―Leꞌe,

bi bichaꞌ,

ca naca xúgute̱ da ba be̱naꞌ nedaꞌ,

zua zri xichaj lázrdawaꞌ lau Dios.

2 Nadxa Ananías,

bxruze blau,

gunná béꞌene̱ꞌ benneꞌ zaj ze̱ꞌ naꞌ xelegape̱ꞌ dxuꞌa Pablo.

3 Naꞌ Pablo beche̱be̱ꞌ:

―Dios güe̱ꞌe̱ lueꞌ,

benneꞌ dxun láweze da xrlátaje.

Dxeꞌu naꞌ chee̱ guchiꞌu chiaꞌ nedaꞌ ca dxenná bea da nadxixruj bea Dios.

¿Bizr chee̱ naꞌ dxunuꞌ da dxedábaga da bdxixruje̱ꞌ,

dxenná beꞌenuꞌ xeluꞌe̱ nedaꞌ?

4 Benneꞌ caꞌ zaj zre̱ꞌe̱ naꞌ gulé̱ꞌe̱ Pablo:

―¿Caní schanniꞌ dxennáuꞌ chee̱ bxruze blau chee̱ Dios?

5 Pablo gunné̱ꞌ:

―Leꞌe,

bi bichaꞌ,

quebe gunezdaꞌ che benneꞌ nigá naque̱ꞌ bxruze blau laweꞌ da dxenná lu xiche chee̱ Dios:

Quebe nneuꞌ schanniꞌ chee̱ benneꞌ dxenná beꞌe̱ lázriuꞌ.

6 Nadxa guque béꞌene̱ꞌ Pablo bal-le̱ꞌ benneꞌ xuꞌu laweꞌ zaj naque̱ꞌ benneꞌ saduceo caꞌ,

naꞌ xebal-le̱ꞌ zaj naque̱ꞌ benneꞌ fariseo caꞌ,

naꞌ gunné̱ꞌ zizraj:

―Leꞌe,

bi bichaꞌ,

nedaꞌ nacaꞌ fariseo,

ne xrtiaꞌ zaj naue̱ꞌ fariseo caꞌ,

naꞌ dxuchíꞌale ca naca chiaꞌ laweꞌ da dxebeza lazraꞌ xelexebán benneꞌ gate.

7 Gate gunná Pablo da nigá,

naꞌ benneꞌ fariseo caꞌ,

ne benneꞌ saduceo caꞌ gulezú lawe̱ꞌ dxulutil-la ljwezre̱ꞌ dizraꞌ,

naꞌ gulaca chupa laꞌa ca naca benneꞌ caꞌ.

8 Caꞌan guca laweꞌ da dxelenná saduceo caꞌ quebe xelexebán benneꞌ gate,

ne quebe nu chiláꞌ gubáz chee̱ xabáa caꞌ,

ne quebe nu chiláꞌ bénneꞌdu xuꞌu bénneache,

san benneꞌ fariseo caꞌ dxeléajle̱ꞌe̱ dxataꞌ xúgute̱ da caꞌ.

9 Xúgute̱ꞌ gulebezre xe̱ꞌe̱,

naꞌ gulezé̱ bal-la benneꞌ dxuluxuzájle̱ꞌe̱ da nadxixruj bea na,

benneꞌ zaj naque̱ꞌ fariseo,

naꞌ gulenné̱ꞌ:

―Benneꞌ nigá quebe bi da cale̱la ne gune̱ꞌ.

Che nu bénnedu xuꞌu bénneache,

u tu gubáz chee̱ xabáa ba gunné̱ꞌ le̱ꞌ,

quebe dxal-laꞌ nne̱dxu chee̱ Dios.

10 Naꞌ bulutíl-lale̱ꞌe̱ ljwezre̱ꞌ dizraꞌ,

naꞌ benneꞌ naꞌ dxenná beꞌe̱ lu wedil-la bzrebe̱ꞌ xele̱l-le̱ꞌ Pablo xuluzúzruje̱ꞌ le̱ꞌ.

Chee̱ le̱ naꞌ gunná béꞌene̱ꞌ benneꞌ dxjaca wedil-la xelexebéaje̱ꞌ le̱ꞌ láwela benneꞌ caꞌ,

ne xelexechéꞌe̱ le̱ꞌ lu xuꞌu naꞌ naga zaj zraꞌ benneꞌ dxjaque̱ꞌ wedil-la.

11 Xe̱la xula,

Xránadxu bleꞌe lawe̱ꞌ Pablo,

naꞌ guzre̱ꞌ le̱ꞌ:

―Be̱n dipa lazruꞌ,

Pablo,

laweꞌ da ca bchálajquezuꞌ chiaꞌ Jerusalén nigá,

caꞌan dxál-laꞌqueze guchálajuꞌ chiaꞌ lu xe̱zre Roma.

