2 Gate belenne̱ꞌ dxuchálajle̱ Pablo le̱ꞌ dizraꞌ hebreo,

naꞌ gulezúadxe̱ꞌ zrize,

naꞌ Pablo guzre̱ꞌ le̱ꞌ:

3 ―Nedaꞌ nacaꞌ judío.

Gúlajaꞌ xe̱zre Tarso naga nababa Cilicia,

naꞌ bgulaꞌ Jerusalén nigá,

naꞌ Gamaliel bsé̱dene̱ꞌ nedaꞌ cáte̱ze naca da nadxixruj bea na chee̱ xra xrtáudxu caꞌ.

Tu dxue lázrezquezaꞌ dxunaꞌ da naca chee̱ Dios cáte̱ze dxunle leꞌe naꞌa.

4 Nédxute̱ gudáu ziꞌ xuzraꞌ benneꞌ caꞌ dxeléajle̱ꞌe̱ chee̱ Jesús,

ne bé̱tequezaꞌ bal-le̱ꞌ,

ne guche̱ꞌa benneꞌ biu,

ne nuꞌula chee̱,

naꞌ bzraꞌa le̱ꞌ lizre xia.

5 Bxruze blau,

ne xúgute̱ benneꞌ gula sina waca xelexeché̱bequeze̱ꞌ belunne̱ꞌ nedaꞌ xiche chee̱ biꞌa na lau bi bíchedxu judío caꞌ zaj zre̱ꞌe̱ xe̱zre Damasco.

Guxáꞌa naꞌ xeajxediljaꞌ naga zaj zraꞌ benneꞌ caꞌ dxeléajle̱ꞌe̱ chee̱ Jesús chee̱ che̱ꞌa benneꞌ caꞌ Jerusalén nigá,

chee̱ xeledée̱ꞌ ba xaꞌ.

6 ’Gate zexáꞌa xuꞌa neza,

ne ba zua zrinaꞌ Damasco,

ca du wagubizra gúcatiteꞌ tu xiꞌ naga zexáꞌa da zaꞌ xabáa.

7 Naꞌ xeajchaziaꞌ lu xu,

ne bendaꞌ chiꞌi tu benneꞌ guzre̱ꞌ nedaꞌ:

“Saulo,

Saulo,

¿bizr chee̱ naꞌ nau ziꞌ xuzruꞌ nedaꞌ?”

8 Nadxa bche̱baꞌ le̱ꞌ:

¿Núzraqueze lueꞌ,

Xran?

Naꞌ guzre̱ꞌ nedaꞌ:

“Nedaꞌ nacaꞌ Jesús,

benneꞌ Nazaret,

bénneaꞌ nau ziꞌ xuzruꞌ lueꞌ.”

9 Benneꞌ caꞌ zrále̱ne̱ꞌ nedaꞌ beleléꞌene̱ꞌ xiꞌ naꞌ,

ne belezrebe̱ꞌ,

san quebe belenne̱ꞌ chiꞌi bénneaꞌ gunné̱ꞌ nedaꞌ.

10 Nadxa gunnéaꞌ:

¿Bi dxal-laꞌ gunaꞌ,

Xran?

Naꞌ Xránadxu gunné̱ꞌ:

“Guxasa,

ne guxíajte̱ze Damasco,

ga naꞌ zua benneꞌ xelé̱ꞌe̱ lueꞌ ca da dxal-laꞌ gunuꞌ.”

11 Benneꞌ caꞌ zjácale̱ne̱ꞌ nedaꞌ belequé̱ꞌe̱ naꞌa zeajntuꞌ Damasco laweꞌ da bcaꞌana xiꞌ naꞌ nedaꞌ la chul-la.

12 ’Zua naꞌ tu benneꞌ le̱ꞌ Ananías,

benneꞌ dxune̱ꞌ du lazre̱ꞌ ca naca da bdxixruj beꞌe Moisés,

naꞌ xúgute̱ benneꞌ judío zaj zre̱ꞌe̱ Damasco dxelenné̱ꞌ cháwele̱ꞌe̱ ca dxune̱ꞌ.

13 Ananías naꞌ ble̱ꞌe̱ naga zuaꞌ nedaꞌ,

naꞌ guzre̱ꞌ nedaꞌ:

“Bichaꞌ Saulo,

naꞌa xeleꞌenuꞌ.”

Lu zra náꞌqueze beléꞌete̱daꞌ,

ne bleꞌedaꞌ benneꞌ naꞌ.

14 Nadxa guzre̱ꞌ nedaꞌ:

“Dios chee̱ xra xrtáudxu guqué̱ꞌe̱ lueꞌ nédxute̱ chee̱ gúnbeꞌu ca naca da dxaca lazreꞌ Le̱ꞌ,

ne chee̱ leꞌenuꞌ Benneꞌ xrlátaje chee̱ Dios,

ne xennuꞌ chiꞌi Bénneaꞌ.

15 Lueꞌ guchálajuꞌ da naca chee̱ Le̱ꞌ lau ca naca bénneache zaj zre̱ꞌe̱ lu xe̱zr la xu,

ne guzennuꞌ benneꞌ caꞌ ca naca da bléꞌenuꞌ,

ne da bennuꞌ.

16 Naꞌa,

¿bizr chee̱ naꞌ dxezrenuꞌ?

