Pablo dxezrine̱ꞌ xe̱zre Jerusalén
21
Gate bezaꞌntuꞌ naga zaj zraꞌ bi bíchedxu caꞌ,
naꞌ bexúꞌuntuꞌ lu da dxedá laweꞌ nísadauꞌ,
naꞌ bexíajteczentuꞌ naga dxeꞌ xe̱zre Cos,
naꞌ zra xula gudentuꞌ naga dxeꞌ xe̱zre Rodas,
naꞌ gudé naꞌ bzrintuꞌ xe̱zre Pátara.
2 Lu xe̱zre Pátara xeajxrácantuꞌ tu da dxedá laweꞌ nísadauꞌ da zeaj na naga nababa Fenicia.
Naꞌ guxuꞌuntuꞌ lu da dxedá laweꞌ nísadauꞌ nigá,
naꞌ bezaꞌntuꞌ naꞌ.
3 Gate gudentuꞌ naga dxeꞌ xe̱zr la xu Chipre,
bléꞌentuꞌ na chaláꞌa xéglala,
naꞌ bexíajteczentuꞌ,
bzrintuꞌ lu xe̱zre caꞌ zaj nababa Siria.
Lu xe̱zre Tiro be̱n na ba xen xuluxulétaje̱ꞌ xuaꞌ da nua da dxedá laweꞌ nísadauꞌ naꞌ,
naꞌ chee̱ le̱ naꞌ bzrintuꞌ naꞌ.
4 Naꞌ bezrágantuꞌ benneꞌ caꞌ dxeléajle̱ꞌe̱ chee̱ Jesús,
benneꞌ zaj zre̱ꞌe̱ xe̱zre Tiro naꞌ,
naꞌ begáꞌanantuꞌ nen benneꞌ caꞌ gazre zra.
Benneꞌ caní,
laweꞌ da bzéajniꞌi Beꞌ Láꞌazxa le̱ꞌ da gaca,
gulé̱ꞌe̱ Pablo quebe dxal-laꞌ chéaje̱ꞌ Jerusalén.
5 Gate gudé guca gazre zra caꞌ,
naꞌ zua xezaꞌntuꞌ naꞌ.
Xúgute̱ benneꞌ caꞌ dxeléajleꞌe̱ chee̱ Xránadxu,
ne zruꞌule̱ꞌ caꞌ,
ne bidu chee̱ꞌ caꞌ gusáꞌacale̱ne̱ꞌ netuꞌ bedxúajte̱ntuꞌ xe̱zre naꞌ,
naꞌ dxuꞌa nísadauꞌ naꞌ bzu zríbentuꞌ bchálajle̱ntuꞌ Dios.
6 Nadxa bze̱ ljwézrentuꞌ dizraꞌ,
ne bnídate̱ ljwézrentuꞌ.
Nadxa bexúꞌuntuꞌ lu da dxedá laweꞌ nísadauꞌ,
naꞌ bi bíchedxu caꞌ belexezrine̱ꞌ lizre̱ꞌ.
7 Bezaꞌntuꞌ Tiro,
gudentuꞌ lu nísadauꞌ,
ne bzrínte̱ntuꞌ xe̱zre Tolemaida,
naga bgápantuꞌ bi bíchedxu caꞌ diuzre,
ne begáꞌanantuꞌ nen benneꞌ caꞌ tu zra.
8 Zra xula Pablo,
ne netuꞌ zrále̱ntuꞌ le̱ꞌ bezáꞌntuꞌ naꞌ,
naꞌ bzrintuꞌ xe̱zre Cesarea.
Naꞌ bzrintuꞌ lizre Felipe,
benneꞌ dxedá dxuchálaje̱ꞌ dizraꞌ chee̱ Dios.
Naque̱ꞌ tu benneꞌ gazre,
benneꞌ caꞌ buluzúa gubáz caꞌ xelune̱ꞌ zrin chee̱ Jesús.
Begáꞌanantuꞌ nen benneꞌ nigá.
9 Felipe naꞌ zaj zraꞌ tapa zríꞌine̱ꞌ nuꞌula quebe ne xuluchaga naꞌabeꞌ,
ne dxuluchálajbeꞌ waláz chee̱ Dios.
10 Guzúantuꞌ naꞌ zaneꞌ zra gate blaꞌ tu benneꞌ le̱ꞌ Agabo chee̱ xe̱zre caꞌ zaj nababa Judea.
Naque̱ꞌ benneꞌ dxuchálaje̱ꞌ waláz chee̱ Dios.
