Pedro ne Juan dxelezrine̱ꞌ lau benneꞌ xuꞌu laweꞌ caꞌ
4
Pedro ne Juan ne dxuluchálajle̱ne̱ꞌ benneꞌ caꞌ gate belezrín naꞌ bxruze caꞌ,
ne benneꞌ xuꞌu lu ne̱ꞌe̱ bi xraꞌaga chee̱ xudauꞌ,
ne benneꞌ saduceo caꞌ.
2 Dxelezré̱ꞌe̱ laweꞌ da dxuluse̱de Pedro,
ne Juan benneꞌ caꞌ,
dxelenné̱ꞌ welexebán benneꞌ gate laweꞌ da bebán Jesús.
3 Nadxa gule̱l-le̱ꞌ Pedro ne Juan,
naꞌ guleché̱ꞌe̱ le̱ꞌ lizre xia ca zrindxa zra xula laweꞌ da ba dxezréꞌ zra naꞌ.
4 Guléajle̱ꞌ benneꞌ zan ládujla benneꞌ caꞌ belénne̱ꞌ da bchalaj Pedro,
naꞌ cátite benneꞌ caꞌ dxeléajle̱ꞌe̱ chee̱ Jesús zaj naque̱ꞌ ca gazxuꞌ cueꞌ chi gaxúa benneꞌ biu.
5 Zra xula naꞌ benneꞌ xíchaje̱ caꞌ chee̱ judío caꞌ,
ne benneꞌ gula sina caꞌ,
ne benneꞌ caꞌ dxuluxuzájle̱ꞌe̱ da nadxixruj bea na,
belezrague̱ꞌ lu xe̱zre Jerusalén
6 nen Anás,
bxruze blau,
ne Caifás,
ne Juan,
ne Alejandro,
ne xúgute̱ benneꞌ xrtia bxruze blau caꞌ.
7 Nadxa gulenná beꞌe xeajlexríꞌe̱ Pedro ne Juan,
naꞌ buluzé̱ꞌ le̱ꞌ laduj naga zaj zre̱ꞌe̱,
naꞌ buluche̱be̱ꞌ le̱ꞌ:
―¿Bi xel-laꞌ dxenná bea,
u nu lu La dxunle da caní?
8 Nadxa Pedro,
zúale̱queze Beꞌ Láꞌazxa le̱ꞌ,
guzre̱ꞌ benneꞌ caꞌ:
―Leꞌe,
benneꞌ xíchaje̱ caꞌ chee̱ bxruze,
ne benneꞌ gula sina caꞌ,
9 leꞌe dxuché̱bele netuꞌ chee̱ tu da chaweꞌ da guca chee̱ tu benneꞌ we̱ꞌ,
chee̱ nézele ájala guca bexaca bénneaꞌ.
10 Dxuzentuꞌ xúgute̱le leꞌe chee̱ xeleneze xúgute̱ benneꞌ Israel,
benneꞌ nigá ze̱ꞌ lau xúgute̱le leꞌe,
ba bexaque̱ꞌ lu La Jesucristo,
Benneꞌ Nazaret,
Bénneaꞌ bdaꞌle leꞌe le̱ꞌe̱ xaga béguaj,
naꞌ Dios bsebane̱ꞌ Le̱ꞌ ládujla benneꞌ gate.
11 Jesús nigá naque̱ꞌ xiaj naꞌ,
leꞌe,
benneꞌ we̱n xuꞌu bzúale chaláꞌala,
san naꞌa Lé̱queze̱ꞌ naque̱ꞌ xiaj blau chee̱ xuꞌu.
12 Quebe nu chiláꞌ bénneache sequeꞌ guselé̱ꞌ dxiꞌu laweꞌ da quebe ne gunna Dios xetú La bénneache lu xe̱zr la xu nigá,
benneꞌ séquene̱ꞌ guselé̱ꞌ dxiꞌu.
13 Gate benneꞌ xuꞌu laweꞌ beleléꞌene̱ꞌ Pedro ne Juan dxuluchálaje̱ꞌ du lazre̱ꞌ,
ne dxeleque béꞌene̱ꞌ quebe zaj nazé̱die̱ꞌ lu naꞌ bxruze caꞌ,
san zaj naque̱ꞌ benneꞌ zre̱ꞌe̱ cáꞌaze,
naꞌ belexebáne benneꞌ xíchaje̱ caꞌ,
san guleque béꞌene̱ꞌ zaj naque̱ꞌ benneꞌ guledále̱ne̱ꞌ Jesús.
