6 Beꞌ Láꞌazxa quebe be̱ꞌe̱ benneꞌ gubáz caꞌ lataj xuluchálaje̱ꞌ dizraꞌ chee̱ Dios naga nababa Asia.

Chee̱ le̱ naꞌ guledée̱ꞌ naga nababa Frigia,

ne xe̱zre caꞌ zaj nababa Galacia.

7 Belezrine̱ꞌ naga nazraga xe̱zre caꞌ zaj nababa Misia.

Gulaca lazre̱ꞌ chjaque̱ꞌ naga nababa Bitinia,

san Beꞌ Láꞌazxa chee̱ Jesús quebe be̱ꞌe̱ le̱ꞌ lataj.

8 Nadxa guledée̱ꞌ naga nababa Misia,

naꞌ belezrine̱ꞌ xe̱zre Troas.

9 Lu xe̱zre naꞌ Pablo bléꞌene̱ꞌ tu da ba bleꞌe Dios le̱ꞌ chizrela,

bléꞌene̱ꞌ tu benneꞌ biu chee̱ ga nababa Macedonia,

ze̱ꞌ dxataꞌ xuene̱ꞌ Pablo,

dxenné̱ꞌ:

“Gudá Macedonia nigá,

gácale̱nuꞌ netuꞌ.”

10 Gate bleꞌe Pablo da nigá,

naꞌ benneꞌ caꞌ,

ne nedaꞌ,

Lucas,

la gudílajte̱ntuꞌ ájala guntuꞌ chee̱ chéajntuꞌ ga nababa Macedonia laweꞌ da gúquequezentuꞌ Dios dxenné̱ꞌ netuꞌ chee̱ cheajchálajle̱ntuꞌ benneꞌ caꞌ dizraꞌ chaweꞌ ca naca chee̱ Jesús.

11 Lu xe̱zre Troas naꞌ guxúꞌuntuꞌ tu lu da dxedá laweꞌ nísadauꞌ,

naꞌ guxéajntuꞌ tu xe̱zr la xu da naxechaj nísadauꞌ,

nazí le na Samotracia,

naꞌ zra xula bzrintuꞌ xe̱zre Neápolis.

12 Bezaꞌntuꞌ Neápolis,

naꞌ bzrintuꞌ xe̱zre Filipos,

da naca tu xe̱zre naga zaj zraꞌ benneꞌ Roma,

ne naca xe̱zre blau ga nababa Macedonia.

Lu xe̱zre naꞌ guzúantuꞌ tu chupa zra.

13 Gate naca zra dxulupáꞌana judío caꞌ,

naꞌ bdxúajntuꞌ dxuꞌa xe̱zre naꞌ,

ne bzrintuꞌ dxuꞌa xe̱gu naga zaj nabéaje̱ꞌ dxeajlechálajle̱ne̱ꞌ Dios.

Gudxeꞌntuꞌ naꞌ ne bchálajle̱ntuꞌ nuꞌula caꞌ zaj nazrague̱ꞌ naꞌ ca naca dizraꞌ chaweꞌ ca naca chee̱ Jesús.

14 Tu nuꞌula caꞌ le̱ꞌ Lidia,

naque̱ꞌ nuꞌula chee̱ xe̱zre Tiatira,

nuꞌula dxute̱ꞌ ladxeꞌ zaca da naca bzawe.

Nuꞌula nigá zéajle̱ne̱ꞌ da naca chee̱ Dios,

naꞌ benne̱ꞌ chee̱ntuꞌ,

naꞌ Xránadxu bzaniꞌe̱ lázrdawe̱ꞌ chee̱ guzíꞌ lu ne̱ꞌe̱ da dxuchalaj Pablo.

15 Naꞌ bdxue nisa nuꞌula nigá nen benneꞌ zaj zre̱ꞌe̱ lizre̱ꞌ.

Gudé naꞌ gutaꞌ xuene̱ꞌ netuꞌ,

gunné̱ꞌ:

―Che leꞌe dxéquele da li dxeajlí lazraꞌ Xránadxu,

le da súale lizraꞌ.

Naꞌ be̱ne̱ꞌ ba xuzre begáꞌanantuꞌ naꞌ.

16 Tu zra gate zéajntuꞌ naga zeajchálajle̱ntuꞌ Dios,

bezrágantuꞌ tu bi nuꞌula cuideꞌ xuꞌubeꞌ beꞌ xriwe̱ꞌ,

ne dxenné̱ xaꞌabeꞌ ne̱ chee̱ beꞌ xriwe̱ꞌ naꞌ.

