Bꞌoxinac scꞌool jun vin̈ penaay yuj jun yabꞌil scuchan lepra
8
Axo yic ix emixta Jesús dꞌa jun tzalan chiꞌ,
tzijtum anima ix och tzacꞌan yuuj.
2 Ay jun vin̈ penaay yuj jun yabꞌil scuch lepra,
ix cꞌoch dꞌa Jesús.
Ix em cuman vin̈ dꞌa yichan̈.
Ix yalan vin̈ dꞌay:
—Mamin,
tato syal a cꞌool,
syal acꞌan bꞌoxoc in cꞌool,
xchi vin̈ dꞌay.
3 Yuj chiꞌ,
ix maslaj vin̈ yuj Jesús.
—In gana tzach in bꞌoxicani,
xchi dꞌa vin̈.
Dꞌa val jun rato chiꞌ ix bꞌoxican vin̈ yuj jun yabꞌil chiꞌ.
4 Ix lajvi chiꞌ,
ix yalan dꞌa vin̈:
—Abꞌi,
ay ta bꞌaj tzal jun tic.
Palta ixic,
chꞌox a bꞌa dꞌa vin̈ sacerdote.
Acꞌ jun silabꞌ ix yalcan Moisés yic tzꞌilji to ach bꞌoxi,
xchi Jesús dꞌa vin̈.
Ix bꞌoxi scꞌool jun schecabꞌ vin̈ yajal soldado
5 Axo yic ix cꞌoch Jesús dꞌa chon̈abꞌ Capernaum,
ix cꞌoch jun vin̈ yajal soldado dꞌay.
Ix tevi vin̈ dꞌay,
6 ix yalan vin̈:
—Mamin,
ay jun vin̈ in checabꞌ manbꞌilel vuuj aycan dꞌa in pat,
jichanecꞌ vin̈ dꞌa sat schꞌat.
Te sicbꞌinaquel vin̈,
te ya yaj vin̈,
xchi vin̈ dꞌay.
7 Yuj chiꞌ,
ix yalan Jesús dꞌa vin̈:
—Tato icha chiꞌ,
ol in bꞌat vacꞌ bꞌoxoc vin̈,
xchi dꞌa vin̈.
8 Ix yalanxi vin̈ dꞌay:
—Palta Mamin,
man̈ smojoc a cꞌoch dꞌa in pat.
Ton̈ejocabꞌ tzalaꞌ,
sbꞌoxican jun vin̈ in checabꞌ chiꞌ.
9 Yujto a in tic,
ay in och dꞌa vopisio,
ay junxo tzin acꞌan mandar.
An̈ejtonaꞌ ay ebꞌ soldado svacꞌ mandar.
Tato ay ebꞌ bꞌaj svalaꞌ to sbꞌat ebꞌ,
sbꞌatn̈ej ebꞌ.
Tato ay pax ebꞌ bꞌaj svalaꞌ to scot ebꞌ,
scotn̈ej ebꞌ.
An̈ejtonaꞌ,
tato ay junoc tas tzin chec sbꞌo junoc in checabꞌ,
sbꞌon̈ej.
Yuj chiꞌ,
vojtac,
icha svutej vacꞌan mandar ebꞌ chiꞌ,
icha chiꞌ tzutej acꞌan mandar masanil tas a ach tic,
xchi vin̈.
10 Axo ix yabꞌan juntzan̈ chiꞌ Jesús,
ix sat scꞌool yabꞌani.
Yuj chiꞌ ix yalan dꞌa ebꞌ ajun yedꞌoc:
—Val yel sval dꞌayex,
manta junoc ebꞌ quetisraelal svil yacꞌanoch scꞌool dꞌa Dios icha jun vin̈ tic.
11 Svalanpax dꞌayex,
tzijtum ebꞌ ol cot bꞌaj sja cꞌu yedꞌ bꞌaj tzꞌem cꞌu.
Ol em cꞌojjabꞌ ebꞌ sva yedꞌ vin̈aj Abraham,*
vin̈aj Isaac yedꞌ vin̈aj Jacob dꞌa mexa bꞌaj ayoch Dios aj satchaan̈ Yajalil.
12 Axo ebꞌ quetisraelal,
smoj ton val scꞌoch ebꞌ taꞌ,
palta ay ebꞌ ol yumjoccanbꞌat dꞌa qꞌuicꞌalqꞌuinal.*
Ataꞌ ol ocꞌ ebꞌ.
