Benneꞌ zaj zre̱ꞌe̱ xe̱zre Tesalónica dxeledábague̱ꞌ Pablo
17
Nadxa Pablo ne Silas guledée̱ꞌ xe̱zre Anfípolis,
ne xe̱zre Apolonia,
naꞌ belezrine̱ꞌ xe̱zre Tesalónica,
naga zua tu xudauꞌ chee̱ judío caꞌ.
2 Pablo guxíaje̱ꞌ xudauꞌ naꞌ,
naꞌ ca dxúnqueze̱ꞌ bchálajle̱ne̱ꞌ benneꞌ caꞌ tu tu zra dxulupáꞌane̱ꞌ du chunna da gazre zra.
3 Ca da naxúaj na lu xiche chee̱ Dios,
bzéajniꞌine̱ꞌ le̱ꞌ be̱n na ba xen Cristo guzí guzaque̱ꞌ,
ne gutie̱ꞌ,
naꞌ ca gudé naꞌ be̱n na ba xen bebane̱ꞌ ládujla benneꞌ gate.
Naꞌ guzre̱ꞌ benneꞌ caꞌ:
―Jesús nigáqueze,
bénneaꞌ dxuzendaꞌ leꞌe chee̱ꞌ,
naque̱ꞌ Cristo,
Bénneaꞌ guche̱be lazreꞌ Dios sel-le̱ꞌ.
4 Nadxa bal-la benneꞌ judío caꞌ guléajle̱ꞌe̱ chee̱ Jesús,
ne gulaque̱ꞌ tuze Pablo ne Silas.
La gázqueze guléajle̱ benneꞌ zan benneꞌ griego,
ne nuꞌula zan zaj naque̱ꞌ nuꞌula blau.
5 Benneꞌ judío caꞌ,
benneꞌ quebe dxeléajle̱ꞌe̱ chee̱ Jesús gulaque̱ꞌ xa lazreꞌ chee̱ Pablo,
naꞌ buluchague̱ꞌ bal-la benneꞌ caꞌ dxelune̱ꞌ da cale̱la dxeledaze̱ꞌ,
ne bulutupa ljwezre̱ꞌ,
naꞌ buluzúe̱ꞌ ste̱be ca naca benneꞌ xe̱zre.
Guluꞌe̱ xadía lizre Jasón,
dxelexílaje̱ꞌ Pablo ne Silas,
chee̱ xelebéaje̱ꞌ le̱ꞌ,
ne xuludée̱ꞌ le̱ꞌ lu naꞌ benneꞌ xe̱zre caꞌ.
6 Gate quebe belexezrelne̱ꞌ Pablo ne Silas lu xuꞌu naꞌ,
nadxa beleché̱ꞌe̱ xadía Jasón ne xebal-la biche ljwézredxu caꞌ lau benneꞌ xuꞌu laweꞌ caꞌ chee̱ xe̱zre,
naꞌ dxelebezre xe̱ꞌe̱,
dxelenné̱ꞌ:
―Benneꞌ caꞌ,
benneꞌ ba belún zréajene̱ꞌ ca naca benneꞌ zaj zre̱ꞌe̱ xe̱zr la xu,
cáꞌanqueze ba belelé̱ꞌe̱ nigá.
7 Jasón nigá ba guluꞌe̱ benneꞌ caꞌ lizre̱ꞌ.
Ca naca benneꞌ caꞌ dxeledábague̱ꞌ da bdxixruj bea César laweꞌ da dxelenné̱ꞌ zua xetú wenná bea,
tu benneꞌ le̱ꞌ Jesús.
8 Gate belenne̱ꞌ da caní,
naꞌ benneꞌ xe̱zre caꞌ,
ne benneꞌ xuꞌu laweꞌ caꞌ gulezúe̱ꞌ ste̱be.
9 Jasón,
ne biche ljwézredxu caꞌ bulucáꞌane̱ꞌ dumí chee̱ gulezíꞌe̱ lataj,
naꞌ benneꞌ xuꞌu laweꞌ caꞌ bulusane̱ꞌ le̱ꞌ.
Pablo ne Silas dxelezrine̱ꞌ xe̱zre Berea
10 Nadxa biche ljwézredxu gulé̱ꞌe̱ Pablo ne Silas chee̱ xesíꞌaque̱ꞌ chizrela,
chee̱ chjaque̱ꞌ xe̱zre Berea.
Gate belezrine̱ꞌ naꞌ,
naꞌ belúꞌe̱ lu xudauꞌ chee̱ judío caꞌ.
