5 Ca lu zra caꞌ zaj zraꞌ xe̱zre Jerusalén benneꞌ judío caꞌ dxulucáꞌana szrénqueze̱ꞌ Dios.

Benneꞌ caní záꞌaque̱ꞌ xúgute̱ xe̱zr la xu zaj dxeꞌ lu xe̱zr la xu nigá.

6 Ca belenne̱ꞌ bénneache ca naca schaga naꞌ da dxaca na,

naꞌ belexezrague̱ꞌ,

ne quebe zaj nézene̱ꞌ bi naꞌ,

laweꞌ da dxelén tu tu benneꞌ caꞌ dizraꞌ cha chee̱ꞌ da dxuluchalaj benneꞌ caꞌ dxeléajle̱ꞌe̱ chee̱ Jesús.

7 Naꞌ belexebánele̱ꞌe̱ne̱ꞌ,

ne belexruse̱ꞌ,

ne gulé̱ ljwezre̱ꞌ tue̱ꞌ xetúe̱ꞌ:

―Zaj naca benneꞌ Galilea xúgute̱ benneꞌ caní dxuluchálaje̱ꞌ.

8 ¿Ájazra naꞌ dxendxu dxuluchálaje̱ꞌ dizraꞌ cha chee̱dxu dxiꞌu?

9 Zradxu dxiꞌu nigá,

nácadxu benneꞌ xe̱zr la xu Partia,

ne benneꞌ xe̱zr la xu Media,

ne benneꞌ xe̱zr la xu Elam,

ne benneꞌ xe̱zr la xu Mesopotamia,

ne benneꞌ chee̱ xe̱zre caꞌ zaj nababa Judea,

ne benneꞌ chee̱ naga nababa Capadocia,

ne benneꞌ chee̱ naga nababa Ponto,

ne benneꞌ chee̱ naga nababa Asia,

10 ne benneꞌ chee̱ naga nababa Frigia,

ne benneꞌ chee̱ naga nababa Panfilia,

ne benneꞌ xe̱zr la xu Egipto,

ne benneꞌ chee̱ xe̱zr la xu Africa da zua dédedxa chee̱ xe̱zre Cirene.

Cáꞌanqueze zaj zraꞌ benneꞌ xe̱zr la xu Roma nigá.

Bal-la benneꞌ Roma caꞌ zaj naque̱ꞌ benneꞌ judío,

benneꞌ gulálaje̱ꞌ caꞌ,

ne benneꞌ zaj naziꞌe̱ ca naca da nadxixruj bea chee̱ benneꞌ judío caꞌ.

11 Cáꞌanqueze nácadxu benneꞌ xe̱zr la xu Creta,

ne benneꞌ xe̱zr la xu Arabia.

Xúgute̱dxu dxendxu lu dizraꞌ cha chee̱dxu dxuluchalaj benneꞌ caní ca naca da zren caꞌ da dxun Dios.

12 Xúgute̱ꞌ belexebánene̱ꞌ,

ne quebe zaj nézene̱ꞌ bi da dxaca naꞌ,

naꞌ gulenaba ljwezre̱ꞌ tue̱ꞌ xetúe̱ꞌ:

―¿Bizra zéaje̱ da nigá?

13 Benneꞌ xula caꞌ belún le̱ꞌ,

gulenné̱ꞌ:

―Dxelezuzre benneꞌ caní.

14 Nadxa guxasa Pedro nen benneꞌ chinéaj gubáz chee̱ Cristo,

naꞌ zizraj bchálajle̱ne̱ꞌ bénneache zaj zraꞌ naꞌ.

Dxe̱ꞌe̱ le̱ꞌ:

―Leꞌe,

benneꞌ Judea,

ne xúgute̱le leꞌe nazrágale xe̱zre Jerusalén.

Dxal-laꞌ nézele leꞌe da nigá.

Le xen xanneꞌ ca naca da xapaꞌ leꞌe.

15 Netuꞌ quebe dxezúzrentuꞌ ca dxéquele leꞌe.

Za gudete̱ xrsila naꞌa.

Netú benneꞌ quebe dxezúzrene̱ꞌ ca náꞌqueze.

