―Gunnáꞌ netuꞌ.

5 Benneꞌ naꞌ gunnáꞌ xánnie̱ꞌ le̱ꞌ laweꞌ da dxéquene̱ꞌ bi xulunezruje̱ꞌ le̱ꞌ.

6 Pedro guzre̱ꞌ le̱ꞌ:

―Quebe bi de̱ chiaꞌ dumí plata ne dumí oro.

Da napaꞌ gunnaꞌ lueꞌ.

Lu La Jesucristo,

benneꞌ Nazaret,

guxasa gudá.

7 Nadxa Pedro guqué̱ꞌe̱ naꞌ benneꞌ zrinnaj naꞌ da zua xabe̱la,

ne bechise̱ꞌ le̱ꞌ,

naꞌ ca be̱ne̱ꞌ caní,

belexezúa chacha niꞌe̱,

ne béchajdu chee̱ꞌ caꞌ.

8 Nadxa benneꞌ zrinnaj naꞌ guxrítie̱ꞌ tu,

naꞌ guzé̱ꞌ,

ne guzú lawe̱ꞌ dxedé̱ꞌ.

Guxúꞌe̱ nen benneꞌ caꞌ xudauꞌ,

dxedé̱ꞌ,

dxexrítie̱ꞌ,

ne dxue láꞌane̱ꞌ Dios.

9 Xúgute̱ benneꞌ zaj zre̱ꞌe̱ naꞌ beleléꞌene̱ꞌ le̱ꞌ dxedé̱ꞌ,

ne dxue láꞌane̱ꞌ Dios.

10 Belexebánene̱ꞌ,

ne belezrebe̱ꞌ ca da beleléꞌene̱ꞌ guca na,

laweꞌ da zaj núnbeꞌe̱ benneꞌ zrinnaj naꞌ,

ne zaj nézene̱ꞌ naque̱ꞌ bénneaꞌ dxebéꞌe̱ dxenabe̱ꞌ gunaꞌ ga dxelexúꞌu bénneache xudauꞌ,

da naꞌ nazí le na Da Xrtante̱.

11 Benneꞌ zrinnaj naꞌ,

benneꞌ ba bexaque̱ꞌ,

quebe bsane̱ꞌ naꞌ Pedro ne Juan,

naꞌ xúgute̱ benneꞌ dxelexebánene̱ꞌ,

ne xjaque̱ꞌ naga nazí le na La Chila Chee̱ Salomón,

naga zaj zraꞌ Pedro ne Juan.

12 Gate bleꞌe Pedro da nigá,

naꞌ guzre̱ꞌ benneꞌ caꞌ:

―Leꞌe,

benneꞌ Israel,

¿bizr chee̱ naꞌ dxebánele leꞌe?

¿Bizr chee̱ naꞌ dxennáꞌle netuꞌ caní,

ne dxéquele netuꞌ bexuntuꞌ benneꞌ nigá,

naꞌ dxexedé̱ꞌ ne̱ chee̱ xel-laꞌ waca chee̱ntuꞌ,

u ne̱ chee̱ xel-laꞌ benneꞌ xudauꞌ chee̱ntuꞌ?

13 ¡Cabí!

Dios chee̱ xra xrtáudxu Abraham,

ne Isaac,

ne Jacob bcaꞌana szrene̱ꞌ Zríꞌine̱ꞌ,

Jesús,

Bénneaꞌ bdele leꞌe lu naꞌ benneꞌ xuꞌu laweꞌ.

Gate guca lazreꞌ Pilato gusane̱ꞌ Le̱ꞌ,

leꞌe quebe guca lázrele.

14 Bzúale chaláꞌala Benneꞌ naꞌ naque̱ꞌ láꞌazxa ne xrlátaje,

naꞌ gunábale la tu benneꞌ we̱n da zrinnaj.

15 Caꞌan guca,

bé̱tele leꞌe Bénneaꞌ dxunne̱ꞌ bénneache xel-laꞌ nabán,

san Dios bsebane̱ꞌ Le̱ꞌ ládujla benneꞌ gate,

naꞌ netuꞌ dxexeché̱bentuꞌ chee̱ da nigá.

