Gubáz caꞌ chee̱ Jesús dxelexezrague̱ꞌ Jerusalén
15
Ca lu zra caꞌ,
bal-la benneꞌ gusiáꞌque̱ꞌ xe̱zre caꞌ zaj nababa Judea,
ne belezrine̱ꞌ xe̱zre Antioquía naꞌ,
naꞌ gulezú lawe̱ꞌ dxelé̱ꞌe̱ biche ljwézredxu caꞌ dxal-laꞌ chugu lateꞌ weaj be̱laꞌ chee̱ be̱l-laꞌ dxen chee̱ benneꞌ biu caꞌ chee̱ xelelé̱ꞌ,
ca gunná bea Moisés.
2 Pablo ne Bernabé bulutíl-lale̱ꞌe̱ le̱ꞌ dizraꞌ,
naꞌ naga xeajcheꞌte̱ na,
biche ljwézredxu caꞌ buluzúe̱ꞌ Pablo,
ne Bernabé,
ne xezícala benneꞌ caꞌ chee̱ chjaque̱ꞌ Jerusalén chee̱ cheajlechálaje̱ꞌ chee̱ da nigá nen benneꞌ gubáz caꞌ,
ne benneꞌ gula caꞌ chee̱ cueꞌ benneꞌ dxeléajle̱ꞌe̱ chee̱ Jesús zaj zre̱ꞌe̱ Jerusalén.
3 Benneꞌ dxeléajle̱ꞌe̱ chee̱ Jesús,
benneꞌ zaj zre̱ꞌe̱ Antioquía,
belexeguꞌe̱ benneꞌ caní neza,
naꞌ belexedée̱ꞌ xe̱zre caꞌ zaj nababa Fenicia,
ne xe̱zre caꞌ zaj nababa Samaria,
naꞌ dxuluzenne̱ꞌ benneꞌ xé̱zredu caꞌ ca belún benneꞌ quebe zaj naque̱ꞌ judío,
ba belexexaque̱ꞌ chee̱ Dios,
naꞌ xúgute̱ biche ljwézredxu belebéle̱ꞌe̱ne̱ꞌ gate belenne̱ꞌ da nigá.
4 Gate Pablo ne Bernabé belexezrine̱ꞌ Jerusalén,
naꞌ benneꞌ caꞌ dxeléajle̱ꞌe̱ chee̱ Jesús ne benneꞌ gubáz caꞌ,
ne benneꞌ gula caꞌ gulezíꞌ lu ne̱ꞌe̱ le̱ꞌ,
naꞌ Pablo ne Bernabé buluzenne̱ꞌ le̱ꞌ ca naca da be̱n Dios lu naꞌ le̱ꞌ.
5 Bal-la benneꞌ fariseo caꞌ,
benneꞌ ba guléajle̱ꞌe̱ chee̱ Jesús,
gulezé̱ꞌ gulenné̱ꞌ:
―Dxun na ba xen chugu lateꞌ weaj be̱laꞌ chee̱ be̱l-laꞌ dxen chee̱ benneꞌ biu caꞌ,
benneꞌ ba guléajle̱ꞌe̱ chee̱ Jesús,
benneꞌ quebe zaj naque̱ꞌ judío,
ne nna beꞌedxu le̱ꞌ xuluzúe̱ꞌ dizraꞌ da bdxixruj beꞌe Moisés.
6 Nadxa belezraga benneꞌ gubáz caꞌ ne benneꞌ gula caꞌ,
benneꞌ dxeléajle̱ꞌe̱ chee̱ Cristo,
chee̱ xulucáꞌana chawe̱ꞌ da naꞌ dxaca.
7 Ca gudé buluchálajle̱ ljwezre̱ꞌ chee̱ da nigá,
naꞌ Pedro guxase̱ꞌ,
ne guzre̱ꞌ benneꞌ caꞌ:
―Biche ljwezraꞌ,
nézquezle leꞌe Dios guqué̱ꞌe̱ nedaꞌ nédxute̱ ládujla leꞌe chee̱ guzendaꞌ benneꞌ quebe zaj naque̱ꞌ judío dizraꞌ chaweꞌ ca naca chee̱ Jesús,
chee̱ xeléajle̱ benneꞌ caꞌ chee̱ Le̱ꞌ.