12 Zra xula bal-la benneꞌ judío caꞌ belune̱ꞌ tuze dizraꞌ xelútie̱ꞌ Pablo.

Gulenné̱ꞌ:

―Dios cuꞌe̱ dxiꞌu deꞌ che bi xiꞌaj gágudxu,

ne quebe ne gútedxu Pablo.

13 Nadé chua benneꞌ biu caꞌ zaj nache̱be lazre̱ꞌ xelune̱ꞌ da nigá.

14 Benneꞌ caní xjaque̱ꞌ lau benneꞌ xíchaje̱ caꞌ chee̱ bxruze caꞌ,

ne benneꞌ gula sina caꞌ,

naꞌ gulenné̱ꞌ:

―Netuꞌ ba guche̱be lázrentuꞌ lau Dios cuꞌe̱ netuꞌ deꞌ che bi gáguntuꞌ,

ne quebe ne gútentuꞌ Pablo.

15 Naꞌa,

leꞌe,

ne xezícadxa benneꞌ xuꞌu laweꞌ blau caꞌ dxal-laꞌ nábale benneꞌ dxenná beꞌe̱ lu wedil-la xedajlegüe̱ꞌe̱ Pablo wxre zila laule leꞌe,

xe̱le bénneaꞌ dxaca lázrele guché̱be xánnele Pablo,

naꞌ netuꞌ se̱ cuásantuꞌ gútentuꞌ le̱ꞌ québela ne xide̱ꞌ nigá.

16 Zriꞌine bi zan Pablo benbeꞌ ca naca da nigá,

naꞌ guxíajbeꞌ naga zua Pablo cheajé̱zrebeꞌ le̱ꞌ.

17 Nadxa Pablo gunné̱ꞌ tu benneꞌ xuꞌu lu ne̱ꞌe̱ benneꞌ caꞌ dxjaque̱ꞌ wedil-la,

naꞌ guzre̱ꞌ le̱ꞌ:

―Guché̱ꞌ bi cuideꞌ nigá lau benneꞌ xíchaje̱ chiuꞌ laweꞌ da de̱ da dxal-laꞌ xe̱beꞌ le̱ꞌ.

18 Naꞌ benneꞌ naꞌ xuꞌu lu ne̱ꞌe̱ benneꞌ caꞌ dxjaque̱ꞌ wedil-la guché̱ꞌe̱-beꞌ lau xrane̱ꞌ,

naꞌ guzre̱ꞌ le̱ꞌ:

―Pablo,

bénneaꞌ nadxéaje̱ꞌ gunné̱ꞌ nedaꞌ,

naꞌ gunabe̱ꞌ xedajguꞌa bi cuideꞌ nigá naga zuꞌ laweꞌ da de̱ da dxal-laꞌ xe̱beꞌ lueꞌ.

19 Benneꞌ xíchaje̱ naꞌ guqué̱ꞌe̱ naꞌ bi cuideꞌ naꞌ,

naꞌ guché̱ꞌe̱-beꞌ chaláꞌala,

ne bche̱be̱ꞌ-beꞌ:

―¿Bi dxaca lazruꞌ xuꞌu nedaꞌ?

20 Naꞌ gunná bi cuideꞌ naꞌ,

gúzrebeꞌ le̱ꞌ:

―Benneꞌ judío caꞌ ba zaj nune̱ꞌ tuze dizraꞌ xelenabe̱ꞌ lueꞌ che̱ꞌu Pablo wxre zila lau benneꞌ xuꞌu laweꞌ blau caꞌ,

xelenné̱ꞌ dxelaca lazre̱ꞌ xuluche̱be xánnie̱ꞌ le̱ꞌ.

21 Quebe chéajle̱ꞌu chee̱ benneꞌ caꞌ laweꞌ da nadé chua benneꞌ caꞌ xelebeze̱ꞌ le̱ꞌ bagácheze,

ne ba guleche̱be lazre̱ꞌ lau Dios Le̱ꞌ cuꞌe̱ benneꞌ caꞌ deꞌ che bi xeleꞌaj xelawe̱ꞌ,

ne quebe ne xelútie̱ꞌ Pablo.

Naꞌa ba zaj zue̱ꞌ dxelebeze̱ꞌ xrtizruꞌ.

22 Nadxa benneꞌ xíchaje̱ naꞌ bze̱ꞌ bi cuideꞌ naꞌ dizraꞌ,

naꞌ guzre̱ꞌ-beꞌ quebe nu xe̱beꞌ ba xeajé̱zrebeꞌ le̱ꞌ caní.

