―¿Guziꞌle leꞌe Beꞌ Láꞌazxa gate guxéajle̱le?

Belexeche̱be̱ꞌ:

―Ne quebe xénentuꞌ che zua Beꞌ Láꞌazxa.

3 Nadxa Pablo bche̱be̱ꞌ benneꞌ caꞌ:

―¿Bi xel-laꞌ dxedxúa nisa guziꞌle leꞌe?

Benneꞌ caꞌ belexeche̱be̱ꞌ:

―Xela dxuchúa nisa ca be̱n Juan.

4 Naꞌ gunná Pablo,

guzre̱ꞌ benneꞌ caꞌ:

―Aweꞌ,

Juan bchue̱ꞌ nisa benneꞌ caꞌ belexebíꞌi lazre̱ꞌ,

san guzre̱ꞌ benneꞌ caꞌ dxal-laꞌ xeléajle̱ꞌe̱ chee̱ Bénneaꞌ xide̱ꞌ ca te chee̱ le̱ꞌ,

da zéaje̱ na,

chee̱ Jesús,

Bénneaꞌ naque̱ꞌ Cristo,

nasel-la Dios.

5 Gate belenne̱ꞌ da nigá,

naꞌ beledxúe̱ꞌ nisa lu La Xránadxu Jesús.

6 Gate bze̱ naꞌ Pablo benneꞌ caꞌ,

naꞌ guzúale̱ Beꞌ Láꞌazxa le̱ꞌ,

naꞌ gulenné̱ꞌ dizraꞌ chee̱ benneꞌ zituꞌ da quebe buluse̱de̱ꞌ,

ne buluchálaje̱ꞌ waláz chee̱ Dios.

7 Benneꞌ caní zaj naca chazrínnue̱ꞌ.

8 Laweꞌ chunna beuꞌ dxeaj Pablo lu xuꞌu caꞌ naga buluzraga judío caꞌ naga bchálajle̱ne̱ꞌ benneꞌ caꞌ dizraꞌ chee̱ Dios,

ne bléꞌene̱ꞌ benneꞌ caꞌ naca da li da dxuchálaje̱ꞌ ca naca xel-laꞌ dxenná bea chee̱ Dios.

9 Bal-le̱ꞌ belún zideꞌ lázrdawe̱ꞌ,

ne quebe gulaca lazre̱ꞌ xeléajle̱ꞌe̱ chee̱ Jesús,

naꞌ gulenné̱ꞌ schanniꞌ chee̱ dizraꞌ chaweꞌ ca naca chee̱ Jesús láwela benneꞌ caꞌ.

Nadxa Pablo bezé̱ꞌe̱ naga zaj zraꞌ benneꞌ caꞌ,

ne guché̱ꞌe̱ benneꞌ caꞌ dxeléajle̱ꞌe̱ chee̱ Jesús lu xuꞌu ga dxuse̱de tu benneꞌ le̱ꞌ Tiranno,

naꞌ lu xuꞌu naꞌ bchálajle̱ne̱ꞌ benneꞌ caꞌ tu zra tu zra.

10 Caꞌ be̱ne̱ꞌ laweꞌ chupa iza,

naꞌ caꞌan guca xúgute̱ benneꞌ zaj zre̱ꞌe̱ xe̱zre caꞌ zaj nababa Asia belenne̱ꞌ dizraꞌ chee̱ Xránadxu Jesús,

benneꞌ judío caꞌ,

ne benneꞌ quebe zaj naque̱ꞌ judío.