8 Dios nézene̱ꞌ ca naca da xuꞌu lu xichaj lázxdau bénneache,
naꞌ bléꞌene̱ꞌ dxezíꞌ lu ne̱ꞌe̱ benneꞌ caꞌ,
laweꞌ da bnézruje̱ꞌ benneꞌ caꞌ Beꞌ Láꞌazxa ca be̱ne̱ꞌ chee̱dxu dxiꞌu.
9 Dios quebe dxuché̱ꞌe̱ ca zríꞌine̱ꞌ tudxu xetudxu laweꞌ da bcaꞌana cháwequeze̱ꞌ lázxdau benneꞌ caꞌ guleajlí lazre̱ꞌ Jesús.
10 Naꞌa,
¿bizr chee̱ naꞌ dxaca lázrele leꞌe guchale ca da ba be̱n Dios,
dxuzúale tu xuaꞌ laweꞌ benneꞌ caꞌ dxeléajle̱ꞌe̱ chee̱ Jesús,
da quebe gaca gúadxu dxiꞌu,
ne quebe guca xelúa xra xrtáudxu na?
11 Naꞌa,
dxéajle̱dxu dxiꞌu bache naladxu ne̱ chee̱ xel-laꞌ zriꞌi lazreꞌ chee̱ Xránadxu Jesús,
ne cáꞌanqueze zaj nalá benneꞌ caꞌ.
12 Nadxa xúgute̱ꞌ gulezúa zrie̱ꞌ,
ne buluzé̱ nague̱ꞌ dxácate̱ dxuchalaj Pablo ne Bernabé ca naca da be̱n Dios,
be̱ne̱ꞌ da zan da dxelunna bea na naca li xrtizre̱ꞌ nen xel-laꞌ waca caꞌ da za xabáa,
da caꞌ be̱ne̱ꞌ lu naꞌ Pablo ne Bernabé láwela benneꞌ caꞌ quebe zaj naque̱ꞌ judío.
13 Gate bexuzre buluchálaje̱ꞌ,
naꞌ gunná Jacobo:
―Biche ljwezraꞌ,
le xene chiaꞌ.
14 Simón Pedro bzenne̱ꞌ dxiꞌu ca be̱n Dios,
be̱ꞌe̱ lataj benneꞌ caꞌ quebe zaj naca judío xelexexaque̱ꞌ chee̱ꞌ da nedxu lasa,
bequé̱ꞌe̱ ládujla benneꞌ caꞌ bénneache xelexexaque̱ꞌ chee̱ꞌ.
15 Da naꞌ guca naca na tuze nen da buluzúaj benneꞌ caꞌ buluchálaje̱ꞌ waláz chee̱ Dios,
da naꞌ naxúaj na lu xiche chee̱ Dios,
dxenné̱ꞌ:
16 Te nigá xeláꞌa
naꞌ xechisaꞌ ca naca lizre David da nazreꞌe.
Gucáꞌana chawaꞌ da nagáꞌana chee̱ na,
naꞌ xechísaquezaꞌ na,
17 chee̱ xelexílaj xúgute̱ benneꞌ xezica caꞌ Xrane̱ꞌ Dios,
ne cáꞌanqueze xelún xúgute̱ benneꞌ zaj zraꞌ xe̱zr la xu caꞌ,
benneꞌ caꞌ xelenne̱ꞌ chee̱ Laꞌ nedaꞌ.
18 Caꞌ dxenná Xránadxu,
bléꞌene̱ꞌ da nigá nédxudaute̱.
19 ’Chee̱ le̱ naꞌ dxapaꞌ leꞌe quebe dxal-laꞌ gunle ze̱de benneꞌ quebe zaj naque̱ꞌ judío,
benneꞌ caꞌ dxelexexaque̱ꞌ chee̱ Dios.
20 Dxal-laꞌ guzúajntuꞌ chee̱ benneꞌ caꞌ dxal-laꞌ xulusane̱ꞌ da naca chee̱ bedáuꞌ xaga caꞌ u bedáuꞌ xiaj,
ne quebe dxal-laꞌ xelune̱ꞌ dul-la chee̱ da dxucáꞌana sban bénneache,
ne quebe dxal-laꞌ xelawe̱ꞌ be̱laꞌ chee̱ be̱ xixreꞌ,
be̱ quebe bdxuaj dxen,
ne quebe dxal-laꞌ xelawe̱ꞌ dxen chee̱baꞌ.
