Pablo dxedée̱ꞌ ga nababa Macedonia ne Grecia
20
Gate gudé guca da ste̱be naꞌ lu xe̱zre Efeso,
naꞌ Pablo btupe̱ꞌ benneꞌ caꞌ dxeléajle̱ꞌe̱ chee̱ Jesús chee̱ guzéajniꞌine̱ꞌ le̱ꞌ.
Nadxa bze̱ꞌ benneꞌ caꞌ dizraꞌ,
ne bnide̱ꞌ le̱ꞌ,
naꞌ guzé̱ꞌe̱ zéaje̱ꞌ xe̱zre caꞌ zaj nababa Macedonia.
2 Xeajné̱ꞌe̱ bíchedxu caꞌ zaj zre̱ꞌe̱ xúgute̱ xé̱zredu caꞌ,
ne btípale̱ꞌe̱ lazreꞌ benneꞌ caꞌ ne̱ chee̱ dizraꞌ da bchálajle̱ne̱ꞌ le̱ꞌ.
Ca gudé naꞌ bezrine̱ꞌ naga nababa Grecia.
3 Begáꞌane̱ꞌ naꞌ chunna beuꞌ,
naꞌ gudé naꞌ gate ba zuate̱ꞌ chuꞌe̱ tu lu da dxedá laweꞌ nísadauꞌ chéaje̱ꞌ xe̱zre caꞌ zaj nababa Siria,
guque béꞌene̱ꞌ ba zaj nun judío caꞌ ca da xelune̱ꞌ chee̱ꞌ.
Chee̱ le̱ naꞌ gulúꞌu biꞌe̱ xezé̱ꞌe̱ niꞌe̱ tée̱ꞌ naga nababa Macedonia.
4 Belún le̱ꞌ tuze Sópater,
benneꞌ xe̱zre Berea,
ne Aristarco,
ne Segundo,
benneꞌ xe̱zre Tesalónica naꞌ,
ne Gayo,
benneꞌ xe̱zre Derbe,
ne Timoteo,
ne Tíquico,
ne Trófimo,
benneꞌ caꞌ chee̱ xe̱zre caꞌ zaj nababa Asia.
5 Bi bíchedxu caní gulebía lawe̱ꞌ launtuꞌ,
nedaꞌ,
Lucas,
ne xezícadxa ljwezre Pablo,
naꞌ gulebeze̱ꞌ netuꞌ lu xe̱zre Troas.
6 Netuꞌ,
gate gudé laní gate dxelagu benneꞌ judío xeta xtila da quebe nachixre cua zichaj chee̱ na,
guxúꞌuntuꞌ tu lu da dxedá laweꞌ nísadauꞌ,
naꞌ bezaꞌntuꞌ xe̱zre Filipos.
Zra gazxuꞌ zra naꞌ xeajzrentuꞌ bi bíchedxu caꞌ lu xe̱zre Troas,
naga guzúantuꞌ gazre zra.
Da be̱n Pablo lu xe̱zre Troas
7 Zra nedxu chee̱ da gazre zra bezrágantuꞌ chee̱ gáguntuꞌ da dxusá lázredxu ca guca gate gute Xránadxu,
naꞌ Pablo bsé̱dene̱ꞌ bi bíchedxu caꞌ.
Be̱n na ba xen xezaꞌntuꞌ zra xula,
naꞌ chee̱ le̱ naꞌ bchálajqueze Pablo cadxa bzrinte̱ dxe̱la.
8 Nazrágantuꞌ tu xuꞌu da zua chunna cuía sibe,
naꞌ zaj zé̱le̱ꞌe̱ xiꞌ da dxulusení na.
9 Tu bi cuideꞌ zríabeꞌ ga dxuꞌu leníꞌ,
naꞌ gate Pablo bsetúnnadxe̱ꞌ xrtizre̱ꞌ,
naꞌ guca wásele̱ꞌe̱ bi cuideꞌ naꞌ,
naꞌ naga xeajchete̱ na,
naꞌ dxásete̱beꞌ gubíxrebeꞌ chunna cuía sibe,
naꞌ xeajlechise̱ꞌ-beꞌ ba nátebeꞌ.
10 Nadxa betaj Pablo,
naꞌ gulégüe̱ꞌ bequé̱ꞌe̱-beꞌ,
ne bnide̱ꞌ-beꞌ.
Nadxa guzre̱ꞌ bi bíchedxu caꞌ:
―Quebe zrébele.
Nabanbeꞌ.