11 Dios be̱ne̱ꞌ xel-laꞌ waca zriꞌa caꞌ lu naꞌ Pablo lu zra caꞌ.

12 Caꞌan guca,

gulequé̱ꞌe̱ ladxeꞌ caꞌ da dxuchéaj xichaj Pablo,

ne ladxeꞌ caꞌ da bde̱ꞌe̱ lachuꞌe̱,

naꞌ belúꞌe̱ na naga zaj de̱ benneꞌ we̱ꞌ caꞌ,

naꞌ benneꞌ caní belexexaque̱ꞌ ca naca xízrawe̱ꞌ da zaj nape̱ꞌ,

naꞌ beꞌ xriwe̱ꞌ caꞌ belexedxúaj na lu be̱l-laꞌ dxen chee̱ benneꞌ caꞌ.

13 Bal-la benneꞌ judío caꞌ,

benneꞌ dxeledé̱ꞌ dxelexebéaje̱ꞌ beꞌ xriwe̱ꞌ caꞌ lu xichaj lázxdau benneꞌ caꞌ,

gulaca lazre̱ꞌ xuluchínene̱ꞌ La Xránadxu Jesús chee̱ xelexebéaje̱ꞌ na,

naꞌ gulé̱ꞌe̱ beꞌ xriwe̱ꞌ caꞌ:

―Dxenná béꞌentuꞌ leꞌe xedxúajle lu xichaj lázxdau benneꞌ nigá lu La Jesucristo,

Bénneaꞌ dxuchalaj Pablo chee̱ꞌ.

14 Caní belún gazre benneꞌ zaj naque̱ꞌ zriꞌine tu benneꞌ judío le̱ꞌ Esceva,

naque̱ꞌ tu benneꞌ xíchaje̱ chee̱ bxruze caꞌ.

15 Gate belune̱ꞌ caní,

beꞌ xriwe̱ꞌ naꞌ beche̱be na chee̱ꞌ:

―Núnbeꞌa Jesús,

ne nezdaꞌ nuaꞌ Pablo,

san leꞌe,

¿nuzra leꞌe?

16 Gate gunná na da nigá,

naꞌ benneꞌ biu naꞌ xuꞌe̱ beꞌ xriwe̱ꞌ naꞌ,

guxritie̱ꞌ guzría che̱ꞌe̱ benneꞌ caꞌ,

naꞌ dute̱ xel-laꞌ wal-la chee̱ꞌ bucule̱ꞌ xúgute̱ benneꞌ caꞌ,

naꞌ bé̱ꞌle̱ꞌe̱ benneꞌ caꞌ cadxa buluzrúnnuje̱ꞌ lu xuꞌu naꞌ galaꞌ xídeze,

ne dxelaque̱ꞌ dxen.

17 Xúgute̱ benneꞌ zaj zre̱ꞌe̱ xe̱zre Efeso,

benneꞌ judío caꞌ,

ne benneꞌ quebe zaj naque̱ꞌ judío,

belenne̱ꞌ ca guca da nigá,

naꞌ chee̱ le̱ naꞌ belezrébele̱ꞌe̱,

ne bulucáꞌana szrene̱ꞌ La Xránadxu Jesús.

18 Cáꞌanqueze benneꞌ zan láwela benneꞌ caꞌ dxeléajle̱ꞌe̱ chee̱ Jesús belelé̱ꞌe̱ dxelexrúale̱pe̱ꞌ da cale̱la da belune̱ꞌ,

19 naꞌ benneꞌ zan,

benneꞌ belúne̱ꞌ xel-laꞌ wazráꞌ,

zaj nuꞌe̱ xiche chee̱ wazráꞌ,

naꞌ buluzezxe̱ꞌ na lau xúgute̱ benneꞌ caꞌ.

Gate bululabe̱ꞌ ca gulezaca xiche caꞌ,

naꞌ gulenézene̱ꞌ gulezaca na ca gazxu gaxúa cueꞌ tu gaxúa dumí plata.

20 Caꞌan guca,

guxíaj bzriluj dizraꞌ chee̱ Xránadxu,

ne bleꞌe na xel-laꞌ waca chee̱ na.

21 Gudé naꞌ Pablo guca lazre̱ꞌ tée̱ꞌ xé̱zredu caꞌ zaj nababa Macedonia,

ne Acaya,

naꞌ te naꞌ chéaje̱ꞌ xe̱zre Jerusalén.