21 Caní dxal-laꞌ xelune̱ꞌ laweꞌ da ca niꞌi zaj zraꞌ benneꞌ tu tu xe̱zre,
benneꞌ dxuluzenne̱ꞌ bénneache ca naca da bdxixruj bea Moisés,
da naꞌ dxululabe̱ꞌ lu xudauꞌ caꞌ chee̱ benneꞌ judío caꞌ tu tu zra caꞌ dxulupáꞌane̱ꞌ.
22 Nadxa benneꞌ gubáz caꞌ,
ne benneꞌ gula caꞌ,
ne xúgute̱ benneꞌ dxeléajle̱ꞌe̱ chee̱ Jesús belune̱ꞌ tuze dizraꞌ xelequé̱ꞌe̱ bal-la benneꞌ caꞌ ládujla le̱ꞌ ne xelesel-le̱ꞌ le̱ꞌ xe̱zre Antioquía nen Pablo,
ne Bernabé.
Belequé̱ꞌe̱ Judas,
bénneaꞌ lé̱queze̱ꞌ Barsabás,
ne Silas.
Chupa benneꞌ caní zaj naque̱ꞌ benneꞌ blau ládujla biche ljwézredxu caꞌ.
23 Bulugüé̱ꞌe̱ benneꞌ caꞌ tu xiche da dxenná na:
“Netuꞌ,
benneꞌ gubáz zrantuꞌ nigá,
ne benneꞌ gula zrantuꞌ nigá,
ne biche ljwézrele zrantuꞌ nigá,
dxugápantuꞌ leꞌe diuzre,
biche ljwézrentuꞌ quebe nácale judío,
zrale xe̱zre Antioquía,
ne leꞌe zrale xe̱zre caꞌ zaj nababa Siria,
ne xe̱zre caꞌ zaj nababa Cilicia.
24 Ba bénentuꞌ bal-la benneꞌ ba besiáꞌque̱ꞌ nigá,
ne quebe nasél-lantuꞌ netuꞌ le̱ꞌ,
naꞌ belune̱ꞌ leꞌe ze̱de nen dizraꞌ da buluchálaje̱ꞌ,
ne belún zréajene̱ꞌ leꞌe,
dxelenné̱ꞌ dxal-laꞌ chugu lateꞌ weaj be̱laꞌ chee̱ be̱l-laꞌ dxen chee̱le,
benneꞌ biu caꞌ,
ne chéajle̱le ca naca da bdxixruj beꞌe Moisés.
25 Chee̱ le̱ naꞌ dxéquentuꞌ naca xrlátaje cáꞌantuꞌ bal-la benneꞌ ládujla netuꞌ chee̱ xelelé̱ꞌe̱ xedajlenné̱ꞌe̱ leꞌe nen biche ljwézredxu Bernabé ne Pablo,
benneꞌ caꞌ nazríꞌi lázrele̱ꞌe̱ntuꞌ.
26 Benneꞌ caní belune̱ꞌ zrin chee̱ Xránadxu Jesucristo,
xjaque̱ꞌ lu da ste̱be naga gulaca lazreꞌ bénneache xelútie̱ꞌ le̱ꞌ.
27 Caꞌ naca na,
dxesél-lantuꞌ naga zúale Judas ne Silas,
naꞌ benneꞌ caní xuluchálajle̱ne̱ꞌ leꞌe ca naca chee̱ da nigá.
28 Guque Beꞌ Láꞌazxa xrlátaje,
ne cáꞌanqueze netuꞌ gúquentuꞌ xrlátaje quebe bi xuaꞌ guzúantuꞌ laweꞌ leꞌe,
san da canize dxun na ba xen gunle.
29 Dxal-laꞌ gusanle da naca chee̱ bedáuꞌ xaga,
ne bedáuꞌ xiaj caꞌ,
ne quebe dxal-laꞌ gunle dul-la chee̱ da dxucáꞌana sban bénneache,
ne quebe dxal-laꞌ gágule be̱laꞌ chee̱ be̱ xixreꞌ,
be̱ quebe bdxuaj dxen,
ne quebe dxal-laꞌ gágule dxen chee̱baꞌ.
Che gunle ca naca da nadxixruj bea caní,
gunle xrlátaje.
