Pablo dxezrine̱ꞌ xe̱zre Corinto
18
Gudé naꞌ bezáꞌ Pablo xe̱zre Atenas,
bexíaje̱ꞌ xe̱zre Corinto.
2 Lu xe̱zre naꞌ xeajxraque̱ꞌ tu benneꞌ judío le̱ꞌ Aquilo,
naque̱ꞌ benneꞌ nababe̱ꞌ tu xe̱zre nababa Ponto.
Láteze ba guca belexezrín Aquilo,
ne zruꞌule̱ꞌ Priscila ga naꞌ.
Benneꞌ caní besiáꞌque̱ꞌ xe̱zr la xu Italia laweꞌ da gunná bea César Claudio xelexedxúaj xúgute̱ benneꞌ judío caꞌ xe̱zre Roma.
Pablo guxíaje̱ꞌ xeajnné̱ꞌe̱ Aquilo ne Priscila,
3 naꞌ laweꞌ da tuze ca naca zrin da dxelún Pablo ne Aquilo,
dxelune̱ꞌ xuꞌu xide zra be̱ xixreꞌ da dxelútie̱ꞌ chee̱ benneꞌ dxjaca wedil-la,
naꞌ begáꞌana Pablo nen benneꞌ caní chee̱ xelune̱ꞌ tu zren zrin.
4 Tu zra tu zra gate naca zra dxulupáꞌana judío caꞌ,
Pablo zéaje̱ꞌ lu xudáudauꞌ chee̱ judío caꞌ naga bchálaje̱ꞌ,
ne bléꞌene̱ꞌ benneꞌ caꞌ,
benneꞌ judío,
ne benneꞌ quebe zaj naque̱ꞌ judío,
Jesús naque̱ꞌ Cristo,
Bénneaꞌ guche̱be lazreꞌ Dios sel-le̱ꞌ.
5 Gate belezrín Silas,
ne Timoteo ga naꞌ,
gudé belexesíꞌaque̱ꞌ xe̱zre caꞌ zaj nababa Macedonia,
naꞌ Pablo tu dxuchálajzqueze̱ꞌ dizraꞌ chee̱ Dios,
ne dxuléꞌene̱ꞌ benneꞌ judío caꞌ da li Jesús naque̱ꞌ Cristo,
bénneaꞌ nasel-la Dios,
bénneaꞌ dxelebeza judío caꞌ.
6 Benneꞌ judío caꞌ gulezú lawe̱ꞌ dxeledábague̱ꞌ Pablo,
ne dxelenné̱ꞌ schanniꞌ chee̱ꞌ.
Nadxa Pablo guzribe̱ꞌ gabán chee̱ꞌ da dxuléꞌe na dxebéaj xíchaje̱ꞌ benneꞌ caꞌ,
dxenné̱ꞌ:
―Leꞌe nabágale chee̱ xel-laꞌ gute chee̱ bénneꞌdu xuꞌule.
Québedxa nabagaꞌ nedaꞌ chee̱ na laweꞌ da ba bzendaꞌ leꞌe dizraꞌ chaweꞌ chee̱ Cristo.
Náꞌate̱la guchálajle̱naꞌ benneꞌ quebe zaj naque̱ꞌ judío.
7 Bezé̱ꞌe̱ lu xudáudauꞌ naꞌ,
naꞌ bezrine̱ꞌ lizre tu benneꞌ le̱ꞌ Justo,
benneꞌ dxucáꞌana szrene̱ꞌ Dios ne zua lizre̱ꞌ cuita xudáudauꞌ chee̱ judío caꞌ.
8 Naꞌ Crispo,
benneꞌ xíchaje̱ chee̱ xudáudauꞌ chee̱ judío caꞌ,
ne ca naca benneꞌ zaj zre̱ꞌe̱ lizre̱ꞌ guléajle̱ꞌe̱ chee̱ Xránadxu.
Cáꞌanqueze benneꞌ zan benneꞌ Corinto,
gate belenne̱ꞌ dizraꞌ chee̱ Dios,
guléajle̱ꞌe̱ ne guledxúe̱ꞌ nisa.
9 Nadxa Xránadxu bleꞌe lawe̱ꞌ Pablo tu zreꞌ tu lu da bleꞌe Dios le̱ꞌ,
ne guzre̱ꞌ le̱ꞌ:
―Quebe zrebuꞌ.