11 Agabo naꞌ bide̱ꞌ bedajnné̱ꞌe̱ netuꞌ.
Guqué̱ꞌe̱ bazxu dxuꞌa le̱ꞌe̱ chee̱ Pablo,
naꞌ bchéaje̱ꞌ na niꞌa naꞌ cuine̱ꞌ,
dxenné̱ꞌ:
―Beꞌ Láꞌazxa dxenné̱ꞌ judío caꞌ lu xe̱zre Jerusalén xuluchéaj caní benneꞌ xrane bazxu dxuꞌa le̱ꞌe̱ nigá,
naꞌ xuludée̱ꞌ le̱ꞌ lu naꞌ benneꞌ zituꞌ caꞌ.
12 Gate bentuꞌ netuꞌ,
ne benneꞌ Cesarea da nigá,
naꞌ gutaꞌ xuentuꞌ Pablo quebe chéaje̱ꞌ Jerusalén.
13 Pablo beche̱be̱ꞌ:
―¿Bizr chee̱ naꞌ dxebézrele,
ne dxuzúale nedaꞌ xel-laꞌ dxewíꞌine lazreꞌ?
Ba zúaquezaꞌ,
quegá tuze xuluchéaje̱ꞌ nedaꞌ,
san la gázqueze zuaꞌ chee̱ gatiaꞌ lu xe̱zre Jerusalén ne̱ chee̱ Xránadxu Jesús.
14 Gate guque béꞌentuꞌ quebe séquentuꞌ guzágantuꞌ Pablo,
naꞌ québedxa bi gúzrentuꞌ le̱ꞌ,
dxennantuꞌ:
―Gaca ca dxaca lazreꞌ Xránadxu.
15 Gudé naꞌ bseníꞌantuꞌ chee̱ntuꞌ,
naꞌ guxíajntuꞌ Jerusalén.
16 Naꞌ gusiáꞌacale̱ bal-la benneꞌ netuꞌ,
benneꞌ Cesarea dxeléajle̱ꞌe̱ chee̱ Jesús,
naꞌ ládujla benneꞌ caꞌ zua tu benneꞌ Chipre le̱ꞌ Mnasón,
zaneꞌ iza ba zeaj dxéajle̱ꞌe̱ chee̱ Jesús,
naꞌ lizre benneꞌ nigá dxal-laꞌ zrintuꞌ súantuꞌ.
Pablo zeajnné̱ꞌe̱ Jacobo
17 Gate bzrintuꞌ Jerusalén,
bi bíchedxu caꞌ belezíꞌ lu ne̱ꞌe̱ netuꞌ dute̱ xel-laꞌ dxelebé.
18 Zra xula Pablo guxíajle̱ne̱ꞌ netuꞌ xeajnnáꞌntuꞌ Jacobo,
naꞌ zaj zráꞌqueze naꞌ xúgute̱ benneꞌ gula caꞌ dxeléajle̱ꞌe̱ chee̱ Jesús.
19 Pablo bgape̱ꞌ le̱ꞌ diuzre,
naꞌ bzenne̱ꞌ benneꞌ caꞌ tu tu da be̱n Dios lu naꞌ le̱ꞌ ládujla benneꞌ quebe zaj naque̱ꞌ judío.
20 Gate belenne̱ꞌ caꞌ,
naꞌ belúe láꞌane̱ꞌ Dios.
Nadxa gulé̱ꞌe̱ Pablo:
―Chaweꞌ naca na,
bi bíchaꞌdauꞌ.
Dxeléꞌequezenuꞌ zane gaxúa benneꞌ judío dxeléajle̱ꞌe̱ chee̱ Jesús,
naꞌ xúgute̱ꞌ dxelenné̱ꞌ dxun na ba xen chéajle̱dxu da bdxixruj bea Moisés.
21 Zaj zraꞌ benneꞌ ba gulé̱ꞌe̱ benneꞌ judío caní lueꞌ dxusé̱denuꞌ xúgute̱ benneꞌ judío zaj zre̱ꞌe̱ zituꞌ québedxa xelune̱ꞌ ca da gunná beꞌe Moisés,
ne quebe xelechugue̱ꞌ lateꞌ bé̱laꞌdauꞌ chee̱ be̱l-laꞌ dxen chee̱ bidu biu chee̱ꞌ caꞌ,
ne quebe chjácale̱ne̱ꞌ ca naca da zéajle̱dxu dxiꞌu dxundxu.