16 Da nigá naca da gunnáqueze Joel,

bénneaꞌ bchálaje̱ꞌ waláz chee̱ Dios gate naꞌ gunné̱ꞌ:

22 ’Chee̱ le̱ naꞌ,

leꞌe,

benneꞌ Israel,

le xen ca da xapaꞌ leꞌe.

Jesús,

benneꞌ Nazaret,

guque̱ꞌ tu benneꞌ bedxúaje̱ꞌ xrlátaje lau xúgute̱le leꞌe ne̱ chee̱ da be̱n Dios laule leꞌe.

Lu naꞌ Jesús Dios bléꞌene̱ꞌ da zan da dxebánedxu,

ne xel-laꞌ waca caꞌ,

ne da dxelunna bea na ca ba nézquezle leꞌe.

23 Gate Dios be̱ꞌe̱ lataj tu benneꞌ bdee̱ꞌ Le̱ꞌ lu naꞌle leꞌe cáte̱ze bache núnqueze̱ꞌ nedxu,

nadxa leꞌe gudé̱l-lale Le̱ꞌ,

naꞌ bé̱tele Le̱ꞌ gate naꞌ bdele Le̱ꞌ lu naꞌ benneꞌ caꞌ dxelune̱ꞌ da cale̱la,

benneꞌ caꞌ buludé̱ꞌe̱ Le̱ꞌ xaga béguaj naga gutie̱ꞌ.

24 Nadxa Dios bsebane̱ꞌ Le̱ꞌ,

bebéaje̱ꞌ Le̱ꞌ lu xel-laꞌ gute.

Quebe guxúꞌu ájala xegáꞌane̱ꞌ chalásaze lu xel-laꞌ gute naꞌ.

25 Ca naca da nigá bchalaj wenná bea David ca naca chee̱ Jesús naꞌ,

gate gunné̱ꞌ:

29 ’Leꞌe,

bi bíchaꞌdauꞌ.

Naca bea na gute xra xrtáudxu David,

naꞌ bulucache̱ꞌ le̱ꞌ lu xe̱dxu ba chee̱ꞌ da zúaqueze na naꞌa nagá zúadxu.

30 David naꞌ guque̱ꞌ tu benneꞌ bchálaje̱ꞌ waláz chee̱ Dios,

ne gunézene̱ꞌ ca da nache̱be lázrequeze Dios gune̱ꞌ.

Gunné̱ lie̱ꞌ tu benneꞌ zriꞌine zre sua David naꞌ gaque̱ꞌ Cristo,

Bénneaꞌ nna béaqueze̱ꞌ,

xequé̱ꞌe̱ lawe̱ꞌ chee̱ David.

31 Caꞌ guca,

David nigá beléꞌequezne̱ꞌ nedxu ca naca da dxal-laꞌ gaca chee̱ Cristo,

naꞌ bchálaje̱ꞌ ca guca gate bebán Cristo,

gunné̱ꞌ:

“Benneꞌ nigá quebe xegáꞌanaqueze̱ꞌ lataj chee̱ benneꞌ gate,

ne quebe gúzruqueze be̱l-laꞌ dxen chee̱ꞌ.”

32 Caní guca,

Dios bsebane̱ꞌ Jesús nigá,

naꞌ netuꞌ dxexeché̱bentuꞌ da li ca guca da nigá.

33 Caꞌ guca,

Dios bzue̱ꞌ Jesús lu xabáa chee̱ꞌ nen xel-laꞌ waca chee̱ꞌ,

naꞌ be̱ꞌe̱ Le̱ꞌ lataj gusel-le̱ꞌ Beꞌ Láꞌazxa chee̱ꞌ nigá ca nache̱be lázrequeze̱ꞌ nedxu gune̱ꞌ,

naꞌ xúgute̱ da caní dxeléꞌele leꞌe,

ne dxenle zaj naca na da dxun Beꞌ Láꞌazxa naꞌ.

34 David naꞌ quebe begüéne̱ꞌ xabáa,

san lé̱queze̱ꞌ gune̱ꞌ:

36 ’Xúgute̱le leꞌe,

benneꞌ Israel,

dxal-laꞌ nézquezle da nigá:

Jesús nigá,

bénneaꞌ bdaꞌle leꞌe xaga béguaj,

Dios ba nune̱ꞌ Le̱ꞌ Xránale ne Cristo chee̱le,

Benneꞌ guselé̱ꞌ leꞌe.