Bchálajte̱ze,
ne quebe sua zriuꞌ.
10 Nedaꞌ zúale̱naꞌ lueꞌ,
naꞌ quebe nu sequeꞌ bi gune lueꞌ laweꞌ da zaj zrále̱ꞌe̱ benneꞌ zaj naque̱ꞌ chiaꞌ lu xe̱zre nigá.
11 Caꞌan guca,
begáꞌana Pablo tu iza xugachaj lu xe̱zre Corinto,
dxusé̱dene̱ꞌ benneꞌ caꞌ dizraꞌ chee̱ Dios.
12 Lu zra caꞌ gate naca Galión benneꞌ xuꞌu lu ne̱ꞌe̱ xe̱zr la xu naꞌ naga nababa Acaya,
waláz chee̱ Roma,
naꞌ benneꞌ judío caꞌ guledábague̱ꞌ Pablo.
Beleché̱ꞌe̱ le̱ꞌ xuꞌu laweꞌ,
13 ne gulé̱ꞌe̱ benneꞌ xuꞌu lu ne̱ꞌe̱ xe̱zr la xu naꞌ:
―Benneꞌ nigá dxedé̱ꞌ dxegúꞌu xel-le̱ꞌ bénneache chee̱ xelúe láꞌane̱ꞌ Dios,
ne xelune̱ꞌ tu da dxedábaga da nadxixruj bea chee̱ntuꞌ.
14 Pablo ba zue̱ꞌ guchálaje̱ꞌ gate Galión guzre̱ꞌ benneꞌ judío caꞌ:
―Chela naca na chee̱ tu da dxuzúa chaláꞌala da bdxixruj bea César u chee̱ tu da zrinnaj zren,
naꞌ gun na ba xen xendaꞌ ca da dxennale leꞌe,
benneꞌ judío.
15 Laweꞌ da naca na chee̱ dízraꞌze,
ne chee̱ la tu benneꞌ,
ne chee̱ da nadxixruj bea na cheé̱zele,
le gucáꞌana chaweꞌ na léꞌequeze,
laweꞌ da quebe dxaca lazraꞌ nedaꞌ guchiꞌe̱ da dxaca chee̱ da caꞌ.
16 Nadxa bebéaje̱ꞌ benneꞌ caꞌ lu xuꞌu laweꞌ naꞌ.
17 Nadxa xúgute̱ benneꞌ griego gule̱l-le̱ꞌ Sóstenes,
benneꞌ xíchaje̱ chee̱ xudáudauꞌ chee̱ judío caꞌ,
ne belúꞌe̱ le̱ꞌ lau benneꞌ xuꞌu lu ne̱ꞌe̱ xe̱zr la xu naꞌ,
le̱ꞌ Galión.
Galión naꞌ quebe be̱ꞌ lazreꞌe chee̱ da naꞌ.
Pablo dxezrine̱ꞌ xe̱zre Antioquía, naꞌ dxezú lawe̱ꞌ zéaje̱ꞌ da guxunneꞌ lasa zéaje̱ꞌ we̱n zrin chee̱ Cristo
18 Pablo begáꞌane̱ꞌ xe̱zre naꞌ xezaneꞌ zra.
Gudé naꞌ bze̱ꞌ biche ljwézredxu caꞌ dizraꞌ,
naꞌ guxúꞌe̱ tu lu da dxedá laweꞌ nísadauꞌ zéaje̱ꞌ naga nababa Siria tu zren nen Priscila ne Aquilo.
Lu xe̱zre Cencrea nédxudxa gate za chuꞌe̱ lu da dxedá laweꞌ nísadauꞌ,
Pablo bzuate̱ꞌ xídeze xíchaje̱ꞌ,
da dxunna bea na zua tu da nache̱be lazre̱ꞌ gune̱ꞌ lau Dios.
19 Gate belezrine̱ꞌ lu xe̱zre Efeso,
Pablo bsane̱ꞌ Priscila ne Aquilo,
naꞌ guxíaje̱ꞌ lu xudáudauꞌ chee̱ judío caꞌ,
ne bchálajle̱ne̱ꞌ judío caꞌ zaj nazrague̱ꞌ naꞌ.