22 ¿Ájala dxal-laꞌ gundxu?
Benneꞌ judío caní welezrague̱ꞌ gate xelenne̱ꞌ ba blaꞌu.
23 Cháwedxa gunuꞌ da caní:
Zaj zraꞌ tapa benneꞌ láwela dxiꞌu dxal-laꞌ xelune̱ꞌ tu da zaj nache̱be lazre̱ꞌ lau Dios.
24 Guché̱ benneꞌ caní chjáꞌacale̱ne̱ꞌ lueꞌ,
ne bcaꞌana chaweꞌ cuinuꞌ lau Dios nen benneꞌ caní,
naꞌ gudizruj ca naca da dxal-laꞌ xelízruje̱ꞌ benneꞌ guchibe̱ꞌ xicha xichaj benneꞌ caní.
Caꞌan gaca,
xúgute̱ benneꞌ xeleque béꞌene̱ꞌ quebe naca da li ca da gulenné̱ꞌ chiuꞌ,
san la gázqueze lueꞌ dxunuꞌ xúgute̱ ca da dxenná da nadxixruj bea na.
25 Ca naca chee̱ benneꞌ caꞌ quebe zaj naque̱ꞌ judío,
ba bzúajntuꞌ chee̱ꞌ quebe dxun na ba xen xelune̱ꞌ da caní,
san tuze dxal-laꞌ xulusane̱ꞌ da naca chee̱ bedáuꞌ xiaj xaga caꞌ,
ne quebe xelawe̱ꞌ dxen chee̱ be̱ xixreꞌ caꞌ,
ne quebe xelawe̱ꞌ be̱laꞌ chee̱ be̱ xixreꞌ,
be̱ quebe bdxuaj dxen,
ne quebe xelune̱ꞌ dul-la chee̱ da dxucáꞌana sban bénneache.
Dxele̱le̱ꞌ Pablo lu xudauꞌ
26 Nadxa Pablo guché̱ꞌe̱ tapa benneꞌ caꞌ,
naꞌ zra xula bcaꞌana chaweꞌ cuine̱ꞌ lau Dios nen benneꞌ caꞌ,
naꞌ belexúꞌe̱ lu xudauꞌ chee̱ buluzenne̱ꞌ bxruze caꞌ gate xexuzre zra caꞌ chee̱ da dxulucáꞌana chaweꞌ cuine̱ꞌ lau Dios,
gate naꞌ tu tue̱ꞌ dxal-laꞌ xelegúꞌe̱ gunaꞌ.
27 Gate ba zua xuzre da gazre zra,
naꞌ bal-la judío caꞌ,
benneꞌ záꞌaca xe̱zre caꞌ zaj nababa Asia,
beleléꞌene̱ꞌ Pablo lu xudauꞌ naꞌ,
naꞌ buluchague̱ꞌ ca naca benneꞌ caꞌ zaj zre̱ꞌe̱ naꞌ,
naꞌ gulebía che̱ꞌe̱ Pablo.
28 Dxelenné̱ꞌ zizraj:
―Benneꞌ Israel,
le gácale̱ netuꞌ.
Benneꞌ nigá dxedé̱ꞌ gátete̱ze dxusé̱dene̱ꞌ xúgute̱ bénneache xuluzúe̱ꞌ chaláꞌala xe̱zr la xu chee̱dxu,
ne da bdxixruj beꞌe Moisés,
ne xudauꞌ nigá,
ne ba guzre̱ꞌe̱ lu xudauꞌ nigá bal-la benneꞌ griego.
Dxucáꞌana dítaje̱ꞌ lataj láꞌazxa nigá.
29 Caní gulenné̱ꞌ laweꞌ da ba beleléꞌene̱ꞌ Pablo lu xe̱zre naꞌ nen Trófimo,
tu benneꞌ xe̱zre Efeso,
naꞌ dxeléquene̱ꞌ gulúꞌu Pablo le̱ꞌ lu xudauꞌ.
30 Ca naca benneꞌ zaj zre̱ꞌe̱ xe̱zre naꞌ beledxéꞌena zrague̱ꞌ,
ne záꞌaca chégüe̱ꞌ.
Nadxa gule̱l-le̱ꞌ Pablo,
ne gulezrube xue̱ꞌ le̱ꞌ chaleꞌaj xudauꞌ naꞌ,
naꞌ bulusézxuje̱ꞌ dxa xuꞌu chee̱ na.