16 Guca lu La Jesús nigáqueze,

u nnadxu guca na laweꞌ da guxéajle̱ chee̱ La Jesús,

chee̱ bezíꞌ le dipa benneꞌ nigá dxeléꞌele,

ne núnbeale le̱ꞌ.

Laweꞌ da guxéajle̱ꞌe̱ chee̱ Jesús,

ba bexácate̱queze̱ꞌ ca dxeléꞌele leꞌe xúgute̱le.

17 ’Leꞌe,

Bi bichaꞌ,

nezdaꞌ gate leꞌe,

ne benneꞌ xíchaje̱ caꞌ chee̱le bé̱tele Jesús,

quebe guque beꞌele ca da dxunle.

18 Dios be̱ne̱ꞌ guca caní chee̱ guca li ca da ba gunné̱ꞌ nédxute̱ gate buluchalaj waláz chee̱ꞌ benneꞌ caꞌ,

naꞌ gulenné̱ꞌ dxal-laꞌ siꞌ saca Cristo chee̱ Dios.

19 Chee̱ le̱ naꞌ,

le xebíꞌi lázrele,

ne le xexaca Dios tuze,

chee̱ xusule̱ꞌ dul-la nabágale.

Nadxa Xránadxu Dios gunne̱ꞌ leꞌe lataj xexaca chaweꞌ xichaj lázrdaule.

20 Sel-le̱ꞌ chee̱le Jesús,

Bénneaꞌ guche̱be lazre̱ꞌ sel-le̱ꞌ chee̱le nédxudaute̱.

21 Lu zra caní Jesucristo dxal-laꞌ xegáꞌane̱ꞌ xabáa cadxa gucáꞌana chaweꞌ Dios xúgute̱ da dxaca,

ca naꞌ gunné̱ꞌ lu dxuꞌa benneꞌ caꞌ buluchálaje̱ꞌ waláz chee̱ꞌ nédxudaute̱.

22 Caꞌ naca na,

laweꞌ da gunná Moisés,

guzre̱ꞌ xra xrtáudxu caꞌ:

“Sel-la Xránadxu Dios chee̱le tu benneꞌ guchálaje̱ꞌ waláz chee̱ꞌ.

Gaque̱ꞌ tu benneꞌ ládujla bi bíchele caꞌ,

naꞌ sel-le̱ꞌ le̱ꞌ chee̱le ca gusel-le̱ꞌ nedaꞌ.

Le xen xanneꞌ xúgute̱ da xe̱ꞌe̱ leꞌe,

23 laweꞌ da welebía xiꞌ xúgute̱ benneꞌ quebe xelapa Le̱ꞌ ba láꞌana,

naꞌ cuase̱ꞌ benneꞌ caꞌ ládujla xe̱zre Israel.”

24 ’Xúgute̱ benneꞌ caꞌ,

benneꞌ buluchálaje̱ꞌ waláz chee̱ Dios,

guzú lau na gate zua Samuel,

ne zeaj na,

buluchálaje̱ꞌ chee̱ zra caní.

25 Leꞌe dxezile ca da gulenná benneꞌ caꞌ buluchálaje̱ꞌ waláz chee̱ Dios,

ne nácale tuze lu xel-laꞌ wezría da be̱n Dios nen xra xrtáule caꞌ,

ca guzre̱ꞌ Abraham:

“Lu naꞌ benneꞌ zriꞌine zre suꞌ gaca chaweꞌ chee̱ xúgute̱ bénneache zaj zre̱ꞌe̱ lu xe̱zr la xu.”

26 Gate Dios bsebane̱ꞌ Zríꞌine̱ꞌ,

gusel-le̱ꞌ Le̱ꞌ nedxu laule leꞌe chee̱ gaca chaweꞌ chee̱le,

chee̱ gusanle tu tule leꞌe da cale̱la da dxunle.