Jesús dxuchálajle̱ne̱ꞌ Nicodemo
3
Zua tu benneꞌ xudauꞌ fariseo le̱ꞌ Nicodemo.
Naque̱ꞌ benneꞌ blau láwela benneꞌ judío caꞌ.
2 Benneꞌ nigá guxíaje̱ꞌ xeajnné̱ꞌe̱ Jesús chizrela,
naꞌ guzre̱ꞌ Le̱ꞌ:
―Benneꞌ Wese̱de,
nézentuꞌ Dios nasel-le̱ꞌ Lueꞌ chee̱ gusé̱denuꞌ netuꞌ laweꞌ da quebe nu benneꞌ gaca gune̱ꞌ ca zaj naca xel-laꞌ waca zrente̱ da dxunuꞌ Lueꞌ che quebe zúale̱ Dios le̱ꞌ.
Jesus habla con Nicodemo (Juan 3.1-21)
3 Nadxa Jesús guzre̱ꞌ le̱ꞌ:
―Da li dxapaꞌ lueꞌ,
nu benneꞌ quebe gálaje̱ꞌ xecha lasa quebe gaca gaque̱ꞌ tuze benneꞌ caꞌ dxenná beꞌe Dios.
4 Nicodemo bche̱be̱ꞌ Jesús:
―¿Ájazra gaca xexalaj tu benneꞌ ba naque̱ꞌ gula?
¿Waca xexuꞌe̱ le̱ꞌe xrne̱ꞌe̱ chee̱ gálaje̱ꞌ xetú?
5 Jesús beche̱be̱ꞌ:
―Da li dxapaꞌ lueꞌ,
nu benneꞌ quebe gálaje̱ꞌ ne̱ chee̱ nisa chee̱ xrtizraꞌ Dios,
ne ne̱ chee̱ Beꞌ Láꞌazxa,
quebe gaca chuꞌe̱ naga dxenná bea Dios.
6 Benneꞌ nálaje̱ꞌ lu niꞌa lu naꞌ bénneache,
naque̱ꞌ bénneacheze.
Nu benneꞌ nálaje̱ꞌ ne̱ chee̱ Beꞌ Láꞌazxa,
naca ban bénneaꞌ ne̱ chee̱ Beꞌ Láꞌazxa.
7 Quebe xebánenuꞌ laweꞌ da dxapaꞌ lueꞌ,
dxun na ba xen gálajuꞌ xecha lasa.
8 Gátete̱ze dxaca beꞌ.
Dxennuꞌ ca schaga da dxun na,
naꞌ quebe nézenuꞌ gala za na,
ne gala zeaj na.
Cáꞌanqueze naca chee̱ benneꞌ zaj nálaje̱ꞌ ne̱ chee̱ Beꞌ Láꞌazxa.
Gaca leꞌenuꞌ da ba nun Beꞌ naꞌ lu xichaj lázxdau bénneaꞌ,
naꞌ quebe dxeléꞌenuꞌ ájala dxun Beꞌ naꞌ.
9 Nadxa Nicodemo bche̱be̱ꞌ Jesús:
―¿Ájazra gaca da caní?
10 Beche̱be Jesús:
―Lueꞌ nacuꞌ tu benneꞌ wesé̱de blau ládujla benneꞌ Israel caꞌ,
naꞌ ¿quebe nézenuꞌ da caní?
11 Da li dxapaꞌ lueꞌ,
netuꞌ dxuchálajntuꞌ ca naca da nézentuꞌ,
ne dxexeché̱bentuꞌ ca da bléꞌentuꞌ,
naꞌ leꞌe quebe dxéajle̱le da dxe̱ntuꞌ leꞌe.
12 Che quebe dxéajle̱le chiaꞌ gate dxuchálajle̱naꞌ leꞌe ca naca chee̱ da dxaca lu xe̱zr la xu nigá,
¿ájazra gaca chéajle̱le chiaꞌ che guchálajle̱naꞌ leꞌe chee̱ da dxaca xabáa?
13 ’Quebe ne cuen tu benneꞌ xabáa chee̱ léꞌene̱ꞌ ca dxaca naꞌ.
