Dxuluzúe̱ꞌ gazre benneꞌ xelune̱ꞌ zrin chee̱ benneꞌ zaj de̱ꞌe̱ Cristo
6
Lu zra caꞌ,
gate zaj dxan benneꞌ caꞌ zaj de̱ꞌe̱ Jesús,
naꞌ benneꞌ caꞌ dxelenné̱ꞌ dizraꞌ griego gulawe̱ꞌ zria benneꞌ caꞌ dxelenné̱ꞌ dizraꞌ hebreo.
Dxelenné̱ꞌ quebe nu dxunezruj xanneꞌ da xeláw nuꞌula ba gulate benneꞌ chee̱ꞌ zaj zre̱ꞌe̱ ládujla le̱ꞌ gate dxelísie̱ꞌ xel-laꞌ wagu tu zra tu zra.
2 Nadxa benneꞌ gubáz caꞌ buluchague̱ꞌ ca naca benneꞌ caꞌ dxeléajle̱ꞌe̱ chee̱ Jesús,
naꞌ gulé̱ꞌe̱ le̱ꞌ:
―Quebe naca xrlátaje gusantuꞌ guchálajntuꞌ xrtizraꞌ Dios chee̱ gudentuꞌ xel-laꞌ wagu.
3 Chee̱ le̱ naꞌ,
biche ljwézrentuꞌ,
le quilaj gazre benneꞌ láwela leꞌe,
benneꞌ zaj naque̱ꞌ du lazreꞌ,
ne dxeléajniꞌine̱ꞌ,
ne zúale̱ Beꞌ Láꞌazxa le̱ꞌ,
naꞌ le gusebague̱ꞌ zrin nigá.
4 Netuꞌ tu guchálajle̱zquezentuꞌ Dios,
ne gusé̱dentuꞌ bénneache xrtizraꞌ Dios.
5 Xúgute̱ꞌ gulaza lazre̱ꞌ,
naꞌ gulequé̱ꞌe̱ Esteban,
tu benneꞌ dxéajle̱ꞌe̱ dute̱ lázrdawe̱ꞌ chee̱ Jesús,
ne zúale̱ Beꞌ Láꞌazxa le̱ꞌ.
Cáꞌanqueze gulequé̱ꞌe̱ Felipe,
ne Prócoro,
ne Nicanor,
ne Timón,
ne Parmenas,
ne Nicolás,
tu benneꞌ xe̱zre Antioquía,
benneꞌ nédxute̱ bexaque̱ꞌ tuze benneꞌ judío caꞌ.
6 Naꞌ guleché̱ꞌe̱ benneꞌ caní lau benneꞌ gubáz caꞌ,
naꞌ le̱ꞌ bululáwizre̱ꞌ Dios,
ne buluzé̱ ne̱ꞌe̱ laweꞌ benneꞌ gazre caní.
7 Xrtizraꞌ Dios zeaj dxezriluj na,
naꞌ benneꞌ caꞌ dxeléajle̱ chee̱ Jesús guxánle̱ꞌe̱ lu xe̱zre Jerusalén,
naꞌ bxruze zan chee̱ judío caꞌ guléajle̱ꞌe̱ chee̱ꞌ.
Dxele̱l-le̱ꞌ Esteban
8 Esteban,
tu benneꞌ nápale̱ꞌe̱ xel-laꞌ waca,
ne naque̱ꞌ chaweꞌ lau Dios,
be̱ne̱ꞌ xel-laꞌ waca caꞌ chee̱ xabáa,
ne da dxelunna bea na chee̱ da caꞌ lau bénneache caꞌ.
9 Nadxa bal-la benneꞌ chee̱ xuꞌu naga dxelezraga bénneache caꞌ,
nazí le na Xuꞌu Chee̱ Benneꞌ Québedxa Zaj Nadaꞌu,
benneꞌ xe̱zre Cirene caꞌ,
ne benneꞌ xe̱zre Alejandría caꞌ,
ne benneꞌ chee̱ ga nababa Cilicia,
ne Asia,
gulezú lawe̱ꞌ dxulutíl-lale̱ne̱ꞌ Esteban dizraꞌ.
10 Quebe gulezéquene̱ꞌ bi xelenné̱ꞌ chee̱ xrtizraꞌ Esteban laweꞌ da bchálaje̱ꞌ nen dute̱ xel-laꞌ sina chee̱ Beꞌ Láꞌazxa.
11 Nadxa gulízruje̱ꞌ bal-la benneꞌ caꞌ chee̱ xelenné̱ꞌ belenne̱ꞌ gunné̱ Esteban dizraꞌ schanniꞌ chee̱ Moisés,
ne chee̱ Dios.
12 Caní belune̱ꞌ,
ne guluꞌe̱ xel-le̱ꞌ bénneache caꞌ,
ne benneꞌ gula sina caꞌ,
ne benneꞌ dxuluxuzájle̱ꞌe̱ da nadxixruj bea na,
naꞌ gulebía diꞌe̱ Esteban.
Gule̱l-le̱ꞌ le̱ꞌ,
ne guleché̱ꞌe̱ le̱ꞌ lau benneꞌ xuꞌu laweꞌ blau.
13 Cáꞌanqueze gulílaje̱ꞌ benneꞌ we̱n lazreꞌ xelenné̱ꞌ chee̱ Esteban,
naꞌ gulenné̱ꞌ:
―Benneꞌ nigá quebe dxusane̱ꞌ dxenné̱ꞌ schanniꞌ chee̱ xudauꞌ láꞌazxa nigá,
ne chee̱ da bdxixruj bea Dios.
14 Ba bentuꞌ gunné̱ꞌ ca gun Jesús,
benneꞌ Nazaret,
dxenné̱ꞌ guzría xiꞌe̱ xudauꞌ nigá,
ne guché̱ꞌe̱ ca naca da zéajle̱dxu da bcaꞌana Moisés.
15 Nadxa benneꞌ xuꞌu laweꞌ caꞌ,
ne xúgute̱ benneꞌ zaj zre̱ꞌe̱ naꞌ,
gate gulenné̱ꞌe̱ Esteban,
beleléꞌene̱ꞌ lawe̱ꞌ,
naca na ca lau tu gubáz chee̱ xabáa.