11 Nadxa Pablo begüéne̱ꞌ bezrine̱ꞌ chunna cuía sibe naꞌ.
Naꞌ bzúzruje̱ꞌ xeta xtila gudawe̱ꞌ,
naꞌ bezú lawe̱ꞌ dxuchálaje̱ꞌ cadxa guxaníꞌte̱.
Zra naꞌ bezé̱ꞌe̱ naꞌ.
12 Nadxa bíchedxu caꞌ belexeché̱ꞌe̱ bi naꞌ gubíxrebeꞌ ba bexaca banbeꞌ,
naꞌ xúgute̱ꞌ gulezúe̱ꞌ lu xel-laꞌ dxelezrén lazreꞌ.
Pablo dxexeze̱ꞌe̱ xe̱zre Troas xezrine̱ꞌ xe̱zre Mileto
13 Netuꞌ guzría launtuꞌ lau Pablo,
naꞌ guxuꞌuntuꞌ lu da dxedá laweꞌ nísadauꞌ,
naꞌ bzrintuꞌ xe̱zre Asón naga xezrágantuꞌ Pablo ca ba nun le̱ꞌ laweꞌ da guca lazre̱ꞌ zéaje̱ꞌ níꞌaze̱ꞌ.
14 Gate bezrágantuꞌ le̱ꞌ lu xe̱zre Asón,
naꞌ guxúꞌe̱ lu da dxedá laweꞌ nísadauꞌ naga xuꞌuntuꞌ,
naꞌ guxíajntuꞌ xe̱zre Mitilene.
15 Bezaꞌntuꞌ naꞌ,
naꞌ zra xula bedentuꞌ le nnaꞌ xe̱zre Quío,
naꞌ xetú zra,
zra xula bezrintuꞌ lu xe̱zre Samos.
Naꞌ guzúantuꞌ xe̱zre Trogilio naga bezíꞌ lázrentuꞌ,
naꞌ zra xula bzrintuꞌ xe̱zre Mileto.
16 Caꞌ be̱ntuꞌ chee̱ quebe guzréꞌte̱cantuꞌ naga nababa Asia.
Chee̱ le̱ naꞌ Pablo quebe guca lazre̱ꞌ chéaje̱ꞌ Efeso laweꞌ da guca lazre̱ꞌ xezrinze̱ꞌ lu xe̱zre Jerusalén chee̱ sue̱ꞌ naꞌ lu zra Pentecostés che ba guca.
Pablo dxuchálajle̱ne̱ꞌ benneꞌ gula dxeléajle̱ꞌe̱ chee̱ Jesús, benneꞌ zaj zre̱ꞌe̱ Efeso
17 Ca zrantuꞌ lu xe̱zre Mileto,
Pablo gusel-le̱ꞌ tu benneꞌ cheajnné̱ꞌ benneꞌ gula caꞌ dxeléajle̱ꞌe̱ chee̱ Jesús zaj zre̱ꞌe̱ xe̱zre Efeso.
18 Gate beleláꞌ benneꞌ caꞌ,
Pablo guzre̱ꞌ le̱ꞌ:
―Leꞌe nézquezle ca be̱naꞌ nedaꞌ xúgute̱ zra ca gudé blaꞌa ga nababa Asia.
19 Xúgute̱ zra guzúaꞌ láwela leꞌe dxunaꞌ zrin chee̱ Xránadxu dute̱ xel-laꞌ dxexruj lazreꞌ,
ne zaneꞌ lasa gudxezraꞌ,
naꞌ gudéaꞌ lu zaneꞌ da guzxacaꞌ ca naca da gulaca lazreꞌ benneꞌ judío caꞌ xelune̱ꞌ chiaꞌ.
20 Bchálajle̱naꞌ leꞌe xúgute̱ da naca na xrlátaje,
ne bsé̱dedaꞌ leꞌe láwela benneꞌ zan,
ne lízrquezle.
21 Benneꞌ zaj naque̱ꞌ judío,
ne benneꞌ quebe zaj naca judío,
gúchequezaꞌ benneꞌ caꞌ dxal-laꞌ xelexebíꞌi lazre̱ꞌ lau Dios,
ne xeléajle̱ꞌe̱ chee̱ Xránadxu Jesucristo.
22 Naꞌa zexáꞌa Jerusalén,
ca dxenná beꞌe Beꞌ Láꞌazxa nedaꞌ,
ne quebe nezdaꞌ bi gaca chiaꞌ naꞌ.