Tuze Bénneaꞌ bétaje̱ꞌ xabáa,
Bénneaꞌ nacaꞌ nedaꞌ,
Benneꞌ Gulje̱ꞌ Bénneache,
nacaꞌ Bénneaꞌ zúaqueze̱ꞌ xabáa.
14 Ca be̱n Moisés,
bde̱ꞌe̱ tu be̱laꞌ xia le̱ꞌe̱ xaga naga zua le̱ꞌe̱ xixreꞌ laweꞌ lataj,
cáꞌanqueze nedaꞌ,
Benneꞌ Gulje̱ꞌ Bénneache,
wuludáꞌqueze̱ꞌ nedaꞌ tu le̱ꞌe̱ xaga,
15 chee̱ quebe xelebía xiꞌ nu benneꞌ xeléajle̱ꞌe̱ chiaꞌ.
Zruéꞌe bénneaꞌ xel-laꞌ nabán da zeajlí canna.
Dios dxezríꞌi lazre̱ꞌ bénneache
16 Dios dxezríꞌi lázrele̱ꞌe̱ne̱ꞌ bénneache,
naꞌ chee̱ le̱ naꞌ bdee̱ꞌ Zríꞌine̱ꞌ tu lichaꞌ chee̱ quebe xelebía xiꞌ nu benneꞌ dxeléajle̱ꞌe̱ chee̱ꞌ.
Zruéꞌe bénneaꞌ xel-laꞌ nabán da zeajlí canna.
17 Dios gusél-le̱ꞌ Zríꞌine̱ꞌ lu xe̱zr la xu nigá,
quegá chee̱ guzría xiꞌe̱ bénneache,
san chee̱ guselé̱ꞌ bénneache.
18 Bénneaꞌ dxéajle̱ꞌe̱ chee̱ Zriꞌine Dios quebe naca chee̱ꞌ cuía xiꞌe̱,
san nu benneꞌ quebe dxéajle̱ꞌe̱ chee̱ꞌ ba naca chee̱ꞌ cuía xiꞌe̱ laweꞌ da quebe dxéajle̱ꞌe̱ chee̱ Zriꞌine Dios,
bi tu lichaꞌ chee̱ꞌ.
19 Benneꞌ caꞌ quebe dxeléajle̱ꞌe̱ chee̱ꞌ ba zaj naca chee̱ꞌ cuía xiꞌe̱ laweꞌ da gate blaꞌ xel-laꞌ naxaníꞌ lu xe̱zr la xu nigá,
beledánedxene̱ꞌ da chul-la ca xel-laꞌ naxaníꞌ,
laweꞌ da dxelune̱ꞌ da cale̱la.
20 Xúgute̱ benneꞌ dxelune̱ꞌ da cale̱la dxelecuídene̱ꞌ xel-laꞌ naxaníꞌ,
ne quebe dxelebigue̱ꞌ lu xel-laꞌ naxaníꞌ,
chee̱ quebe gaca bea da cale̱la da dxelune̱ꞌ.
21 Benneꞌ caꞌ dxelune̱ꞌ ca naca da li dxelebigue̱ꞌ lu xel-laꞌ naxaníꞌ chee̱ gaca bea naca na chee̱ Dios da dxelune̱ꞌ.
Da gunná Juan, bénneaꞌ bchue̱ꞌ bénneache nisa
22 Gudé naꞌ guxíaj Jesús naga nababa Judea nen benneꞌ caꞌ dxusé̱dene̱ꞌ,
naꞌ guzúe̱ꞌ naꞌ zaneꞌ zra nen benneꞌ caꞌ,
dxuluchúe̱ꞌ bénneache nisa.
Juan testifica acerca de Jesús (Juan 3.22-36)
23 Cáꞌanqueze zua Juan lu xe̱zr la xu chee̱ xe̱zre Enón da zua gáguze naga dxeꞌ xe̱zre Salím,
dxuchúe̱ꞌ bénneache nisa lataj naꞌ laweꞌ da dé̱le̱ꞌe̱ naꞌ nisa zila,
naꞌ belezrín benneꞌ zan naga zua Juan,
naꞌ beledxúe̱ꞌ nisa.