20 Benneꞌ caꞌ gulataꞌ xuene̱ꞌ le̱ꞌ xegáꞌanadxe̱ꞌ xetú chiꞌi,
naꞌ le̱ꞌ quebe guca lazre̱ꞌ.
21 Nadxa Pablo bze̱ꞌ benneꞌ caꞌ dizraꞌ,
dxenné̱ꞌ:
―Dxun na ba xen xezrinaꞌ suaꞌ Jerusalén chee̱ súaquezaꞌ lu laní da ba zaꞌ.
Weláꞌaquezaꞌ xedajnnáꞌa leꞌe che gunna Dios lataj.
Naꞌ guxúꞌe̱ lu da dxedá laweꞌ nísadauꞌ,
ne bezé̱ꞌe̱ Efeso naꞌ.
22 Gate bezrine̱ꞌ xe̱zre Cesarea,
Pablo guxíaje̱ꞌ Jerusalén xeajape̱ꞌ diuzre benneꞌ caꞌ dxeléajle̱ꞌe̱ chee̱ Jesús,
naꞌ gudé naꞌ guxíaje̱ꞌ xe̱zre Antioquía.
23 Ca gudé guzúe̱ꞌ naꞌ tu chiꞌi,
naꞌ bezé̱ꞌe̱ naꞌ,
gudée̱ꞌ tu tu xé̱zredu caꞌ zaj nababa Galacia,
ne xe̱zre caꞌ zaj nababa Frigia,
dxutipe̱ꞌ lazreꞌ benneꞌ caꞌ dxeléajle̱ꞌe̱ chee̱ Jesús.
Apolos dxuchálaje̱ꞌ dizraꞌ chee̱ Dios lu xe̱zre Efeso
24 Ca lu zra caꞌ tu benneꞌ judío le̱ꞌ Apolos bzrine̱ꞌ lu xe̱zre Efeso,
naque̱ꞌ benneꞌ xe̱zre Alejandría,
lu xu Egipto.
Naque̱ꞌ tu benneꞌ nupáꞌale̱ꞌe̱ xrtizre̱ꞌ,
ne núnbeale̱ꞌe̱ da naxúaj na lu xiche chee̱ Dios.
25 Naxéajniꞌile̱ꞌe̱ne̱ꞌ ca naca chee̱ Xránadxu,
ne dute̱ lázrdawe̱ꞌ dxuchálaje̱ꞌ,
dxusé̱dene̱ꞌ cáte̱ze naca chee̱ Jesús,
lácala dxusé̱dezene̱ꞌ xel-laꞌ dxuchúa nisa ca be̱n Juan.
26 Apolos guzú lawe̱ꞌ dxusé̱dene̱ꞌ benneꞌ caꞌ zaj zre̱ꞌe̱ xudáudauꞌ chee̱ judío caꞌ du lazre̱ꞌ.
Gate belén Priscila,
ne Aquilo chee̱ꞌ,
naꞌ guleché̱ꞌe̱ le̱ꞌ chaláꞌala,
ne buluzéajniꞌidxene̱ꞌ le̱ꞌ cáte̱ze naca dizraꞌ chee̱ Dios.
27 Ca gudé naꞌ,
gate guca lazreꞌ Apolos chéaje̱ꞌ naga nababa Acaya,
bi bíchedxu caꞌ bulutipe̱ꞌ lazre̱ꞌ,
ne buluzuaje̱ꞌ tu xiche chee̱ benneꞌ caꞌ dxeléajle̱ꞌe̱ chee̱ Jesús zaj zre̱ꞌe̱ xe̱zre caꞌ zaj nababa Acaya naꞌ chee̱ xelezíꞌ lu ne̱ꞌe̱ Apolos naꞌ.
Gate bzrin le̱ꞌ naga nababa Acaya,
gúcale̱le̱ꞌe̱ne̱ꞌ benneꞌ caꞌ,
naꞌ Dios be̱ꞌe̱ le̱ꞌ lataj guléajle̱ꞌe̱ chee̱ Jesús.
28 Apolos bléꞌene̱ꞌ lau xúgute̱ benneꞌ caꞌ ca dxeleque zréaje benneꞌ judío caꞌ,
ne bléꞌene̱ꞌ ne̱ chee̱ da naxúaj na lu xiche chee̱ Dios Jesús naqueꞌ Cristo,
Bénneaꞌ nasel-la Dios,
Bénneaꞌ dxelebeza judío caꞌ.