Dxenábantuꞌ lau Dios gaca chaweꞌ chee̱le.”
30 Nadxa benneꞌ caꞌ gulesel-le̱ꞌ xjaque̱ꞌ xe̱zre Antioquía.
Naꞌ buluchague̱ꞌ benneꞌ caꞌ zaj naque̱ꞌ chee̱ Dios,
ne bulunézruje̱ꞌ le̱ꞌ xiche naꞌ.
31 Gate biche ljwézredxu caꞌ bululabe̱ꞌ na,
naꞌ gulebéle̱ꞌe̱ne̱ꞌ laweꞌ da dxue zren na le̱ꞌ.
32 Judas ne Silas zaj naque̱ꞌ benneꞌ dxelenné̱ꞌ waláz chee̱ Dios.
Chee̱ le̱ naꞌ buluchálajle̱ne̱ꞌ biche ljwézredxu caꞌ,
belúe zrene̱ꞌ le̱ꞌ,
ne bulutipe̱ꞌ lazreꞌ le̱ꞌ.
33 Gate gudé guca tu chiꞌi zaj zre̱ꞌe̱ naꞌ,
naꞌ benneꞌ bíchedxu caꞌ buluzé̱ꞌ benneꞌ caꞌ dizraꞌ,
ne gulenabe̱ꞌ Dios sua xel-laꞌ dxebeza zri lazreꞌ nen benneꞌ caꞌ,
chee̱ xesíꞌaque̱ꞌ xelexezrine̱ꞌ naga zaj zraꞌ benneꞌ caꞌ gulesel-le̱ꞌ le̱ꞌ.
34 Silas gúquene̱ꞌ xrlátaje xegáꞌane̱ꞌ naꞌ.
35 Cáꞌanqueze Pablo,
ne Bernabé belexegáꞌane̱ꞌ lu xe̱zre Antioquía,
naꞌ tu zren nen benneꞌ zandxa gulezúe̱ꞌ dxulusé̱dene̱ꞌ bénneache,
ne dxuluchálaje̱ꞌ ca naca dizraꞌ chee̱ Xránadxu.
Dxezú lau Pablo zéaje̱ꞌ zituꞌ da gudxupeꞌ lasa guchálaje̱ꞌ chee̱ Jesús
36 Ca gudé naꞌ,
Pablo guzre̱ꞌ Bernabé:
―Xuꞌu xecha lasa cheajnnadxu biche ljwézredxu caꞌ zaj zre̱ꞌe̱ xúgute̱ xe̱zre caꞌ naga xeajchálajdxu dizraꞌ chee̱ Xránadxu,
chee̱ cheajnnadxu aja dxaca zaj zre̱ꞌe̱.
37 Bernabé guca lazre̱ꞌ che̱ꞌe̱ Juan nen le̱ꞌ,
bi naꞌ lé̱quezebeꞌ Marcos,
38 san Pablo quebe guxáza lazre̱ꞌ che̱ꞌe̱-beꞌ laweꞌ da bsanbeꞌ benneꞌ caꞌ gate zaj zre̱ꞌe̱ xe̱zre caꞌ zaj nababa Panfilia,
ne québedxa guxíajle̱beꞌ le̱ꞌ lu zrin chee̱ Xránadxu.
39 Naꞌ Pablo,
ne Bernabé bulutil-la ljwezre̱ꞌ dizraꞌ.
Caꞌan guca,
belexelaꞌa cha chee̱ꞌ.
Bernabé guché̱ꞌe̱ Marcos,
naꞌ guluꞌe̱ tu lu da dxedá laweꞌ nísadauꞌ,
naꞌ xjaque̱ꞌ Chipre.
40 Naꞌ Pablo guqué̱ꞌe̱ Silas,
naꞌ ca gudé biche ljwézredxu caꞌ belegüe̱ꞌe̱ Pablo ne Silas lu naꞌ Xránadxu chee̱ gune̱ꞌ da chaweꞌ chee̱ benneꞌ caꞌ,
41 naꞌ gusiáꞌque̱ꞌ,
ne guledée̱ꞌ xe̱zre caꞌ zaj nababa Siria,
ne xe̱zre caꞌ zaj nababa Cilicia,
naꞌ bulutipe̱ꞌ lazreꞌ bi bíchedxu caꞌ.