Ol laj siqꞌuicꞌoc ebꞌ yoqꞌui yuj yabꞌan syail,
xchi dꞌa ebꞌ.
13 Ix lajvi chiꞌ,
ix yalanxi dꞌa vin̈ yajal soldado chiꞌ:
—Paxan̈ dꞌa a pat.
Icha val tzutej acꞌanoch Dios dꞌa a cꞌool,
icha pax chiꞌ ol aj sbꞌo dꞌayach,
xchi dꞌa vin̈.
Axo jun vin̈ schecabꞌ vin̈ chiꞌ,
a val dꞌa jun rato chiꞌ ix bꞌoxican vin̈.
Tzijtum ebꞌ anima ix bꞌoxi scꞌool yuj Jesús
14 Ix lajvi chiꞌ,
ix bꞌat Jesús dꞌa spat vin̈aj Pedro.
Axo ix cꞌochi,
ix yilani,
jichanecꞌ ix sn̈iꞌ vin̈aj Pedro chiꞌ yuj jun cꞌacꞌal yabꞌil.
15 Yuj chiꞌ ix yamji scꞌabꞌ ix yuj Jesús.
Dꞌa jun rato chiꞌ,
ix sicbꞌi jun cꞌacꞌal yabꞌil chiꞌ dꞌa ix.
Yuj chiꞌ ix qꞌue vaan ix.
Ix och ijan ix scꞌatcꞌancot ebꞌ.
16 Axo dꞌa yic numumixo sqꞌuicꞌbꞌi,
tzijtum ebꞌ ayoch enemigo dꞌay ix icꞌjibꞌat dꞌa Jesús.
Junn̈ej bꞌelan̈ lolonel ix yalaꞌ,
ix el ebꞌ enemigo chiꞌ.
An̈ejtonaꞌ ix yacꞌcan bꞌoxoc masanil ebꞌ penaay.
17 Icha chiꞌ ix aj yelcꞌoch tas yalnaccan vin̈aj Isaías schecabꞌ Dios dꞌa pecaꞌ,
xchi icha tic:
A ix icꞌanel juntzan̈ co yaelal.
Van yabꞌan syail co qꞌuexuloc,
xchican Slolonel Dios Tzꞌibꞌabꞌilcani.
A ebꞌ sgana yoch tzacꞌan yuj Jesús
18 Axo dꞌa junel,
ix yilan Jesús,
tzijtum anima ix smolbꞌejcꞌoch sbꞌa dꞌay.
Yuj chiꞌ,
ix yalan dꞌa ebꞌ scꞌaybꞌum:
—Coyec dꞌa scꞌaxepal jun aꞌ nivan n̈ajabꞌ tic,
xchi dꞌa ebꞌ.
19 Palta ayic manto bꞌat ebꞌ,
ay jun vin̈ cꞌaybꞌum dꞌa ley Moisés ix cꞌoch dꞌay.
Ix yalan vin̈ dꞌay:
—Ach in Cꞌaybꞌumal,
yaln̈ej bꞌaj ol ach bꞌatoc,
ol in och tzacꞌan uuj,
xchi vin̈ dꞌay.
20 Axo ix yalan Jesús dꞌa vin̈:
—A nocꞌ vaax,
ay sn̈aqꞌueen nocꞌ.
A nocꞌ much,
ay pax soꞌ nocꞌ bꞌaj svayi.
A inxo Acꞌbꞌil in cot yuj Dios voch animail,
malaj in pat bꞌaj tzin vayi,
xchi dꞌa vin̈.
21 Ay junxo vin̈ scꞌaybꞌum ix alani:
—Mamin,
ol in bꞌat edꞌoc,
palta in gana tzacꞌ in permiso.
Ato ol cham vin̈ in mam ol in bꞌat edꞌoc,
xchi vin̈ dꞌay.
22 Palta ix yalanpax dꞌa vin̈:
—Con̈ vedꞌoc.
A ebꞌ chamnacto el dꞌa yichan̈ Dios,
a ebꞌ chiꞌ syal smucan ebꞌ yetchamnaquil chiꞌ,
xchi Jesús dꞌa vin̈.
Numcꞌajnac icꞌ yedꞌ aꞌ n̈ajabꞌ yuj Jesús
23 Ix lajvi chiꞌ,
ix och Jesús dꞌa yol barco.
Ix och pax ebꞌ scꞌaybꞌum yedꞌoc.
Ix bꞌat ebꞌ.
24 Palta ayic van sbꞌey ebꞌ,
ix ja jun icꞌ te ov.
