Da belún Pablo ne Bernabé lu xe̱zre Iconio
14
Gate belezrin Pablo ne Bernabé xe̱zre Iconio,
naꞌ belúꞌe̱ tu zrente̱ lu xudauꞌ chee̱ judío caꞌ,
naꞌ ca buluchálaje̱ꞌ dizraꞌ chee̱ Dios,
benneꞌ zante̱ guléajle̱ꞌe̱ chee̱ Jesús,
benneꞌ judío caꞌ,
ne benneꞌ quebe zaj naque̱ꞌ judío.
2 Nadxa benneꞌ judío caꞌ,
benneꞌ quebe dxeléajle̱ꞌe̱ chee̱ Jesús belegúꞌu xel-le̱ꞌ benneꞌ quebe zaj naque̱ꞌ judío chee̱ xelecuídene̱ꞌ biche ljwézredxu caꞌ.
3 Lácala belune̱ꞌ caní,
benneꞌ gubáz caꞌ gulezúaqueze̱ꞌ naꞌ zaneꞌ zra,
ne du lazre̱ꞌ buluchálaje̱ꞌ dizraꞌ chee̱ Dios,
dxuluxrén lazre̱ꞌ Xránadxu,
naꞌ Xránadxu bzua chúchue̱ꞌ ca da dxelenná benneꞌ gubáz caꞌ ca naca xel-laꞌ zriꞌi lazreꞌ chee̱ Dios,
naꞌ Le̱ꞌ bnézruje̱ꞌ gubáz caꞌ xel-laꞌ dxenná bea xelune̱ꞌ xel-laꞌ waca caꞌ chee̱ xabáa ne da dxelunna bea na naca da li da dxelenné̱ꞌ.
4 Benneꞌ caꞌ zaj zre̱ꞌe̱ xe̱zre naꞌ gulaque̱ꞌ chupa laꞌa.
Bal-le̱ꞌ beledé̱ꞌe̱ judío caꞌ,
naꞌ xebal-le̱ꞌ beledé̱ꞌe̱ gubáz caꞌ chee̱ Jesús.
5 Nadxa benneꞌ judío caꞌ,
ne benneꞌ quebe zaj naque̱ꞌ judío belune̱ꞌ tuze dizraꞌ nen benneꞌ xuꞌu laweꞌ caꞌ chee̱ gulenné̱ꞌ schanniꞌ chee̱ benneꞌ gubáz caꞌ,
naꞌ gulaca lazre̱ꞌ xuluzríe̱ꞌ le̱ꞌ xiaj.
6 Pablo ne Bernabé,
gate belenne̱ꞌ caꞌ,
buluzrúnnaje̱ꞌ zjaque̱ꞌ naga zaj dxeꞌ xe̱zre Listra,
ne xe̱zre Derbe,
da zaj nababa Licaonia,
naꞌ guledée̱ꞌ ca naca xé̱zredu caꞌ chee̱ xe̱zre caꞌ zaj nababa naꞌ,
7 naꞌ buluchálaje̱ꞌ naꞌ ca naca dizraꞌ chaweꞌ chee̱ Jesús.
Dxuluzríe̱ꞌ Pablo xiaj lu xe̱zre Listra
8 Lu xe̱zre Listra zua tu benneꞌ nazrinnaj niꞌe̱.
Dxeꞌe̱ naꞌ laweꞌ da gúlaje̱ꞌ nazrinnaj niꞌe̱,
ne quebe dxácaqueze se̱ꞌe̱.
9 Benneꞌ nigá dxenne̱ꞌ da dxuchalaj Pablo,
naꞌ Pablo gunné̱ꞌe̱ benneꞌ zrinnaj naꞌ,
naꞌ guque béꞌene̱ꞌ nape̱ꞌ xel-laꞌ dxeajlí lazreꞌ chee̱ xexaque̱ꞌ.
10 Nadxa Pablo gunné̱ꞌ zizraj:
―Guzé̱ niꞌu.
Benneꞌ naꞌ guxase̱ꞌ guze̱te̱ꞌ,
naꞌ guzú lawe̱ꞌ dxedé̱ꞌ.
11 Gate beleléꞌe benneꞌ caꞌ da be̱n Pablo,
naꞌ gulezú lawe̱ꞌ dxelenné̱ꞌ zizraj nen dizraꞌ walazreꞌ chee̱ benneꞌ Licaonia,
dxelenné̱ꞌ:
―Dios caꞌ zaj naca ca bénneache ba belelé̱ꞌe̱ naga zúadxu.
12 Dxelenné̱ꞌ naca Bernabé dios Júpiter,
ne naca Pablo dios Mercurio laweꞌ da dxuchálajqueze Pablo.
13 Naꞌ bxruze chee̱ dios Júpiter,
zua xudauꞌ chee̱ na ca dxúꞌudxu xe̱zre naꞌ,
guché̱ꞌe̱ be̱zre caꞌ ne xiaj zaj nuzé̱ꞌe̱ na du,
naꞌ bxruze naꞌ,
ne benneꞌ zan caꞌ gulaca lazre̱ꞌ xuluxucáꞌana szrene̱ꞌ benneꞌ gubáz caꞌ,
ne xelútie̱ꞌ be̱zr caꞌ lau benneꞌ gubáz caꞌ ca dxelúnqueze benneꞌ xe̱zre Listra naꞌ chee̱ dios chee̱ꞌ.
14 Gate guleque beꞌe Bernabé ne Pablo,
benneꞌ gubáz caꞌ,
naꞌ gulecheze̱ꞌ zra lane̱ꞌ da dxuléꞌe na dxelezrebe̱ꞌ bi gun Dios,
naꞌ guluꞌe̱ láwela benneꞌ caꞌ,
dxelenné̱ꞌ zizraj:
15 ―Leꞌe,
benneꞌ,
¿bizr chee̱ naꞌ dxunle da nigá?