23 Tuze da nezdaꞌ,
lu xúgute̱ xe̱zre caꞌ naga dxedéaꞌ,
Beꞌ Láꞌazxa dxe̱ꞌe̱ nedaꞌ dxal-laꞌ chuꞌa lizre xia,
ne teaꞌ zaneꞌ xel-laꞌ ziꞌ.
24 Quebe dxebeꞌa gunne xue chee̱ da nigá,
ne quebe bi zaca xel-laꞌ nabán chiaꞌ,
san tuze che gaca chéajle̱naꞌ ca naca da dxunaꞌ,
ne chee̱ gusexúzrquezaꞌ gunaꞌ ca naca da nusebaga Xránadxu Jesús nedaꞌ,
guchálajaꞌ dizraꞌ chaweꞌ ca nazríꞌi Dios dxiꞌu.
25 ’Nézquezdaꞌ netule leꞌe,
ba bchálajle̱naꞌ leꞌe ca dxenná bea Dios,
québedxa léꞌele nedaꞌ.
26 Chee̱ le̱ naꞌ,
dxaca lazraꞌ xapaꞌ leꞌe naꞌa,
quebe nabagaꞌ zria ne̱ chee̱ tule leꞌe,
27 laweꞌ da ba bzendaꞌ leꞌe ca naca da dxaca lazreꞌ Dios gune̱ꞌ,
ne quebe bi bcáꞌanaꞌ da quebe bzéajniꞌidaꞌ leꞌe.
28 Chee̱ le̱ naꞌ,
le guxúe cuínale,
ne le guxúe ca naca benneꞌ caꞌ nácale tuze,
benneꞌ caꞌ Beꞌ Láꞌazxa ba nuzúe̱ꞌ leꞌe ládujla le̱ꞌ chee̱ chuꞌu lu naꞌle guxuele benneꞌ caꞌ zaj nazrague̱ꞌ chee̱ Xránadxu,
benneꞌ caꞌ naxáꞌawene̱ꞌ nen dxen cheé̱queze̱ꞌ.
29 Nezdaꞌ gate xezáꞌa nedaꞌ xeleláꞌ bal-la benneꞌ xelaca lazre̱ꞌ guzría xiꞌe̱ benneꞌ zaj nazraga chee̱ Xránadxu ca dxelún becuꞌ xiꞌa,
be̱ snia caꞌ dxuluzría xibaꞌ zrilaꞌ caꞌ.
30 Ládujla leꞌe weleláꞌ bal-la benneꞌ xulusé̱dene̱ꞌ da we̱n lazreꞌ,
ne quegá da li,
chee̱ chjácale̱ benneꞌ caꞌ dxeléajle̱ꞌe̱ chee̱ Jesús le̱ꞌ.
31 Chee̱ le̱ naꞌ,
le guxúe cuínale.
Le gusáꞌ lázrele ca be̱naꞌ chun iza,
te zra ne chizrela quebe bsanaꞌ bzéajniꞌidaꞌ leꞌe tu tule leꞌe,
ne gudxézreteaꞌ.
32 ’Naꞌa,
biche ljwezraꞌ,
dxuzúaꞌ leꞌe lu naꞌ Dios,
ne lu dizraꞌ chee̱ xel-laꞌ zriꞌi lazreꞌ chee̱ꞌ,
da napa na xel-laꞌ waca chee̱ gun na leꞌe benneꞌ chuchu lazreꞌ,
ne chee̱ guzúa na leꞌe láwela xúgute̱ benneꞌ caꞌ ba guleaj Dios cheé̱queze̱ꞌ.
33 Quebe guca lazraꞌ nedaꞌ siꞌa chiaꞌ dumí ne zra lana nu benneꞌ.
34 Nézquezle leꞌe ca be̱naꞌ,
be̱naꞌ zrin nen niꞌa náꞌquezaꞌ chee̱ gutaꞌ da guchínnedaꞌ nedaꞌ,
ne da gulechinne benneꞌ caꞌ gulaque̱ꞌ nedaꞌ tuze.
35 Bléꞌequezdaꞌ leꞌe,
caꞌan dxal-laꞌ gunle zrin chee̱ séquele gácale̱le benneꞌ dxelexazrje.
Bsa lázrele xrtizraꞌ Xránadxu Jesús,
gate gunné̱ꞌ:
“Ba neza zrendxa naca na chee̱ benneꞌ dxunezruj,
quézcala chee̱ benneꞌ siꞌ lu ne̱ꞌe̱.”