Guxasa,

gudxúa nisa,

ne bxren lazreꞌ chee̱ Xránuꞌ Dios chee̱ cuee̱ꞌ dul-la chiuꞌ.”

17 ’Gate bezrinaꞌ Jerusalén,

guxáꞌa lu xudauꞌ xeajchálajle̱naꞌ Dios,

naꞌ bleꞌedaꞌ tu da bleꞌe Dios nedaꞌ.

18 Bleꞌedaꞌ Xránadxu,

naꞌ guzre̱ꞌ nedaꞌ:

“Bdxuajche Jerusalén nigá laweꞌ da quebe xelezíꞌe̱ ca naca da guchálajuꞌ chiaꞌ.”

19 Nadxa guchaꞌ Le̱ꞌ:

Xran,

zaj nézquezne̱ꞌ guxáꞌa nedaꞌ xúgute̱ xuꞌu naga dxelezraga judío caꞌ,

ne xeajxriꞌa benneꞌ caꞌ dxeléajle̱ꞌe̱ chiuꞌ,

naꞌ bzraꞌa le̱ꞌ lizre xia,

ne bzálajquezaꞌ benneꞌ caꞌ,

20 naꞌ gate belútie̱ꞌ Esteban,

benneꞌ we̱n zrin chiuꞌ,

naꞌ zé̱quezaꞌ nedaꞌ nacaꞌ tuze nen benneꞌ caꞌ belútie̱ꞌ le̱ꞌ.

21 Xránadxu guzre̱ꞌ nedaꞌ:

“Guxíaj,

laweꞌ da sel-laꞌ lueꞌ zituꞌ naga zaj zraꞌ benneꞌ quebe zaj naque̱ꞌ judío.”

22 Dizraꞌ caní belenne̱ꞌ,

san lu dizraꞌ nigá gulezú lawe̱ꞌ dxelebezre xe̱ꞌe̱,

dxelenné̱ꞌ:

―¡Gate benneꞌ nigá!

¡Québedxa dxal-laꞌ gaca bane̱ꞌ!

23 Naꞌ gulebezre xáꞌaqueze̱ꞌ,

ne buluzale̱ꞌ sibe zra lane̱ꞌ,

ne belequé̱ꞌe̱ bxrte xu da buluzale̱ꞌ sibe.

24 Chee̱ le̱ naꞌ benneꞌ naꞌ dxenná beꞌe̱ lu wedil-la gunná béꞌene̱ꞌ xelegúꞌe̱ Pablo lu xuꞌula,

ne xeluꞌe̱ le̱ꞌ chee̱ nne̱ꞌ da li,

bizr chee̱ naꞌ gulebezre xaꞌa benneꞌ zan caꞌ chee̱ le̱ꞌ.

25 Gate bexuzre buluchéaje̱ꞌ naꞌ Pablo,

chee̱ xeluꞌe̱ le̱ꞌ,

Pablo guzre̱ꞌ tu benneꞌ dxeaje̱ꞌ wedil-la zue̱ꞌ naꞌ:

―¿Naca chee̱le leꞌe güele tu benneꞌ nababe̱ꞌ Roma,

ne quebe ne guchíꞌale aja naca chee̱ꞌ?

26 Gate ben benneꞌ dxeaje̱ꞌ wedil-la da nigá,

naꞌ guxíaje̱ꞌ xeaje̱zre̱ꞌ benneꞌ dxenná beꞌe̱ lu wedil-la:

―Guxúe xánniuꞌ bi naꞌ gunuꞌ,

laweꞌ da nababa Roma benneꞌ nigá.

27 Nadxa benneꞌ nigá gubigue̱ꞌ naga ze̱ Pablo,

naꞌ bche̱be̱ꞌ le̱ꞌ:

―¿Da li naꞌ nababuꞌ Roma?

Pablo beche̱be̱ꞌ:

―Aweꞌ.

28 Naꞌ benneꞌ dxenná beꞌe̱ lu wedil-la gunné̱ꞌ:

―Nedaꞌ da zrente̱ gudízrujaꞌ chee̱ gubabaꞌ Roma.

Naꞌ Pablo gunné̱ꞌ:

―Nedaꞌ nabábaquezaꞌ Roma gate gúlajteaꞌ.

29 Gate belenne̱ꞌ da nigá,

naꞌ benneꞌ caꞌ ba zaj ze̱ꞌ xeluꞌe̱ Pablo belexecuase̱ꞌ cuita le̱ꞌ,

naꞌ la gaze benneꞌ naꞌ dxenná beꞌe̱ lu wedil-la,

gate guque béꞌene̱ꞌ nababa Pablo Roma,

bzrebe̱ꞌ laweꞌ da nuchéaje̱ꞌ le̱ du xia.

30 Zra xula,

benneꞌ naꞌ dxenná beꞌe̱ lu wedil-la guca lazre̱ꞌ nézene̱ꞌ bi chee̱ naꞌ dxelagu zria judío caꞌ Pablo,

naꞌ bequé̱ꞌe̱ du xia naꞌ nadxéaj na naꞌ Pablo,

naꞌ gunná béꞌene̱ꞌ xelezraga benneꞌ xíchaje̱ caꞌ chee̱ bxruze,

ne xúgute̱ benneꞌ xuꞌu laweꞌ blau.

Nadxa guléaje̱ꞌ Pablo,

naꞌ bze̱ꞌ le̱ꞌ lau benneꞌ caꞌ.