Malaquías sbꞌi jun libro tic, yujto a slolonel Dios yalnac dꞌa vin̈aj Malaquías tzꞌibꞌabꞌilcan dꞌay. A jun libro tic, tecan tzꞌibꞌabꞌilcan dꞌa stiempoal vin̈aj Esdras yedꞌ vin̈aj Nehemías, yujto bꞌobꞌilxopax stemplo Dios ayic stzꞌibꞌchajnaccani. A ebꞌ anima yedꞌ ebꞌ sacerdote, schꞌoxel spitalil ebꞌ dꞌa tastac to yicn̈ej Dios yaji. Maxtzac yacꞌ ofrenda ebꞌ to yovalil syacꞌ ebꞌ. Spatiquej val el juntzan̈ checnabꞌil ebꞌ aycan dꞌa yol scꞌabꞌ.

Yuj chiꞌ a vin̈aj Malaquías schecabꞌ Dios chiꞌ, yalnac vin̈ dꞌa ebꞌ anima chiꞌ to ol chꞌolbꞌitaj ebꞌ yuj Dios, yic vachꞌ tzꞌajxican ebꞌ. Palta ayic manto uji jun chiꞌ, ol scheccot jun schecabꞌ yic tzul yacꞌan snacot strato Dios chiꞌ ebꞌ anima chiꞌ. Vachꞌchom ay yaelal ol javoc dꞌa yibꞌan̈ ebꞌ spitej sbꞌa chiꞌ, palta axo ebꞌ scꞌanabꞌajan Dios chiꞌ, ay val tzalajcꞌolal yedꞌ svachꞌcꞌolal Dios chiꞌ ol scha ebꞌ.