Bi nuꞌula nigá xúꞌubeꞌ lu naꞌ benneꞌ caꞌ dxuluchínene̱ꞌ le̱beꞌ xadía,

naꞌ xránabeꞌ caꞌ dxelezíle̱ꞌe̱ dumí da dxezibeꞌ,

dxenné̱ xaꞌabeꞌ.

17 Bi nuꞌula nigá guzú laubeꞌ zaꞌbeꞌ cuzru Pablo ne netuꞌ,

dxennabeꞌ zizraj:

―Benneꞌ caní dxelune̱ꞌ zrin chee̱ Dios szrente̱,

ne dxuluzenne̱ꞌ leꞌe ájala gunle lale.

18 Zaneꞌ zra be̱nbeꞌ caní cadxa guque Pablo ze̱de,

naꞌ bexéchaje̱ꞌ,

ne guzre̱ꞌ beꞌ xriwe̱ꞌ da xuꞌubeꞌ:

―Lu La Jesucristo dxenná beꞌedaꞌ lueꞌ xedxúajuꞌ lu be̱l-laꞌ dxen chee̱ bi nuꞌula nigá.

Naꞌ beꞌ xriwe̱ꞌ naꞌ bedxúajte̱ na.

19 Gate benneꞌ caꞌ dxuluchínene̱ꞌ-beꞌ xadía guleque béꞌene̱ꞌ québedxa bi xelexezíꞌe̱ ne̱ chee̱beꞌ,

naꞌ gule̱l-le̱ꞌ Pablo ne Silas,

naꞌ guleché̱ꞌe̱ benneꞌ caní lau benneꞌ xuꞌu laweꞌ naga zua chaleꞌaj xuꞌu laweꞌ blau.

20 Naꞌ buluzúe̱ꞌ benneꞌ caní lau benneꞌ xuꞌu laweꞌ caꞌ,

naꞌ gulenné̱ꞌ:

―Benneꞌ caní zaj naque̱ꞌ judío ne dxelún zréajene̱ꞌ benneꞌ zaj zre̱ꞌe̱ xe̱zre chee̱dxu,

21 ne dxulusé̱dene̱ꞌ ca naca da zjácale̱ne̱ꞌ,

da quebe gaca sidxu,

ne quebe gaca gundxu na laweꞌ da nábabadxu Roma.

22 Nadxa benneꞌ zaj zre̱ꞌe̱ xe̱zre naꞌ guledábague̱ꞌ Pablo ne Silas,

naꞌ benneꞌ xuꞌu laweꞌ naꞌ gulenná beꞌe xeleléchaje̱ꞌ zra lana Pablo ne Silas,

ne xeluꞌe̱ le̱ꞌ zrise.

23 Ca gudé belúele̱ꞌe̱ le̱ꞌ,

naꞌ buluzré̱ꞌe̱ le̱ꞌ lizre xia,

ne gulenná béꞌene̱ꞌ benneꞌ xuꞌu lu ne̱ꞌe̱ lizre xia naꞌ guxúe xánnie̱ꞌ benneꞌ caꞌ.

24 Gate benne̱ꞌ ca gulenná beꞌe̱,

naꞌ bzre̱ꞌe̱ le̱ꞌ zaneꞌ lézxudxa ne bzre̱ꞌe̱ niꞌa benneꞌ caꞌ lu xe̱dxu chee̱ cuaga da dxuxru na niꞌe̱.

25 Gate gula dxe̱la Pablo ne Silas dxuluchálajle̱ne̱ꞌ Dios,

ne dxelul-le̱ꞌ da dxelúe láꞌane̱ꞌ Dios,

naꞌ xezícadxa benneꞌ zaj zre̱ꞌe̱ lizre xia dxuluzé̱ nague̱ꞌ chee̱ꞌ.

26 Laꞌ naꞌte̱ guzrúꞌle̱ꞌe̱ da bxrize na ca naca lizre xia,

naꞌ belexalaj xúgute̱ dxa xuꞌu caꞌ,

ne belexexe̱zre du xia da zaj nadxéaj niꞌa xúgute̱ benneꞌ caꞌ zaj zre̱ꞌe̱ lizre xia.

27 Naꞌ benneꞌ xuꞌu lu ne̱ꞌe̱ lizre xia naꞌ bebane̱ꞌ,

ne gate bléꞌene̱ꞌ zaj naxalaj dxa xuꞌu caꞌ chee̱ lizre xia,

gúlaje̱ꞌ xia chee̱ xute cuine̱ꞌ laweꞌ da dxéquene̱ꞌ ba buluxuzrúnnaj benneꞌ caꞌ zaj zre̱ꞌe lizre xia.

28 Pablo gudxezre xe̱ꞌe̱,

guzre̱ꞌ le̱ꞌ:

―Quebe bi gune cuinuꞌ.