11 Benneꞌ judío caní zaj nácadxe̱ꞌ zren lazreꞌ ca benneꞌ Tesalónica caꞌ laweꞌ da du lazre̱ꞌ gulezíꞌe̱ dizraꞌ chee̱ Dios,
naꞌ tu zra tu zra dxululabe̱ꞌ lu xiche chee̱ Dios chee̱ xuluxúe̱ꞌ che naca da li da dxelé̱ꞌe̱ le̱ꞌ.
12 Caꞌan guca,
benneꞌ zan benneꞌ judío caꞌ guléajle̱ꞌe̱ chee̱ Jesús,
ne cáꞌanqueze benneꞌ griego.
Benneꞌ zan guléajle̱ꞌe̱,
nuꞌula blau caꞌ,
ne benneꞌ biu caꞌ.
13 Gate benneꞌ judío caꞌ zaj zre̱ꞌe̱ xe̱zre Tesalónica guleque béꞌene̱ꞌ dxuchalaj Pablo dizraꞌ chee̱ Dios lu xe̱zre Berea,
naꞌ belezrine̱ꞌ naꞌ,
ne gulegúꞌu xel-le̱ꞌ bénneache chee̱ xeledábague̱ꞌ Pablo ne Silas.
14 Biche ljwézredxu caꞌ la gulesél-laꞌte̱ꞌ Pablo chéaje̱ꞌ dxuꞌa nísadauꞌ,
naꞌ Silas ne Timoteo belexegáꞌane̱ꞌ lu xe̱zre Berea.
15 Benneꞌ caꞌ zjácale̱ne̱ꞌ Pablo beleché̱ꞌe̱ le̱ꞌ lu xe̱zre Atenas.
Nadxa benneꞌ caꞌ belexezrine̱ꞌ lazrie̱ꞌ,
ne gulé̱ꞌe̱ Silas,
ne Timoteo chjácazegue̱ꞌ naga zua Pablo.
Da dxun Pablo lu xe̱zre Atenas
16 Dxácate̱ naꞌ Pablo dxebeze̱ꞌ Silas ne Timoteo naga zue̱ꞌ lu xe̱zre Atenas,
naꞌ guzúale̱ꞌe̱ ste̱be gate bléꞌene̱ꞌ ca naca xe̱zre naꞌ,
niꞌ naze nítale̱ꞌe̱ bedáuꞌ xiaj.
17 Chee̱ le̱ naꞌ bchálaje̱ꞌ lu xudauꞌ chee̱ judío caꞌ nen benneꞌ judío caꞌ,
ne xezícala benneꞌ caꞌ zjácale̱ne̱ꞌ da naca chee̱ Dios,
naꞌ tu zra tu zra bchálajle̱ne̱ꞌ benneꞌ caꞌ zaj zre̱ꞌe̱ laweꞌ xiꞌa.
18 Bal-la benneꞌ zjácale̱ne̱ꞌ ca naca da dxuluse̱de benneꞌ caꞌ zaj le̱ꞌ benneꞌ epicureo,
ne benneꞌ estoico gulezú lawe̱ꞌ dxuluchálajle̱ne̱ꞌ Pablo.
Bal-le̱ꞌ gulenné̱ꞌ:
―¿Bizra xe̱ga benneꞌ wechalaj nigá dxiꞌu?
Naꞌ xebal-le̱ꞌ gulenné̱ꞌ:
―Dxéquentuꞌ naque̱ꞌ benneꞌ dxuse dizraꞌ chee̱ dios zituꞌ caꞌ.
Caꞌan gulenné̱ꞌ laweꞌ da dxuchalaj Pablo dizraꞌ chaweꞌ ca naca chee̱ Jesús,
ne ca naca chee̱ xel-laꞌ dxexebán.
19 Nadxa guleché̱ꞌe̱ Pablo lu lataj nazí le na Areópago,
naga dxelezrágaqueze̱ꞌ bi xuluzén ljwezre̱ꞌ.
Naꞌ buluche̱be̱ꞌ Pablo:
―¿Waca guzénenuꞌ netuꞌ ca naca da cube nigá da dxusé̱denuꞌ bénneache?
20 Lueꞌ dxuchálajuꞌ dizraꞌ da quebe ne xénentuꞌ,
naꞌ dxaca lázrentuꞌ nézentuꞌ bi zéaje̱ ca naca da caní.