14 Cáꞌanqueze bénneaꞌ bexaque̱ꞌ ze̱ꞌ naꞌ nen Pedro ne Juan,
naꞌ chee̱ le̱ naꞌ quebe gulezéquene̱ꞌ bi xelenné̱ꞌ chee̱ꞌ.
15 Nadxa gulenná beꞌe̱ belexedxúaj benneꞌ gubáz caꞌ ládujla le̱ꞌ.
Cateꞌ belexegáꞌana le̱ze̱ꞌ buluche̱be ljwezre̱ꞌ,
16 dxelenné̱ꞌ:
―¿Ájazra gundxu chee̱ benneꞌ caní?
Xúgute̱ benneꞌ zaj zre̱ꞌe̱ Jerusalén zaj nézene̱ꞌ belune̱ꞌ xel-laꞌ waca zren nigá,
naꞌ quebe gaca tábagadxu na.
17 Naꞌa,
chee̱ québedxa zriluj da nigá láwela bénneache,
guxrúsadxu benneꞌ caní chee̱ québedxa nu xuluchálajle̱ne̱ꞌ lu La Jesús.
18 Nadxa gulenná beꞌe̱ belexezrín Pedro ne Juan,
naꞌ gulenná béꞌene̱ꞌ le̱ꞌ québedxa nu xuluchálajle̱ne̱ꞌ,
ne quebe nu xulusé̱dene̱ꞌ lu La Jesús.
19 Pedro ne Juan belexeche̱be̱ꞌ:
―Le nnaꞌ leꞌe che naca xrlátaje lau Dios guzúazrantuꞌ xrtízrale leꞌe,
quézcala xrtizraꞌ Dios.
20 Netuꞌ quebe gaca gusantuꞌ gucháljantuꞌ ca naca da bléꞌentuꞌ,
ne da bénentuꞌ.
21 Nadxa benneꞌ xuꞌu laweꞌ caꞌ buluxruse̱ꞌ Pedro ne Juan,
san bulusane̱ꞌ le̱ꞌ.
Quebe belezrelne̱ꞌ ájala xelune̱ꞌ xuluzaca ziꞌe̱ le̱ꞌ laweꞌ da dxelúe láꞌana xúgute̱ bénneache Dios ca naca da ba guca.
22 Bénneaꞌ bexaque̱ꞌ ne̱ chee̱ xel-laꞌ waca zren nigá ba gudée̱ꞌ chua iza.
Benneꞌ caꞌ dxeléajle̱ꞌe̱ chee̱ Jesús dxelenabe̱ꞌ lau Dios gunézruje̱ꞌ le̱ꞌ xel-laꞌ dxuluxrén lazreꞌ
23 Gate bulusane̱ꞌ Pedro ne Juan,
benneꞌ caní xjaque̱ꞌ naga zaj zraꞌ benneꞌ ljwezre̱ꞌ,
naꞌ buluzenne̱ꞌ le̱ꞌ ca naca xúgute̱ da gulenná benneꞌ xíchaje̱ caꞌ chee̱ bxruze caꞌ,
ne benneꞌ gula sina caꞌ.
24 Gate belenne̱ꞌ da caní,
xúgute̱ꞌ buluchálajle̱ne̱ꞌ Dios,
gulenné̱ꞌ:
―Xránantuꞌ,
Lueꞌ nacuꞌ Dios.
Be̱nuꞌ xabáa,
ne xe̱zr la xu,
ne nísadauꞌ,
ne xúgute̱ da zaj nnita lataj caꞌ.
25 Lueꞌ,
lu naꞌ Beꞌ Láꞌazxa,
ne lu dxuꞌa David,
benneꞌ we̱n zrin chiuꞌ,
gunnáuꞌ:
¿Bizr chee̱ naꞌ dxelasa bénneache xe̱zr la xu caꞌ,
naꞌ bénneache dxelegúꞌu lazre̱ꞌ da quebe bi zaj zaca?
26 Benneꞌ wenná bea caꞌ chee̱ xe̱zr la xu gulune̱ꞌ tuz,
naꞌ benneꞌ blau caꞌ chee̱ xe̱zr caꞌ belezrague̱ꞌ
chee̱ xeledábague̱ꞌe̱ Xránadxu Dios,
ne Cristo chee̱ꞌ.
27 ’Da li,
Herodes.
ne Poncio Pilato belezrague̱ꞌ lu xe̱zre nigá nen benneꞌ zituꞌ caꞌ,
ne nen benneꞌ Israel caꞌ,
naꞌ guledábague̱ꞌ Zriꞌinuꞌ Láꞌazxa,
Jesús,
Bénneaꞌ bzúaquezuꞌ Lueꞌ.
28 Caꞌan guca,
benneꞌ caꞌ belune̱ꞌ xúgute̱ ca da ba núnquezuꞌ Lueꞌ dxal-laꞌ gaca na.
29 Naꞌa,
Xran,
gunnáꞌ ca dxuluxruse̱ꞌ netuꞌ,
ne be̱nna netuꞌ,
we̱n zrin chiuꞌ caꞌ,
xel-laꞌ dxuxrén lazreꞌ chee̱ guchálajntuꞌ xrtizruꞌ,
ne quebe zrébentuꞌ,
30 ne be̱nna netuꞌ xel-laꞌ waca chiuꞌ chee̱ gaca xexuntuꞌ benneꞌ we̱ꞌ caꞌ,
ne chee̱ guntuꞌ xel-laꞌ waca chee̱ xabáa lu La Zriꞌinuꞌ Láꞌazxa Jesús.
¡Caꞌan gaca!
31 Gate bexuzre buluchálajle̱ne̱ꞌ Dios,
lu lataj naga zaj nazrague̱ꞌ guzrúꞌ,
naꞌ xúgute̱ꞌ guzúale̱ Beꞌ Láꞌazxa le̱ꞌ,
naꞌ buluchálaje̱ꞌ xrtizraꞌ Dios dute̱ xel-laꞌ dxuluxrén lazreꞌ chee̱ꞌ.
Xúgute̱ꞌ dxelune̱ꞌ tuze ca naca da zaj nape̱ꞌ
32 Benneꞌ zan caꞌ,
benneꞌ dxeléajle̱ꞌe̱ chee̱ Jesús gulaque̱ꞌ tuze lu xichaj lázrdawe̱ꞌ.
Netúe̱ꞌ quebe gunné̱ꞌ chee̱ze̱ꞌ naca da nape̱ꞌ.
Xúgute̱ da zaj nape̱ꞌ zaj nune̱ꞌ tuze.
33 Benneꞌ gubáz caꞌ chee̱ Jesús,
nen dute̱ xel-laꞌ dxelenná bea buluchálajqueze̱ꞌ ca guca gate bebán Xránadxu Jesús,
naꞌ Dios be̱ne̱ꞌ guca chaweꞌ chee̱ xúgute̱ benneꞌ caꞌ.
34 Quebe nu guzúa ládujla benneꞌ caꞌ bi bxázrjene̱ꞌ laweꞌ da caní belún xúgute̱ benneꞌ zaj nape̱ꞌ xe̱zr la xu caꞌ u xuꞌu caꞌ.
Belutie̱ꞌ na,
naꞌ belúꞌe̱ dumí naꞌ,
35 ne xeajlenézruje̱ꞌ na lu naꞌ benneꞌ gubáz caꞌ,
chee̱ xelexele̱ꞌe̱ na tu tu benneꞌ caꞌ ca da dxelechínene̱ꞌ.
36 Zua ládujla benneꞌ caꞌ tu benneꞌ xrtia Leví le̱ꞌ José,
benneꞌ gúlaje̱ꞌ Chipre da naca tu xe̱zr la xudauꞌ naxechaj nísadauꞌ le̱ na.
Benneꞌ nigá,
buluzúa gubáz caꞌ le̱ꞌ Bernabé,
da zéaje̱ na benneꞌ dxexúe zrene̱ꞌ.
37 Benneꞌ nigá be̱tie̱ꞌ tu xe̱zr la xu da nape̱ꞌ,
naꞌ biꞌe̱ dumí naꞌ,
ne bnézruje̱ꞌ na lu naꞌ benneꞌ gubáz caꞌ.