37 Gate benneꞌ caꞌ belenne̱ꞌ da nigá,

naꞌ belexewíꞌine lazre̱ꞌ,

naꞌ buluche̱be̱ꞌ Pedro,

ne benneꞌ gubáz caꞌ chee̱ Jesús,

dxelé̱ꞌe̱ le̱ꞌ:

―Benneꞌ bíchentuꞌ,

¿ájazra dxal-laꞌ guntuꞌ xcaꞌ?

38 Nadxa gunná Pedro:

―Le xebíꞌi lazreꞌ lau Dios,

ne le chua nisa tu tule chee̱ gácale Jesucristo tuze,

chee̱ gunite lau Le̱ꞌ chee̱le leꞌe ca naca dul-la da nabágale.

Caꞌ gaca,

nadxa Dios sél-laqueze̱ꞌ Beꞌ Láꞌazxa chee̱ꞌ chee̱ súale̱ne̱ꞌ leꞌe.

39 Da nigá nache̱be lazreꞌ Dios naca na chee̱le leꞌe,

ne chee̱ zríꞌinele,

ne chee̱ xúgute̱ benneꞌ zaj zre̱ꞌe̱ zituꞌ,

xúgute̱ benneꞌ caꞌ dxaca lazreꞌ Dios nne̱ꞌ.

40 Ca naca dizraꞌ nigá,

ne xezícaladxa dizraꞌ da bchalaj Pedro,

bzéajniꞌine̱ꞌ benneꞌ caꞌ,

naꞌ gunné̱ꞌ:

―Le la ládujla benneꞌ we̱n da cale̱la caní.

41 Caꞌan guca,

benneꞌ caꞌ guléajle̱ꞌe̱ chee̱ da bchalaj Pedro belexedxúe̱ꞌ nisa,

naꞌ lu zra naꞌ belaca tuze ca chi dxua gaxúa benneꞌ nen benneꞌ caꞌ ba dxeléajle̱ꞌe̱ chee̱ Jesús.

42 Naꞌ xúgute̱ benneꞌ caꞌ gulezúa típaqueze̱ꞌ ca da dxuluse̱de benneꞌ gubáz chee̱ Jesús le̱ꞌ,

naꞌ gulezúe̱ꞌ tuze nen le saꞌ ljwezre̱ꞌ chee̱ bululáwizre̱ꞌ Dios,

ne buluzrague̱ꞌ chee̱ xelawe̱ꞌ da dxusá lázredxu ca guca gate gute Cristo.

43 Xúgute̱ benneꞌ caꞌ gulezrebe̱ꞌ gate beleléꞌene̱ꞌ xel-laꞌ waca zante̱,

ne da dxelunna bea na da dxelún benneꞌ gubáz chee̱ Jesús.

44 Xúgute̱ benneꞌ caꞌ dxeléajle̱ꞌe̱ chee̱ Jesús gulaque̱ꞌ tuze,

ne bulunézruje̱ꞌ da de̱ chee̱ꞌ tue̱ꞌ xetúe̱ꞌ.

45 Belutie̱ꞌ xúgute̱ da zaj nape̱ꞌ,

ne bulunézruje̱ꞌ dumí naꞌ chee̱ benneꞌ caꞌ ca da dxelexázrjene̱ꞌ.

46 Xuguꞌ zra belexezrague̱ꞌ lu xudauꞌ,

ne cáꞌanqueze lu lizre cha chee̱ꞌ,

chee̱ xelawe̱ꞌ da dxusá lázredxu ca guca gate gute Cristo.

Gulawe̱ꞌ tu zrente̱ lu xel-laꞌ dxelebé,

ne dute̱ xel-laꞌ dxelexruj lazreꞌ chee̱ꞌ.

47 Belúe láꞌane̱ꞌ Dios,

naꞌ xúgute̱ bénneache guléquene̱ꞌ benneꞌ caꞌ ba láꞌana.

Tu zra tu zra Xránadxu bzane̱ꞌ benneꞌ caꞌ chee̱ Cristo ca dxelezíꞌ lu ne̱ꞌe̱ tu tue̱ꞌ Cristo.