Pablo dxexeche̱be̱ꞌ lau Festo
25
Nadxa Festo bzrine̱ꞌ xe̱zre Cesarea chee̱ siꞌ lu ne̱ꞌe̱ gaque̱ꞌ benneꞌ xuꞌu lu ne̱ꞌe̱ xe̱zr la xu naꞌ,
naꞌ gate guca chunna zra,
guxíaje̱ꞌ Jerusalén.
2 Lu xe̱zre naꞌ belezrín benneꞌ xíchaje̱ caꞌ chee̱ bxruze caꞌ,
ne benneꞌ judío blau caꞌ lau le̱ꞌ,
ne gulawe̱ꞌ zria Pablo.
3 Gulataꞌ xuene̱ꞌ benneꞌ xuꞌu lu ne̱ꞌe̱ xe̱zr la xu naꞌ sel-le̱ꞌ benneꞌ cheajlexezriꞌe̱ Pablo chee̱ xezrine̱ꞌ Jerusalén.
Benneꞌ judío caꞌ ba zaj nune̱ꞌ xelútie̱ꞌ Pablo la neza gate zezé̱ꞌe̱ naꞌ.
4 Beche̱be Festo ba xuꞌu Pablo lizre xia lu xe̱zre Cesarea,
naꞌ lé̱queze̱ꞌ ba nune̱ꞌ chéaje̱ꞌ naꞌ xetú chupa zra.
5 Naꞌ guzre̱ꞌ benneꞌ caꞌ:
―Benneꞌ caꞌ zaj zre̱ꞌe̱ láwela leꞌe,
benneꞌ zaj nape̱ꞌ xel-laꞌ dxenná bea,
dxal-laꞌ chjácale̱ne̱ꞌ nedaꞌ Cesarea,
naꞌ che benneꞌ naꞌ zua bi da cale̱la da be̱ne̱ꞌ,
waca gágule le̱ꞌ zria.
6 Festo begáꞌane̱ꞌ Jerusalén ca du xrunuꞌ ga chi zraze,
naꞌ bezrine̱ꞌ Cesarea.
Zra xula gudxéꞌe̱ lataj blau chee̱ꞌ,
ne gunná béꞌene̱ꞌ xeajlexríꞌe̱ Pablo.
7 Gate bzrin Pablo lau benneꞌ xuꞌu lu ne̱ꞌe̱ xe̱zr la xu naꞌ,
naꞌ gulebiga judío caꞌ záꞌaca Jerusalén,
ne gulágule̱ꞌe̱ zria Pablo,
san quebe guca xululéꞌene̱ꞌ naca na da li.
8 Nadxa Pablo beche̱be̱ꞌ waláz chee̱ꞌ,
gunné̱ꞌ:
―Nedaꞌ quebe bi da cale̱la ne gunaꞌ,
quegá chee̱ da nadxixruj bea chee̱ judío caꞌ,
ne quegá chee̱ xudauꞌ chee̱ꞌ,
ne quegá chee̱ César.
9 Festo guca lazre̱ꞌ xegáꞌane̱ꞌ xrlátaje lau benneꞌ judío caꞌ,
naꞌ bche̱be̱ꞌ Pablo:
―¿Dxaca lazruꞌ chéajuꞌ Jerusalén chee̱ guchiꞌa nedaꞌ ca naca chiuꞌ naꞌ?
10 Pablo beche̱be̱ꞌ:
―Zuaꞌ lau xuꞌu laweꞌ da nuzúa César naga dxal-laꞌ zriꞌa ca naca chiaꞌ.
Lueꞌ nézqueznuꞌ quebe bi da zrinnaj ne gunaꞌ chee̱ benneꞌ judío caꞌ.
11 Che ba be̱naꞌ tu da zrinnaj da dxun na gútele nedaꞌ,
waca gútele nedaꞌ.
Che quebe bi de̱ naca na da li ca naca zria da dxelawe̱ꞌ nedaꞌ,
quebe nu napa xel-laꞌ dxenná bea gudée̱ꞌ nedaꞌ lu naꞌ benneꞌ caꞌ.
Dxenabaꞌ zriꞌa chiaꞌ lau César.
12 Ca gudé bchálajle̱ne̱ꞌ benneꞌ dxuluzéajniꞌi le̱ꞌ,
naꞌ Festo guzre̱ꞌ Pablo:
―Ba gunabuꞌ zriꞌa chiuꞌ lau César.
Chéajuꞌ lau César.
Pablo dxezrine̱ꞌ lau Agripa, benneꞌ wenná bea
13 Ca gudé zaneꞌ zra Agripa,
benneꞌ wenná bea,
ne bi zane̱ꞌ belezrine̱ꞌ Cesarea chee̱ xulugape̱ꞌ Festo diuzre.
14 Gulezúe̱ꞌ naꞌ tu chupa zra,
naꞌ Festo bzenne̱ꞌ Agripa,
benneꞌ wenná bea naꞌ ca naca chee̱ Pablo.