Gunné̱ꞌ ca te chéaje̱ꞌ Jerusalén,

naꞌ dxal-laꞌ cheajte̱ꞌ xe̱zre Roma.

22 Nadxa gusel-le̱ꞌ chupa benneꞌ dxelácale̱ le̱ꞌ,

Timoteo ne Erasto,

naga nababa Macedonia,

dxácate̱ begáꞌana le̱ꞌ xetú chiꞌi naga nababa Asia.

23 Ca lu zra naꞌ benneꞌ zan guledábague̱ꞌ dizraꞌ chaweꞌ ca naca chee̱ Jesús,

24 da naꞌ guca na ne̱ chee̱ tu benneꞌ le̱ꞌ Demetrio,

benneꞌ gubizre plata.

Benneꞌ nigá dxune̱ꞌ níchudu caꞌ da zaj naca plata ca xudauꞌ chee̱ dios nuꞌula le̱ꞌ Diana,

naꞌ benneꞌ caꞌ dxelúnle̱ne̱ꞌ le̱ꞌ zrin nigá dxelezíꞌle̱ꞌe̱ dumí.

25 Demetrio naꞌ bchague̱ꞌ benneꞌ caní tu zren nen xezica benneꞌ dxelune̱ꞌ zrin caní,

naꞌ guzre̱ꞌ benneꞌ caꞌ:

―Leꞌe,

benneꞌ,

nézquezle lu zrin nigá dxaca chee̱dxu da cháwele̱ꞌe̱,

26 naꞌ ca dxeléꞌequezle leꞌe ne dxenle,

Pablo nigá dxedé̱ꞌ dxenné̱ꞌ dios caꞌ da zaj nun bénneache quebe zaj naca na dios,

naꞌ caní ba bsé̱dene̱ꞌ benneꞌ zan,

quegá Efeso nigáze,

san du ca nababa Asia.

27 Da nigá nácale̱ꞌe̱ na ste̱be chee̱dxu,

laweꞌ da ca naca zrin chee̱dxu nigá nazruzre cuía xi na,

ne la gaze xudauꞌ chee̱ dios nuꞌula Diana nazruzre nite xel-laꞌ nuzé̱ chee̱ na,

naꞌ caní xegáꞌana ditaj ca naca xel-laꞌ szren chee̱ dios nuꞌula,

bénneaꞌ dxelúe láꞌana ca naca benneꞌ zaj zre̱ꞌe̱ ga nababa Asia,

ne du ca naca bénneache zaj zre̱ꞌe̱ xe̱zr la xu.

28 Gate belenne̱ꞌ da nigá,

naꞌ belezráꞌale̱ꞌe̱ benneꞌ caꞌ,

ne gulebezre xe̱ꞌe̱,

dxelenné̱ꞌ:

―¡Gaꞌana szren Diana,

dios chee̱dxu,

benneꞌ Efeso!

29 Naꞌ ca naca benneꞌ zaj zre̱ꞌe̱ xe̱zre naꞌ guleque zréajene̱ꞌ.

Gule̱le̱ꞌ Gayo,

ne Aristarco,

benneꞌ Macedonia dxeledále̱ne̱ꞌ Pablo,

naꞌ gulezrube xue̱ꞌ benneꞌ caní chaleꞌaj xuꞌu laweꞌ.

30 Pablo guca lazre̱ꞌ chuꞌe̱ naꞌ chee̱ guchálajle̱ne̱ꞌ benneꞌ caꞌ,

san bi bíchedxu caꞌ quebe gulegúꞌe̱ le̱ꞌ lataj.

31 Cáꞌanqueze bal-la benneꞌ xuꞌu laweꞌ chee̱ xe̱zre caꞌ zaj nababa Asia gulesel-le̱ꞌ benneꞌ xeaje̱zre̱ꞌ Pablo quebe dxal-laꞌ chuꞌe̱ naꞌ.