21 Caní gulenné̱ꞌ laweꞌ da dxuluzé̱ nágaze,
ne dxuluchálajze ca naca tu dizraꞌ cube xúgute̱ benneꞌ Atenas,
ne benneꞌ zituꞌ caꞌ zaj zre̱ꞌe̱ xe̱zre naꞌ.
22 Nadxa Pablo guzé̱ꞌ laduj benneꞌ caꞌ zaj zre̱ꞌe̱ Areópago naꞌ,
naꞌ guzre̱ꞌ le̱ꞌ:
―Leꞌe,
benneꞌ Atenas,
ca naca xúgute̱ da dxeléꞌedaꞌ,
dxuléꞌe na dxápale̱ꞌe̱le ba láꞌana dios chee̱le caꞌ,
23 laweꞌ da gate gudáꞌ nedaꞌ gunnáꞌa ca zaj naca xudauꞌ caꞌ naga dxue láꞌanale dios chee̱le caꞌ,
naꞌ bleꞌedaꞌ tu xudáudauꞌ naga naxúaj dizraꞌ caní:
Chee̱ Dios Quebe Nu Núnbea.
Naꞌa,
Dios naꞌ dxue láꞌanale leꞌe,
ne quebe núnbeale Le̱ꞌ,
chee̱ Dios naꞌ dxuchálajle̱naꞌ leꞌe.
24 ’Naque̱ꞌ Dios naꞌ be̱ne̱ꞌ xe̱zr la xu nigá,
ne xúgute̱ da de̱ lawe na.
Naque̱ꞌ Xrane xabáa,
ne Xrane xe̱zr la xu nigá.
Quebe zue̱ꞌ xudauꞌ da nun niꞌa naꞌ bénneache.
25 Quebe nachínene̱ꞌ bi da gaca xelún bénneache chee̱ Le̱ꞌ laweꞌ da dxunna Dios náꞌqueze xúgute̱dxu xel-laꞌ nabán,
ne beꞌ da dxecaꞌadxu,
ne xúgute̱ da de̱.
26 ’Tuze benneꞌ be̱ne̱ꞌ naque̱ꞌ xra xúgute̱ cueꞌ xe̱zr la xu caꞌ chee̱ che̱ꞌe̱ du gabíꞌi xe̱zr la xu,
naꞌ bléꞌene̱ꞌ zra,
ne lataj naga dxal-laꞌ xelezré̱ꞌe̱,
27 chee̱ xelexexílaje̱ꞌ Dios chee̱ ájala xelexezrelne̱ꞌ Le̱ꞌ lácala quebe xelúnbea xánnie̱ꞌ Le̱ꞌ,
san da li Dios quebe zue̱ꞌ zituꞌ naga zua tu tudxu dxiꞌu.
28 Ne̱ chee̱ Dios nigá naca bandxu,
ne dxedadxu,
ne zradxu.
Naca ca gulenná bal-la benneꞌ wila chee̱le,
gulenné̱ꞌ:
“Nácadxu xrtia Dios.”
29 Che nácadxu xrtia Dios,
quebe dxal-laꞌ guéquedxu naca Dios ca tu bedáuꞌ oro,
u tu bedáuꞌ plata,
u tu bedáuꞌ xiaj,
da zaj nun bénneache cáte̱ze dxululaba lázrequeze̱ꞌ.
30 Dios bzue̱ꞌ chaláꞌala da belún bénneache ca niꞌte̱ lu xel-laꞌ quebe zaj neze chee̱ꞌ,
san naꞌa dxenná béꞌene̱ꞌ xúgute̱ benneꞌ gátete̱ze zaj zre̱ꞌe̱ xelexebíꞌi lazre̱ꞌ.
31 Dios ba nuzúe̱ꞌ tu zra gate guchiꞌe̱ chee̱ xúgute̱ bénneache lu da xrlátaje chee̱ꞌ lu naꞌ tu benneꞌ ba gucáꞌa Le̱ꞌ,
naꞌ chee̱ da nigá bzue̱ꞌ tu da dxunna bea na gate bsebane̱ꞌ bénneaꞌ ládujla benneꞌ gate.
32 Gate benneꞌ caꞌ belenne̱ꞌ dizraꞌ nigá ca naca chee̱ tu benneꞌ bebane̱ꞌ ládujla benneꞌ gate,
naꞌ bal-le̱ꞌ belún le̱ꞌ chee̱ꞌ,
ne xebal-le̱ꞌ gulenné̱ꞌ:
―Waca guchálajle̱nuꞌ netuꞌ ca naca da nigá xetú zra.