23 Benneꞌ xíchaje̱ naꞌ gunné̱ꞌ chupa benneꞌ chee̱ꞌ,

benneꞌ xuꞌu lu ne̱ꞌe̱ benneꞌ caꞌ dxjaque̱ꞌ wedil-la,

naꞌ gunná béꞌene̱ꞌ le̱ꞌ xulucueze̱ꞌ chupa gaxúa benneꞌ dxjaque̱ꞌ wedil-la,

benneꞌ saꞌaca niꞌe̱,

ne ga xun chi benneꞌ dxjaque̱ꞌ wedil-la,

benneꞌ xelebía bzrinaꞌ,

ne chupa gaxúa benneꞌ dxjaque̱ꞌ wedil-la,

benneꞌ xeluꞌe̱ xia tunna,

chee̱ chjaque̱ꞌ lu xe̱zre Cesarea dxedáꞌ ga chizrela.

24 La gázqueze gunná béꞌene̱ꞌ xulucueze̱ꞌ bzrinaꞌ cuía Pablo,

ne gunná béꞌene̱ꞌ xeleché̱ꞌe̱ le̱ꞌ cháwedauꞌ lau Félix,

benneꞌ xuꞌu lu ne̱ꞌe̱ xe̱zr la xu naꞌ waláz chee̱ Roma.

25 Gusel-le̱ꞌ tu xiche da belúa benneꞌ dxjaque̱ꞌ wedil-la.

Caní naxúaj na:

26 Nedaꞌ Claudio,

dxugapaꞌ lueꞌ diuzre Félix,

benneꞌ xuꞌu lu naꞌu xe̱zr la xu nigá.

27 Benneꞌ judío caꞌ gule̱l-le̱ꞌ benneꞌ nigá náꞌtega naꞌa chee̱ xelútie̱ꞌ le̱ꞌ.

Gate gunezdaꞌ nedaꞌ nababe̱ꞌ Roma,

naꞌ guxíajle̱naꞌ benneꞌ chiaꞌ caꞌ,

benneꞌ dxjaque̱ꞌ wedil-la,

xeajseláꞌ le̱ꞌ.

28 Guca lazraꞌ nezdaꞌ bi dxelagu zria le̱ꞌ,

naꞌ guche̱ꞌa le̱ꞌ lau benneꞌ xuꞌu laweꞌ caꞌ chee̱ judío caꞌ.

29 Naꞌ gunezdaꞌ dxelagu zria le̱ꞌ da naca chee̱ da nadxixruj bea chee̱ judío caꞌ,

san quebe naca na chee̱ xelútie̱ꞌ le̱ꞌ,

ne chee̱ chuꞌe̱ lizre xia.

30 Gate bendaꞌ ca ba zaj nun judío caꞌ chee̱ xelútie̱ꞌ le̱ꞌ,

naꞌ dxusel-laꞌ le̱ꞌ naga zuꞌ,

ne ba guchaꞌ benneꞌ caꞌ dxelagu zria le̱ꞌ waca xelawe̱ꞌ le̱ꞌ zria lau lueꞌ.

Gaca xrlátaje chiuꞌ.

31 Nadxa benneꞌ dxjaque̱ꞌ wedil-la belune̱ꞌ ca gunná beꞌe benneꞌ xíchaje̱ chee̱ꞌ,

naꞌ beleché̱ꞌe̱ Pablo chizrela,

naꞌ belezrine̱ꞌ xe̱zre Antípatris.

32 Zra xula benneꞌ dxjaca wedil-la,

benneꞌ caꞌ dxeledáꞌ níꞌaze,

belexezrine̱ꞌ Jerusalén,

naꞌ benneꞌ dxjaque̱ꞌ wedil-la zaj zrie̱ꞌ bzrinaꞌ beleché̱ꞌe̱ Pablo naga dxal-laꞌ zrine̱ꞌ.

33 Gate belezrine̱ꞌ xe̱zre Cesarea,

naꞌ bulunézruje̱ꞌ benneꞌ xuꞌu lu ne̱ꞌe̱ xe̱zr la xu naꞌ xiche naꞌ,

ne buludée̱ꞌ Pablo lu ne̱ꞌe̱.

34 Ca bexuzre blabe̱ꞌ xiche naꞌ,

naꞌ benneꞌ xuꞌu lu ne̱ꞌe̱ xe̱zr la xu naꞌ bche̱be̱ꞌ ga benneꞌ Pablo.

Gate benne̱ꞌ naque̱ꞌ benneꞌ chee̱ xe̱zre nababa Cilicia,

35 naꞌ guzre̱ꞌ le̱ꞌ:

―Guchiꞌa chee̱ da dxaca chiuꞌ gate xeleláꞌ benneꞌ caꞌ dxelagu zria lueꞌ.

Nadxa gunná béꞌene̱ꞌ cha benneꞌ dxjaca wedil-la xuluxúe̱ꞌ Pablo naga zua xuꞌu laweꞌ chee̱ Herodes.