benneꞌ blau caꞌ.

Dxapaꞌ benneꞌ caꞌ tuze ca naca da gulenná benneꞌ caꞌ buluchálaje̱ꞌ waláz chee̱ Dios,

ne da gunná Moisés dxal-laꞌ gaca.

23 Gulenné̱ꞌ Cristo dxal-laꞌ siꞌ saque̱ꞌ,

naꞌ ca te gatie̱ꞌ dxal-laꞌ xebane̱ꞌ ládujla benneꞌ gate nédxudxa ca xúgute̱ benneꞌ caꞌ,

naꞌ gulenné̱ꞌ xelén benneꞌ judío caꞌ,

ne benneꞌ quebe zaj naque̱ꞌ judío ca naca chee̱ xel-laꞌ naxaníꞌ chee̱ Dios,

da dxuléꞌe na le̱ꞌ ca gaca xelelé̱ꞌ.

24 Gate gunná Pablo da caní,

naꞌ gunná zizraj Festo:

―Nadá xichaj lázrdaꞌu,

Pablo.

Laweꞌ da dxusé̱dele̱ꞌu,

naꞌ nadá xichaj lázrdaꞌu.

25 Pablo beche̱be̱ꞌ:

―Quebe nadá xichaj lázrdawaꞌ,

dxapaꞌ cuinuꞌ Festo.

Da dxennéaꞌ naca na da gaca chéajle̱dxu,

ne da li.

26 Nigá zua wenná bea Agripa.

Nézele̱ꞌe̱ne̱ꞌ ca naca chee̱ da caní,

naꞌ chee̱ le̱ naꞌ dxuchálajaꞌ dute̱ xel-laꞌ dxuxrén lazreꞌ chiaꞌ lawe̱ꞌ.

Nézquezdaꞌ le̱ꞌ nézene̱ꞌ ca naca da nigá laweꞌ da dxuchálajaꞌ ca naca chee̱ da quebe guca na bagácheze.

27 ¿Dxéajle̱ꞌu lueꞌ,

wenná bea Agripa,

ca naca da gulenná benneꞌ caꞌ buluchálaje̱ꞌ waláz chee̱ Dios?

Nezdaꞌ dxéajle̱ꞌu.

28 Nadxa gunná Agripa:

―Xeláteze guzéajniꞌinuꞌ nedaꞌ gacaꞌ chee̱ Cristo.

29 Nadxa gunná Pablo:

―Che xeláteze u che da zrendxa dxenabaꞌ gun Dios,

quegá lueꞌze,

san cáꞌanqueze xúgute̱ benneꞌ dxelenne̱ꞌ chiaꞌ naꞌa,

xelaque̱ꞌ ca nédaꞌquezaꞌ,

san quebe xeledxéaje̱ꞌ du xia.

30 Ca gudé gunná Pablo da nigá,

naꞌ gulexasa wenná bea,

ne benneꞌ xuꞌu lu ne̱ꞌe̱ xe̱zr la xu naꞌ tu zren nen Berenice,

ne xúgute̱ benneꞌ caꞌ zaj dxeꞌe̱ naꞌ.

31 Belexedxúaje̱ꞌ chee̱ze̱ꞌ chee̱ xuluchálajle̱ ljwezre̱ꞌ ca naca chee̱ da nigá.

Naꞌ gulenné̱ꞌ,

dxelé̱ ljwezre̱ꞌ:

―Benneꞌ nigá quebe bi da cale̱la ne gune̱ꞌ da gudé na le̱ꞌ gatie̱ꞌ,

ne quebe dxal-laꞌ chuꞌe̱ lizre xia.

32 Naꞌ gunná Agripa,

guzre̱ꞌ Festo:

―Waca gusandxu benneꞌ nigá chela quebe gunabe̱ꞌ zriꞌa chee̱ꞌ lau César.