Netuꞌ nácantuꞌ bénneache ca léꞌequeze,
ne zaꞌntuꞌ nigá chee̱ xe̱ntuꞌ leꞌe dxal-laꞌ gusanle québedxa gunle da caní da quebe bi zaca na,
ne chéajle̱le chee̱ Dios ban,
Bénneaꞌ be̱ne̱ꞌ xabáa ne xe̱zr la xu,
ne nísadauꞌ,
ne xúgute̱ da de̱ luꞌule na.
16 Lu iza da ba guledé Dios be̱ꞌe̱ lataj xúgute̱ bénneache guledé̱ꞌ lu xrneza cha chee̱ꞌ,
naꞌ belune̱ꞌ ca da gulaca lazre̱ꞌ,
17 lácala bléꞌequezne̱ꞌ benneꞌ caꞌ nu naca Le̱ꞌ ne̱ chee̱ da chaweꞌ da dxune̱ꞌ chee̱ benneꞌ caꞌ.
Le̱ꞌ dxusel-laꞌ xiuj chee̱dxu ne ca naca lina xrtante̱,
ne dxunne̱ꞌ da dxechínedxu da gágudxu,
ne chee̱ bedxu.
18 Lácala gulenná gubáz caꞌ da nigá,
gúcale̱ꞌe̱ na ste̱be buluzague̱ꞌ benneꞌ caꞌ chee̱ quebe xelútie̱ꞌ be̱zr caꞌ lau le̱ꞌ chee̱ xuluxucáꞌana szrene̱ꞌ le̱ꞌ.
19 Gudé naꞌ belezrín bal-la benneꞌ judío,
benneꞌ Antioquía,
ne benneꞌ Iconio,
naꞌ belegúꞌu xel-le̱ꞌ bénneache caꞌ,
naꞌ buluzríe̱ꞌ Pablo xiaj.
Guléquene̱ꞌ ba belutie̱ꞌ Pablo,
naꞌ gulezrube xue̱ꞌ le̱ꞌ belebéaje̱ꞌ le̱ꞌ xe̱zre naꞌ.
20 Gate benneꞌ caꞌ dxeléajle̱ꞌe̱ chee̱ Jesús belezrague̱ꞌ zaj naxéchaje̱ꞌ naga de̱ꞌ Pablo,
naꞌ bexasa le̱ꞌ,
ne bexuꞌe̱ xe̱zre naꞌ,
naꞌ zra xula bezáꞌle̱ne̱ꞌ Bernabé,
zjaque̱ꞌ xe̱zre Derbe.
21 Ca gudé bchálaje̱ꞌ dizraꞌ chaweꞌ chee̱ Jesús lu xe̱zre Derbe,
naga benneꞌ zante̱ gulezíꞌ lu ne̱ꞌe̱ dizraꞌ chee̱ Dios,
naꞌ gubáz caꞌ belexedée̱ꞌ xe̱zre Listra,
ne xe̱zre Iconio,
ne xe̱zre Antioquía.
22 Lu xe̱zre caní belún chache̱ꞌ lázrdau benneꞌ caꞌ dxeléajle̱ꞌe̱ chee̱ Jesús,
ne bulusízrene̱ꞌ le̱ꞌ chjácale̱ne̱ꞌ da naca chee̱ Dios,
dxelé̱ꞌe̱ le̱ꞌ:
―Benneꞌ xeluꞌe̱ naga dxenná bea Dios,
xel-laꞌ ziꞌ zrente̱ xeledée̱ꞌ.
23 La gázqueze buluzúe̱ꞌ benneꞌ gula caꞌ chee̱ xuluxúe̱ꞌ tu tu cueꞌ benneꞌ caꞌ dxeléajle̱ꞌe̱ chee̱ Jesús,
naꞌ ca gudé naꞌ buluzré̱ꞌe̱ benneꞌ caꞌ lu naꞌ Xránadxu,
Bénneaꞌ ba guléajle̱ꞌe̱ chee̱ꞌ.
Pablo ne Bernabé dxelexezrine̱ꞌ lu xe̱zre Antioquía da nababa Siria
24 Ca gudé naꞌ belexedée̱ꞌ naga nababa Pisidia,
naꞌ belezrine̱ꞌ naga nababa Panfilia.
25 Buluchálaje̱ꞌ dizraꞌ chee̱ Dios lu xe̱zre Perge,
naꞌ ca gudé naꞌ xjaque̱ꞌ xe̱zre Atalia.
26 Naꞌ belexúꞌe̱ da dxedá laweꞌ nísadauꞌ,
naꞌ belexezrine̱ꞌ xe̱zre Antioquía,
naga zaj zraꞌ benneꞌ beleguꞌe̱ gubáz caꞌ lu naꞌ Dios chee̱ xelune̱ꞌ zrin naꞌ,
da ba belezuene̱ꞌ naꞌa.
27 Gate belezrine̱ꞌ Antioquía naꞌ,
naꞌ bulutupe̱ꞌ benneꞌ caꞌ dxeléajle̱ꞌe̱ chee̱ Jesús,
ne buluzenne̱ꞌ benneꞌ caꞌ xúgute̱ da ba be̱n Dios,
bchínene̱ꞌ gubáz caꞌ,
ne ca be̱n Xránadxu,
be̱ꞌe̱ benneꞌ quebe zaj naque̱ꞌ judío lataj xeléajle̱ꞌe̱ chee̱ Jesús.
28 Naꞌ Pablo,
ne Bernabé belexegáꞌane̱ꞌ naꞌ zaneꞌ beuꞌ nen benneꞌ caꞌ dxeléajle̱ꞌe̱ chee̱ Jesús.