―Xcalenuꞌ lueꞌ,

benneꞌ xuꞌu lu naꞌu xe̱zr la xu nigá,

laweꞌ da zúantuꞌ xel-laꞌ dxebeza zri lazreꞌ,

naꞌ da chaweꞌ dxgua dxaca na chee̱ntuꞌ,

naꞌ ca dxenná beꞌenuꞌ netuꞌ lu xel-laꞌ sina chiuꞌ dxexedxúaj na chaweꞌ.

3 Xúgute̱ da nigá dxezíꞌqueze lu naꞌntuꞌ gátete̱ze naꞌ,

ne dxe̱ntuꞌ lueꞌ xcalén cuinuꞌ,

Félix.

4 Chee̱ québedxa guntuꞌ lueꞌ zé̱dete̱,

dxataꞌ xuedaꞌ lueꞌ gun zren lazruꞌ xennuꞌ chee̱ntuꞌ tu chíꞌidauꞌ.

5 Dxennáꞌantuꞌ benneꞌ nigá dxúnle̱ꞌe̱ da cale̱la,

ne gátete̱ze naꞌ lu xe̱zr la xu nigá dxune̱ꞌ benneꞌ judío chupa laꞌa,

ne naque̱ꞌ benneꞌ xíchaje̱ chee̱ benneꞌ caꞌ zaj daꞌ tu benneꞌ Nazaret.

6 Benneꞌ nigá guca lazre̱ꞌ guzúe̱ꞌ chaláꞌala xudauꞌ chee̱ntuꞌ,

naꞌ netuꞌ gudé̱l-lantuꞌ le̱ꞌ,

ne guca lázrentuꞌ guchíꞌantuꞌ da naca chee̱ꞌ ca nadxixruj bea na chee̱ntuꞌ.

7 Naꞌ Lisias,

benneꞌ dxenná beꞌe̱ lu wedil-la,

bequé̱ꞌe̱ le̱ꞌ lu naꞌntuꞌ xadía.

8 Naꞌ gunné̱ꞌ che zaj zra benneꞌ xelagu zrie̱ꞌ Le̱ꞌ,

dxal-laꞌ xelelé̱ꞌe̱ lau lueꞌ.

Lueꞌ gaca guche̱buꞌ benneꞌ nigá,

naꞌ nézenuꞌ naca da li zria dxáguntuꞌ le̱ꞌ.

9 Benneꞌ judío caꞌ zaj zre̱ꞌe̱ naꞌ gulenné̱ꞌ naca da li xúgute̱ da caꞌ.

10 Nadxa benneꞌ xuꞌu lu ne̱ꞌe̱ xe̱zr la xu naꞌ guchisa ne̱ꞌe̱ chee̱ guchalaj Pablo,

naꞌ gunná Pablo:

―Dxebéle̱ꞌe̱daꞌ dxunuꞌ nedaꞌ lataj xeche̱baꞌ lau lueꞌ,

laweꞌ da nezdaꞌ naca xrlátaje ca dxuchiꞌu da dxaca chee̱ xe̱zr la xu chee̱ntuꞌ ba zeaj zaneꞌ iza.

11 Luéꞌqueze waca chéajniꞌinuꞌ ba zeaj chazrinnu zraze blaꞌa Jerusalén chee̱ güe láꞌanaꞌ Dios.

12 Quebe beleléꞌene̱ꞌ nedaꞌ nu gutil-laꞌ dizraꞌ,

ne quebe nu benneꞌ guchéꞌenaꞌ zraga lu xudauꞌ blau,

ne lu xezícala xuꞌu caꞌ,

ne lu neza caꞌ chee̱ xe̱zre naꞌ.

13 Benneꞌ caní quebe xelezéquene̱ꞌ xululéꞌene̱ꞌ naca da li ca zaj naca da dxelawe̱ꞌ nedaꞌ zria.

14 Tu da dxexeche̱baꞌ,

dxucáꞌana szrenaꞌ Dios chee̱ xra xrtáudxu caꞌ,

dxunaꞌ ca da dxelenná benneꞌ caní naca na da we̱n lazreꞌ,

laweꞌ da dxéajle̱ꞌa xúgute̱ da naxúaj na lu xiche chee̱ da nadxixruj bea na,

ne chee̱ benneꞌ caꞌ buluchálaje̱ꞌ waláz chee̱ Dios.

15 Nedaꞌ dxebeza lázrquezaꞌ ca da gun Dios,

ca dxelebeza lazreꞌ benneꞌ caní,

dxebeza lázrentuꞌ Dios gusebane̱ꞌ benneꞌ gate caꞌ,

benneꞌ xrlátaje,

ne benneꞌ caꞌ dxelune̱ꞌ da cale̱la.