Ix och chulnaj aꞌ dꞌa yol teꞌ barco chiꞌ.
Axo Jesús vaynacbꞌat dꞌa yol teꞌ.
25 Yuj chiꞌ ix pitzjiel svayan̈ yuj ebꞌ.
—Mamin,
col on̈.
Van co bꞌat dꞌa yich aꞌ,
xchi ebꞌ dꞌay.
26 —¿Tas yuj tzex te xivi?
Te teveln̈ej tzeyacꞌoch Dios dꞌa e cꞌool,
xchi dꞌa ebꞌ.
Ix lajvi chiꞌ,
ix qꞌue vaan.
Ix scachanoch vaan jun icꞌ chiꞌ yedꞌ aꞌ n̈ajabꞌ chiꞌ.
Yuj chiꞌ ix numcꞌaj smasanil.
27 Ix te sat scꞌool ebꞌ sicꞌlabꞌil.
Ix laj yalan ebꞌ junjun:
—¿Tas val yaj jun vin̈ tic?
Inai ix cꞌanabꞌajax vin̈ yuj icꞌ yedꞌ aꞌ n̈ajabꞌ tic,
xchi ebꞌ.
A chavan̈ ebꞌ tzꞌixtax yuj ebꞌ enemigo dꞌa lugar Gadara
28 Ix lajvi chiꞌ,
ix cꞌoch ebꞌ dꞌa junxo scꞌaxepal bꞌat aꞌ,
dꞌa chon̈abꞌ Gadara.
Ataꞌ ix cot chavan̈ ebꞌ vin̈ bꞌaj smucji ebꞌ chamnac.
Ix cꞌoch ebꞌ vin̈ dꞌa Jesús.
A chavan̈ ebꞌ vin̈ chiꞌ,
ayoch ebꞌ enemigo dꞌa ebꞌ vin̈.
Yelxo te ov ebꞌ vin̈.
Yuj chiꞌ,
malaj junoc mach sbꞌeyecꞌ dꞌa jun bꞌe tzꞌecꞌ bꞌaj ayecꞌ ebꞌ vin̈ chiꞌ.
29 Ix qꞌue yav ebꞌ vin̈ dꞌa Jesús:
—Ach Yuninal Dios,
¿tas och dꞌayon̈?
¿Tom tzach ja acꞌoch yaelal dꞌa quibꞌan̈ yacbꞌan manto cꞌoch stiempoal?
xchi ebꞌ dꞌay.
30 Axo dꞌa slacꞌanil jun lugar chiꞌ,
tzijtum juntzan̈ nocꞌ chitam van svaꞌi.
31 Yuj chiꞌ ix tevi ebꞌ enemigo chiꞌ dꞌa Jesús,
ix yalan ebꞌ:
—Tato tzon̈ a pecheli,
a dꞌa juntzan̈ nocꞌ chitam chiꞌ tzon̈ acꞌbꞌati,
xchi ebꞌ dꞌay:
32 —Ixiquec,
xchi Jesús chiꞌ dꞌa ebꞌ.
Yuj chiꞌ,
ix el ebꞌ enemigo chiꞌ dꞌa ebꞌ vin̈ chavan̈ chiꞌ.
Axo dꞌa nocꞌ chitam chiꞌ ix ochxican ebꞌ.
Axo dꞌa jun rato chiꞌ,
ix bꞌat n̈ilnaj nocꞌ elelal.
Ix bꞌat nocꞌ dꞌa sattac vitz,
masanto ix cꞌoch nocꞌ dꞌa yol aꞌ nivan n̈ajabꞌ.
Ataꞌ ix sjicꞌ aꞌ nocꞌ,
ix cham nocꞌ smasanil.
33 Axo ebꞌ stan̈vumal nocꞌ,
ix xivbꞌat ebꞌ,
ix bꞌat ebꞌ elelal.
Elan̈chamel ix cꞌoch ebꞌ dꞌa yol chon̈abꞌ.
Ataꞌ ix yalel ebꞌ smasanil.
Ix yalanpax ebꞌ tas ix utaj ebꞌ ayoch enemigo chiꞌ dꞌay.
34 Yuj chiꞌ ix bꞌat ebꞌ ay dꞌa chon̈abꞌ chiꞌ smasanil yil Jesús.
Axo yic ix yilan ebꞌ,
ix laj tevi ebꞌ dꞌay,
yic elan̈chamel tzꞌelxi dꞌa yol slugar ebꞌ chiꞌ.