Xúgute̱ntuꞌ zúantuꞌ nigá.

29 Nadxa benneꞌ naꞌ xuꞌu lu ne̱ꞌe̱ lizre xia gunabe̱ꞌ tu xiꞌ,

naꞌ guxúꞌu chégüe̱ꞌ,

dxezrízequeze̱ꞌ xel-laꞌ dxezrebe,

naꞌ bzu zribe̱ꞌ lau Pablo ne Silas.

30 Nadxa guléaje̱ꞌ benneꞌ caꞌ ne bche̱be̱ꞌ le̱ꞌ:

―Leꞌe,

benneꞌ,

¿bizra dxal-laꞌ gunaꞌ chee̱ laꞌ?

31 Benneꞌ caꞌ belexeche̱be̱ꞌ:

―Guxéajle̱ chee̱ Xránadxu Jesucristo,

naꞌ lauꞌ,

ne cáꞌanqueze benneꞌ zaj zre̱ꞌe lizruꞌ.

32 Naꞌ buluchálajle̱ne̱ꞌ le̱ꞌ,

ne xúgute̱ benneꞌ zaj zre̱ꞌe̱ lizre̱ꞌ ca naca dizraꞌ chee̱ Xránadxu.

33 Lu xe̱la náꞌqueze benneꞌ naꞌ xuꞌu lu ne̱ꞌe̱ lizre xia gudibe̱ꞌ we̱ꞌ chee̱ Pablo ne Silas,

naꞌ ca gudé naꞌ,

le̱ꞌ ne xúgute̱ benneꞌ zaj zre̱ꞌe̱ lizre̱ꞌ guledxúe̱ꞌ nisa.

34 Ca gudé naꞌ beche̱ꞌe̱ Pablo ne Silas lizre̱ꞌ,

naꞌ bnézruje̱ꞌ da gulawe̱ꞌ,

naꞌ le̱ꞌ ne benneꞌ zaj zre̱ꞌe̱ lizre̱ꞌ gulebéle̱ꞌe̱ne̱ꞌ laweꞌ da ba guléajle̱ꞌe̱ chee̱ Dios.

35 Che zílala benneꞌ xuꞌu laweꞌ caꞌ gulesel-le̱ꞌ bi xraꞌaga lau benneꞌ naꞌ xuꞌu lu ne̱ꞌe̱ lizre xia,

ne gulenná béꞌene̱ꞌ le̱ꞌ gusane̱ꞌ Pablo ne Silas.

36 Nadxa benneꞌ naꞌ xuꞌu lu ne̱ꞌe̱ lizre xia guzre̱ꞌ Pablo:

―Benneꞌ xuꞌu laweꞌ caꞌ gulenná béꞌene̱ꞌ nedaꞌ gusanaꞌ leꞌe.

Naꞌa waca xedxúajle du lázrele.

37 Pablo guzre̱ꞌ bi xraꞌaga caꞌ:

―Netuꞌ nabábantuꞌ Roma,

naꞌ belúꞌe̱ netuꞌ láwela benneꞌ xe̱zre caꞌ,

ne quebe ne xuluchíꞌe̱ chee̱ntuꞌ,

naꞌ buluzré̱ꞌe̱ netuꞌ lizre xia.

Naꞌa ¿dxeléquene̱ꞌ xulusane̱ꞌ netuꞌ bagácheze?

Quebe gaca.

Xelída lé̱queze̱ꞌ xelexebéaje̱ꞌ netuꞌ.

38 Bi xraꞌaga caꞌ xeajlexezénnebeꞌ benneꞌ xuꞌu laweꞌ caꞌ,

naꞌ benneꞌ caní belezrebe̱ꞌ gate guleque béꞌene̱ꞌ Pablo ne Silas zaj nababe̱ꞌ Roma.

39 Naꞌ xjaque̱ꞌ lizre xia naꞌ,

ne gulenabe̱ꞌ Pablo ne Silas xelezí zrene̱ꞌ chee̱ꞌ.

Nadxa belexebéaje̱ꞌ le̱ꞌ,

ne gulataꞌ xuene̱ꞌ le̱ꞌ xelexedxúaje̱ꞌ xe̱zre naꞌ.

40 Gate Pablo ne Silas belexedxúaje̱ꞌ lizre xia naꞌ,

naꞌ xjaque̱ꞌ lizre Lidia,

naꞌ ca gudé buluchálajle̱ne̱ꞌ biche ljwézredxu caꞌ,

ne bulutipe̱ꞌ lazre̱ꞌ,

naꞌ besiáꞌque̱ꞌ.