24 Da nigá guca na nédxudxa gate quebe ne xelegúꞌe̱ Juan lizre xia.
25 Nadxa bal-la benneꞌ zaj de̱ꞌe̱ Juan gulezú lawe̱ꞌ dxulutil-le̱ꞌ judío caꞌ dizraꞌ ca naca chee̱ da dxucáꞌana chawe na bénneache lau Dios.
26 Nadxa xeajlegue̱zre̱ꞌ Juan:
―Benneꞌ wese̱de,
bénneaꞌ ble̱ꞌe̱ naga zuꞌ chaláꞌa xe̱gu Jordán naga dxalaj gubizra,
bénneaꞌ bchálajle̱nuꞌ netuꞌ chee̱ꞌ,
naꞌa dxuchúe̱ꞌ bénneache nisa,
naꞌ xúgute̱ bénneache zjácale̱ne̱ꞌ Le̱ꞌ.
27 Nadxa Juan guzre̱ꞌ benneꞌ caꞌ:
―Quegá nu benneꞌ gaca bi gape̱ꞌ che quebe gunezruj Dios na chee̱ꞌ.
28 Leꞌe bénquezle gunníaꞌ nedaꞌ quebe nácaquezaꞌ nedaꞌ Cristo,
Bénneaꞌ guche̱be lazreꞌ Dios sel-le̱ꞌ.
Nacaꞌ tu benneꞌ nasel-la Dios chee̱ quia lawaꞌ lau Le̱ꞌ.
29 Lu laní chee̱ wechaga naꞌ,
bénneaꞌ siꞌe̱ nuꞌula wechaga naꞌ naque̱ꞌ benneꞌ wechaga naꞌ,
naꞌ benneꞌ ljwezre benneꞌ wechaga naꞌ,
bénneaꞌ zue̱ꞌ naꞌ,
ne dxenne̱ꞌ chee̱ꞌ,
dxebéle̱ꞌe̱ne̱ꞌ gate dxenne̱ꞌ da dxuchalaj benneꞌ wechaga naꞌ.
Cáꞌanqueze nedaꞌ dxebéle̱ꞌe̱daꞌ laweꞌ da caní nacaꞌ ljwezre Cristo.
30 Le̱ꞌ dxal-laꞌ gácadxe̱ꞌ szren,
naꞌ nedaꞌ dxal-laꞌ gácadxaꞌ cáꞌaze.
Ca naca chee̱ Bénneaꞌ zaꞌ xabáa
31 Naꞌ gunná Juan:
―Bénneaꞌ zaꞌ xabáa nácadxe̱ꞌ blau ca xúgute̱ bénneache.
Benneꞌ naque̱ꞌ chee̱ xe̱zr la xu nigá naque̱ꞌ bénneacheze,
ne dxuchálaje̱ꞌ ca naca chee̱ da dxaca lu xe̱zr la xu nigáze.
Bénneaꞌ ze̱ꞌe̱ xabáa nácadxe̱ꞌ szren ca xúgute̱ bénneache.
32 Le̱ꞌ dxuchálaje̱ꞌ ca naca chee̱ da ba bléꞌene̱ꞌ,
ne da ba benne̱ꞌ xabaala,
naꞌ quebe dxéajle̱ꞌ nu benneꞌ chee̱ da dxenné̱ꞌ.
33 Che nu benneꞌ dxéajle̱ꞌe̱ chee̱ꞌ,
benneꞌ nigá dxuléꞌene̱ꞌ naca li ca da dxenná Dios.
34 Bénneaꞌ nasel-la Dios dxuchálaje̱ꞌ xrtizraꞌ Dios laweꞌ da dxunna Dios Le̱ꞌ Beꞌ Láꞌazxa chee̱ꞌ dute̱ ca naque̱ꞌ.
35 Xradxu Dios nazríꞌine̱ꞌ Zríꞌinequeze̱ꞌ,
ne ba bdee̱ꞌ lu ne̱ꞌe̱ xúgute̱ da de̱.
36 Nu benneꞌ dxéajle̱ꞌe̱ chee̱ Zriꞌine Dios nape̱ꞌ xel-laꞌ nabán da zeajlí canna,
naꞌ benneꞌ quebe dxuzúe̱ꞌ dizraꞌ chee̱ Zriꞌine Dios quebe gape̱ꞌ xel-laꞌ nabán caní.
Wadée̱ꞌ lu da ba xaꞌ da gun Dios.