32 Dxácate̱ naꞌ,

naga zaj nazraga benneꞌ caꞌ,

bal-le̱ꞌ gulebezre xe̱ꞌe̱,

tu da dxelenné̱ꞌ,

naꞌ xebal-le̱ꞌ dxelebezre xe̱ꞌe̱,

dxelenné̱ꞌ da xula,

laweꞌ da beledxéꞌena zraga benneꞌ zan,

naꞌ benneꞌ zante̱ quebe zaj nézene̱ꞌ bizr chee̱ naꞌ zaj nazrague̱ꞌ naꞌ.

33 Nadxa benneꞌ judío caꞌ buluzúe̱ꞌ Alejandro lau benneꞌ caꞌ chee̱ guzéajniꞌine̱ꞌ le̱ꞌ ca naca da nigá,

naꞌ le̱ꞌ guchisa ne̱ꞌe̱ chee̱ xelezúa zri benneꞌ caꞌ laweꞌ da guca lazre̱ꞌ guchálajle̱ne̱ꞌ benneꞌ zan caꞌ da gácale̱ na judío caꞌ.

34 Gate benneꞌ zan caꞌ guleque béꞌene̱ꞌ naque̱ꞌ benneꞌ judío,

naꞌ gulebezre xaꞌa xúgute̱ꞌ ca chupa hora,

dxelenné̱ꞌ:

―¡Gaꞌana szren Diana,

dios chee̱dxu,

benneꞌ Efeso!

35 Nadxa benneꞌ dxuzúaje̱ꞌ ne̱ chee̱ xe̱zre naꞌ,

gate ba bzua zrie̱ꞌ benneꞌ zan caꞌ,

gunné̱ꞌ:

―Leꞌe,

benneꞌ Efeso.

Ca naca bénneache zaj zraꞌ xe̱zr la xu nigá zaj nézene̱ꞌ benneꞌ zaj zre̱ꞌe̱ xe̱zre Efeso nigá zaj nabague̱ꞌ xuluxúe̱ꞌ xudauꞌ chee̱ dios nuꞌula Diana,

ne bedáuꞌ chee̱ꞌ da bexruj na zran xabáa.

36 Quebe nu sequeꞌ tábagaꞌ da nigá.

Chee̱ le̱ naꞌ le sua zrize,

ne quebe bi gunle da quebe ne guxúe xánnele.

37 Benneꞌ caní nache̱ꞌle nigá quebe bi da cale̱la ne xelune̱ꞌ,

ne quebe bi schanniꞌ ne xelenné̱ꞌ chee̱ dios nuꞌula chee̱le.

38 Che Demetrio,

ne benneꞌ caꞌ dxelune̱ꞌ zrin nen le̱ꞌ dxelaca lazre̱ꞌ xelagu zria chee̱ tu benneꞌ,

zaj zraꞌ benneꞌ dxuluchiꞌe̱ da dxaca,

ne zaj zua xuꞌu laweꞌ caꞌ naga gaca xelawe̱ꞌ zría chee̱ benneꞌ caꞌ.

39 Naꞌ che leꞌe bi xetú da nábale,

dxal-laꞌ nábale na naga zaj nazraga benneꞌ xuꞌu laweꞌ ca dxenná bea da bdxixruj bea César.

40 Naꞌa zúadxu ste̱be ga gaze nu gagu zria chee̱dxu ca naca da be̱ndxu,

xelenné̱ꞌ dxedábagadxu xuꞌu laweꞌ laweꞌ da quebe sequeꞌ bi xeché̱bedxu che nu gagu zria dxiꞌu ne̱ chee̱ da guca naꞌa.

41 Ca gudé gunné̱ꞌ da nigá,

naꞌ bze̱ꞌ benneꞌ zan caꞌ dizraꞌ.