31 Ba zuate̱ xelútie̱ꞌ Pablo gate benneꞌ Roma dxenná beꞌe̱ lu wedil-la benne̱ꞌ ba dxeledxéꞌena zraga ca naca benneꞌ zaj zre̱ꞌe̱ xe̱zre Jerusalén.
32 Nadxa benneꞌ nigá bchague̱ꞌ benneꞌ dxjaque̱ꞌ wedil-la nen benneꞌ dxenná béꞌene̱ꞌ le̱ꞌ,
naꞌ xjaca chégüe̱ꞌ naga zaj nazraga benneꞌ zan caꞌ.
Gate benneꞌ caꞌ beleléꞌene̱ꞌ benneꞌ naꞌ dxenná beꞌe̱ lu wedil-la,
naꞌ bulusane̱ꞌ québedxa buluzálaje̱ꞌ Pablo.
33 Nadxa gubigaꞌ benneꞌ naꞌ dxenná beꞌe̱ lu wedil-la,
naꞌ gude̱l-le̱ꞌ Pablo,
ne gunná béꞌene̱ꞌ xuluchéaje̱ꞌ le̱ꞌ chupa du xia.
Gudé naꞌ bche̱be̱ꞌ benneꞌ caꞌ nuaꞌ benneꞌ nigá,
ne bi ba be̱ne̱ꞌ.
34 Benneꞌ caꞌ gulebezre xe̱ꞌe̱ da zan da gulenné̱ꞌ.
Caꞌan guca benneꞌ dxenná beꞌe̱ lu wedil-la quebe bi guxéajniꞌine̱ꞌ laweꞌ da dxelúnle̱ꞌe̱ schagaꞌ.
Nadxa gunná béꞌene̱ꞌ xeleché̱ꞌe̱ Pablo xuꞌu naga zaj zraꞌ benneꞌ dxjaque̱ꞌ wedil-la,
benneꞌ zan caꞌ.
35 Gate belezrine̱ꞌ dxa xuꞌu naga zaj zraꞌ benneꞌ dxjaque̱ꞌ wedil-la,
naꞌ benneꞌ dxjaque̱ꞌ wedil-la belexúꞌe̱ Pablo lu naꞌze̱ꞌ laweꞌ da dxelúele̱ꞌe̱ benneꞌ zan caꞌ Pablo,
36 naꞌ xúgute̱ꞌ záꞌaque̱ꞌ cuzre naꞌ dxelenné̱ꞌ zizraj:
―Gate bénneaꞌ.
Pablo dxexeche̱be̱ꞌ lau benneꞌ zan caꞌ
37 Gate dxelegúꞌe̱ Pablo lu xuꞌu naga zaj zraꞌ benneꞌ dxjaque̱ꞌ wedil-la,
le̱ꞌ guzre̱ꞌ benneꞌ naꞌ dxenná béꞌene̱ꞌ le̱ꞌ:
―¿Waca bi nniaꞌ?
Naꞌ bche̱be bénneaꞌ le̱ꞌ:
―¿Waca nneuꞌ dizraꞌ griego?
38 ¿Quebe nacuꞌ lueꞌ benneꞌ Egipto naꞌ ba zeaj tu chupa iza btupe̱ꞌ benneꞌ caꞌ guledábague̱ꞌ xuꞌu laweꞌ,
naꞌ guché̱ꞌe̱ tapa gaxúa benneꞌ dxelutie̱ꞌ benneꞌ,
xeajzré̱ꞌe̱ le̱ꞌ le̱ꞌe̱ xixreꞌ laweꞌ lataj?
39 Nadxa Pablo guzre̱ꞌ benneꞌ naꞌ:
―Nedaꞌ nacaꞌ benneꞌ judío,
ne nababaꞌ tu xe̱zre blau chee̱ ga nababa Cilicia.
Be̱n culuén gunuꞌ nedaꞌ lataj guchálajle̱naꞌ benneꞌ zan caní.
40 Benneꞌ naꞌ be̱ꞌe̱ le̱ꞌ lataj,
naꞌ Pablo guzé̱ꞌ lachila chee̱ xuꞌu naꞌ,
naꞌ guchisa ne̱ꞌe̱ chee̱ xelezúa zri benneꞌ zan caꞌ.
Gate gudxéꞌ zri,
naꞌ bchálajle̱ne̱ꞌ le̱ꞌ dizraꞌ hebreo,
dxenné̱ꞌ: