Dul-la da belún Ananías ne Safira
5
Xetú benneꞌ le̱ꞌ Ananías nen zruꞌule̱ꞌ Safira,
be̱tie̱ꞌ tu xe̱zr la xu chee̱ꞌ.
2 Benneꞌ nigá bequé̱ꞌe̱ lateꞌ dumí naꞌ,
naꞌ da begáꞌanaze biꞌe̱ lau benneꞌ gubáz caꞌ,
ne gunné̱ꞌ ca naca naꞌ.
Zruꞌule̱ꞌ ca naca na nézene̱ꞌ.
3 Nadxa guzre Pedro le̱ꞌ:
―Ananías,
¿bizr chee̱ naꞌ be̱ꞌu lataj Satanás guxúꞌu na lu xichaj lázrdaꞌu chee̱ si xe̱ꞌu Beꞌ Láꞌazxa,
naꞌ becaꞌu lateꞌ chiuꞌ ca naca da guziꞌu chee̱ xe̱zr la xu naꞌ?
4 ¿Quebe guca xe̱zr la xu naꞌ chiuꞌ?
Naꞌ gate be̱tiuꞌ na,
¿quebe guca dumí naꞌ chiuꞌ?
¿Ájazra guca be̱nuꞌ da nigá?
Dios guzí xe̱ꞌu,
quegá bénneache.
5 Ca ben Ananías da nigá,
naꞌ guzréꞌe̱ gútete̱ꞌ.
Xúgute̱ benneꞌ belén da nigá belezrébele̱ꞌe̱.
6 Nadxa gulebiga bal-la bi cuideꞌ caꞌ,
ne buluchélabeꞌ le̱ꞌ tu ladxeꞌ,
naꞌ belúabeꞌ le̱ꞌ cheajlecáchebeꞌ le̱ꞌ lu ba.
7 Ca guca chunna hora gudé naꞌ,
guxúꞌu zruꞌula Ananías naꞌ,
ne quebe nézene̱ꞌ bi ba guca.
8 Pedro bche̱be̱ꞌ le̱ꞌ:
―Gunná,
¿bé̱tele leꞌe xe̱zr la xu naꞌ ca dxennale guzile na?
Gunná Safira naꞌ:
―Aweꞌ,
ca naca naꞌ.
9 Nadxa Pedro guzre̱ꞌ le̱ꞌ:
―¿Bizr chee̱ naꞌ be̱nle leꞌe tuze dizraꞌ gúquele si xe̱le Beꞌ Láꞌazxa?
Chaleꞌaj naꞌ ba zesíꞌaca bi caꞌ xeajlecáchebeꞌ benneꞌ chiuꞌ,
naꞌ naꞌa xelúatequezebeꞌ lueꞌ.
10 Laꞌ náꞌqueze nuꞌula naꞌ guzréꞌe̱ gútete̱ꞌ zran niꞌa Pedro.
Gate belúꞌu benneꞌ cuideꞌ caꞌ,
naꞌ beleléꞌebeꞌ le̱ꞌ ba gutie̱ꞌ,
naꞌ belexebéajbeꞌ le̱ꞌ xeajlecáchebeꞌ le̱ꞌ cuita ba chee̱ benneꞌ chee̱ꞌ.
11 Xúgute̱ benneꞌ caꞌ zaj nazrague̱ꞌ naꞌ,
ne xúgute̱ bénneache,
benneꞌ belén da caní belezrébele̱ꞌe̱.
Benneꞌ gubáz caꞌ dxelúnle̱ꞌe̱ xel-laꞌ waca chee̱ xabáa
12 Benneꞌ gubáz caꞌ belúnle̱ꞌe̱ xel-laꞌ waca chee̱ xabáa,
ne da dxelunna bea na lau benneꞌ caꞌ,
naꞌ xúgute̱ꞌ belezrague̱ꞌ La Chila Chee̱ Salomón,
da naca na chee̱ xudauꞌ.
13 Netú benneꞌ caꞌ,
benneꞌ quebe dxeléajle̱ꞌe̱ chee̱ Jesús,
quebe belexázrene̱ꞌ gune̱ꞌ benneꞌ caꞌ tuze,
san xúgute̱ bénneache belape̱ꞌ benneꞌ caní ba láꞌana.
14 Benneꞌ zandxa gulezú lawe̱ꞌ dxeléajle̱ꞌe̱ chee̱ Xránadxu,
benneꞌ biu ne nuꞌula caꞌ.
15 Caꞌ guca na,
belebéaje̱ꞌ benneꞌ we̱ꞌ caꞌ,
zaj de̱ꞌ lu da dxelátaꞌne̱ꞌ,
ne daꞌa chee̱ꞌ,
naꞌ gulíxrue̱ꞌ le̱ꞌ la neza caꞌ chee̱ gate te Pedro naꞌ,
naꞌ te zrula chee̱ꞌ laweꞌ benneꞌ caꞌ.
16 Cáꞌanqueze benneꞌ xe̱zre walizre caꞌ belelé̱ꞌe̱ lu xe̱zre Jerusalén,
zaj nuꞌe̱ benneꞌ we̱ꞌ chee̱ꞌ caꞌ,
ne benneꞌ caꞌ zaj xuꞌe̱ beꞌ xriwe̱ꞌ caꞌ,
naꞌ xúgute̱ꞌ belexexaque̱ꞌ.
Benneꞌ gubáz caꞌ dxeluꞌe̱ lizre xia
17 Nadxa bxruze blau,
ne benneꞌ saduceo caꞌ zaj zúale̱ne̱ꞌ le̱ꞌ,
gulaque̱ꞌ xa lazreꞌ,
18 naꞌ gule̱l-le̱ꞌ benneꞌ gubáz caꞌ,
ne buluzré̱ꞌe̱ le̱ꞌ lizre xia.
19 Naꞌ tu gubáz chee̱ xabáa chee̱ Xránadxu gusálaje̱ꞌ dxa xuꞌu chee̱ lizre xia naꞌ chizrela,
naꞌ bebéaje̱ꞌ benneꞌ caꞌ,
ne dxe̱ꞌe̱ le̱ꞌ:
20 ―Le chjaca,
ne le cheajsé̱ lu xudauꞌ,
ne le guzén benneꞌ caꞌ ca naca chee̱ xel-laꞌ nabán cube nigá.
21 Ca belenne̱ꞌ da nigá,
zra xula belúꞌe̱ chila xudauꞌ che zílala,
naꞌ gulezú lawe̱ꞌ dxulusé̱dene̱ꞌ benneꞌ zaj zre̱ꞌe̱ naꞌ.
Dxácate̱ naꞌ,
bxruze blau naꞌ,
ne benneꞌ zrále̱ne̱ꞌ le̱ꞌ,
buluchague̱ꞌ benneꞌ caꞌ chee̱ xuꞌu laweꞌ blau,
ne benneꞌ gula sina caꞌ chee̱ xe̱zre Israel,
naꞌ gulenná beꞌe̱ xelexebéaje̱ꞌ gubáz caꞌ zaj xuꞌe̱ lizre xia.
22 Gate belezrín bi xraꞌaga chee̱ xudauꞌ naꞌ,
quebe nu beleléꞌene̱ꞌ lu xuꞌu lizre xia,
naꞌ belexezrine̱ꞌ,
ne buluzenne̱ꞌ benneꞌ caꞌ,
23 dxelenné̱ꞌ:
―Gate bzrintuꞌ lizre xia naꞌ,
naxezxuj tipa na,
naꞌ benneꞌ dxjaque̱ꞌ wedil-la zaj zre̱ꞌe̱ dxuꞌa dxa xuꞌu naꞌ,
ne dxuluxúe̱ꞌ na,
san gate gusálajntuꞌ na,
quebe nu bezrélentuꞌ lu xuꞌu naꞌ.
24 Gate bxruze blau,
ne benneꞌ xíchaje̱ caꞌ chee̱ bxruze caꞌ,
ne xíchaje̱ chee̱ bi xraꞌaga caꞌ,
belenne̱ꞌ da nigá,
naꞌ buluche̱be ljwezre̱ꞌ ga cheajsé̱ da nigá.
25 Laꞌ náꞌqueze bzrin tu benneꞌ guzre̱ꞌ le̱ꞌ:
―Benneꞌ caꞌ bzraꞌle leꞌe lizre xia zaj zre̱ꞌe̱ lu chila xudauꞌ,
dxulusé̱dene̱ꞌ bénneache.
26 Nadxa benneꞌ xíchaje̱ chee̱ bi xraꞌaga chee̱ xudauꞌ guxíajle̱ne̱ꞌ bi xraꞌaga caꞌ,
naꞌ xeajlexríꞌe̱ gubáz caꞌ.
Quebe bi belúnene̱ꞌ le̱ꞌ laweꞌ da belezrebe̱ꞌ bi xelún benneꞌ caꞌ dxelenne̱ꞌ chee̱ gubáz caꞌ,
laweꞌ da dxeléquene̱ꞌ xeluꞌe̱ le̱ꞌ xiaj.
27 Gate xeajlexríꞌe̱ gubáz caꞌ,
naꞌ buluzré̱ꞌe̱ le̱ꞌ lau benneꞌ xuꞌu laweꞌ blau,
naꞌ gunná bxruze blau naꞌ,
dxe̱ꞌe̱ benneꞌ gubáz caꞌ:
28 ―Netuꞌ bzrúnantuꞌ leꞌe quebe guchálajle̱dxale bénneache lu la bénneaꞌ.
¿Bizra naꞌ be̱nle?
Ba bzenle ca naca benneꞌ zaj zre̱ꞌe̱ xe̱zre Jerusalén ca naca da dxusé̱dele,
ne dxaca lázrele gusebágale netuꞌ xel-laꞌ gute chee̱ benneꞌ naꞌ.
29 Nadxa belexeche̱be Pedro,
ne xezícadxa benneꞌ gubáz caꞌ:
―Dxalaꞌ guzúantuꞌ xrtizraꞌ Dios,
quegá xrtizraꞌ bénneache.
30 Dios chee̱ xra xrtáudxu caꞌ bsebane̱ꞌ Jesús,
Bénneaꞌ bé̱tele leꞌe bdaꞌale Le̱ꞌ xaga béguaj.
31 Dios bcaꞌana szrene̱ꞌ Le̱ꞌ chaláꞌa xabe̱la chee̱ꞌ,
ne be̱ne̱ꞌ Le̱ꞌ Benneꞌ Blau,
ne Weselá,
chee̱ gataꞌ lataj chee̱ benneꞌ Israel xelexebíꞌi lazre̱ꞌ chee̱ gunite lau Dios dul-la chee̱ꞌ.
32 Chee̱ le̱ naꞌ netuꞌ dxexeché̱bentuꞌ,
ne cáꞌanqueze dxun Beꞌ Láꞌazxa.
Dios dxunézruje̱ꞌ Beꞌ Láꞌazxa benneꞌ dxuluzúe̱ꞌ dizraꞌ chee̱ꞌ.
33 Gate belenne̱ꞌ da nigá,
naꞌ belezré̱ꞌe̱,
ne gulaca lazre̱ꞌ xelútie̱ꞌ gubáz caꞌ.
34 Ládujla benneꞌ xuꞌu laweꞌ caꞌ zua tu benneꞌ fariseo le̱ꞌ Gamaliel.
Naque̱ꞌ benneꞌ dxuxuzájle̱ꞌe̱ da nadxixruj bea na,
naꞌ dxelápale̱ꞌe̱ bénneache le̱ꞌ ba láꞌana.
Benneꞌ nigá guzé̱ꞌ,
naꞌ gunná béꞌene̱ꞌ xelexebéaje̱ꞌ gubáz caꞌ chaléꞌajla tu chíꞌidauꞌ.
35 Nadxa guzre̱ꞌ benneꞌ xuꞌu laweꞌ caꞌ:
―Leꞌe,
benneꞌ Israel,
le guxúe xanneꞌ ca gunle chee̱ benneꞌ caní.
36 Le gusá lazreꞌ,
bache guca zaneꞌ iza,
gudábaga Teudas xuꞌu laweꞌ,
gunné̱ꞌ naque̱ꞌ tu benneꞌ blau,
naꞌ xjácale̱ ca tapa gaxúa benneꞌ biu le̱ꞌ.
Naꞌ belutie̱ꞌ le̱ꞌ,
naꞌ xúgute̱ benneꞌ caꞌ gulaca le̱ꞌ tuze belexase dinnaje̱ꞌ caꞌ,
naꞌ gudé chee̱ da naꞌ.
37 Gudé naꞌ,
lu zra gate belúꞌu bénneache xiche,
naꞌ blaꞌ Judas,
benneꞌ Galilea,
naꞌ benneꞌ zan xjácale̱ne̱ꞌ le̱ꞌ.
Cáꞌanqueze belutie̱ꞌ bénneaꞌ,
naꞌ xúgute̱ benneꞌ gulede̱ꞌe̱ le̱ꞌ belexase dínnaje̱ꞌ.
38 Chee̱ le̱ naꞌ,
le gusán benneꞌ caní,
ne quebe guchixre chee̱le nen benneꞌ caꞌ.
Che da nigá naca na da dxun beneácheze,
wadé chee̱ na.
39 Che naca na da dxun Dios,
quebe séquele leꞌe guzría xile na.
Le guxúe xanneꞌ chee̱ quebe tíl-lale̱le Dios.
40 Xúgute̱ꞌ belexaque̱ꞌ tuze.
Nadxa gulenná beꞌe̱ belúꞌu gubáz caꞌ da xula,
naꞌ ca belúꞌu benneꞌ caꞌ,
naꞌ buluzrune̱ꞌ le̱ꞌ québedxa nu xuluchálajle̱ benneꞌ caꞌ lu La Jesús.
Gudé naꞌ bulusane̱ꞌ le̱ꞌ.
41 Naꞌ benneꞌ gubáz caꞌ belexedxúaje̱ꞌ naga zaj zraꞌ benneꞌ xuꞌu laweꞌ caꞌ,
dxelebéle̱ꞌe̱ne̱ꞌ laweꞌ da be̱ꞌ Dios lataj guledée̱ꞌ xel-laꞌ ziꞌ laweꞌ da zaj naqueꞌ Jesús tuze.
42 Quebe bulusane̱ꞌ dxuluchálaje̱ꞌ,
ne dxulusé̱dene̱ꞌ bénneache ca naca chee̱ Jesucristo xúgute̱ zra,
lu chila xudauꞌ,
ne lu xuꞌu caꞌ.