Guzre̱ꞌ le̱ꞌ:
―Zua tu benneꞌ nigá,
benneꞌ bcaꞌana Félix lizre xia.
15 Gate guzúaꞌ xe̱zre Jerusalén,
naꞌ benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ chee̱ judío caꞌ gulenné̱ꞌ chee̱ benneꞌ nigá,
ne gulenabe̱ꞌ nedaꞌ chugaꞌ chee̱ꞌ gatie̱ꞌ.
16 Nedaꞌ beche̱baꞌ benneꞌ caꞌ,
gunníaꞌ benneꞌ xuꞌu laweꞌ chee̱ Roma quebe nu benneꞌ dxelechugue̱ꞌ chee̱ꞌ gatie̱ꞌ che quebe zrine̱ꞌ lau benneꞌ caꞌ dxelaweꞌ le̱ꞌ zria chee̱ xeche̱be̱ꞌ waláz chee̱ꞌ.
17 Chee̱ le̱ naꞌ,
gate beleláꞌ benneꞌ caꞌ nigá,
quebe guzredaꞌ,
naꞌ zra xula gudxeꞌa lataj blau chiaꞌ,
ne gunná beꞌedaꞌ blaꞌ benneꞌ naꞌ.
18 Benneꞌ caꞌ gulawe̱ꞌ le̱ꞌ zria quebe bi gulenné̱ꞌ chee̱ꞌ ca da gúquedaꞌ nedaꞌ.
19 Laze láweze da gulenné̱ꞌ chee̱ꞌ naca na ca naca da dxeléajle̱ꞌe̱ chee̱ Dios,
ne chee̱ tu benneꞌ le̱ꞌ Jesús,
benneꞌ gute,
san dxenná Pablo naca bane̱ꞌ.
20 Quebe bezréledaꞌ ájala gunaꞌ chee̱ da naꞌ,
naꞌ bche̱baꞌ Pablo che dxaca lazre̱ꞌ chéaje̱ꞌ Jerusalén chee̱ zriꞌa ca naca chee̱ꞌ naꞌ.
21 Nadxa le̱ꞌ gunabe̱ꞌ zriꞌa chee̱ꞌ lau César Augusto,
naꞌ gunná beꞌedaꞌ xegáꞌane̱ꞌ lizre xia cadxa séquedaꞌ sel-laꞌ le̱ꞌ lau César.
22 Nadxa gunná Agripa,
dxe̱ꞌe̱ Festo:
―La gaze nedaꞌ dxaca lazraꞌ xendaꞌ chee̱ benneꞌ nigá.
Naꞌ beche̱be Festo:
―Wxre xennuꞌ chee̱ꞌ.
23 Zra xula,
gate belezrín Agripa,
ne Berenice ga naꞌ,
belúꞌe̱ lu dute̱ xel-laꞌ szren nen benneꞌ dxenná beꞌe̱ lu wedil-la,
ne benneꞌ blau caꞌ chee̱ xe̱zre.
Naꞌ Festo gunná béꞌene̱ꞌ xeajlexríꞌe̱ Pablo,
24 naꞌ gunné̱ꞌ:
―Agripa,
benneꞌ wenná bea,
ne leꞌe,
nazrágale nigá nen netuꞌ.
Nigá zua benneꞌ naꞌ.
Benneꞌ zan,
benneꞌ judío zaj zre̱ꞌe̱ Jerusalén,
ne benneꞌ zaj zre̱ꞌe̱ Cesarea nigá,
gulenné̱ꞌ chee̱ benneꞌ nigá,
naꞌ tu gulé̱zqueze̱ꞌ nedaꞌ dxal-laꞌ gatie̱ꞌ.
25 Nedaꞌ dxéquedaꞌ quebe bi be̱ne̱ꞌ da gudé na le̱ꞌ gatie̱ꞌ,
san lé̱queze̱ꞌ gunabe̱ꞌ zriꞌa chee̱ꞌ lau César.
Chee̱ le̱ naꞌ ba nunaꞌ chee̱ꞌ sel-laꞌ le̱ꞌ lau César.
26 Quebe bi de̱ da guzúajaꞌ chee̱ Xranaꞌ César ca naca chee̱ benneꞌ nigá.
Chee̱ le̱ naꞌ dxuzúaꞌ benneꞌ nigá laule leꞌe,
ne da naca bláuqueze,
dxuzúaꞌ le̱ꞌ lau lueꞌ,
wenná bea Agripa,
chee̱ guche̱buꞌ le̱ꞌ chee̱ gataꞌ lateꞌ da guzúajaꞌ ca naca chee̱ꞌ.
27 Dxéquedaꞌ quebe naca chaweꞌ sel-laꞌ tu benneꞌ nadxéaje̱ꞌ du xia,
ne quebe nniaꞌ bi da zria nape̱ꞌ.