16 Chee̱ le̱ naꞌ dxue lazraꞌ sua zri xichaj lázrdawaꞌ lau Dios,

ne lau bénneache caꞌ.

17 ’Ca gudé gudáꞌ xe̱zre xula caꞌ zaneꞌ iza,

naꞌ bezrinaꞌ lazriaꞌ chee̱ gunézrujaꞌ da gácale̱ na benneꞌ xacheꞌ caꞌ,

ne cuꞌa gunaꞌ lau Dios.

18 Da nigá dxunaꞌ nedaꞌ gate bal-la benneꞌ judío chee̱ xe̱zre caꞌ zaj nababa Asia belexezrague̱ꞌ nedaꞌ lu xudauꞌ ca gudé bcaꞌana chaweꞌ cuinaꞌ cáte̱ze naca da zéajle̱ntuꞌ,

san quebe nu benneꞌ bchagaꞌ,

ne quebe nu benneꞌ guchéꞌenaꞌ zraga.

19 Benneꞌ caní dxal-laꞌ xelelé̱ꞌe̱ nigá chee̱ xelawe̱ꞌ nedaꞌ zria che bi zua dxelaca chee̱ꞌ nen nedaꞌ,

20 san che quebe bi de̱,

naꞌ benneꞌ caní zaj zre̱ꞌe̱ nigá dxal-laꞌ xelenné̱ꞌ che bi belezrélene̱ꞌ da dxebagaꞌ gate zuaꞌ lau benneꞌ xuꞌu laweꞌ blau caꞌ chee̱ judío caꞌ.

21 Tuze da be̱naꞌ gate zuaꞌ lau benneꞌ caꞌ,

gunnéaꞌ zizraj:

Naꞌa dxuchíꞌale chiaꞌ laweꞌ da dxeajlí lazraꞌ xelexebán benneꞌ gate.

22 Gate Félix benne̱ꞌ da nigá,

naꞌ bcaꞌane̱ꞌ na cáꞌaze laweꞌ da neze xanneꞌ le̱ꞌ ca naca chee̱ benneꞌ caꞌ dxeléajle̱ꞌe̱ chee̱ Jesús,

naꞌ guzre̱ꞌ benneꞌ caꞌ:

―Gate xida Lisias,

benneꞌ dxenná beꞌe̱ lu wedil-la,

naꞌ chéajniꞌidxedaꞌ chee̱ da nigá dxaca chee̱le.

23 Nadxa Félix gunná béꞌene̱ꞌ benneꞌ dxenná beꞌe̱ lu wedil-la,

ne benneꞌ caꞌ dxenná beꞌene̱ꞌ xelexeguꞌe̱ Pablo lu xuꞌu laweꞌ naꞌ,

naꞌ xeluꞌe̱ le̱ꞌ lataj bi gune̱ꞌ,

ne xeluꞌe̱ lataj benneꞌ ljwezre Pablo cheajlenné̱ꞌe̱ le̱ꞌ,

ne bi xelune̱ꞌ chee̱ꞌ.

24 Gudé tu chupa zra Félix belé̱ꞌe̱ xetú nen zruꞌule̱ꞌ Drusila,

nuꞌula judío,

naꞌ gunná béꞌene̱ꞌ bzrin Pablo chee̱ guchálajle̱ne̱ꞌ le̱ꞌ ca naca xel-laꞌ dxeajlí lazreꞌ chee̱ꞌ chee̱ Jesucristo.

25 Gate Pablo bchálajle̱ne̱ꞌ le̱ꞌ ca dxal-laꞌ gundxu da xrlátaje,

ne nna beꞌe cuínadxu,

naꞌ zrin zra guchiꞌa Dios chee̱dxu gate cheajsé̱ chee̱ xe̱zr la xu,

naꞌ bzrebe Félix,

ne guzre̱ꞌ Pablo:

―Bexíaj naꞌa.

Gate nalátajaꞌ,

naꞌ nné̱quezaꞌ lueꞌ.

26 La gaze dxaca lazreꞌ Félix gunezruj Pablo le̱ꞌ dumí chee̱ gusane̱ꞌ le̱ꞌ.

Chee̱ le̱ naꞌ gunné̱le̱ꞌe̱ Pablo chee̱ guchálajle̱ne̱ꞌ le̱ꞌ.

27 Caꞌ guca,

gudé chupa iza,

naꞌ Félix bedxúaje̱ꞌ xrlátaje̱ꞌ ga xuꞌu lu ne̱ꞌe̱ xe̱zr la xu naꞌ,

naꞌ bedé tu benneꞌ le̱ꞌ Porcio Festo waláz chee̱ Félix.

Félix bcaꞌane̱ꞌ Pablo lizre xia laweꞌ da guca lazre̱ꞌ xegáꞌane̱ꞌ chaweꞌ lau judío caꞌ.